文/William Luk

瑞士著名打氣歌 “Schweizer Nati ole, ole.”(德文)

 (廣東話翻譯:「我哋有好多受人歡迎嘅金融機構同埋清新嘅空氣。」)
link: https://www.youtube.com/watch?v=Ko1KY2OEP2M

瑞士足球代表隊 (德文 : Schweizer Fussballnationalmannschaft;法文 : Équipe de Suisse de football; 意大利文: Nazionale di calcio della Svizzera;羅馬傳語 : Squadra naziunala da ballape da la Svizra)

教練:柏高域(Vladimir Petkovic)

世界排名:6

外圍賽成績:歐洲區B組次名(附加賽兩回合合計1:0北愛爾蘭)

歷年出席世盃決賽週次數:10次(1934年、1938年、1950年、1954年、1962年、1966年、1994年、2006 年、2010年同2014年)

歷屆最佳成績:8強(1934年、1938年同1954年)

今屆訓練基地:圖里也提(Tolyatti/Толья́тти)

瑞士係一個多官方語言嘅國家,講意大利文、法文、德文同羅馬傳語嘅人各成一區。但一直都冇出現咩大規模對立問題,而足球正正就係其中一個維持瑞士穩定嘅主要因素。唔同母語嘅瑞士國民都為咗瑞士國家隊而瞓身支持,加上國民生活指數良好,相信會有好多人飛到俄羅斯去支持呢支「十字軍團」。但好多球迷都好奇怪,點解瑞士嘅世界排名一直都會咁前。好簡單啫,國家隊喺友誼賽同外圍賽都踢得好嘅話自然會加分,瑞士喺近年對賽成績係相當好,自2016年歐國盃16強只係互射十二碼階段輸畀波蘭之外,一直到上年10月先喺外圍賽最後一場賽事0:2輸畀葡萄牙,其他都係非勝則和。所以,佢FIFA排名高係有原因。

瑞士足總早喺2018年5月26號公佈咗世界盃決賽週26人名單。直到6月4號正式公佈23人大名單(瑞士足總Facebook)

瑞士23人名單如下:

門將:
1.恩·蘇馬 (慕遜加柏)、12.麥禾高 (RB萊比錫)、21.貝基(多蒙特)

後防:
2.列治史迪拿 (阿仙奴)(C)、 3.莫班迪治(圖盧茲)、 4.尼高·艾維迪 (慕遜加柏)、5.阿簡治 (多蒙特)、6.米高·蘭治 (巴素利)、13.列卡度·洛迪古斯 (AC米蘭)、20.迪佐奴 (安塔利亞)、22.法比安· 舒亞 (拉科魯尼亞)

中場:
8.費奧拿 (阿特蘭大)、10.格列·沙加 (阿仙奴)、11.比哈美 (烏甸尼斯)、14.蘇巴 (賀芬咸)、 15.迪斯馬利 (博洛尼亞)、16.謝臣·費南迪斯 (法蘭克福)、17.丹尼斯·沙克利亞 (慕遜加柏)、23.沙基利 (史篤城)

前鋒:
7.安保路 (史浩克04)、9.施費洛域 (賓菲加)、18.馬里奧·加雲蘭奴域 (薩格勒布戴拿模)、19.迪米斯 (慕遜加柏)

*大家有冇留意到23人大名單入面,有成10個球員係效力緊德甲,當中龍門到前鋒都有慕遜加柏球員喺入面。呢獲瑞士人真係可以叫聲「德甲是我爸!

回顧

今日嘅瑞士,可以由2008年歐洲國家盃結束之後講起。當年,瑞士以主辦國身份參加2008年歐國盃,但因隊內傷病問題嚴重,最後小組賽出局。之後著名教練古恩(Kuhn)辭去瑞士主教練職務,由德國籍老牌球頭希斯菲特(Hitzfeld)接替,呢位「成功教頭」將瑞士訓練出優秀嘅防守以及使用德國人嘅「機動化戰術」,而且開始接納好多外來移民嘅第二代。瑞士喺之後嘅2010年世界盃同2014年世界盃都有唔錯嘅表現,特別喺2010年南非世界盃小組賽,瑞士以1:0爆冷擊敗西班牙,至今都為人津津樂道,贏嘅就係球隊嘅機動性同出色嘅防守令西班牙無辦法長時間控球在腳。

及後瑞士喺2014年世界盃16強勇戰阿根廷,最後鬥到加時以0:1僅負對手。當時,希斯菲特同一眾瑞士國腳喺哥連泰斯球場嘅失落表情,相信好多球迷都仍然記得,尤其球員果種唔甘心嘅表情筆者依然歷歷在目,如果瑞士頂多2分鐘,進入互射十二碼階段,誰勝誰負真係無人知。而瑞士人喺希斯菲特退休後需要重新起步。及後瑞士足總,喺2014年夏天搵咗一位球員同教練生涯平平無奇嘅柏高域(Vladimir Petkovic)上任。

柏高域可以帶領呢把「瑞士軍刀」行幾遠?

講起柏高域,其實好多人對佢並唔熟悉,不過有啲意甲迷會對佢留有印象,事關近年嘅意大利盃(Coppa Italia)近年都係由國米同祖記所壟斷,但喺2012-13年球季,由柏高域帶領嘅拉素,先喺四強擊敗祖雲達斯,再喺決賽擊敗同城死敵羅馬奪冠。

柏高域執教嘅瑞士國家隊,基本上延續咗希斯菲特過去嘅「機動化風格」,以其部分球員核心去確立咗一套固定陣容去衝擊世界盃外圍賽,後防以效力意甲班霸嘅右閘列治史迪拿(Lichtsteiner)為重心,由呢位老將用「以老帶新」方法帶領擔任中堅嘅法比安· 舒亞(Fabian Schär)同阿簡治(Akanji)或者係成日派膠嘅迪佐奴(Djourou)擔任後防重責,中場方面,仍然重用希斯菲特時期嘅比哈美(Behrami)夥拍後起之秀格列‧沙加(Granit Xhaka),前場由沙基利(Shaqiri)領衍或再由左閘列卡度·洛迪古斯(Ricardo Rodríguez)從後提供支援。

總括而言,瑞士嘅踢法係注重防守,但唔係全面退守,而係喺穩守嘅前提下等一個快速反擊嘅機會。擔任防中嘅格列·沙加嘅致命傳送同中場組織將引導前面四個攻擊球員。但如果面對死守型球隊,就要靠埋兩個邊閘嘅走動去打破場上僵局。基本上柏高域係用下列呢個陣容去衝擊世界盃外圍賽:

守門員:恩·蘇馬

後防:列治史迪拿,阿簡治,迪佐奴, 列卡度·洛迪古斯

防中: 比哈美,格列·沙加

前腰: 沙基利,迪斯馬利,美密迪

前鋒: 施費洛域

而且瑞士有達迪約克,費南迪斯,蘇巴呢堆有實力嘅後備球員。喺調動得宜嘅情況下,令到柏高域執教下嘅「十字軍團」,喺世界盃外圍賽最後一輪作客葡萄牙之前,做出連續9場世界盃外圍賽全勝,入23球失5球嘅成績,高葡萄牙3分。差啲就可以成為繼德國、英格蘭、比利時同西班牙之後,另一隊以不敗身份殺入2018年世界盃決賽週嘅歐洲國家隊。難怪柏高域曾經對外宣稱:「我哋瑞士有最好嘅球員。」。以下係瑞士喺2018世界盃外圍賽戰績:
瑞士2:0葡萄牙

匈牙利2:3瑞士

安道爾1:2瑞士

瑞士2:0 法羅群島

瑞士1:0拉脫維亞

法羅群島0:2瑞士

瑞士3:0安道爾

拉脫維亞0:3瑞士

瑞士5:2匈牙利

葡萄牙2:0瑞士

附加賽:

北愛爾蘭0:1瑞士

瑞士0:0北愛爾蘭

(兩回合計1:0)

由上面賽績可見,瑞士喺今屆世界盃外圍賽表現良好,唔係最後一輪對葡萄牙嗰場迪佐奴擺老烏之後,成隊波散晒再失多球,瑞士絕對有機會壓過葡萄牙首名直接出綫。但喺附加賽瑞士就被外界認為佢係「符碌」過關,事關瑞士只係憑住首回合作客北愛一球爭議12碼淘汰北愛爾蘭,喺兩回合對陣北愛嘅比賽中瑞士多番失機,前鋒施費洛域甚至出現離門幾碼打飛機嘅情況,暴露咗瑞士進攻欠奉嘅問題。

陣中分析

門將夠穩定 兩閘夠煞食
門將: 1.恩·蘇馬 (慕遜加柏)、12.麥禾高 (RB萊比錫)、21.貝基(多蒙特)

14年世界盃之後,主力門將比拿利奧(Diego Benaglio)宣佈退出國家隊。外界原本以為瑞士門將位置會出現青黃不接嘅問題,點知德甲竟然提供一堆出色嘅瑞士籍門將。

恩·蘇馬自2014年之後已經穩奪瑞士首席門將地位(Zimbio)

恩·蘇馬(Yann Sommer)之所以成為瑞士首席門將,真係要同巴塞隆拿講聲多謝。事關2014年慕遜加柏因為要搵一個門將去接替達史特根離隊加盟巴塞留低嘅空缺,最後由瑞士超級聯賽班霸巴素利簽入恩·蘇馬。

雖然恩·蘇馬只有1.82M身高,但佢擅於封位、出迎果斷同埋具有良好心理質素,令到慕遜加柏放心畀佢成為球隊首席門將。及後恩·蘇馬喺2016年歐洲國家盃成為國家隊主力門將,協助瑞士打入16強,互射12碼階段僅負波蘭。

至於2號門將貝基(Burki),效力德甲多蒙特。2015年由瑞士豪門蘇黎世草蜢加盟多蒙特後,漸漸取代年老嘅維丹費拿,成為「蜜蜂兵團」首席門神,喺近幾個賽季有多次神救,係一個反應極快嘅門將,前途無可限量,而喺德國名氣都較恩·蘇馬大。但無奈恩·蘇馬表現更為穩定,難以動搖佢嘅首席位置。

最後係3號門將麥禾高(Mvogo),目前效力RB萊比錫。佢係一位喀麥隆移民。但麥禾高唔係球隊正選,喺今季只上陣1場,名氣都無蘇馬同貝基大。但值得注意嘅係,2006年世界盃瑞士第三門將法比奧·高杜迪(Fabio Coltorti),目前係RB萊比錫正選龍門。

-後防:2.列治史迪拿 (阿仙奴)(C)、 3.莫班迪治(圖盧茲)、 4.尼高·艾維迪 (慕遜加柏)、5.阿簡治 (多蒙特)、6.米高·蘭治 (巴素利)、13.列卡度·洛迪古斯 (AC米蘭)、20.迪佐奴 (安塔利亞)、22.法比安· 舒亞 (拉科魯尼亞)

老將列治史迪拿喺專欄文章完稿前幾個鐘,正式由意甲祖雲達斯轉投英超阿仙奴

.

相信呢一幕係列治史迪拿球員生涯最痛苦嘅一刻(美國Time)

瑞士最強一環係有兩個強力邊閘。右閘係隊長列治史迪拿,效力瑞士國家隊12年,已經累積99頂喼帽。喺6月8號對日本嘅友誼賽再上陣的話,將會成為瑞士第4位上陣100場嘅球員。

佢嘅優點係幾近無限嘅體能滿場飛,早喺2011年加盟意甲班霸祖雲達斯之後就已經有住穩定嘅發揮,祖記球迷對佢最有印象嘅係呢位球員經常會等待對方左閘身後穿插嘅機會,同埋佢經常喺遠柱傳出一啲準繩度高嘅長傳,令高大嘅中鋒可以一蹴而就。

但係優點往往都可以係缺點,正正佢滿場跑嘅習慣,令佢喺2014年世界盃16強對阿根廷嘅比賽入面付上沉重代價,當時下半場加時最後2分鐘,列治史迪拿帶波上前助攻,但交波失誤令全隊瑞士回唔切防,最後被迪馬利亞(Di Maria)輕鬆射入致勝一球。相信今年嘅世界盃係列治史迪拿最後一次以球員身份參加,希望唔會再有不幸嘅事發生喺呢位隊長身上。

列卡度·洛迪古斯係瑞士少見嘅技術型球員(scroll.in)

至於左閘嘅列卡度·洛迪古斯(Ricardo Rodriguez)具有濃厚嘅拉丁球風,老豆係西班牙人,媽咪係智利人,目前效力意甲AC米蘭。佢嘅助攻慾望強,早喺德甲禾夫斯堡時期就經常可以向禁區送出高質傳中,導致「狼堡」鋒線入球率大大提高。而列卡度·洛迪古斯同列治史迪拿唔同嘅係,佢更多時會留喺前方參與進攻同埋喺邊路傳中,而且有處理自由球同十二碼嘅能力。
不過列卡度·洛迪古斯都有一個大缺點,就係體能問題,特別係上年加盟到AC米蘭,意甲慢節奏嘅風格會令佢呢個問題雪上加霜。
以上兩位傑出邊閘同樣都有一位後備球員以防萬一,包括效力法甲圖盧茲嘅左閘莫班迪治(Moubandje),佢近幾年都係列卡度·洛迪古斯嘅後備球員,呢位球員攻守兼備,遺憾一山不能藏二虎。除非列卡度·洛迪古斯有咩傷痛,否則好難會有上陣機會。

而司職右閘嘅尼高·艾維迪(Nico Elvedi),目前效力德甲慕遜加柏,近3個球季已經成為球隊不可或缺嘅部分。相對於列治史迪拿,佢欠缺上前助攻能力,速度一般,但勝在防守能力唔錯。

雖然瑞士防守係歐洲一流,但係中堅會係瑞士防守入面較脆弱嘅一環,呢個唔係一時三刻出現。早喺2年前嘅歐國盃筆者就見到有呢個問題,奈何瑞士唔係一個足球人才輩出嘅國家,唯有限米煮限飯。

自從上屆主力中堅禾·比根(Steve Von Bergen)喺14年世界盃淡出國家隊之後。瑞士中堅呢兩個位就正式由佢嘅拍檔法比安·舒哈(Fabian Schaer)夥拍被公認經常派「膠」嘅迪佐奴(Djourou)。

舒哈係近年瑞士其中一個受較高評價嘅球員,但佢仍然唔係一個可以有穩定發揮嘅球員。呢位係瑞士班霸巴素利成名嘅中堅,早幾季效力過德甲賀芬咸,而今季轉投西甲拉科魯尼亞之後有段時間受到傷患困擾,拉科最終都以降班收場。

筆者由佢效力德甲同西甲嘅表現可見,舒哈傳球能力一般,喺壓上進攻時因為速度慢,好容易畀對方快攻突破。但佢喺德甲同西甲都有幾個頭鎚入波,呢點證明佢有強大嘅制空能力。

相信好多阿迷以前見到迪佐奴防守果時都會心驚膽顫

迪佐奴,呢位喺象牙海岸出世嘅瑞士中堅,喺英超效力阿仙奴期間就一直畀人認為係欠缺穩定,甚至喺一啲關鍵時刻經常爆炸累街坊。特別係上年外圍賽0:2不敵葡萄牙一仗,就係迪佐奴喺下半場擺老烏間接導致瑞士失去首名出綫資格。而下面呢位新秀,將會取代迪佐奴嘅中堅位置。

艾簡治係瑞士近年最快上到位嘅球員 (bvbbuzz.com)

迪佐奴嘅正選位置已經畀效力德甲多蒙特嘅艾簡治奪去,呢個年僅22歲嘅中堅喺今年1月加盟多蒙特,極速融入球隊體系,解決咗多蒙特中堅問題。由前日對西班牙嘅友誼賽可見,柏高域將仍放喺正選中堅位置,而棄用迪佐奴。筆者估計佢會成為瑞士今屆世界盃中堅核心之一。

至於米高·蘭治(Michael Lang),效力瑞士班霸巴素利。名氣唔大,上屆都有份入選23人名單,喺小組賽最後一輪3:0領先緊洪都拉斯嗰時曾經以後備身份落場踢咗13分鐘。相信喺後防駕肩接武嘅情況下,相信佢好難可以喺世界盃決賽週有上陣機會。

中場人才濟濟
中場: 8.費奧拿 (阿特蘭大)、10.格列·沙加 (阿仙奴)、11.比哈美 (烏甸尼斯)、14.蘇巴 (賀芬咸)、 15.迪斯馬利 (博洛尼亞)、16.謝臣·費南迪斯 (法蘭克福)、17.丹尼斯·沙克利亞 (慕遜加柏)、23.沙基利 (史篤城)

格列·沙加嘅表現將會主宰住瑞士喺E組嘅命運 (Sky Sports)

格列·沙加今季喺阿仙奴嘅演出或者唔可以說服到阿仙奴球迷。但只要佢一返到國家隊,佢絕對係陣中主力,擔任防中嘅佢支撐住瑞士成條中場線,由搶波到分波所有程序都要由佢主導。佢有良好嘅傳波視野,呢點係瑞士可以由防守轉為反攻嘅轉換器。但格列·沙加有幾個問題要注意,首先係佢攔截兇狠,筆者留意到佢喺16-17球季效力阿仙奴期間經常有一啲無謂嘅粗野攔截,令佢試過畀人紅牌趕出賽。另外,係佢嘅脾氣,筆者早喺2016年歐國盃已經留意到呢點,佢一但脾性大過理性,會令到成個瑞士由守轉攻嘅過程完全停頓。甚至,對波蘭互射12碼階段,佢係瑞士唯一射失嘅1個,睇返全場精華,你會留意到沙加係帶住脾氣踢。

不過格列·沙加目前飽受傷患困擾,缺席上星期日瑞士友賽西班牙嘅比賽,令到好多球迷擔心佢會唔會踢唔到世界盃。不過,沙加喺接受瑞士足總官網訪問時表示自己無大礙。沙加有機會可以趕及得切喺在6月8號友賽日本嗰時復出。筆者認為如果瑞士中場無咗佢在陣,佢哋真係可以執定行李返瑞士。

2014年巴西世界盃小組賽E組最後一輪瑞士對陣洪都拉斯,沙基利上演帽子戲法,協助瑞士以 3:0擊敗對手。以一己之力帶領「十字軍團」打入16強 (英國獨立報)

瑞士中場其中一個進攻骨幹成員係沙基利(Shaqiri),目前效力喺英超球雋史篤城。呢一位科索夫阿爾巴尼亞裔穆斯林因為南斯拉夫內戰,細過跟屋企人移民到瑞士生活。早喺4年前嘅巴西世界盃入面,已經向世人展現咗過人嘅進攻天賦,雖然今季表現低迷係導致史篤城降班嘅主要原因之一,但佢仍然獲得柏高域嘅徵召,足以見到佢係瑞士國家隊入面不可或缺嘅一員。

沙基利自2010年開始為瑞士國家隊征戰後,69場嘅喼帽就已經攻入20球,而沙基利嘅個人能力係瑞士歷年嚟比較少見,佢嘅盤扭突破同埋飛快嘅速度係佢最大嘅優勢。
雖然沙基利目前效力英超球會史篤城,但隨住史篤城來季降落英冠,相信佢都唔相留喺英格蘭次級聯賽,近期傳出熱刺同修咸頓都對佢有興趣,所以今次世界盃係一個畀佢爭取好表現去吸引其他球會嘅機會。
不過,正如好多時下年輕球員一樣,佢自身脾氣係出晒名臭。如果喺球場上唔好好控制,好大機會會影響瑞士喺今屆世界盃嘅表現。

比哈美係科索夫阿爾巴尼亞移民,同樣都係穆斯林 (malaymail)

比哈美作為瑞士多年主力防中,佢喺瑞士嘅地位從未動搖。佢嘅足球風格充滿咗狂野同粗獷,而且佢體能充沛、奔跑能力極強。比哈美嘅攔截能力係非常好,今年意甲平均攔截係3.5次左右,已經係意甲頭三攔截率高嘅球員。

目前效力意甲烏甸尼斯嘅佢雖然年紀漸大,但勝在經驗豐富。筆者記得啱出道嘅佢係一個脾氣火爆嘅球員,而且出眾嘅外表同新潮嘅打扮令佢有「瑞士碧咸」嘅稱號。但近年比哈美已經有所收斂。相信由佢拍住格列·沙加擔任防中位置,可以控制到呢個初生之犢嘅火爆脾氣。

大家仲記唔記得呢場波搞到成地眼鏡碎? (NY Daily News)

講起老將,仲有謝臣·費南迪斯(Gelson Fernandes),呢位曾經效力曼城嘅中場為人津津樂道嘅一球就係2010年世界盃擊敗西班牙嗰球。雖然費南迪斯已經31歲,但佢同比哈美同樣擁有嘅豐富嘅大賽經驗,相信會幫到一班中場球員去應對比賽。

迪斯馬利(Džemaili)作為征戰意甲多年嘅瑞士老將,最為香港球迷所認識嘅係佢嘅太太(呢度唔多講)。佢嘅優點係有一個良好射門同傳球視野,好多場比賽嘅傳球成功率係超過90%。筆者對佢印象最深係2014年世界盃16強對阿根廷比賽,當時加時賽最後一擊,佢連返攻門最後柱邊出界,最終瑞士被阿根廷淘汰出局。今次世界盃相信係呢位老將最後一屆,希望佢可以無憾離場。

蘇巴(Zuber)呢位效力德甲賀芬咸嘅右翼,係賀芬咸殺入來季歐聯嘅功臣之一。如無意外,佢會正選上陣,擔任左中場角色。佢有唔錯嘅速度、盤扭能力、良好傳球視野、強力嘅體能甚至經常回防,絕對適合瑞士嘅打法。

丹尼斯·沙克利亞(Denis Zakaria),效力德甲慕遜加柏防中球員,作為比哈美同沙加嘅後備,必然會有上陣機會,最有可能係下半場最後階段入替老將比哈美,保持防中活力。

至於費奧拿(Freuler),近兩季喺意甲新貴阿特蘭大表現出色,為球隊陣中主力。甚至傳出有意甲班霸打算喺今夏羅致佢,本來世界盃係一個難得嘅舞臺去表現自己,但面對人才濟濟嘅瑞士中場,相信佢好難會有出場機會。

前鋒問題多 廖化作先鋒

前鋒:7.安保路 (史浩克04)、9.施費洛域 (賓菲加)、18.馬里奧·加雲蘭奴域 (薩格勒布戴拿模)、19.迪米斯 (慕遜加柏)

講起瑞士前鋒,我諗好多球迷仍然停留喺阿歷山大·費特時期。但呢啲已經係過去式,瑞士畀筆者嘅感覺係防守唔錯但攻力貧乏,喺前日1:1西班牙嘅友誼賽已經見到呢個問題。因為核心格列·沙加受傷關係,全場控球率極低而且無辦法可以由後場傳波上前場打反擊,全場射門得4次。但整體嚟講,瑞士呢場防守表現係良好。但唔係迪基亞下半場中段派膠,我諗1:1呢個賽果無可能出現。

呢場友誼賽令到筆者反思一個問題,瑞士近年真係無一個可以擔到大期嘅前鋒?

施費洛域(Seferović)係瑞士今屆世界盃外圍賽入波最多球員(4球)。效力賓菲加嘅佢喺季初3場入球不斷。但之後表現直插谷底,筆者只係記得佢兩回合對北愛嘅比賽都連番失機,完全唔明點解瑞士可以畀佢作為前鋒首選。

「蜀中無大將,廖化作先鋒」。柏高域係揀無可揀嘅情況下好大機會繼續用施費洛域做正選。面對咁嘅進攻「火」力,瑞士要喺小組賽爭取入球,或者要寄望格列·沙加同沙基利靠個人技術做出突破,甚至要靠後防兩閘列卡度·洛迪古斯同列治史迪拿協助出擊助攻,支援疲無可疲嘅前鋒線。

迪米斯(Drmic)目前效力德甲慕遜加柏。佢係克羅地亞移民後代,屋企同樣因為南斯拉夫內戰而嚟到瑞士生活。佢喺德甲嘅弗賴堡崛起,單一球季就攻入17球,具有一定入攝同處理埋門能力。但自從轉投利華古遜後,入球率大跌。

問題出自佢嘅背身控球能力同傳球差,喺高佬橫行嘅德甲又欠缺高空制衡能力。而喺近年開始一直飽受傷患困擾至今,喺16年初借去漢堡其間軟骨受傷休息近8個月,去到今個球季又曾經因為膝傷休息3個月,狀態成疑。

效力德甲史浩克04嘅安保路,可唔可以成為另一粒瑞士超新星? (Talksport)

現年21歲嘅安保路(Embolo)效力德甲史浩克04,佢嘅特點係速度快而且身體對抗能力強。呢一位喺喀麥隆出世但喺瑞士成長嘅後起之秀由U16開始就為瑞士效力,並喺2015年正式入選大國腳。今年「礦工」史浩克04喺德甲一洗近年頹氣,拎到下屆歐聯小組賽入場卷。安保路嘅出色表現可謂功不可沒。呢位後起之秀雖然唔係「礦工」陣中主力,但聯賽出場21入3球,佢經常喺邊路突破往往威脅到對手防線。假以時日,相信將來必定成為瑞士隊中另外一個重要人物。筆者相信安保路喺今屆世界盃,可以作為後備為瑞士頹無可頹嘅前場注入一定程度上嘅活力。

至於馬里奧·加雲蘭奴(Mario Gavranović)可以入選今次23人名單,筆者對呢個決定係挍到頭都爆。佢球員生涯唔多算成功,最多喺德甲打滾咗幾年,上年夏天由克羅地亞列積卡轉投當地班霸薩格勒布戴拿模,但只上陣15場入8球。因此,估計加雲蘭奴都係瑞士第四前鋒,今屆冇咩上陣機會。亦都可以喺呢個決定睇出,瑞士前鋒好缺人。

有人問筆者點解柏高域寧願揀佢都唔要達迪約克(Derdiyok),我都唔知點答佢好,但以筆者所知,達迪約克今年喺土耳其都係踢得一般,受到傷患困擾嘅佢狀態低迷,已經返唔到喺利華古遜嗰時嘅巓峰。

小組形勢

今屆世界盃瑞士編喺同上屆一樣嘅E組,筆者認為今屆同瑞士同組嘅國家隊實力比上2屆強。 如果瑞士喺首輪面對同組實力最強嘅巴西1分都拎唔到,恐怕今屆世盃都係陪跑居多。相反,如果複製到類似2010年爆冷擊敗1:0西班牙嘅版本出嚟,咁或者有機會爭個次名出線。

再講下首輪對巴西嘅賽事,面對「森巴軍團」嘅強力進攻線,「十字軍團」必定採取穩守策略。所以,瑞士會一如以往排出最穩陣嘅4-2-3-1陣容,由兩個防中把守之下寄望可以做到進攻退可守嘅狀況。所以瑞士第一場基本上會好似對西班牙果場熱身賽咁放棄控球,等待時機「一劍封喉」。

到次輪對陣實力較接近嘅塞爾維亞,瑞士就必定出盡全力全取3分。如無意外,呢場比賽將會決定小組次名出線資格。如果瑞士喺呢場輸畀塞爾維亞,瑞士今屆已經可以提前執完行李返去阿爾卑斯山滑雪。

唯一一個對瑞士嘅好消息係齋戒月完結。因為,瑞士喺歐洲中立國嘅身份令到好多南斯拉夫內戰嘅穆斯林難民選擇定居於此。而佢哋嘅後代好多都留喺瑞士落地生根,由上面球員分析部分已經見到瑞士有一定數量嘅穆斯林球員, 但好彩齋戒月完結後2日先係瑞士第一場小組賽。筆者相信一眾穆斯林球員到時已經可以回復正常生活作息,唔會再受上屆咁要日間禁食,嚴重影響比賽狀態。

筆者相信一眾球迷都希望佢哋可以有更大嘅突破。但係同組除咗實力最強嘅巴西之外仲有塞爾維亞同哥斯達黎加呢兩隻黑馬 。小組出綫?談何容易? 但近年瑞士喺世界盃屢有佳作,2010年爆冷擊敗1:0西班牙同埋2014年16強力戰阿根延到加時,已經話畀所有球迷知絕對唔可以睇少呢把「瑞士軍刀」。

簡單而言,如果瑞士能夠一如既往咁保持佢哋嚴密嘅防守結構,同時喺進攻上有所作為,咁呢把「瑞士軍刀」就擁有成功嘅一切條件。到時必定可以過五關斬六將,去尋求自身喺世界盃更大嘅突破。

瑞士小組賽賽程表:

E

618 02:00 巴西 vs 瑞士 羅斯托夫體育場

623 02:00 塞爾維亞 vs 瑞士 加里寧格勒體育場

628 02:00 瑞士 vs 哥斯達黎加 下諾夫哥羅德體育場

陣容預測

瑞士隊正選陣容(4-2-3-1):

守門員:恩·蘇馬

後防:列治史迪拿,阿簡治,舒亞,列卡度·洛迪古斯

防中: 比哈美,格列·沙加

前腰: 沙基利,迪斯馬利, 蘇巴

前鋒: 施費洛域

作者: William Luk

(文章純屬筆者意見,唔代表癲狗日報立場。

.

全民俾LIKE 人人「些牙」!

.