”Compromise where you can. But you can’t ,don’t. ” 即使身邊嘅幕僚同你咁講,即使全世界都叫你行開唔好干擾佢哋所謂「內政」。但呢個人仍然會斬釘截鐵咁話:”No! You move!I have to go my way!”

呢個人叫Donald Trump……一個與別不同嘅美國總統!

國際秩序目前處於「後冷戰時期」。而國際秩序係有一個週期性(約40-50年)。目前嘅「後冷戰時期」正處於週期性嘅後半期 。其實近幾年好多國家對現有國際秩序嘅不滿已經去到積羞成怒嘅地步,不可避免地再次出現爭奪霸權嘅大規模衝突,一有差池現有嘅國際秩序分分鐘返到一個比一戰同二戰更加無序同混亂嘅局面。
喺2017年國際政治入面,其中一個焦點係Donald Trump。而喺今年頭4個月,佢喺國際政治入面依舊係其中一個不可或缺嘅角色。而美國近期對外政策明確話畀大家知,今年國際衝突焦點仍然都係以中東為主,但係中華人民共和國都走唔甩。
總括而言,目前美國喺今年有兩樣嘢會集中處理:一、對敍利亞 ; 二、對中華人民共和國貿易政策。

 

一處敍利亞化武工廠轟炸前後衛星圖 (英國地鐵報)

重返中東

「大事大非,必須旗幟鮮明!」侵侵嘅特點係實際行動,唔打嘴炮。
今個月14號凌晨4點(GMT+2),美、英、法空軍開始空襲敘利亞嘅化學武器生產據點。由事反發佈衛星圖片可見,呢次遠距離精確轟炸係完全將目標據點焚巢搗穴。
不過今次美英法三國聯合軍事行動,事前顯然已跟俄羅斯有「默契」。俄羅斯事先已經將駐敍海軍基地艦隊全部撤走。而根據俄羅斯國防部確認,美英法三國嘅導彈係冇進入到俄羅斯駐敍防空領域。

一個國家要保持強盛,唔可以懶不自惜。呢點正正解釋到點解美國喺二戰之後都一直喺外國有駐軍同埋經常發動一啲針對「獨裁主義」嘅軍事行動。但美國喺奧巴馬8年執政時期,喺中東逐步撤軍,轉移到一個無得發揮實戰嘅亞太。一打「左膠」大愛牌,結果2008-2016年嘅美國表現係點,相信大家有目共睹。

其實自Donald Trump上臺之後,美國一直好想重返中東。但一直苦等一個契機,對敍利亞動武,係借助咗英俄關係惡化同埋敍利亞杜馬化武攻擊事件。同時Donald Trump亦都要轉移國內壓力,畢竟美國有班麻煩「左膠」媒體,加上目前FBI查「通俄門」查到Donald Trump冇埞抖。仲唔迮迮侖去馬咩?

講返奧巴馬帶領美國嗰8年,佢除咗識喺公開場合打下嘴炮同公關形象之外,佢嗰8年任期實際上做咗啲咩?
佢在任嗰8年正正係近半世紀美國對外最軟弱嘅一段時間。有人會駁我話,奧巴馬都「重返亞太」同擊殺拉登。係。但「重返亞太」之後又有咩實際作用?而且唔好唔記得,負責擊殺拉登行動嘅海豹陸戰隊喺事成之後一排,遭遇咗一次前所未有嘅人員傷亡事件,令美軍士氣喺往後一段長時間大受打擊。

另外,位處中東嘅伊朗都係美國一直想解決嘅問題。對比朝鮮,伊朗多一樣嘢令美國好忌憚,就係什葉派呢個比遜尼派更極端嘅伊斯蘭思想。伊朗嘅核技術加極端宗教,令美國不得不注視。
呢度就衍生出一個諗法,之前Donald Trump高調宣佈承認耶路撒冷係以色列首都,佢嘅目的唔應該只係單純承認同埋打擊伊斯蘭世界咁簡單。
因為筆者喺一個集現實主義同悲觀主義於一身嘅人。所以我認為呢個世界無一個國家嘅政府係正義,所有目的都係基於自身利益出發。
美國知道以伊關係一直處於劍拔弩張嘅狀態,係咪想利用耶路撒冷地位嚟換取以色列更多嘅幫助呢?我哋拭目以待!

美國總統Donald Trump有關中華人民共和國言論 (Twitter 圖片)

對中國嘅貿易保護政策

我一直唔多評論近期議論紛紛嘅「中美貿易戰」。原因好簡單,對我嚟講中美係唔存在貿易戰。正如上圖Donald Trump所講「我哋冇同中國打貿易戰。喺好多年前,當時代表美國嘅蠢材或者無能嘅人已經輸咗呢場戰爭。而家我哋每年嘅貿易逆差達到5000億美金 ,仲有3000億美金嘅盜取知識產權損失。我哋唔可以畀佢再繼續咁樣落去。」
所以筆者認為目前只係一場美國發動嘅單方面貿易保護政策,只不過比以往更層次分明同埋有針對性。不過諗深一層,如果中華人民共和國用佢嘅人口基數去釋放大量勞動力反擊,美國肯定唔夠做。但好可惜,短期內係冇可能實現。
而且什麼封殺藝人、限制旅客呢類中華人民共和國經常做嘅反擊措施對於美國而言,絕對係不痛不癢,事關美國同你冇地緣政治相連,而佢啲藝人係全球知名,無區域局限,同韓國完全相反,無咗中國市場會好大損失。
所以呢次孰勝孰負?唔使多講!

不過筆者有樣嘢要特別喺度講,上述情況持續落去嘅話。朝鮮將會係其中一個得益者。因為,無一個人會走去瘋狂挑機,辣㷫全世界。朝鮮喺上年一直畀Donald Trump窮追猛打,仲要喺U.N過百個國家面前畀人當眾侮辱。對於金正恩而言絕對係奇恥大辱,但朝鮮有咩實際行動可以反擊美國?
而肥仔恩喺得到一定程度上嘅喘息之外,可以繼續同「左膠」總統文在寅傾偈之餘又繼續秘密發展核武。
所以,美國對朝政策對比上年會稍為緩和,甚至如果一但金仔同侵侵會面。Donald Trump嘅形象可能會有所改善,至少國內「左膠」媒體冇得大造文章。而且,美國都可以大大力刮中國一巴,因為如果今日嘅韓半島局勢由中國主導去緩和,所謂嘅「中美貿易戰」可能唔會發生。Donald Trump可能繼續對外宣稱‘President Xi and I will always be friends & I sees great future on China trade’。

總括而言,21世紀係人類史上最道德淪喪嘅一個年代,有機會我會詳細闡述當中原因。再加上出現一個近年國際政治入面反主流嘅Donald Trump,同埋普京想重返蘇聯鼎盛時期。我絕對有理由相信2018年下半年將會極不平靜。
香港唔好諗住可以置身事外,即使有《美國-香港政策法》*(英文:United States–Hong Kong Policy Act),但美國對中國嘅貿易保護政策肯定會對香港造成一定嘅影響。最近,美國提高鋁材徵稅入面,香港亦喺名單之列。同埋唔好唔記得之前制裁朝鮮果段時間,有香港貨船牽入公海運油事件,以Donald Trump記仇性格,一定走唔甩。

正如上幾段所講,我認為呢個世界無一個國家嘅政府係正義,所有目的都係基於自身利益出發。但有啲國家執政黨係毫無人性可言。特別喺你無辦法知道目前事實嘅真相果時,只要果啲決定由呢類無人性嘅國家政黨支持嘅,你去反對,錯嘅機會必定相對較細 。敍利亞化武真偽我自己都畀唔到一個明確答案畀大家,但畀着你,你會信邊個?

唉!香港人喺外交上無任何權利可言。我哋對呢啲嘢真係無能為力,完全被動。不過我哋要感恩身處香港呢塊彈丸福地,雖然當前有大量人禍但至少無天災戰亂。

今次國際大棋局就寫到呢度,下星期同大家講下近年國際組織嘅自由流動。

William Luk 2018年4月15日 澳門


* 《美國-香港政策法》係一部由美國國會喺1992年通過嘅法案。關於香港喺1997年7月1日由英屬香港成為中華人民共和國轄下嘅一個特別行政區之後,美國政府重新釐定對港政策嘅法案。
根據呢個法案,美國政府將繼續將香港視為一個喺政治、經濟、貿易政策等方面同中國完全不同嘅地區,並喺對外政策上將香港特別行政區政府同中華人民共和國政府作出區別對待。