文 / William Luk

德國著名打氣歌

Olé, Olé Olé Olé, Super Deutschland, Super Deutschland, Super Deutschland Olé Olé.”

德國國家足球隊(德語:Die deutsche Fußballnationalmannschaft)

教練:祖亞占·路維(Joachim Löw)

世界排名:1

外圍賽成績:歐洲區C組首名

外圍賽最佳射手:湯馬士·梅拿 & 辛度·華拿(5球)

歷年出席世盃決賽週次數:19次(1934年、1938年、1954年至今)

歷屆最佳成績:冠軍(1954年、1974年、1990年、2014年)

今屆訓練基地:莫斯科

足球係德國標誌之一,呢度擁有世界頂級五大聯賽之一嘅德甲,球迷嘅熱情令到每一個德國球隊嘅主場都係地獄主場。加上日耳曼民族性格嚴謹同系統性,令到近年良好嘅青訓球員源源不絕,相信德國23人大名單應該係32隊入面最難揀人嘅一隊。但正正係呢一系列嘅基礎,令到國家隊拎過4次世界盃冠軍,3次歐洲國家盃冠軍,1次洲際盃冠軍。目前德國喺最新一期嘅FIFA排名入面高踞榜首,幾近無人能敵。

德國今屆世界盃決賽週嘅27人初選名單喺5月15號公佈,外圍賽神射手之一辛度·華拿(Sandro Wagner)意外落選,華拿繼而退出國家隊。直到6月4日,23人名單正式出爐。當中4名無緣搭上尾班車嘅球員入面,包括今屆喺英超球會曼城表現出色嘅辛尼(Leroy Sane)。辛尼喺今季幫曼城贏得英超冠軍,整季表現大有進步,甚至贏得本賽季英超最佳年青球員獎,成季各項賽事4上陣9場入14球同埋交出19次助攻,但最終無緣參加今屆俄羅斯世盃決賽周。不過辛尼嘅落選係有因由,事關呢位球員算係「獨食型」,同德國隊嘅團體合作同「機動式」差天共地。

另外3位落選球員分別係門將連奴(Bernd Leno)、後防莊拿芬·泰希(Jonathan Tah)同埋前鋒彼德臣(Nils Petersen)。而今屆德國嘅23人名單中,只係後中前場有些微改變,當中有12位球員曾經出戰2014年巴西世界盃決賽週,有一定嘅大賽經驗。

而對一眾德國球迷嚟講絕對係好消息係每逢國際賽前夕受傷嘅馬高·萊斯(Marco Reus)、歐聯4強傷出嘅保定(Jérôme Boateng)同抖咗接近成季嘅紐亞(Manuel Neuer)都可以入選到23人大名單。能夠以健康的姿態來踢這次世足賽。喺目前德國中場眾星匯集嘅情況下,呢班絕對主力嘅及時傷癒可以話係呢架「德意志戰車」發動前嘅最後幾塊零件。德國今屆目標好簡單,劍指二連霸!

德國2018世界盃23人大軍名單(德國足總Facebook)

德國23人名單如下:
門將:

1.紐亞(拜仁慕尼黑)(C)、12.奇雲·查普(巴黎聖日門)、22.達史特根(巴塞隆拿)

後衛:

2. 柏汀赫特(哈化柏林)、3.莊拿斯·赫達(科隆)、4.馬菲亞斯·真達(慕遜加柏)、5.曉姆斯(拜仁慕尼黑)、15.歷卡斯·蘇尼(拜仁慕尼黑)、16.魯迪格(車路士)、17.謝路美·保定(拜仁慕尼黑) 、18.甘美治(拜仁慕尼黑)

中場:

6.基迪拉(祖雲達斯)、7.達斯拿(巴黎聖日門)、8.卻奧斯(皇家馬德里)、10.奧斯爾(阿仙奴)、11.馬高·萊斯(多蒙特)、13.湯馬士·梅拿(拜仁慕尼黑)、14.哥列斯卡(史浩克04)、19.施巴斯坦·魯迪(拜仁慕尼黑)、20.祖利安·白蘭特(利華古遜)、21.根度簡(曼城)

前鋒:
9.迪姆·華拿(RB萊比錫)、23.馬里奧·高美斯(史特加)

回顧

筆者只係希望路維可唔可以唔好再撩鼻哥。另外,筆者感覺今次可能係佢最後一次帶領德國隊參加世界盃決賽週 (Pinterest)

德國喺上屆世界盃決賽週開賽前係奪冠大熱門之一,最終佢哋眾望所歸,喺巴西第四度捧起大力神盃。之後嘅德國因為梅迪薩卡(Per Mertesacker)、拿姆(Philipp Lahm)同高路斯(Miroslav Klose)掛靴,開始補入一堆新血,並喺2016年歐洲國家盃亮相,最終不敵東道主法國4強止步。而德國喺今屆世界盃外圍賽基本上係一帆風順,同組實力較弱,只有北愛爾蘭、捷克同挪威較具威脅。最終小組賽10戰全勝,入43球失4球,小組首名晉身2018年俄羅斯世界盃決賽週,以下係佢哋嘅外圍賽成績:

挪威0:3德國

德國3:0捷克

德國2:0北愛爾蘭

聖馬利諾0:8德國

阿塞拜疆1:4德國

德國7:0聖馬利諾

捷克1:2德國

德國6:0挪威

北愛爾蘭1:3德國

德國5:1阿塞拜疆

•主力分析

筆者甚少質疑路維嘅用人,而唯一擔心只係門將位置,中場方面已經揀盡當前德國最FIT嘅球員。而今屆路維只帶兩個正前鋒,已經知道路維好大機會又想學上一屆咁打無鋒陣。

-三位門將都係良幣

屆歷嘅德國門將位置都係競爭激烈 (Scoopnest.com)

首先係門將位置,紐亞喺舊年9月因為受傷而宣告收咧,直到4月中先至重新投入拜仁嘅訓練。佢喺6月2號對陣奧地利嘅熱身賽前,冇參加過任何比賽,雖然紐亞喺6月8號對沙地阿拉伯比賽完全復出,筆者相信佢仍然會係門將位置首選。

但如果有咩閃失,二號門將達史特根(Marc-André ter Stegen)絕對可以頂替他的位置,呢位巴塞門將今季表現出色,西甲聯賽有一半比賽喺零封對手。

至於三號門將查普(Kevin Trapp),效力巴黎聖日門同樣表現出色。可惜時不與我,今屆出賽機會渺茫。

-後防傷病潮嚴重

曉姆斯(左)同謝路美·保定(右),是但一個有咩冬瓜豆腐對德國都係致命打擊 (ESPN)

筆者最為擔心係德國嘅後防。喺後衛位置上,主力中堅謝路美·保定(Jérôme Boateng)同曉姆斯(Mats Hummels)喺今季都係飽受傷患困擾,目前佢哋嘅狀態仲係未知知數。而且,兩位都係擅頂之人,一但因傷缺陣,會好影響德國嘅角球部署。

不過,有一班喺上年洲際國家盃崛起嘅球員,有機會因為佢哋嘅受傷而喺今屆世界盃發光發亮。首先係佢哋嘅拜仁隊友蘇利(Niklas Süle)係代替佢哋嘅首要人選,蘇利喺今季兩位主力受傷期間,長時間擔任拜仁嘅主力中堅,繼而令佢到入選23人大名單。

另外,效力車路士嘅魯迪加(Antonio Rüdiger)都會係頂替到兩人嘅中堅。佢既助攻能力係不容忽視,喺車路士嘅佢擁有同大衛·雷斯(David Luiz)一樣嘅帶波前插能力,同時長傳視野非常好,可以快速將個波送到前線進行射門。不過,呢位德國中堅偶然有失位嘅情況,呢點喺車路士都經常出現,叫佢做「大衛·雷斯二世」,非常貼切不過。

基美治已經穩奪德國右閘正選 (Bayern Strikes)

至於好多德國球迷喺拿姆退役之後一直擔心德國右閘問題,但筆者相信隨住拜仁新晉右閘甘美治(Joshua Kimmich)嘅崛起,相信已經向一眾德國球迷派下定心丹。
基美治喺哥迪奧拿(Pep Guardiola)執教拜仁嗰時嘅一塊瑰寶。出身自防中嘅佢,因為中堅傷患潮而畀哥迪奧拿改造成後防球員,甚至不時擔任右閘或中堅,導致佢成為一個攻守兼備嘅球員。筆者認為佢優點好多,拼搶能力強,擅於MARK人,有出色防守判斷力,控波時非常冷靜,腳下功夫相當唔錯。而且佢體能充沛,能夠勝任快速嘅轉守為攻戰術。至於射門能力方面,甘美治喺今季提升唔少,喺歐聯對皇馬兩回合比賽入面,兩回合都都取得入波,差啲幫助拜仁擊敗皇馬殺入今季歐聯決賽。

-中場星光熠熠

6.基迪拉(祖雲達斯)、7.達斯拿(巴黎聖日門)、8.卻奧斯(皇家馬德里)、10.奧斯爾(阿仙奴)、11.馬高·萊斯(多蒙特)、13.湯馬士·梅拿(拜仁慕尼黑)、14.哥列斯卡(史浩克04)、19.施巴斯坦·魯迪(拜仁慕尼黑)、20.祖利安·白蘭特(利華古遜)、21.根度簡(曼城)

德國中場實力雄厚,總共有11位球員入選今夏世界盃決賽週23人大名單。雖然對比2014年嘅陣容,今次少咗「小豬」舒韋恩·史迪加(Bastian Schweinsteiger)。不過梅拿(Thomas Müller),奧斯爾(Mesut Özil),卻奧斯(Toni Kroos)同基迪拉(Sami Khedira)喺今屆世界盃仍然會係德國陣中主力,而達斯拿(Julian Draxler)都獲選入23人大名單。因此,筆者相信德國嘅打法同風格都唔會受到太大影響。至於根度簡(İlkay Gündoğan)、哥列斯卡(Leon Goretzka)、祖利安·白蘭特(Julian Brandt)同魯迪(Sebastian Rudy),喺目前人滿為患嘅情況下,必定後備居多,好難有機會正選登場。

卻奧斯無疑係目前世界最頂級中場之一 (英國獨立報)

基迪拉近年擺脫傷患困擾,喺意甲祖雲達斯表現出色 (Sky Sports)

奧斯爾火速傷癒,大派定心丸 (Evening Standard)

近年梅拿狀態唔穩定,存有隱憂 (GOAL.COM)

達斯拿嘅正選位置受到萊斯嘅威脅 (Bayern Strikes)

萊斯絕對係德國喺今年世界盃嘅絕對主力,但大前提係唔好又傷 (Sport Bild)

由於以上中場球員大家都係耳熟能詳,分析得多你唔悶我都悶。因此筆者只想喺度講下馬高·萊斯。佢嘅能力係助攻能力強,埋門能力亦佳。而且,忠誠度高!

呢位多蒙特翼鋒喺職業生涯上一直飽受傷患困擾,喺2010年世界盃前夕首次入選國家隊,幾日之後竟然因傷退疋隊,去到2012年歐洲國家盃首次喺大賽亮相,為德國射入一球。點知4年前世界盃開鑼前,又因為足踝韌帶受傷無奈退隊,坐睇德國喺巴西第4度封王,最後到2016年歐國盃前夕又因傷退隊。直到今次終於有機會首次喺世界盃亮相,令一眾德國球迷興奮不已。萊斯自己本人都喺對沙地阿拉伯嘅友誼賽之前表示:「我自己都好驚又傷無得踢世界盃。」,佢本人都喺對沙地嘅友誼賽交出一個助攻,表現搶鏡。

遺憾嘅係佢老友馬里奧·古沙(Mario Götze)落選23人大名單,我哋無得睇佢哋跳起再膊頭對膊頭嘅入波慶祝畫面。

-前鋒只得兩位 都係望而生畏

前鋒:9.迪姆·華拿(RB萊比錫)、23.馬里奧·高美斯(史特加)

迪姆·華拿速度驚人,絕對係德國打快攻嘅首選 (Eurosport)

迪姆·華拿(Timo Warner),22歲嘅佢目前效力德甲新貴rb萊比錫。強項係超強嘅後上能力,步幅同變向大,絕對佢一眾後防嘅夢魘。今季佢表現出色,喺rb萊比錫作客2:0擊敗漢堡嘅聯賽賽事入面。佢喺一次反擊入面只係用咗7秒狂奔50米,電光火石之間就將個波勁射入網。而賽後報告顯示佢呢次反擊嘅跑動速度達到每小時33.6公里。(lINK: https://www.youtube.com/watch?v=Y71cb7tDfp4)

而華拿喺季尾必定離隊他投,目前同佢扯上關係嘅有英超利物浦同西甲皇馬。由於華拿嘅優點非常適合德國嘅「機動性」打法。因此筆者絕對相信佢係德國今屆世盃正選前鋒上嘅不二人選。

至於馬里奧·高美斯(Mario Gomez),目前效力德甲史特加。年屆33歲嘅佢顛峰期已過。上屆因為傷患關係,曼終落選最後23人名單。高美斯速度慢,但門前把握力唔錯,絕對有力成為後備殺手。

•小組分析
就陣容而言,德國依然係大力神杯的有力爭奪者之一。由於「阿媽係女人嘅關係」,筆者唔會太詳細分析德國出綫形勢,因為真係無咩好分析。相信好多德國球迷睇到呢架「德意志戰車」喺友誼賽出現一啲問題。距離世界盃仲有大約1個星期時間,相信德國隊會有所改變。

德國作為F組嘅種子隊,小組首名出綫問題唔大,問題係可唔可以以三戰全勝呢個佳積出綫。筆者喺32人入面都比較睇好呢架「德意志戰車」能夠喺俄羅斯有所斬獲,至少都應該穩入4-8強。

總括而言,德國隊F組首名出綫應該唔係大問題,筆者只係擔心今屆呢隊波冇咗過去嗰種雄心。因為過去嗰班主力球員,有啲係2002年或者2006年呢兩屆之間開始奮鬥到2014年奪冠,佢哋一次又一次失敗嘅,自自然有Heart去博。但呢班球員,筆者會打一個問號。

另外,倘若德國可以喺F組頭兩輪全勝提早出綫,德國可以畀班主力休息,畢竟今年呢班主力都輪流經歷過傷病潮,畀佢哋抖多幾日,何樂而不為?

對比其他國家隊,教練路維由2006年帶隊至今,12年嚟帥位一直穩定,從未傳出德國足總因為洲際賽事失利而易帥。令佢對每一個球員都十分了解。所以,德國要戰勝嘅只得一樣嘢,就係自己!

•德國小組賽賽程表:
F組

6月17號 23:00 德國vs 墨西哥 下諾夫哥羅德球場

6月24號 00:00 德國 vs 瑞典 索契菲斯特球場

6月27號 22:00 韓國 vs 德國 喀山體育場

•陣容預測

德國隊正選名單 4-2-3-1

門將:紐亞

後衛:赫達、曉姆斯、謝路美·保定、甘美治

中場:卻奧斯、基迪拉

前場:達斯拿/馬高·萊斯、梅拿、奧斯爾

前鋒:迪姆·華拿

.

全民俾LIKE 人人「些牙」!

.