作者:無主孤魂

上週四(三月二十二日),立法會大會續會,早上九點零二分就通過撥款,即前後用咗兩分鐘,係兩分鐘就通過咗!點解咁快?皆因泛民主派集體失縱!呢啲前因後果,已有好多討論,就唔太重覆啦。我想提出既係,大眾既反應。

我見到既係好多非泛民陣營既非建制派人士,狂屌班契弟!對呢班所謂「反對派」既毫無戰意,軟弱無力大聲窒呼。佢哋壟斷咗「非建制」陣營議席,無功而還不特止,連反抗既意志都無!喺呢個天生強弱懸殊既議會制度,輸唔係罪,屍位素餐就係!

再望望「戰犯」支持者既反應,真係會覺得香港係有平衡世界。先去岩岩重返議會既范國威面書睇睇,無人聲討佢唔開會hea做議員!相反,范國威喺投票甩碌過幾日後,仲喺面書專頁貼咗一張自己好風騷咁畫畫既相,得到逾二千個讚好,近二百個留言。對於網上過街老鼠泛民主派黎講,算係一個好好成績架啦!(內容連結:https://www.facebook.com/124853124283126/photos/a.482607795174322.1073742333.124853124283126/1335004883267938/?type=3&theater)   

再黎,今次睇睇綽號「癲雞」既陳淑莊議員。三月二十六日面書貼出經剪輯過既短片,自誇「KO」劉江華。然後班黃絲粉就紛紛斷留言吹捧癲雞。最好笑係,癲雞用 hashtag 「可以Hea的話不會郁」,諷刺劉江華懶惰。好似佢本人唔知自己,以致成個泛民主派,喺幾日前先集體失縱,兩分鐘比人拎咗千幾億!當然,佢哋黃絲粉亦都無再就呢點質問佢。(內容連結:https://www.facebook.com/tanyachancp/videos/10155946333300733)   

相信各個泛民主派「演員」既面書專頁情況,都大同小異,我亦都無逐一細數。政府三扒兩撥就過咗1131億元並唔係大問題,問題係選民沒有「問責」的心!「民主」其中一個最重要既元素,係你選咗一個無能既領導人,中完伏之後,下次可以唔選佢!但香港既情況好特別,只要泛民議員高舉「民主大義」,再得閒做吓「大龍鳯」,喺一個安全位置鬧吓啲官,同埋多啲扮鬼扮馬扮低能,氹吓班粉絲歡笑,就得!各位泛民議員,放心啦!你做得幾閪都好,班黃絲盲粉唔會責你棍!

(3月28日)