早前收到大量來自各界、男女老少寫嘅聖誕和新年賀卡,真係十分開心亦窩心。數量之多,實在驚人,搞到我有點受寵若驚。btw寫清明食飯嗰位朋友,我都好期待他日與你一聚,齊齊吞雲吐霧。

眼見現時不同派別人士願意同心合力,為各位政治犯送上祝福及支持,實在令人鼓舞。喺現時嚴峻嘅政治環境下,繼續將力量分散喺攻擊其他派別人士上,實屬不智之舉。不過可惜嘅係,部分思想守舊的老派依然對此不遺餘力,奮力於各議題上冇人就問人去咗邊,出現又問人係咪騎劫(咩事就唔講,大家係外面應該更清楚)。

其實難得不同派別肯放下成見,嘗試合作,未嘗唔係好事。政治同抗爭從來唔係一兩個人嘅事,有需要就要合作,待他日前途光明之時再一較高下又有何不可?目前犧牲嘅難道仲未夠?13+3、魚革、佔旺藐視法庭等等加加埋埋成百人,個個抗爭者原本前途大好,大可不理既黑暗又麻煩嘅各項政治議題,做個普通人算,但因為我哋仍然對香港抱有希望,所以先會企出嚟。

對我嚟講,抗爭應該只係人生中一小部分,而唔係我哋賴以為生的職業、工作。如果一個地方,有人以抗爭作為終身目標,當然唔係唔得,但嗰個地方,想必一定有如地獄一樣。與其諗永續抗爭,不如諗下點盡快完結這個地獄,打開通往天堂之門。

新的一年,新的開始,期望不同派別可以有更大合作空間,同時又可以堅守自己信念、理想。2017太多壞事發生,鮮有好事,確實是難捱的一年。期望新一年香港人能有美好一年。我亦會盡快回歸,繼續引領香港進入民主自由嘅世界。

Ps: 出面真係好恐怖,我都係把握時間休息下先!

山羊