昨日沙田十場日馬,閘前所見部份馬匹已有厭戰情況,投注前要睇清楚馬匹神態同考慮馬匹體力夠唔夠。另外今日好幾位騎師都一心輸馬,或收到”指示”幫馬匹減分,所以季尾投注方法,個人覺得簡單較好。焦點馬「巴基之星」沿途令大眾驚訝,但馬兒明顯唔喜歡莫雷拉,衷心希望告東尼可以換人,唔好害咗隻馬。

 
第一場「好運多贏」沙圈亮相有啲急,但不急燥,成熟只六七分但跑來輕鬆掃晒,我覺得八十分前無阻力。反而「團隊精神」個樣好成熟,但呢個無威脅既第二令我覺得不宜高估。其他馬「陽光假日」臨尾一百先望空而餘勢唔錯,增程要留意。「大收成」出閘慢車無跑過,但其實狀態仍然唔錯,可能唞一輪又會部署泥地開飯。「軍力勁」長相好吸引但一撞就縮顯示鬥心麻麻,不宜憧憬太多。

 
第二場「連利進寶」贏馬真係大話夾好彩,毋需跟進。「萬霸駒」推騎都跟唔到,短期內唔投注好啲。

 
第四場「精益求精」潘頓明要輸馬,直路頭有位唔試下拉出去,試都唔試,取位同第三場「開懷大少」一模一樣,結果都一模一樣,就係倒灶。此馬步大,明顯出面衝好過入面偷位上。「有理共想」個騎師醒少少狼少少已經贏咗。

 
第六場「鵲橋飛渡」上次叫大家要留意,呢場賽事我有投注,今場馬梁家俊取位唔夠決心,隻馬搞到全程無順衝過,下次我好驚佢成熱變成雞肋。「金如意」隻馬有質再上,但砌左幾場直路頭似乎力度不足,應要唞暑去了。「鋒芒畢露」頭段放得太快臨尾一百才腳軟,下場縮程再擺黃俊有機劏晒!

 
第十場辛苦沈拿同羅理雅,兩隻馬搵位都係求輸唔求贏,一隻在內檔玩碰碰車,另一隻就聞馬屎忽到終點,何良似乎決心要幫「怪獸家長」穩勝一場。「萬馬歡騰」搵個冷門騎師減分,一落班只要形勢遷就咩草都要買。

 
是次跟進馬︰   「好運多贏」、 「萬馬歡騰」、「鵲橋飛渡」、「鋒芒畢露」

(飛神    9/4/2018)