文/ William Luk

韓國著名打氣歌

 “오 必勝 코리아! 오 必勝 코리아!

오 必勝 코리아! 오 올레 올레!

오 必勝 코리아” (國漢文)

 (廣東話翻譯:「韓國必勝!」-尹度玹Link: https://www.youtube.com/watch?v=VG0aQQKthYg )

大韓民國足球代表隊 (國漢文: 大韓民國 蹴球 國家 代表팀;諺文: 대한민국 축구 국가 대표팀)

教練:申台龍

世界排名:61

外圍賽成績:亞洲區A組次名

外圍賽最佳射手:孫興慜(7球)

歷年出席世盃決賽週次數:10次(1954年、1986年至今)

歷屆最佳成績:殿軍(2002年)

今屆訓練基地:聖彼得堡

韓國雖然係一個現代化國家,但國民思維好多都停留喺好傳統嘅漢文化觀念。所以,呢班韓國大國腳,唔單止要全心全意投入比賽,仲要背負國人對佢哋嘅寄望,甚至係責難。由上年世盃慘敗回國畀國民喺仁川機場扔麥芽糖嘅情況嚟睇,如果唔希望有出現類似行為,班球員真係要生性。筆者喺上年9月經仁川機場轉機嗰時同一班韓國人一齊睇韓國對烏茲別克嘅最後一場外圍賽,最終和波收場。雖然韓國一早奠定出綫,但係筆者身邊啲大叔喺完場之後好多都面露不滿咁離場,情況極為尷尬。

講起韓國足球,所有人都總會將佢同一海之隔嘅日本做對比。兩隊貴為為東亞足球強國,喺戰術風格截然不同,但近年嚟拎到嘅成績其實都不相伯仲。同今屆身處H組嘅日本一樣,目前嘅韓國都正處於一個青黃不接嘅時期。近年,我哋都好少聽到有咩韓國超新星彈起嘅新聞。

「太極虎」自1986年以來,連續9屆殺入世界盃決賽週,隊史總共已經參加過10次世界盃決賽週,已經係亞洲之首。而一眾香港球迷對於韓國喺2002年世界盃嘅表現會有好大爭議,嗰屆嘅韓國,絕對唔可以稱得上實至名歸。當然筆者都認為入面係充滿一系列爭議性判決,甚至有激進球迷會認為絕對係「黑哨」。

而時隔16年,今日嘅韓國雖然係亞洲一流,但過去幾年都已經呈現一種力不從心嘅感覺,到底呢隻「太極虎」,會唔會變成一隻「太極貓」?

今屆韓國嘅2018年世界盃決賽週28人初選名單喺2018年5月14號公佈,部分球員因傷退隊。再喺5月22號將名單減到26人。而23人最終名單喺2018年6月2號公佈,當中有7位球員出席過上屆世界盃決賽週,而效力歐洲主流聯賽嘅孫興慜同寄誠庸等一概入選。

韓國2018世界盃23人大軍名單,樣夠Chok,但實力呢?(韓國足總Facebook)

韓國23人大名單如下:

門將
1.金承奎(神戶勝利船)、21.金鎮鉉(大阪櫻花)、23.趙賢祐(FC大邱)

後防
2.李鎔(全北現代)3.鄭昇炫(鳥栖砂岩)、4.吳友石(濟州聯)、5.尹榮善(FC城南)、6.朴柱昊(蔚山現代)、12.金民友(尚州尚武)、14.洪喆(尚州尚武)、19.金英權(廣州恆大)、20.張賢秀 (FC東京)、22.高約翰(FC首爾)

中場
8.朱世鐘(牙山木槿花)、10.李昇祐(維羅拿)、13. 具滋哲(奧格斯堡)、15.鄭又榮(神戶勝利船) 、16.寄誠庸(史雲斯)(C)、17.李在城(全北現代)、18. 文善玟(仁川聯)

前鋒
7. 孫興慜(熱刺)、9. 金信煜(全北現代)、11. 黃喜燦(薩爾斯堡紅牛)

 

回顧

2014年韓國民眾喺國家隊小組賽出局後喺機場向歸國球員抗議,向球員丟擲麥芽糖,並大叫:「엿먹어(食糖)」,呢個行為喺韓國係極唔禮貌,等同(Fxxk You)(圖翻攝自《StarToday》)

2014年韓國經歷一個極不如意嘅世界盃,H組3戰1和2負墊底,名宿洪明甫引咎辭職。直到2014年9月24號,韓國足總宣佈由德國籍教頭史泰歷克(Ulrich Stielike)接手韓國國家隊,史泰歷克喺教員生涯戰績彪炳,幫助過德甲慕遜加柏拎過歐聯冠軍。而喺呢幾年期間「太極虎」表現出色,先後贏得2015年亞洲盃亞軍,2015年同2017年東亞盃冠軍,亦都喺今屆世盃亞洲區外圍賽第二圈以8戰全勝入27球失0球嘅成績殺入第三圈最後12強。

韓國隊喺今屆外圍賽第三圈表現一般,差啲要踢附加賽同澳洲爭最後一個出綫席位 (Mohammad Hassanzadeh)

申台龍接手國家隊時間短,但佢擔任過U21教練,所以對目前韓國最優秀嘅年輕球員可以講係瞭若指掌 (Football Tribe)

但去到外圍賽第三圈最後12強,韓國喺2014年世界盃決賽週嘅防守問題又再次表露無遺,先後不敵中華人民共和國、卡塔同伊朗,出綫情況岌岌可危。終於,去到外圍賽尾聲,史泰歷克因為韓國隊防守不濟嘅問題畀韓國足總終止合約。但仍然值得一提嘅係,佢執教996日超越咗名宿許丁茂嘅912日成為韓國國家隊歷史上執教時間最長嘅教練。

隨後韓國足總任命U-21國青隊主帥申台龍(Shin Tae-yong/신태용)接任國家隊教鞭,申台龍被稱為韓國足球嘅「救火教練」,曾經喺2016年巴西里約奧運會走馬上任主教練一職,率領小太極虎喺小組賽上取得了2勝佳績晉級8強,可惜喺對洪都拉斯嘅8強決賽以0:1惜敗對手。佢喺上年11月又臨時頂替出任U21國家隊主教練一職,經過唔夠7個月嘅賽前準備,喺今年5月舉行嘅韓國世青賽上帶領球隊挺進16強,呢個已經係佢第3次扮演「救火教練」角色。

韓國媒體報導佢同球員之間關係相處較其他教練融洽,無韓國主流社會漢文化嘅階級觀念,令到包括孫興慜呢埋球員都對於佢嘅帶隊畀予積極首肯,令佢最後出任國家隊一職加分唔少。

而申台龍喺韓國球壇素有「狐狸」之稱,亦都係球壇少數嘅One Club Player,由1992年到2004年始終如一效力韓職城南一和,司職進攻中場嘅佢喺韓職一共上場401次,射入99球同交出68次助攻,先後拎過韓職年度最佳新人、年度最佳射手同年度最佳球員獎項,亦都連續9個球季入選韓職最佳陣容。退役之後喺2005到2008年遠赴澳洲昆士蘭獅吼出任助理教練一職,同年重返韓職,出任母會城南一和教練,並喺2012年奪得亞洲冠軍聯賽冠軍。

申台龍上任之後韓國雖然喺最後兩場外圍賽韓國無任何入波,但同時都無再失波,最終有驚無險拎到A組次名,直接拎到2018年俄羅斯世界盃入場券。

所以,叫佢做「救火教練」係最好不過。皆因「太極虎」喺當時已經係一個燙手山芋無人敢接手。而筆者認為呢位49歲少帥嘅優勢係佢曾經出任過U21教練,所以佢對於目前韓國最優秀嘅年青球員情況係瞭若指掌,可以有調動球員嘅主動同積極性,掌控國家隊整體情況,尤其喺最為重要嘅人事疏通能力得到隊內成員嘅普遍認可,對於喺較短時間內重組「太極虎」係有一定優勢。以下係韓國喺今屆世界盃外圍賽戰績:

-第二圈G組:

緬甸0:2韓國

韓國8:0寮國

黎巴嫩0:3韓國

科威特0:1韓國

韓國4:0緬甸

寮國0:5韓國

韓國1:0黎巴嫩

韓國3:0科威特*

*科威特因為通過一項畀政府介入科威特足球事務嘅體育法,而被國際足協議決取消科威特嘅會籍,同時亦禁止科威特足球隊參加任何國際賽。最後,國際足協對科威特足球隊仲未進行嘅三場比賽裁定科威特以0:3輸晒三場比賽。

-第三圈A組:

韓國3:2 中國

敍利亞0:0 韓國

韓國3:2卡塔

伊朗1:0韓國

韓國2:1烏茲別克

中華人民共和國3:0韓國

韓國1:0敍利亞

卡塔3:2韓國

韓國0:0 伊朗*

烏茲別克0:0韓國*

*由申台龍領軍

 

球員分析
今屆世界盃輿論上冇人會睇好韓國隊,筆者甚至覺得佢哋好大機會小組賽完咗就行人止步返韓國。頂攏可以同墨西哥以及瑞典爭下次名出綫,以下我會分析一下韓國嘅陣容:

-龍門位置已定 金承奎夠後生
門將1.金承奎(神戶勝利船)、21.金鎮鉉(大阪櫻花)、23.趙賢祐(FC大邱)

金承奎早喺2014年世界盃成為「太極虎」三號門將,今次由佢擔正大旗,心理質數將係關鍵 (Zimbio)

如無意外,金承奎(Kim Seung-gyu/김승규)將會係韓國隊嘅一號國門,呢個效力於神戶勝利船嘅門將,出身自蔚山現代。佢喺世界盃第三圈12強嘅10場比賽入面,有6場正選上陣。

筆者認為佢嘅優點係快速反應,喺日職屢救險球。但係當處理一啲快速開波果時準繩度欠奉。

至於,另外兩位門將,金鎮鉉(Kim Jin-hyeon/김진현)同趙賢祐(Cho Hyun-woo/조현우)同樣參加過2018東亞盃,目前係韓國門將位置嘅主要後備力量。

最令香港球迷驚訝嘅係,今次申台龍冇徵召到效力喺日職川崎前鋒嘅老牌國門鄭成龍(Jung Sung-ryong/정성룡),呢位33歲老將大賽經驗豐富,曾經以正選身份出戰2010年同2014年世界盃決賽週,更喺2010年世界盃幫助「太極虎」打入16強。而且佢仍然係當打之年,筆者認為應該揀佢輔助金承奎。

-後防甩漏多

喺韓國後中前場入面,後防應該係最令人擔心嘅一環。雖然有高達10位球員入選。但早幾屆韓國嘅後防都有好多外流球員,而且喺世盃發揮得唔錯。早喺上屆開始,韓國嘅後防可以用慘不忍睹嚟形容。喺小組賽3戰全輸失6球。

而今屆韓國嘅後防,最有大賽經驗都已經係效力中超廣州恆大嘅金英權(Kim Young-gwon/김영권)同由歐洲回流嘅朴柱昊(Park Joo-ho)。不過考慮到申台龍揀10位後防球員入選,筆者認為韓國有機會打一個3-4-1-2嘅5人防守陣型,可能類似上屆哥斯達黎加嗰一種,有機會放棄4-4-2陣形。

金英權(右)喺上屆世盃已經係韓國主力後防 (RTE)

筆者相信金英權絕對係韓國嘅後防主力,現年28歲嘅佢效力中超廣州恆大,左囿嘅佢司職中堅,亦都可以客串左閘,絕對係全能後防球員。出身於韓國足球青訓名校全州大學,之後喺2009年世青盃嘅出色表現加盟日職FC東京,喺FC東京降班後加盟大宮松鼠,之後效力廣州恆大至今,並幫助廣州恆大拎過兩次亞洲聯賽冠軍。而當時金英權嘅出色表現導致有意甲球會曾經希望佢加盟,但最後都畀廣州恆大用高價人工令佢留低。

佢係少數唔夠20歲就成為韓國大國腳嘅球員。喺2012年倫敦奧運會以主力中堅身份代表韓國國家奧運隊,並幫助韓國拎到銅牌。

筆者曾經幾次喺現場睇過金英權踢波,呢位中堅喺韓國中堅嚟講算係身型硬朗,具良好嘅位置感同防守意識,有時可以直接長傳畀前鋒造出具威脅嘅射門。但始終亞洲足球競技水平唔係世界一流,喺2014年世界盃2:4輸畀阿爾及利亞嘅比賽,4個失球佢都要負全責。希望今屆可以吸取經驗,唔好再派「膠」。至於佢嘅拍檔,筆者相信申台龍會喺張賢秀(Jang Hyun-soo/장현수)、鄭昇炫(Jung Seung-hyun/정승현))、吳友石(Oh Ban-suk/오반석)同尹榮善(Yun Young-sun/윤영선)任擇其一。

朴柱昊曾經喺多蒙特彈起過半季 (FOX Sports Asia)

自從李榮杓(Lee Young-pyo/이영표)喺2011年退出國家隊之後,韓國左閘位就一直無一個穩定人選。上屆左閘正選尹錫榮自申台龍上任後就棄之不用,今屆入選23人名單嘅左閘有兩位,分別係朴柱昊(Park Joo-ho/박주호)同洪喆(Hong Chul/홍철)。其實兩個喺任何方面都比唔上全盛時期嘅李榮杓,但目前左閘位等呢兩個選擇,只能限米煮限飯,但兩個左閘同時能攻能守,相信申台龍都幾頭痕。

先講下朴柱昊,31歲嘅佢,有流歐經驗,曾經效力過瑞士班霸巴素利,協助巴素利拎過聯賽冠軍之餘,都喺2011年幫助球隊喺歐聯過擊敗英超豪門曼聯。後嚟效力過德甲緬恩斯同多蒙特,而喺2015年亞洲杯已經見到佢可以為中場帶來了多樣性風格。朴柱昊最令我印象深刻嘅係佢喺2015年霸盃對陣卡斯洛達嗰場,喺補時第93分鐘後上接應長傳攻入1球,協助球隊以2比1絕殺對手。

洪喆速度快,能攻能守。喺外圍賽0:1輸比中國嗰場算係表現較好嘅一位

至於洪喆,現年27歲,效力韓職班霸水原三星藍翼。筆者喺亞洲聯賽冠軍盃睇過佢踢波,佢嘅特點係速度快而且體能充沛,而且身體質素非常強壯。

-中場寄望寄誠庸
中場8..朱世鐘(牙山木槿花)、10.李昇祐(維羅拿)、13. 具滋哲(奧格斯堡)、15.鄭又榮(神戶勝利船) 、16.寄誠庸(史雲斯)(C)、17.李在城(全北現代)、18. 文善玟(仁川聯)

中場方面,效力歐洲五大聯賽嘅寄誠庸(Ki Sung-yueng/기성용)、具滋哲(Koo Ja-cheol/구자철)以及李昇祐(Lee Seung-woo/이승우)悉數入選,另外會輔以日韓職球員。。而較香港球迷熟悉嘅英超水晶宮球員李青龍(Lee Chung-yong/이청용)由於近期參加的比賽較少狀態欠佳,最終未能進入最後23人大名單,筆者認為早幾年效力保頓嘅佢斷腳受傷喺球員生涯轉捩點。

申台龍麾下嘅韓國隊將會以寄誠庸作為中場核心 (bta.bg)

先講下隊長寄誠庸(Ki Sung-yueng/기성용),呢位29歲嘅韓國隊長被公認為係目前韓國足球歷史上最好嘅組織者(Playmaker)。作為「後朴智星」年代第一位隊長,今屆已經係佢第三次參加嘅世界盃決賽週,早2屆都係「太極虎」嘅11人正選之一。

目前屬於自由身嘅佢,先前效力英超球隊史雲斯。早喺2009年效力蘇超班霸些路迪就已經令人眼前一亮,隨後喺2012年夏天加盟史雲斯,第一季就幫「天鵝」拎到英格蘭聯賽盃冠軍。

具滋哲實力唔錯但作風低調,為韓國不可或缺嘅一員

筆者認為佢係一個身材高大,有制空力,遠射能力,控球技術高超,傳球視野強勁嘅球員,係可一個可以作為攻守轉換嘅球員。不過佢作為一位防守中場,防守力弱,攔截能力差。今季史雲斯最終護級失敗,同佢防守不力都有一定關係,佢會喺7月正式離開史雲斯。咁到底會繼續留歐,定重返亞洲,就真係要睇呢位隊長自己喺今屆世界嘅造化喇。

具滋哲(Koo Ja-cheol/구자철),目前效力德甲奧格斯堡,係目前喺歐洲發展較順利嘅韓國球員。 2011年,當年21歲嘅具滋哲憑藉住喺亞洲國家盃決賽週梅開二度,協助南韓以2:1反勝巴林,而開始被人所認識。一戰成名後,呢位韓國近年嘅中前場「萬金油」就轉會到德甲禾夫斯堡,之後喺德甲效力至今。
而家嘅具滋哲已經係「太極虎」嘅領軍人物之一,肯定會喺今屆世界盃必然正選。筆者覺得佢係一個射門技術優良,而且善於盤扭。但有一個問題,佢防守係極弱。雖然論名氣,具滋哲唔及現任隊長寄誠庸同主力射手孫興慜,但呢位奧格斯堡中場喺國家隊入面,仍然扮演住一個相當重要嘅角色。

李昇祐係韓國少見嘅技術型球員 (Modern Seoul)

最後要講下出身自巴塞青訓嘅李昇祐 (Seung Woo Lee/이승우),年僅20歲。目前效力意甲球會維羅拿,有「韓國美斯」之稱。人如其名,佢嘅特點好似阿根廷球星美斯,可以自己將個波由邊帶去中間搵空位去射門。而且佢盤扭技術好到不得了,係韓國少見嘅技術型球員。筆者認為佢係韓國今屆世界盃有機會崛起嘅超新星。

-前場孫興慜獨力難支
前鋒7. 孫興慜(熱刺)、9. 金信煜(全北現代)、11. 黃喜燦(薩爾斯堡紅牛)

孫興慜喺近年韓國少數可以喺歐洲頂級聯賽站穩陣腳嘅球員 (Telegraph)

講到前鋒,唯可一以值得關注嘅係孫興慜(Son Heung-min/손흥민),筆者要喺度講一講,佢個漢字名嘅「慜」,廣東話讀敏,而唔係叫孫興民。呢啲嘢唔求其得,尊重他人好緊要,你試下陳大文寫陳大民,你估大文會點諗?

孫興慜早喺16歲旅歐,加入德國漢堡青訓體系,後嚟升上一線隊,逐漸踢出名堂。2013年,德甲利華古遜以1000萬歐元將佢帶到「藥廠」,表現突出。而2015年佢轉戰英超熱刺,以2190萬英鎊嘅轉會費成為歷史上最高身價嘅亞洲球員。

目前,孫興慜效力熱刺三個球季就入咗30球,係英超史上單季入波最多嘅亞洲球員。筆者相信呢位亞洲「入波機器」可以帶領韓國由F組突圍而出。

而呢位亞洲「入波機器」有出色嘅射術,臨門一腳總係可以非常冷靜去處理,當時效力漢堡嘅佢已經顯現出呢個特點。另外,孫興慜既具備亞洲人靈活,快速同爆發力強嘅特點,同時又具備韓國人堅韌同奔跑能力超強嘅特質。所以,孫興慜有時會令筆者諗起以往嘅車范根,朴智星奴同李榮杓呢班喺歐洲成功嘅韓國球員。但佢嘅傳波能力同頭鎚能力一直都有待改善,呢點相信好多熱刺迷都不敢苟同。

因此,筆者認為孫興慜必定係韓國喺今屆世界嘅必然正選,因為韓國一但無咗孫興慜,如同自折一翼。喺6月8號0:0玻利維亞嘅友誼賽,孫興慜連後備名單都無嘅情況下,韓國隊全賽14次射門顆粒無收,射門多靠中場外圍射施。今次嘅試陣申台龍應該明白,前鋒線上唯一可信嘅只有孫興慜。而且孫興慜因為*面臨兵役問題,如果再唔喺國家隊大賽有任何成績,佢就要喺2021年前返韓國服兵役,所以佢自然會博到盡。

*大韓民國政府規定,所有男性國民必須喺29歲前服滿2年兵役,否則將會被剝奪國籍。不過,如果幫到國家拎到重大榮譽,兵役期限可以減短。以隊長奇誠庸為例,佢曾代表大韓民國喺2012年倫敦奧運會上,勇奪銅牌,令到佢兵役期限被縮短到4個禮拜。

黃喜燦(左)預計會成為韓國第二前鋒, 文善玟(右)係申台龍麾下嘅一個重要後備

至於,另一個效力歐洲奧地利班霸薩爾斯堡紅牛嘅前鋒黃喜燦(Hwang Hee-chan/황희찬),速度係佢唯一強項,後上能力唔錯。

佢喺16-17年球季表現驚人,幫助紅牛拎到聯賽冠軍,並且喺奧地利盃決賽射入一球,協助紅牛2:1擊敗維也納迅速,成為「雙冠王」。今季表現大幅下滑,上陣20場只入5球。但今季喺歐霸盃有唔錯嘅發揮,上陣9次入3球,幫助紅牛打到入4強。

最後要講講金信煜,呢位1米98嘅全北現代中鋒制空力驚人。喺亞洲冠軍聯賽賽事,佢經常利用自身衝擊力令到對手使用「超技術」對付佢,筆者估計喺第二輪對墨西哥嘅比賽有機會上陣,特別係墨西哥平均身高完全輸蝕比韓國。

小組分析

筆者相信孫興慜會係韓國喺今屆世盃最落力嘅一位,因為再唔喺國家隊拎到獎牌,佢喺2021年前要返韓國服2年兵役

而前線嘅孫興慜毫無疑問會係陣中焦點,而且佢避免要返韓國服2年兵役就一定要剩餘嘅大賽入面拎到獎盃,如果孫興慜要回國服兵役,佢嘅球員生涯一定玩完。筆者相信如果佢可以用熱刺踢波嘅態度去參加世界盃,或者可以幫到韓國隊引發一啲衝擊。
今屆外圍賽韓國嘅表現令人好失望,雖然「太極虎」已經連續第九次參加世界盃決賽。但筆者認為韓國喺呢組會係實力最弱一隊, 而且自2002年日韓世界盃以東道主身份拎完殿軍之後,「太極虎」喺過去3屆世界盃佢哋只係贏得兩場比賽,加上呢隊韓國隊嘅實力比過去嗰4屆大不如前,已經由一隻「太極虎」變為「太極貓」。

總括嚟講,目前「太極虎」除咗個別球員有極強嘅天賦外,其他大部分球員能力都比較差,所以筆者唔睇好韓國隊有實力同墨西哥以及瑞典爭取次名出綫,甚至有可能小組賽執底出局。
但係緊記,正正由於佢哋一早接受弱者呢類標籤,所以喺小組賽幾乎冇任何壓力。而且頭兩輪係對瑞典同墨西哥,或者有機會一兩場爆下冷都唔出奇。只要最後一輪對手德國只要喺前兩場全勝,喺第三場篤定晉級嘅情況下,佢哋有可能以練兵方式迎戰韓國。若果韓國喺當時兩輪小組賽拎到甜頭嘅話,或者可以偷下雞,從而喺F組突圍而出。

所以F組出綫形勢,筆者會有咁嘅分析,德國首名毫無懸念,次名出綫有啲睇頭。

今次韓國係太極虎定太極貓,兩個禮拜後就一清二楚

韓國小組賽賽程表:

F組

6月18號 20:00 瑞典vs 韓國 下諾夫哥羅德體育場

6月23號23:00 韓國vs 墨西哥羅斯托夫體育場

6月27號22:00 韓國vs 德國喀山體育場

陣容預測:

韓國隊陣容預測Plan A 4-4-2

門將:金承奎

後防:李鎔、金英權、張賢秀、朴柱昊/洪喆
中場:李在成、寄誠庸、鄭又榮、具滋哲

前鋒:黃喜燦、孫興慜

韓國隊陣容預測Plan B 3-4-1-2

門將:金承奎

後防:鄭昇炫、金英權、張賢秀

中場:高約翰、寄誠庸、具滋哲、洪喆

進攻中場:李賢祐

前鋒:黃喜燦、孫興慜

全民俾LIKE 人人「些牙」!

.