文/ William Luk

瑞典打氣歌“Oj, Oj, Oj…”

瑞典足球代表隊 (瑞典文svenska fotbollslandslaget)

教練:贊尼·安達臣(JANNE ANDERSSON)

世界排名:24

今屆外圍賽成績:歐洲區A組次名(附加賽兩回合合計1:0義大利)

外圍賽最佳射手:馬古斯·貝治(8球)

歷年出席世盃決賽週次數:12次(1934年、1938年、1950年、1958年、1970年、1974年、1978年、1990年、1994年、2002年、2006年以及2018年)

歷屆最佳成績:亞軍(1958年)

今屆訓練基地:格連齊克

講起瑞典,好多人第一時間諗起IKEA,甚至係瑞典肉丸,不過瑞典肉丸係同土耳其肉丸有密不可分嘅關係,並唔係瑞典人發明。題外話講完,而筆者仲記得嗰時小學三年班睇2002年日韓世界盃,心愛嘅英格蘭身處「死亡之組」,瑞典係其中一隊同組嘅國家隊,最後仲要力壓英格蘭首名出綫,而且將阿根廷踢出局。記得嗰時瑞典有一大堆勁人,盧錫(Teddy Lučić)、龍格堡(Freddie Ljungberg)、美爾堡(Olof Mellberg)、軒歷拿臣(Henrik Larsson),歲月不饒人,如今都全部退曬役,嗰時仲係初生之犢嘅「戰神」伊巴謙莫域(Zlatan Ibrahimović),都只能夠喺幾時比賽下半場尾段後備出場踢幾分鐘。

好景不常,2006年之後,呢班瑞典黃金一代就慢慢退落嚟。往後嘅十幾年,瑞典一直都處於「伊巴時代」。但除咗伊巴之外,瑞典喺千禧年間中後段時間人才凋零,整體實力唔算出色。就算擁有神乎其神嘅伊巴都連續缺席2屆世界盃決賽週。

而喺2016年伊巴退出國家隊後,筆者本以為瑞典會一頹再頹。但皇天不負有心人,終於有一班2015年U21世青賽冠軍球員開始喺瑞典國家隊發光發亮,今日有幾位2015年U21成員都可以喺歐洲五大聯賽踢上主力。幫助「北歐海盜」喺時隔12年再次殺入世界盃決賽週,而最終伊巴都無重返回家隊。今次嘅世盃係瑞典喺「後伊巴時代」嘅第一次挑戰,咁到底「後伊巴時代」嘅瑞典,可以喺今屆世界盃行得幾遠呢?

今屆除咗巴西、哥斯達黎加以外,瑞典亦早喺5月15號就公佈今夏世界盃決賽週23人大名單。

瑞典23人大名單,對比其他國家呢份23人名單設計好低調(瑞典足總Twitter)

瑞典23人大名單:

門將:
1.羅賓·奧臣(哥本哈根)、12. 卡爾-祖翰·莊臣(甘岡)、23.洛德菲特(史雲斯)

後衛:
2.路斯迪(些路迪)、3.連迪路夫(曼聯)、4. 格蘭基斯(卡斯洛達)(C)、5.馬田·奧臣(史雲斯)、6 . 奧古斯甸臣(不萊梅)、14.希蘭達(博洛尼亞)、16. 艾美·卡夫(博洛尼亞)、18.彭圖斯·贊臣(列斯聯)

中場:
7.施巴斯坦·拿臣(侯城)(VC)、8. 艾卡度(漢堡)、10. 科斯貝治(RB萊比錫)、13.史雲遜(西雅圖海灣者)、15. 希真麥克(熱那亞)、17.卡利臣(卡斯洛達)、19. 馬古斯·洛頓(克羅托尼)、21.杜馬斯(圖盧茲)’

前鋒:
9.馬古斯·貝治(艾阿恩)、11.古達迪(艾拉維斯)、20.杜禾倫(圖盧茲)、22.卡斯·泰連(華斯蘭比華倫)

筆者相信會有好多球迷問:「餵!前鋒無伊巴?佢去咗邊吖???」。呃…….佢無入選呀!

•回顧

近年嘅瑞典,大家自然會諗到「戰神」伊巴謙莫域。自從瑞典喺2016年歐國盃小組賽出局,「戰神」就宣佈退出國家隊。瑞典就再冇一個世界級球星坐陣喺國家隊。

另外,執教瑞典7年嘅夏美倫(Erik Hamrén)都喺2016年歐國盃之後辭去國家隊教練一職。頓時令瑞典球迷感到徬徨無助。

安達臣過往執教生涯平平無奇,但帶領瑞典擊敗義大利成功出線今屆世盃32強(Eurosport)

瑞典籍教頭贊尼·安達臣喺2016年歐國盃後走馬上任。佢自1988年開始執教生涯,23年一直無咩成績。直到喺2011年接手瑞典球會諾高平,用4年時間苦苦經營,終於喺2015年球季帶領球會贏得23年嚟第一個瑞典超級聯賽冠軍。

然而,低處未算低,喺2018年世界盃外圍賽,瑞典抽到一條極黑仔嘅籤,編入A組嘅佢哋會同法國以及荷蘭兩支強隊同組,出線機會自己被睇低一線,外界一致認為呢隊「北歐海盜」將會連續缺席3屆世界盃決賽週。但係,瑞典最終以10戰6勝1和3負得19分,入26失9球以較佳嘅得失球差力壓同分嘅荷蘭,拎到小組次名附加賽資格。

但更不幸嘅係,瑞典喺附加賽嘅對手係四屆世界盃冠軍兼歷史上只缺席世盃決賽週一次嘅傳統強隊義大利,瑞典出線機會再被看淡。但最後瑞典兩回合以總比數1-0撃敗義大利,晉身2018年世界盃決賽週。

雖然,2016年歐國盃瑞典嘅表現畀大家感覺到青黃不接問題相當嚴重,3場小組賽就係識傳波畀伊巴,毫無組織。但比荷蘭好嘅係,佢哋有班U21青年軍,喺2015年贏咗歐洲盃冠軍。而當中部分球員,今日已經慢慢喺歐洲頂級聯賽立足,有望帶領「北歐海盜」喺未來嘅國際賽同其他列強一較高下。

瑞典嘅表現令到成地眼鏡碎,而且瑞典嘅「黑馬」實力都令到世界盃各隊都重新審視呢個北歐傳統足球強國。

而喺成個外圍賽入面,教練安達臣都係用傳統嘅4-4-2陣容去衝鋒陷陣,以下係艾達臣執教瑞典喺世界盃外圍賽戰績:
-歐洲區A組

瑞典1:1荷蘭

盧森堡0:1瑞典

瑞典3:0保加利亞

法國2:1瑞典

瑞典4:0白羅斯

瑞典2:1法國

保加利亞3:2瑞典

白羅斯0:4瑞典

瑞典8:0盧森堡

荷蘭2:0瑞典
-附加賽

瑞典1:0意大利

意大利0:0瑞典

(兩回合計1:0)

附加賽首回合現場(Derrick Tam)

•陣中主力分析

瑞典今屆23人名單平平無奇,不過筆者發覺瑞典23人名單同其他歐洲國家相比少數族裔唔算多。呢刻嘅筆者諗起德國嘅名單(詳情請睇專欄嘅德國篇)。同埋,筆者唔明點解贊尼‧安達臣喺手上好牌匱乏嘅情況下都唔重召近排喺美職FIT到爆嘅伊巴謙莫域(其實伊巴喺瑞典都係少數族裔,佢老豆係南斯拉夫穆斯林,不過佢自己從來無伊斯蘭信仰)。

不過嬲還嬲,如果冷靜啲去睇,筆者認為「戰神」一但重返瑞典,又會好似16年歐國盃咁成為全隊倚賴嘅核心,將安達臣上任之後建立嘅團隊合作破壞得一乾二淨。

因此,團隊合作會係佢哋嘅關鍵,而喺後中前場都會發現2015年U21歐青賽冠軍成員,後防有效力曼聯嘅連迪路夫同雲達不萊梅嘅奧古斯甸臣,中場有喺RB萊比錫踢得風山水起嘅科斯貝治,前場有古達迪同卡斯·泰連。筆者相信假以時日,呢班球員喺世盃過後係有能力帶領「北歐海盜」超越2002年嗰班黃金一代。

-門將夠後生

1.羅賓·奧臣(哥本哈根)、12. 卡爾-祖翰·莊臣(甘岡)、23.洛德菲特(史雲斯)

3位入選門將都係28歲,夠曬後生。筆者預計今屆世界正選門將會係羅賓·奧臣(Robin Olsen),呢位門將效力丹麥班霸哥本哈根,喺瑞典班霸馬模出道,效力過五大聯賽嘅球隊。在喺上年對義大利嘅附加賽兩回合入面多次作出關鍵撲救,係瑞典晉級今屆世盃決賽週功臣之一。

奧臣除咗撲救能力有待提升之外,喺處理長傳,企位同反應都唔錯。

-後防穩陣得分關鍵
2.路斯迪(些路迪)、3.連迪路夫(曼聯)、4.格蘭基斯(卡斯洛達)(C)、5.馬田·奧臣(史雲斯)、6.奧古斯甸臣(雲達不萊梅)、14.希蘭達(博洛尼亞)、16.艾美·卡夫(博洛尼亞)、18.彭圖斯·贊臣(列斯聯)

瑞典嘅防線紀律同默契良好,而且穩守突擊戰術熟練。最終瑞典喺外圍賽10場失10球,算係不過不失。
佢哋利用瑞典人種天生高大嘅優勢,喺打高空波層面基本喺穩如泰山。同樣地,角球戰術都係佢哋比較耍家嘅進攻戰術,陣中後防件件都係利器,喺外圍賽已經展現畀大家睇。

路斯迪(左)同格蘭基斯(右)呢兩位老將預計會支撐起瑞典成條防線工作(Metro)

首先講講隊長格蘭基斯(Andreas Granqvist)效力俄超卡斯洛達,大賽經驗豐富,參加過3屆歐國盃。雖然已經33歲,不過身體質素依然強壯,防守能力非常唔錯。

路斯迪(Mikael Lustig)效力蘇超些路迪,大賽同樣經驗豐富,參加過上2屆歐國盃。但筆者認為佢作為右閘嚟講能力一般,極慢,喺外圍賽已經屢次成為防守突破點。所以筆者擔心佢有機會畀效力意甲博洛尼亞嘅艾美·卡夫(Emil Krafth)搶走正選位置。

連迪路夫(Sky Sports)

至於中堅連迪路夫(Victor Lindelöf),年僅23歲,年紀輕輕就效力英超豪門曼聯。而佢之前入選咗2016年歐國盃23人名單。

佢除咗勝任中堅位置之外,亦可擔任防守中場同右閘,早喺葡超效力賓菲加嗰時就展現出唔錯嘅傳波能力。而且連迪路夫罰球能力唔錯,曾經喺葡超用罰球入過波。不過佢嘅防守一直被人詬病,筆者好怕佢大賽派「膠」。

奧古斯甸臣係瑞典其中一粒超新星(Read West Ham)

此外,筆者要喺度講講近年喺瑞典後防迅速崛起嘅新秀奧古斯甸臣(Ludwig Augustinsson),效力德甲不來梅,年僅24歲,司職左閘,係2015年U21世青盃冠軍成員。

今季不來梅可以護級成功佢係功不可沒,係3月中3:1擊敗禾夫斯堡嘅護級大戰入面頂入1球。目前已經引起部分英超球隊關注,筆者相信佢會係瑞典未來嘅邊路核心。

團隊合作係瑞典嘅重要元素

至於馬田·奧臣(Martin Olsson)、希蘭達(Filip Helander)同彭圖斯·贊臣(Pontus Jansson),筆者預計後備居多。

當中喺英格蘭打滾多年嘅馬田·奧臣將會成為奧古斯甸臣嘅後備球員,而效力意甲博洛尼亞嘅希蘭達,目前25歲,司職中堅,係2015年U21世青盃冠軍成員。

-中場防守能力差
7.施巴斯坦·拿臣(侯城)(VC)、8. 艾卡度(漢堡)、10. 科斯貝治(RB萊比錫)、13.史雲遜(西雅圖海灣者)、15. 希真麥克(熱那亞)、17.卡利臣(卡斯洛達)、19. 馬古斯·洛頓(克羅托尼)、21.杜馬斯(圖盧茲)

瑞典嘅中場平均年齡係28.12,預計正選陣容會係以老帶新,陣中主力喺中場組織同罰球方面都唔錯。但係整體防守差,早喺外圍賽已經表露無遺。以下會介紹幾位瑞典中場主力。

瑞典嘅反擊要靠曬呢位中場大腦科斯貝治(Beinsports)

筆者認為今屆瑞典世界盃中場核心會喺26歲嘅科斯貝治(Emil Forsberg),呢位當打之年嘅中場目前效力德甲新貴 RB萊比錫,喺球隊係中場大腦。但佢喺瑞典更多擔任邊路位置,能傳能射,不過速度慢,防守能力差,屬於攻強守弱嘅中場。而佢罰球有上佳造詣,喺對法國嘅外圍賽試過一腳射死法國國門洛列斯。筆者認為小組賽對陣墨西哥嘅比賽佢會喺「關鍵一員」,嗰場分分鐘係一場罰球大戰。

副隊長施巴斯坦·拿臣絕對係陣中最有大賽經驗嘅球員 (UEFA)

施巴斯坦·拿臣(Sebastian Larsson),呢位32歲副隊長目前效力英冠球隊侯城,曾經代表瑞典出戰3次歐洲國家盃。筆者喺2011年前伯明罕訪港期間同佢影過張相,為人無架子。佢係一個擅長組織攻勢同傳波嘅中場,都有一定嘅罰球能力,呢點喺佢以前效力伯明罕同新特蘭期間已經表露無遺。相信拿臣會好好形惜今次世界盃,因為可能係佢球員生涯唯一一次。
艾卡度(Albin Ekdal),效力來季降落德乙嘅漢堡,早年喺意甲成名,效力過祖雲達斯、博洛尼亞、錫耶納同卡利亞里。喺同義大利嘅附加賽入面大腿嚴重受傷下場,幾近收咧。不過目前已經可以復出,佢嘅傳控能力不錯。

卡利臣(Viktor Claesson)效力俄超卡斯洛達,進攻能力唔錯,擅長喺邊路切入中路搵位起腳。今季喺俄超大爆發,30場入10球。不過身體質素一般,一但面對大隻型防守球員往往處於下風。

杜馬斯係瑞典少數穆斯林球員 (Zimbio)

杜馬斯(Jimmy Durmaz)係瑞典陣中唯一一個穆斯林球員,屋企係土耳其裔。佢嘅邊路突破能力好強,速度快,但體能極差。佢嘅把握能力唔錯,喺2:1擊敗法國嘅外圍賽射入一球窩利。
希真麥克(Oscar Hiljemark)係2015年世盃賽冠軍成員入面發展得較為唔順嘅一位,近年都係以外借為主,但有隨隊參加2016年歐洲國家盃。

-鋒線年紀偏大 名大於實
9. 馬古斯·貝治(艾阿恩)、11.古達迪(艾拉維斯)、20.杜禾倫(圖盧茲)、22.卡斯·泰連(華斯蘭比華倫)

瑞典嘅鋒線平均年齡係28.25歲,呢個年齡喺今屆世界盃嚟講已經算係偏大。而筆者認為瑞典鋒線疲弱,尤其係小組賽檔次唔同外圍賽,馬古斯·貝治想延續外畔賽入波氣勢?難矣!

馬古斯·貝治可唔可以延續外圍賽氣勢,繼續喺小組賽入波呢? (UEFA)

馬古斯·貝治(Marcus Berg),現年31歲,目前效力阿聯酋球隊艾阿恩,喺今屆世界外圍賽射入8球,係「北歐海盜」能夠晉身世界盃32強嘅功臣之一,門前把握力唔錯。

杜禾倫(Ola Toivonen),相信有啲英超球迷會對佢有印象,佢曾經踢過「黑貓」新特蘭一季,屬於工兵型,冇咩突出,歷季入波率都唔高。筆者留意到佢喺外圍賽一路幫貝治鋪橋搭路,類似以往英格蘭喺卡比路時期用希斯基咁款。

古達迪係一個好識搞氣氛嘅球員 (Mirror)

而古達迪(John Guidetti)會係筆者最為熟悉嘅瑞典前鋒,之前長年畀曼城外借唔同球隊。目前效力艾拉維斯,亦都係2015年U21世青盃冠軍成員。早喺蘇超些路迪時期就已經成日有好多靚靚罰球。

另外,佢後上速度極快,把握能力高,喺過去效力切爾達時期已經話畀大家知佢絕對有料。不過喺安達臣麾下佢只係後備角色。往往團體合作就會犧牲一大堆個人能力強嘅球員。你或者會問安達臣點解要揀佢,筆者認為佢喺一個識得好幽默嘅人,可以維持更衣室氣氛,而且又無伊巴咁大牌。

伊巴嘅出場(116場)同入波紀錄(62球)相信喺筆者有生之年都未必有人打破到。都係嗰句:「畀返伊巴我呀!!!!!!!!!」

至於卡斯·泰連(Isaac Kiese Thelin)入選,雖然今季喺比甲入咗19球,並且作為2015年世盃賽冠軍成員。但以佢年資同埋實力,筆者偏激都要講句:「好X心揀返伊巴啦!」

•小組形勢分析
瑞典能夠擊敗義大利殺入今屆世界盃32強,已經令到一眾球評家、球迷同媒體目瞪口呆,有人會話對於「團隊至上」嘅瑞典國家隊,一切都有可能。所以呢支瑞典係今屆「黑馬」。

但係,筆者並唔睇好瑞典。瑞典嘅攻力我不嬲都質疑,近排瑞典喺2場友誼賽表現令人失望,先喺上星期0:0和丹麥嗰場比賽,全場只得9次射門,仲要0中龍。尋日0:0和秘魯仲衰,全場4射1中。前鋒會喺小組賽啞火,顆粒無收,係好有可能發生嘅事。
而瑞典身處嘅F組,除咗有實力最強嘅德國,仲有墨西哥同韓國。所以,瑞典最實際都係爭返個次名出綫,不過次名好大機會對E組首名巴西,所以瑞典最多去到16強就盡。

但瑞典同同組次名出綫最大對手墨西哥相比,瑞典喺技術,經驗,中場組織同進攻層面絕對欠奉。所以第一場對韓國贏唔贏到波就至關重要,贏到韓國嘅就可以留到最後一輪同墨西哥一較高下。

雖然筆者認為瑞典已經好難再繼續創造奇跡。喺世界盃呢類見真章嘅賽場上,小組賽3場都塞大巴嘅話你可以執定行李走人(2010年嘅紐西蘭試過,最後成為2010年世界盃唯一一支不敗國家隊)。老實講,國家隊喺缺乏真正有實力嘅球員做支援,係好難走得更遠。特別喺瑞典過去連續爆冷嘅情況下,殺入2018年世界盃決賽週,就算列強球隊都絕對唔會輕視呢隊「北歐海盜」。但筆者希望瑞典就算冇伊巴,都可以創造一啲驚喜畀大家。

瑞典小組賽賽程表:

F組

6月18號20:00 瑞典vs 韓國 下諾夫哥羅德球場

6月24號00:00 德國vs 瑞典 索契菲斯特球場

6月27號22:00墨西哥vs瑞典 葉卡捷琳堡中央體育場

陣容預測:

瑞典隊正選陣容(4-4-2) :

門將:羅賓·奧臣

後防:奧古斯甸臣、格蘭基斯、連迪路夫、路斯迪

中場:科斯貝治、拿臣、艾卡度、卡利臣

前鋒:馬古斯·貝治、杜禾倫

全民俾LIKE 人人「些牙」!

.