馬會為了令馬主引入一些高質素的馬匹,設立了「優異成績特別獎金計劃」,引用馬會網頁的說法: “任何評分不低於八十分的賽駒於年屆五歲前首度在第二班賽事中勝出,即可獲得七十五萬(上圖)。若繼而勝出第一班或以上級別賽事,則可再獲得二十五萬元遞增獎金(下圖),即合共一百萬。”

(星洲司令勝出經典盃後獲得廿五萬遞增獎金, 收齊一百萬)

 

重賞之下必有勇夫,這個計劃的確令香港馬主更容易一擲千金,以香港現役馬平均售價大約五百萬左右,呢張支票已經差唔多是馬價的五分之一,計算埋一般獎金,馬主賭自己隻馬贏的彩金,就好容易贏回馬價。近年拎到呢張大支票的馬,大多在之後扶搖直上,這些馬我會叫做「支票馬」。

 

因此季尾的高班賽,大家可以留意呢類「支票馬」,擺舊錢在你面前,你會不心動嗎?更不用說甚麼陰謀論等等,熱門會拉馬等等。騎師試下拉呢類馬,個馬主頭都打爆你啊!

 

除了呢張大支票外,近年馬會對馬主換馬,亦有大幅度的放寛,馬會叫做「特別補替馬匹進口許可證」。只要你有錢,基本上你退一隻馬,就可以「任換」咁滯。因為你支新簽,第一次如果要換,就可以換一隻香港評分80分的自購馬(PP),之後再換,就可以換一隻85分的PP。只要你有無限金錢,一隻85分唔得,就可以換另一隻85分,第二隻唔得,就可以換第三隻85分,如此類推,換到你鍾意為止。

 

不過近年要達到香港85分水平,最低消費都要在「高水準」的級際賽上名,所謂「高水準」,即係要同場要和一些之前或之後贏級際賽的惡馬跑,先可以俾到85分你。呢類馬近年大部分都成八位數字一隻。所以各位馬主見到呢張「大支票」,那會有放軟手腳的理由?

 

(鹵味男   19/4/2018)