剛週日十場賽事談不上精彩刺激,成季流流長唔會日日好賭又精彩,但贏錢做功課無分賽日,最緊要做好功課!

全日泥地都屬無得追之格,第一場「吉利馬王」月中試好泥閘諗住一網成擒點知輸俾條賽道純屬欠運,如果改善前速,我覺得呢隻馬跑泥地千二可贏番上四班。「電訊太神」早段根本是沒有參與競賽,最後竟然有獎金證明呢隻馬識跑泥地,再玩泥沙如果換大師傅可小注。第七場「小龍兒」評分創新高後不斷減分等季尾開工,今場顯示後上有力,季尾跑番中距離不論泥草值得投注。

草地場合,第三場「大運舞台」一早有態,今場直路一早有位打落無反應,死都要落班再用牌仔食糊?「珍珠鳳凰」祈普敦直路取位非常猶疑,希望練馬師認真谷谷隻馬幫馬主贏番場。

第十場「精算風暴」其實上次場頭馬唔係好勁,放頭大勝水準不是很高,落敗合理。「喜勝駒」賽前已有殺聲但差場熱身。「神龍駒」馬有能力,直路咁樣走上黎顯示頗有鬥心但應該會留番下季先用。「琴心星」中距離馬,沙圈明顯未得但咁快有追勢,下場跑千六以上已可小注。

(飛神 27/3/2018)