文/ William Luk

墨西哥著名打氣歌”EEEEEEEEE…………….PUDO”

墨西哥足球代表隊(西班牙文: Selección de fútbol de México)

教練:祖安·卡路士·奧蘇利奧(Juan Carlos Osorio)

世界排名:15

今屆外圍賽成績中北美洲區第5圈首名

外圍賽最佳射手:洛贊奴、卡路士·韋拿、捷西斯·曼維·哥朗拿、查維亞·靴南迪斯(3球)

歷年出席世盃決賽週次數: 16 (1930 年、1950年、1954年、1958年、1962年、1966年、1970年、1978年、1986年、1994年、1998年、2002年、2006年、 2010年、2014年以及2018年)

歷屆最佳成績8強(1970 年同1986年)

今屆訓練基地:莫斯科希姆基

「阿茲特克雄鷹」墨西哥一直以嚟都係中北美地區嘅足球霸主,喺世界盃大賽嘅戰績一直都係中北美洲一馬當先。呢個國家雖然治安差劣,當中販毒問題衍生嘅幫派仇殺令好多國民都惶惶不可終日,但足球係少數令佢哋快樂嘅途徑。筆者好鐘意墨西哥,5年前留過喺度1個月,特別係啲拉丁混血女仔嚟我會唔捨得走。

今次係墨西哥喺世界盃第16次出場,呢一個戰績僅排在德國、巴西、阿根廷同意大利之後。墨西哥喺之前15次世界盃經最佳戰績試過兩次進軍八強(1970年、1986年),呢兩次最好成績都係墨西哥以東道主身份拎到。

今屆世界盃墨西哥28人初選名單喺5月14號公佈,之後喺5月23號因為阿拉烏祖(Néstor Araujo)因傷退隊而減到27人。再喺6月2號再減到24人。最後,喺6月4號公佈墨西哥23人大名單,當中有15人曾經參加過上屆巴西世界盃,大賽經驗自然豐富。

今屆世盃決賽週墨西哥23人大名單(墨西哥足總Facebook)

墨西哥23人大名單:

門將:
1.捷西斯·哥朗拿(藍十字)、12.泰拿華拉(托盧卡)、13.奧祖亞(標準列治)

後防:
2.曉高·艾耶拉(老虎隊)、3.卡路士·沙些度(法蘭克福)、4.拉菲爾·馬基斯(阿特拿斯) 、5.迪亞高·雷耶斯(波圖)、 8.米基爾·拿恩(西維爾)、15.赫達·摩蘭奴(皇家蘇斯達)、21.艾臣·艾華利斯(阿美利加) 、23.捷西斯·加也度(蒙特利)

中場:
6.莊拿芬·杜斯山度士(洛杉磯銀河)、8.馬高·法比安(法蘭克福)、10.基奧雲尼·杜斯山度士(洛杉磯銀河)、16.赫達·靴里拉(波圖)、18.古亞達度(貝迪斯)(C)

前鋒:
9.魯爾·占美尼斯(賓菲加)、11.卡路士·韋拿(洛杉磯FC)、14.查維亞·靴南迪斯(韋斯咸)、17.捷西斯·曼維·哥朗拿(波圖)、19.奧利比·柏拉達(阿美利加)、20.查維亞·阿基路(老虎隊)、22.洛贊奴(PSV燕豪芬)

回顧:

奧蘇利奧主攻嘅踢法非常適合墨西哥(Zimbio)

「阿茲特克雄鷹」現任教頭係哥倫比亞籍嘅奧蘇利奧,自從2015年10月上任成為墨西哥國家隊教練,同時都係墨西哥第一位哥倫比亞籍教練。歷年嘅墨西哥球員都係好難駕馭,但奧蘇利奧就迅速展現出自己對於更衣室管理嘅能力,令隊內氣氛大為融洽。

呢位教頭風格崇尚快攻,我哋喺上年洲際國家盃小組賽已經見到墨西哥嘅打法係大開大合,相當有觀賞性。但早喺2016年百年美洲盃4強0:7大敗智利一役,筆者已經知道墨西哥呢類有前無後嘅打法一但對上比佢仲快嘅球隊,佢係兼唔到前顧唔到後,必定大敗收場。之後喺2017年嘅洲際盃4強1:4輸畀德國。

2016年嘅大敗無令到奧蘇利奧放棄呢種唔要命打法。喺之後嘅2018年世界盃外圍賽仍然堅持呢種主攻踢法。根據中北美洲地區嘅世盃賽制,墨西哥因為FIFA排名高而無需參加前三圈嘅比賽,直接進入第四圈嘅分組賽。佢哋同加拿大、洪都拉斯以及薩爾瓦多分同組。結果,墨西哥狂風掃落葉,頭五場全贏,早早篤定晉級第五圈嘅資格。最終「阿茲特克雄鷹」以5勝1和入13球失1球嘅成績,喺小組首名出線。以下係墨西哥喺第4圈A組嘅成績:

墨西哥3:0薩爾瓦多

洪都拉斯0:2墨西哥

加拿大0:3

墨西哥2:0加拿大

薩爾瓦多:3墨西哥

墨西哥0:0洪都拉斯

去到外圍賽第五圈,面對住美國、巴拿馬、千里達、洪都拉斯同哥斯達黎加呢班中北美洲強隊,墨西哥都輕鬆面對。呢隻「阿茲特克雄鷹」頭7輪已經5勝2和得17分,提前三輪就拿到了飛往俄羅斯的機票,成為咗第四支獲得2018年世界盃決賽週席位嘅國家(唔包括東道主俄羅斯)。最終,奧蘇利奧帶領嘅墨西哥喺呢圈總共10戰拎到21分,入16球失7球,領先次名廿斯達黎加5分,成為榜首球隊。以下係墨西哥喺第五圈嘅成績:

美國1:2墨西哥

巴拿馬0:0墨西哥

墨西哥2:0哥斯達黎加

千里達0:1墨西哥

墨西哥3:0洪都拉斯

墨西哥1:1美國

墨西哥1:0巴拿馬

哥斯達黎加1:1墨西哥

墨西哥3:1千里達

洪都拉斯3:2墨西哥

•陣中主力分析

-門將吳鎮字坐鎮力保墨西哥大門
1.捷西斯·哥朗拿(藍十字)、12.泰拿華拉(托盧卡)、13.奧祖亞(標準列治),

¡ Vamos!「SAM哥」

奧祖亞(Guillermo Ochoa)呢位「墨西哥SAM哥」,擔任墨西哥正選門將多年,大賽經驗極為豐富,球迷最記得佢上屆世界盃小組賽對住巴西連環神救,喺墨西哥後防線上最穩定嘅一個位。
但目前效力比甲標準列日嘅佢,球會生涯就極唔如意。2014年夏天加盟西甲馬拉加,結果第一季被投閒置散,第二季只上陣11場,仲要係正選門將卡文尼受傷先至有機會出場。之後被外借到西班牙南部格蘭納達,打足38場,但球隊最終降落西乙。最後,奧祖亞轉投比利時班霸標準列日,今季幫球隊拎咗比利時盃。

另外,效力墨西哥球會藍十字嘅哥朗拿(José de Jesús Corona),實力同樣不容忽視。呢位37歲二號門將,會喺奧祖亞受傷嘅慵況下,仍然有能力力保墨西哥大門不失。

-後防5屆老臣坐鎮
2.曉高·艾耶拉(老虎隊)、3.卡路士·沙些度(法蘭克福)、4.拉菲爾·馬基斯(阿特拿斯) 、5 .迪亞高·雷耶斯(波圖)、 8.米基爾·拿恩(西維爾)、15.赫達·摩蘭奴(皇家蘇斯達)、21.艾臣·艾華利斯(阿美利加) 、23.捷西斯·加也度(蒙特利)

今屆係馬基斯出席嘅第五次世界盃決賽週,亦都係最後一次

講起墨西哥後防,點可以唔講「長青樹」馬基斯( Rafael Márquez ),現年39歲嘅佢,喺今季效力墨西哥球會阿特拿斯(Atlas)。早前佢已經落實喺世盃結束後正式掛靴,希望呢位老將可以帶領墨西哥行得更遠。
值得一提,如果今屆決賽週馬基斯可以上陣,佢將會成為世界盃史上第3位曾經喺5屆世界盃上陣嘅球員,而前兩人分別係德國名將馬圖斯(Lothar Matthaus)同埋墨西哥神龍卡巴查(Antonio Carbajal)。(如果今屆意大利都出綫,保方都會有呢個成就)

摩蘭奴(左)喺2010年世界盃已經正選上陣,當時力抗法國翼鋒列貝利(Franck Ribéry) (FIFA)

赫達·摩蘭奴(Héctor Moreno)效力西甲皇家蘇斯達。筆者認為佢係墨西哥後防線上最穩定一位,目前30歲嘅佢正值中堅巔峰歲數,大賽經驗豐富,身型喺墨西哥嚟講算係高大,而且有一定嘅頭鎚能力,係少數墨西哥球員擁有嘅強項。
相信一眾紅魔Fans一定憎到佢爆,事關15年歐聯分組賽佢剷斷咗魯克·梳爾(Luke Shaw)隻腳,令佢往後球員生涯發展受阻。

雷耶斯(Diego Reyes)效力葡超班霸波圖,喺球會並唔係絕對主力。不過上陣12次就入2球1助攻,喺墨西哥隊中身材高大,同摩蘭奴一樣頭鎚能力出色。

沙些度絕對係墨西哥超新星(Zimbio)

沙些度(Carlos Salcedo)效力德甲法蘭克福,近年墨西哥最有潛力嘅後生中堅,24歲嘅佢資歷絕對唔係尚淺,早喺2015年就入選大國腳,並且參加過裡約奧運同17年洲際國家盃。
沙些度具有出眾嘅傳波能力,並且係一名鐘意長傳嘅中堅,喺法蘭克福試過有呢類助攻畀前鋒快速入波。另外,佢剷截時間好準,甚少畀球證吹罰。而且佢同樣身材高大,轉身速度都快,絕對可以保護墨西哥後防。
今季沙些度喺法蘭克福發揮出色,幫助球隊喺德國盃決賽3:1擊敗班霸拜仁慕尼黑,拎到法蘭克福30年嚟首個重要錦標。

-中場組織能力強古亞達度獨力撐
6.莊拿芬·杜斯山度士(洛杉磯銀河)、8.馬高·法比安(法蘭克福)、10.基奧雲尼·杜斯山度士(洛杉磯銀河)、16.赫達·靴里拉(波圖)、18.古亞達度(貝迪斯)(C)

古亞達度喺墨西哥多年嘅主力,控制比場節奏。不過剪短頭髮令筆者一時認唔到佢(Goal.com)

中場入面,筆者必須講下31歲嘅隊長古亞達度(Andrés Guardado),目前效力西甲貝廿斯,今季表現出色,交出9個助攻兼射入2球,幫助貝迪斯拎到來季歐霸小姐賽資格。古亞達度係一個出色中場,控球技術強、傳球視野佳、短長傳準繩度高以及有一定嘅罰球能力。佢就係球場上嘅「莫札特」指揮住墨西哥嘅進攻節奏。
古亞達度過去參加過3屆世界盃,筆者相信今屆好可能係佢最後一次以球員身份參加世界盃,希望佢可以有出色嘅發揮。

靴里拉可以用跑動去拉近同強隊嘅不足(Depor)

另外,赫達·靴里拉(Héctor Herrera)效力葡超班霸波圖,曾經入選2014年世界盃23人名單。早幾年曾經被譽其中一位最佳全能中場,當時利物浦扯上關係,最終不了了之。筆者對佢唯一評價係「跑狗」一名,同時都有一定嘅遠射能力。

「壞孩子」法比安嘅發揮好影響墨西哥中前場連接(Goal.com)

至於馬高·法比安(Marco Fabián),效力德甲法蘭克福。集控球、短傳、遠射能力於一身嘅中場球員,有份入選2014年世界盃23人名單。
呢個「壞孩子」曾經喺2011年美洲國家盃開前集體召妓,結果被逐出國家隊。但天份極高,係墨西哥喺2012年倫敦奧運奪金嘅功臣。相信今屆會係墨西哥進攻大腦之一。講開又講,就喺筆者寫稿前幾日,又有媒體爆咗單又有球員集體召妓,真係唔明點解墨西哥啲球員咁鐘頭玩呢啲嘢。

至於基奧雲尼·杜斯山度士(Giovani dos Santos),目前踢緊美職洛杉磯銀河。一個懷才不遇嘅球員,香港球迷喺佢效力熱刺期間成日叫佢「道士」。佢嘅分析如果要寫寫到天朝都未完,所以有機會再寫佢啦。筆者相信佢今屆世盃應該後備居多。

-前鋒陪伴你我長大遺憾只得一位成才
9.魯爾·占美尼斯(賓菲加)、11.卡路士·韋拿(洛杉磯FC)、14.查維亞·靴南迪斯(韋斯咸)、17.捷西斯·曼維·哥朗拿(波圖)、19.奧利比·柏拉達(阿美利加)、20.查維亞·阿基路(老虎隊)、22 .洛贊奴(PSV燕豪芬)
其實,墨西哥中前場上有好多我哋呢班90後熟識嘅面孔,但奈何只有一個球員係成到才。佢係邊個?相信大家心裡有數。

唔經唔覺,小豆都30歲啦(Metro)

墨西哥嘅頭牌前鋒絕對係查維亞·靴南迪斯( Javier Hernández ),呢位曾經效力過英超曼聯、西甲皇馬、同德甲利華古遜嘅高效射手。佢嘅特點係彈跳力高,頭鎚能力好以及埋門把握力高。
今季喺英超中遊球隊韋斯咸效力,為「鎚仔幫」上陣33次,入咗8球。但奈何豬隊友太多,「鎚仔幫」戰績差劣,好彩最終護級成功,呢季都係「小豆」留歐生涯最唔如意嘅一季。但外界仍然期望佢喺世界盃有出色嘅發揮。
「小豆」自從2009年著上墨西哥綠色戰袍以來,至今佢已經上陣101次,入咗49球,平均2場入1球,喺墨西哥隊歷史上入波最多嘅球員。今次係小豆第三次參加世界盃決賽週,筆者相信佢將會帶領呢隻「阿茲特克雄鷹」飛得更高。

洛仙奴絕對佢帶到驚喜畀大家(Sports Illustrated)

年僅22歲嘅洛仙奴( Hirving Lozano )目前效力荷甲PSV燕豪芬,年僅22歲已經係球會絕對主力,上陣33次入19球交出8助攻,入選今季荷甲最佳11人。呢位墨西哥新星速度極快,而且可以自己強行突破再搵空位起腳或者再交畀隊友射門,絕對係墨西哥將來前鋒線上重要人物。

當年筆者係中學雞嗰時好鐘意踢阿仙奴嘅韋拿(ESPN)

最後,都要講下卡路士·韋拿(Carlos Vela),佢唔驚唔覺都29歲。曾經效力英超阿仙奴,但咁多季嘅表現都令人失望。2012年夏天加盟西甲皇家蘇斯達,7個球季一共上陣184場射入54球。今季季初狀態一般,最終,喺今年1月,轉會美職洛杉磯FC,重獲第二春,上陣12場入7球。
佢其實係一位控球、速度同射門於一身嘅前鋒,曾經係筆者最鐘頭嘅球員之一。但遺憾一直發揮唔穩定,喺成個球員生涯一無所獲。

至於,魯爾·占美尼斯、捷西斯·曼維·哥朗拿、奧利比·柏拉達同查維亞·阿基路,將會係前鋒線上嘅後備球員。當中嘅魯爾·占美尼斯曾經效力過筆者愛隊馬體會,但係自己摧毀自己球員生涯,聽聞佢賓菲加踢得一般。其實之前韋斯咸想藉用佢一季,但佢自己瞓唔醒MISS咗班機,之後「鎚仔幫」就放棄咗佢。算啦!唔想講佢!

小組形勢分析:

今屆世界盃,墨西哥同應屆冠軍德國,韓國同瑞典身處F組,相信喺教練奧蘇利奧嘅帶領下,墨西哥隊誓將衝擊困擾住佢哋24年嘅世界盃16強魔咒。

講起呢個魔咒,筆者都好匪夷所思。墨西哥自1994年之後,每屆世界盃決賽週都可以踢入16強,雖然係晉級常客。但係每次都喺16強出局,或者係中北美洲安定嘅足球環境令墨西哥有所鬆懈,球隊始終同世界頂級國家隊有一定差距。但筆者相信今次23人入面大部分球員可能都係最後一次以球員身份喺世界盃上陣,筆者相信佢哋自然會博到盡。

筆者認為F組入面,墨西哥都係除咗德國以外,筆者比較睇好可以出線嘅國家隊。而德國同墨西哥喺上年洲際國家盃4強碰頭,當時德國用咗B隊成員去參賽,正選有9個入咗今屆世盃大名單;而墨西哥當時11個正選入面,有8個有入選到今次世盃大名單。德國最後贏4:1。所以,論實力,墨西哥唔係德國嗰皮,所以第一場對德國或者已經決定墨西哥只可以以次名出綫為目標。(2017年洲際盃4強德國VS墨西哥LINK: https://www.youtube.com/watch?v=2CqcmXC3w1Q)。或者最後一賽對瑞典嘅比賽會係「關鍵一戰」,不過前提一定要贏咗韓國先。

而且墨西哥陣中嘅主力球員大賽經驗都係十分豐富,大部分係參加國際賽多年嘅隊友,部分球員做國家隊隊友都超過10年,相信默契已經在心中。雖然23人名單入面有15人曾經參加過上屆巴西世界盃,有部分更參加過2006世界盃同2010年世界盃。大賽經驗都係十分豐富嘅同時令到墨西哥喺今屆面臨陣中主力老化問題。今屆墨西哥平均年齡高達28.87歲,喺體能、爆發力以及拚勁都無得同德國(26.69歲)、瑞典(27.73歲)同韓國(27.3歲)抗衡。墨西哥喺過去上屆比賽尾段就已經出現體能下降問題,輸比荷蘭嗰場就係一個好例子。

相信4年過後,筆者估計墨西哥喺小組賽嘅作戰策略會更加偏向保守,預計墨西哥會打一個3-1-3-3嘅防守陣容。前場兩翼實際喺閘,可攻可守,防中由古亞達度擔任,同前場4人做呼應。呢個陣對付德國嘅4-2-3-1,已經算係最穩固嘅一個。

墨西哥小組賽賽程表:

F組

6月17號23:00 德國vs 墨西哥下諾夫哥羅德體育場

6月23號23:00 韓國vs 墨西哥羅斯托夫體育場

6月27號22:00墨西哥vs瑞典葉卡捷琳堡中央體育場

陣容預測

墨西哥陣容PLAN A(3-1-3-3):

門將:奧祖亞

後衛:莫連奴、雷耶斯、沙些度

防中:古亞達度

前場:法比安、靴里拉、拿恩

前鋒:洛仙奴、靴南迪斯、韋拿

墨西哥陣容PLAN B(4-1-2-3):

門將:奧祖亞

後衛:拿恩、莫連奴、雷耶斯/艾耶拉、沙些度

防中:古亞達度

前場:靴里拉、法比安

前鋒:洛仙奴、靴南迪斯、韋拿

 

全民俾LIKE 人人「些牙」!

.