呢封信係我第一次寫畀諸位嘅信,亦係自屢次閱畢JY所寫嘅嘢之後終於鼓起勇氣、下定決心所寫嘅信。當中,若有不足或冒犯之處,望能包涵。

首先,我想講下自身入獄至今以來呢半年有突嘅感想。我記得畀人收押嘅頭一個星期係十分之難受嘅。難受在於兮新環境入面,一邊要調整自己、適應兮呢度嘅新生活,一種同以全然不同兼受限制、安排嘅生活;同時。到咗夜闌人靜嘅時候,又會無止境諗起、掛住出面嘅親友、另一半、家中寵物等。去到之後,我為自己定下咗多多少少唔同嘅短、中、長期目標,加上大量閱讀同學習,先至令我可以迅速咁慣咗呢度嘅生活。以致我到呢一刻,不致於太過懷念於外面嘅嘢。相信現今同處囹圄嘅諸位唔多唔少都有類似感受。而有可能不幸入獄嘅,我期望你哋亦可以多作準備,心理準備固然重要,但物資例如入書、探訪、呢度嘅資訊等等方面嘅準備我諗係會更加重要。

另外,我想講下自己對於入書種類嘅睇法。當然,入自己鍾意睇嘅書係理所當然㗎喇。但除此之外,我會極力推薦大家可以入啲哲學宗教類嘅書來睇。點解?因為就算你真正不幸咁入來前嗰一刻之前諗到自己幾有心理準備都好,實際上當你真正入咗來之後,你都係會控制唔到自己,猛咁胡思亂想。會諗自己點解會有咁嘅遭遇、會諗自己所做對錯、會諗人生觀存亡啊宇宙構成之類、會諗將來過去呢個時候你就會發現呢啲書嘅好啦。佢哋所講嘅或者你未必同意或全盤接受,但起碼你嘅心唔再孤單,會有人同你嘅心傾談、舒解。亦可以令諸位更加能夠思考、堅持自己、不致淪為犬儒,喪失意志。

以上我所寫嘅並非話要潑冷水或睇死正在審訊嘅諸位必定投獄,而係想大家可以真係做足萬全準備,以免真係不幸到咗嗰一刻不知所措。

至於之前JY所寫關於「輸少當贏」嘅論述主張,我都係好認同嘅。千祈唔好心存僥倖咁去迎接審訊啊。考量清楚到目前呢一刻進行各種決定嘅利弊。除非有十足把握自己係被捏造以致有勝算大之外,真係奉勸各位要計清條數,三分之一認罪減刑、三分之一假期減刑,刑期愈有機會長就愈值得去諗呢樣。當然,我所講嘅係齊「暴動」嘅情況而言,其他更嚴重嘅指控會唔會都係易入罪我就不得而知,亦唔去妄論喇。嫌我噚都係要噏多次:若有冒犯,請多多見諒。

祝  身心安康

古羅羅斯上

二零一八年三月三日