文 / William Luk

哥斯達黎加著名打氣歌 “Ole, ole, ole, Ticos, Ticos,”(西班牙文)
(Ticos係解加勒比海盜,呢個都係哥斯達黎加嘅花名)
Link: https://www.youtube.com/watch?v=zu2EAN-t0pw

 

哥斯達黎加足球代表隊 (西班牙文: Selección de fútbol de Costa Rica)

世界排名:23

教練:奧斯卡·拉美利斯(Oscar Ramírez)

今屆外圍賽成績:中北美洲賽區第5圈次名

歷年出席世盃決賽週次數:5次(1990年,2002年,2006年2014年以及2018年)

歷屆最佳成績:8強(2014年)

外圍賽最佳射手:烏連拿(4球)

今屆訓練基地:聖彼得堡

哥斯達黎加,我諗好多香港球迷第一時間聯想起世界盃,呢隊曾經嘅「魚腩部隊」喺上屆世界盃小組賽力壓意大利,英格蘭同烏拉圭首名出綫。曾經有位前香港代表隊成員鄭兆聰(Ricky Cheng),佢嘅童年就喺呢個國家渡過。而且曾經效力當地班霸亞祖拉拿(Liga Deportiva Alajuelense),所以佢都可以講到好流利嘅西班牙話。

呢個國家盛產咖啡,筆者5年前品嚐過嚟自Tarrazú嘅咖啡,酸度理想、香味獨特。一世人一定要試一次。而當地經濟同治安都唔係幾好,但佢哋仍然都好樂觀,筆者好記得當年有個伯伯同我講咗句:”Somos puda Vida”(我哋享受生活)。所以都解釋到點解次次世界盃小組賽出局佢哋都唔會怨啲咩,仲會好享受當中過程。

其實除咗巴西之外,哥斯達黎加都係其中一隊最早公佈23人大名單之一。哥斯達黎加足總一早喺5月14號就已經公布咗出戰俄羅斯世界盃嘅23人大名單。

哥斯達黎加2018世界盃23人大軍名單(哥斯達黎加足總Facebook)

今屆哥斯達黎加嘅23人名單中,有12個球員曾出戰2014年巴西世界盃決賽週,有一定嘅大賽經驗。23名球員所效力嘅球會喺嚟自五湖四海, 6位效力國內聯賽;6位效力緊美職;4位效力西甲;1位效力意甲;1位效力英冠,其餘嘅有瑞典,瑞士,蘇格蘭同哥倫比亞。

哥斯達黎加23人名單如下:
門將:
1.基羅·拿華斯 (皇家馬德里)、18.彭貝頓(亞祖拉拿)、23. 摩利拿(希利迪亞奴)

後防:
2. 莊尼·阿哥斯達(黑河金鷹) 、3. G.干沙利斯 (博洛尼亞)、 4. 伊恩·史密夫 (諾高平)、 6. 奧斯卡·杜亞迪 (愛斯賓奴)、8. 奧維度 (新特蘭)、15法蘭斯高·卡禾 (明尼蘇達聯)、16.基斯甸·甘保亞 (些路迪)、19. 華斯頓 (溫哥華白帽)、22.馬達列達 (紐約城)

中場:
5.施素·貝高斯 (拉科魯尼亞)、7. 保蘭奴斯 (薩比沙) 、12.丹尼爾·哥連達斯 (沙比薩)、13. 洛尼·華萊士(紐約城)、14. 艾素費法 (希雷迪亞奴)、17.迪捷達 (洛桑),、20.大衛· 古斯文 (波特蘭伐木者)

前鋒:
9.祖爾·甘保(貝迪斯)、10.拜恩·雷斯(士砵亭)、11. 雲尼加斯(薩比沙)、21. 烏連拿(洛杉磯)回顧

•回顧

4年前嘅哥斯達黎加,被編入死亡之組,同組有烏拉圭、意大利同英格蘭,無人會睇好呢隊哥斯達黎加。點知呢支美洲國家隊喺哥倫比亞籍教頭佐治·路斯·賓圖(Jorge Luis Pinto)帶領下突圍而出,並以小組第一出線,再喺16強加時互射十二碼擊敗希臘殺入8強,雖然喺8強賽再一次喺加時逼和荷蘭,但最終互射十二碼不敵「橙色軍團」。但已經創造咗「加勒比海盜」喺世界盃嘅最好成績,成為2014年巴西世界盃最大黑馬,令廣大球迷留下深刻印象同評價。有人甚至將2014年世界盃哥斯達黎加嘅表現同2002年世界盃嘅塞內加爾相提並論。

主教練拉美利斯平易近人,同球員打成一片

4年過後,哥斯達黎加喺人腳上無咩大變化。只係主教練早就由佐治·路斯·賓圖換為奧斯卡·拉美利斯,拉美利斯喺球員生涯司職中場,曾經代表哥斯達黎加參加1990年意大利世界盃,幫助國家隊打入16強。而佢哋喺今屆世界盃外圍賽主要用5-4-1陣式,龍門同後防都主要用返上屆世界盃成員,仍然都係打重兵防守,再用翼鋒打快速反擊。其中喺外圍賽第5圈主客場雙殺美國,最後導致美國無緣18年世盃決賽過週,以下係佢哋嘅外圍賽成績:

-第4圈

哥斯達黎加1:0海地

巴拿馬1:2哥斯達黎加

牙買加1:1哥斯達黎加

哥斯達黎加3:0牙買加

海地0:1哥斯達黎加

哥斯達黎加3:1巴拿馬

6戰5勝1和 入11球失3球

-第5圈

千里達0:2哥斯達黎加

哥斯達黎加4:0美國

墨西哥2:0哥斯達黎加

洪都拉斯1:1哥斯達黎加

哥斯達黎加0:0巴拿馬

哥斯達黎加2:1千里達

美國0:2哥斯達黎加

哥斯達黎加1:1墨西哥

哥斯達黎加1:1洪都拉斯

巴拿馬2:1哥斯達黎加

10戰4勝4和2負  入14球失8球

陣中主力分析

-門將穩如泰山

基羅·拿華斯係少數唔靠星味嚟喺皇馬立足嘅球員 (英國獨立報)

31歲嘅副隊長基羅·拿華斯(Keylor Navas)效力西甲豪門皇家馬德里4個球季,係「銀河艦隊」嘅首席門將,幾近贏盡西班牙同3次歐聯錦標。基羅·拿華斯撲救反應快,呢點早喺佢效力利雲特同上屆世界盃決賽週表露無遺,佢喺上屆分組賽只失一球,屢次成為國家隊救世主,最終幫助呢支「加勒比海盜」打入8強。

筆者相信喺今屆3場小組賽入面,哥斯達黎加仍然都係穩守嘅一方,拿華斯嘅臨場表現會係十分重要。

另外,兩個副選門將都係效力哥斯達黎加班霸亞祖拉拿同希利迪亞奴,由於拿華斯100%係必然正選,筆者唔喺度做過多分析。

-中後場老化問題

由球員資料可以見到哥斯達黎加中後場出現老化問題,其中後防平均年齡係27.4歲,只係比同組塞爾維亞後生0.6歲。而中場平均年齡係     30.4歲,係E組4隊入面最老。所筆者好擔心今屆世界盃佢哋只有捱打,而無辦法好似上年咁有好多快

但係經驗或可以以彌補體能呢一點。先講講後防,中堅主力會係效力意甲博洛尼亞嘅G.干沙利斯(Giancarlo González)(30歲),效力西甲愛斯賓奴嘅奧斯卡·杜亞迪(Óscar Duarte)(29歲)會喺佢左面,而莊尼·阿哥斯達(Johnny Acosta)會喺干沙利斯右面。 筆者由於留意開意甲同西甲所以知道G.干沙利斯同奧斯卡·杜亞迪係正式中堅,相信佢哋留歐嘅經驗可以喺今次決賽週度加以應用。而作為上屆主力,佢咃喺過去4年都成長唔少。但至於阿哥斯達,我好難理解點解一個毫無喺歐洲頂級聯賽效力嘅老球員可以成為哥斯達黎加喺世界盃正選,但筆者睇返佢喺外圍賽嘅表現,絕對佢中規中矩,難怪咁受拉美利斯重用。

奧維度如果冇斷過腳的話,事業可能會更上一層樓

兩閘由奧維度同甘保亞擔任正選,筆者喺度想詳細寫下白賴仁·奧維度(Bryan Oviedo),因為當年佢斷腳嗰一刻我係我睇住電視直播。呢位現年28歲嘅前愛華頓左閘喺2014年1月因為一次斷腳受傷而缺席咗上屆世界盃。嚴重影響佢球員生涯發展。上年年初佢加盟英超球會新特蘭,點知「黑貓」喺兩季內連續兩次降班。

但呢個賽季,奧維度喺34場英冠賽事有5次助攻同2次入波。而佢都係國家隊嘅重要組成部分,第5圈10場比賽入面有6場係正選上陣。

筆者認為奧維度助攻能力極佳,只係斷腳之後不復當年勇,但鬥志旺盛嘅佢仍然可以撐起哥斯達黎加左路防守同進攻工作。
而司職右閘嘅甘保亞(Cristian Gamboa),28歲嘅佢喺 2016年8月由英超西布朗轉會到蘇超些路迪,但今個賽季僅僅出場幾次。佢喺前利記領隊羅渣士麾下係毫無用武之地。不過早喺西布朗時期呢個球員已經有紀律問題,加上無咩上陣時間,佢嘅入選絕對係無說服力。甚至我覺得以下呢個球員有可以取代到佢正選位置。

伊恩· 史密夫有可能會係今屆哥斯達黎加一粒超新星

呢個仲後生過筆者嘅球員叫伊恩· 史密夫(Ian Smith)。司職右閘現年20歲嘅佢有非常英式嘅名,但佢係一個哥斯達黎加人。而佢父母覺得佢將來會出外踢波,而喺佢仲細嘅時侯叫佢去學英文,呢個舉動令佢短短加盟瑞典球會諾高平幾個月之後可以快速融入當地生活(瑞典算係多人識講英文嘅歐盟國家),佢效力短短半年期間,上場3次射入1球。

哥斯達黎加所有中場入面,最後生嘅古斯文(左)都已經28歲 (Los Angeles Times)

至於中場老化問題同樣令人擔憂,7個球員有5個已經係30歲,至於較為後生而且正選機會較高嘅只有現年28歲,效力美職嘅古斯文(David Guzmán)。而筆者想喺呢度特別介紹哥斯達黎加2個年過30嘅中場「長青樹」。

施素·貝高斯將會係國家隊喺今次世盃決賽週嘅防守要員

首先係30歲嘅施素·貝高斯 (Celso Borges),效力西甲拉科魯尼亞,雖然今季喺拉科上陣時間大減,但仍然獲得教練拉美利斯重用。縱使拉科下季要降到西乙作賽,但佢仍然有3個入球進帳。
貝高斯自2008年起為國家隊效力,至少有109頂喼帽。另外佢有一定嘅遠射能力同埋良好嘅心理質素,絕對可以穩住「加勒比海盜」嘅中場線。

保蘭奴斯喺今屆外圍賽射入4球

另外一位係保蘭奴斯(Christian Bolaños),現年34歲嘅佢目前效力國內聯賽班霸沙比薩,之前喺歐洲效力丹麥班霸哥本哈根。喺當打之年時,控球、射術、傳波都係頂呱呱,甚至經常有造出靚助攻,2014年世界盃第一場對烏拉圭嘅賽事,就係佢嘅助攻幫助國家隊反超前烏拉圭。但歲月不饒人,目前佢嘅體能同競技狀態都令人擔憂,筆者認為佢最多踢到下半場60分鐘就要被換出。

最後要講講艾素費法(Randall Azofeifa),33歲嘅佢曾經喺歐洲比甲球會真特效力5個球季,目前效力國內班霸希利迪亞奴。自2005年開始為國家隊披甲上陣,曾經參加過2006年德國世界盃。不過並非教練拉美利斯心目中嘅正選11人,預計仍然有後備上陣嘅機會。

拜恩·雷斯高峰已過,但生咗鏽嘅刀都仲可以劈幾下

陣中主力前鋒拜恩·雷斯(Bryan Ruiz),係一個位置感同控球技術極強嘅球員。而且佢有一定對高空波嘅控制力,不過體能係佢目前最大問題。

佢嘅球員之旅是喺佢家鄉球會亞祖拉拿開始,之後轉戰到歐洲比甲球隊真特,出色嘅表現引嚟荷甲球隊川迪嘅注意,之後喺2011年登陸英超球會富咸,成為少數踢英超嘅哥斯達黎加人。喺英格蘭嘅3個球季入面,他經歷咗大起大落。最後,13-14球季季中畀富咸外借返荷甲PSV燕豪芬。但迎嚟咗佢嘅第二春,佢喺14場比賽入面入面射入5球,協助PSV拎到來季嘅歐霸盃席位,並重奪自己喺國家隊嘅正選位置。

拜恩·雷斯喺之後2014年世界盃決賽週成為哥斯達黎加創造奇蹟嘅重要人物,當時外界都認為哥斯達黎加幾乎冇可能喺「死亡之組」殺出重圍,最後8強光榮出局,令佢成為街知巷問嘅國家英雄。

但呢位32歲前鋒近年嘅球會生涯唔算順,今季拜恩雷斯效力士砵亭喺葡超渡過咗一個極為失望嘅球季,但筆者認為就算咁都絕唔可以輕視呢個對手,因為2014年已經話咗畀大家知,任何嘢都可以發生。

「浪子」祖爾·甘保,到底幾時先可以有一個真正嘅「家」畀佢效力?

至於祖爾·甘保(Joel Campbell),上屆世界盃決賽週對烏拉圭嘅小組賽射入板平嘅一球,最後協助國家隊3:1擊敗對手。近年一直畀英超球會,係「名符其實」嘅浪人。喺上場熱身賽3:0贏北愛爾蘭時射入一球,仲貢獻兩次2次間接助攻,表現十分搶鏡。

祖爾·甘保都外借咗好多個球季,如果最後唔能夠喺一隊入面佔有一席之位嘅話,真係非常可惜,筆者希望佢可以喺今屆有好嘅表現,吸引唔同球會嘅注意。

烏連拿喺外圍賽客戰美國嘅比賽中梅開二度 (SB Nation)

最後,效力美職FC洛杉磯嘅烏連拿(Marco Ureña)因為喺4月尾一場比賽同對方相撞受面部骨裂,但經手術治理後已經傷癒歸隊。雖然趕上到決賽週23人大軍尾班車,但係狀態成一大疑問。筆者記得仍上屆世盃對烏拉圭攻入埋尾一球,佢嘅射門技術都好刁鑽。

小組形勢分析

筆者認為4年過去,年紀對呢班上屆骨幹成員會係一大挑戰。特別係上屆哥斯達黎加之所以成為黑馬係因為佢嘅「機動性」打法,積極嘅迫搶同快速回防係兩大關鍵。而睇返過去呢班哥斯達黎加主力喺球會表現,除咗拿華斯之外,都佢哋已經不復當年勇,好難再創造好似上屆咁嘅奇蹟。

雖然話就話除咗巴西之外另外3隊會爭次名出線,但筆者覺得今屆哥斯達黎加只可以係分組賽陪跑分子,實力上絕對同巴西差一大截,而面對踢法務實嘅瑞士亦難有甜頭,攻力又同塞爾維亞差一大截。

呢樣要歸咎於國家隊處於青黃不接嘅階段。近年球壇未有任何一個令人矚目嘅新星出現。喺外圍賽入面,前場進攻仲要依賴32歲嘅拜恩·雷斯,祖爾·甘保又一路成唔到才。所以,筆者真係睇唔到佢哋今屆可以有咩作為。

另外,目前哥斯達黎加後防都面臨住傷病問題。作為後中場主力嘅保蘭奴斯同G.干沙利斯都有傷患問題,特別係鎮守中路嘅G.干沙利斯一但因傷缺陣或者退隊,都會嚴重打亂哥斯達黎加嘅部署。

「哥斯達黎加人唔會對世界盃有咩大期望,但我哋係能夠創造奇蹟嘅一個。」哥斯達黎加人在意嘅係享受過程,就算國家隊出局,都唔會發生類似一啲玻璃心國家咁週圍搞事,「活在當下」,希望呢支上屆「黑馬」可以有理想成績。
好啦!4篇夾埋超過3萬字嘅E組4隊分析就去到呢度。總括嚟講,筆者認為E組將會係首名巴西一枝獨秀,次名3國群雄混戰。

2014年哥斯達黎加嘅球迷有一個夢幻旅程,唔知今屆世界盃可唔可以延續落去呢?

哥斯達黎加小組賽賽程表:

E組

6月17號 20:00 哥斯達黎加 VS 塞爾維亞 沙馬拉體育場

6月22號 20:00 巴西 VS 哥斯達黎加 聖彼得堡體育場

6月28號 02:00 塞爾維亞 VS 巴西 莫斯科斯巴達體育場

陣容預測:

巴斯達黎加正選陣容(5-4-1):

守門員: 拿華斯

後防:奧維度,杜亞迪,干沙利斯,阿哥斯達,甘保亞/伊恩· 史密夫

中場:古斯文,貝高斯,保蘭奴斯,拜恩·雷斯

前鋒: 烏連拿

(文章純屬筆者意見,唔代表癲狗日報立場。