剛谷草夜賽可用四個字形容︰「悶住咁贏」! 首先睇啱跑道形勢,再估啱步速,應該有錢贏。季尾賽事見到好多馬無火無力,好多馬落到場想追都有心無力!話悶話悶,悶極都有唔悶嘅場次,全日最唔悶一場馬係第四場,見到貝湯美騎「紅旗星將」出閘最快唔推唔騎,收落隻保齡馬「大地威龍」後面,繼而留到隻馬爭啲脫口,直路隻馬明有奮力上直跑第二,觀其策騎智慧、意識、能力仲差過見習騎師,憑咩跑一級賽?呢位鼎鼎大名的騎師淪落至此,係個人能力問題定存心跑假馬?同場「曾幾何時」神色轉好,直路肯追馬,未用過嘅馬今季有機會執雞執番場頭馬。另一位”發揮出色”的騎師就是潘明輝,兩隻熱門第二場「飛馬再威」、第七場「威信」有得走唔走,拉拉拉拉拉拉到前駒塞車,後駒三檔三疊,莫非火車仔收左好多安家費?

 

第一場「喜菜」出閘難得咁快,田泰安唔推多兩步守好位反而望望望究竟望乜春?浪費了好狀態!「天皇巨星」幾時肯再放頭跑?場場練打追但隻馬明明係前領馬。

 

第五場「隨我來」跑得好求其下跑近,馬有能力要贏一場唔難,反正下季可能被轉倉。「順意寶」全程順檔外遊試馬,追勢不錯,如果下場見收身檔好已要小敲。

 

第六場「贏科超影」確認三班不足,今場稍稍走光下應該會輸多幾場先起筷。「小龍兒」出閘明明最快但越跑越退,雖然直路稍追但馬似內在有事。「銀豐神駒」講咗好多次馬房唔冷唔去,隻馬老咗能力又唔高,買落去嘅朋友覺得麥菲文練得好過吳定強?

 

第八場「大風暴」慢步速守好位竟然一步都無,暫時唔使買住。「力奇先鋒」初跑谷草憑咩廿幾蚊大熱?「勇敢傳說」有啲俾容天鵬浪費咗嘅感覺,但後勁還在,未知告仔會唔會轉田草試下?

 

(飛神 13/4/2018)