炒飯哥被釘牌15個月可謂震驚馬壇,事前毫無先兆,座騎換人唔在講,賽前聽聞整個騎師室一片死寂,班騎師除策騎外零交流,結果潘頓大發神威執咗5W,坦白講如果截稿前知悉事件,我們選人選馬肯定不一樣,起碼騎師王必棄雷神執番潘頓,貝湯美退下火綫[川河領駒]換咗沈拿,呢位阿哥難怪尤達話佢廢柴,排內檔沿途越跑越外,入直路居然可以飛到近觀眾席咁滯,俾隻馬王你都死得喇! 隻馬膽就咁俾佢搞掂,真係激到嘔血,希望今次可以收復前失!

[旌暉]今季突破評分,千四公認路程專家,跑法機動,上賽增程千八當然敗不作準,賽後郭能過檔操練正常,拍[有得威]步頭有勁火氣十足,姚本輝保養得宜應記一功,今回師首本路程當然四平八穩,三甲必選。

騎師王我們必須承認上次棄潘頓是敗北之作,今次和雷神出足十場肯定連場惡鬥,而他的座騎比雷神更惡,現時只落後雷神七場頭馬已燃起潘頓鬥志,加上炒飯哥事件相信此君演出會正常得多,兩人同1.85倍則潘頓值搏,寧買當頭起,都要買潘頓。

 

癲狗馬膽              第四場          4 旌暉

癲狗騎師王                1 潘頓

(資料組     29/4/2018)