上期本欄倖不辱命,”癫狗馬膽”[帶榮來]先拔頭籌,及後炒飯哥打爭氣波,尾場憑[協勝神駒]大演帽子戲法,開埋個”癲狗騎師王”出嚟,唔少讀者買到9倍騎師王仲send咗投注紀錄俾我哋,令《癲狗馬經》上上下下士氣大振,教主毓民同尤達師兄兩位高層都點名讚賞,我哋資料組各人開心之餘,當然唔會自我感覺良好,接得呢個波當然會繼續努力,刨啲好嘢俾大家,各位讀者跟買贏到錢嘅,資料組仝人希望大家月費支持訂閱《癲狗日報》外,同時亦要支持”MyRadio節目月費支持計劃”,當中梗係支持我哋主編尤達師兄同LakLak主持嘅[馬場USB]喇!

言歸正傳,今次癫狗馬膽要第三場潘頓座騎[開懷大少],此駒前仗巳打開勝利之門,上仗增程跑二千僅負[天胆]一又四份一馬位末段走勢不弱,潘頓親自快試落腳輕盈,最後試跑步伐整齊力度貫注,狀態保持勇銳,匆匆再出求補中之心昭然若揭,文家良近期成績復甦,距”畢業”只差一場,鬥志無疑,今戰更有一檔之助,重返勝途必然搏殺,可期再捷。

至於騎師王,今次要出冷相信並不容易,雷神又低水但手馬唔算好惡,當然要搵個可以搞掂佢喇,潘頓除[開懷大少]外,全熱門馬[精益求精],[金如意]同[馬克羅斯]都係爭勝份子,如果佢殺得性起雷神都唔易招架,一於揀潘頓,希望佢做番齣好戲。

癲狗馬膽: 第三場         (7)   開懷大少

癲狗騎師王:                  (2)   潘頓

(資料組   8/4/2018)