文/ William Luk

萬眾期待嘅美朝首腦峰會(「特金會」)將喺天朝9點舉行,結果係點可能喺呢篇專欄文章推出嗰段時間已經塵埃落定。筆者最後都係無去到星加坡見證呢個時刻,主要考慮到今次事件係全球關注,超過2500間傳媒申請採訪, 只有部分傳媒可以全程跟蹤報道,其他媒體只可以喺傳媒中心收睇相關直播同報導。而且星加坡細,封路會好麻煩,而且佢又係出名嚴厲嘅國家,筆者唔想喺條街行兩步又要改路行,行幾步又要停低搜身。

但筆者仍然會持觀望態度,而唔係樂觀態度。因為我對任何國際政治議題都係唔樂觀有邊個國家會完全妥協?只能達成一定共識。所以,筆者認為今次會談對於無核化嘅問題係唔會一蹴而就。

雖然今次會談結果好難預測,但筆者估計佢哋點都會簽一個韓戰正式結束嘅協議(朝鮮同韓國喺1953年簽署咗停戰協議,但直到今日戰爭狀態仲未結束)。因為美國總統特朗普都話呢一點應該係「比較容易」做到嘅事。假如一切順利就會發表聯合聲明,但峰會唔會持續多一日。單對單見面。

另外,大家可能會MISS咗一樣嘢。其實今次「特金會」,筆者認為會令到特朗普喺G7峰會好蝕底。因為佢中途離場飛去星加坡,會變相畀另外5國(日本除外),有更多時間去傾點應對呢位有史以嚟最狂妄不羈嘅美國總統。我有啲擔心G8變完G7又要變成G7。

總括而言,國際政治冇朋友,只有利益同實力。今次筆者想透過近日各國喺今次峰會上面嘅舉動,去分析一下佢哋各自盤算緊啲乜。

 

‧美國

-「利比亞模式」棄核
美國嘅意願好簡單,要求朝鮮要徹底棄核。甚至特朗普講到明話,機會只得一次,大家見面坐低10秒就知肥仔想諗乜。
美國希望朝鮮行「利比亞模式」棄核。「利比亞模式」指嘅係前利比亞領導人卡達菲喺2003年完份交出核武器,最終喺得到安全承諾同經濟援助作為交換條件情況下,完全放棄核武。但卡達菲喺2011年嘅下場,喺內戰被殺。而全世界,包括你我,仲有朝鮮係親眼睇得一清二楚。
所以,侵侵打算點樣要金正恩主動放棄擁核國家嘅基本身份,仍然係一個懸而未決嘅問題。

-成為和平締造國

筆者絕對相信美國希望簽一個韓戰正式結束嘅協議(朝鮮同韓國喺1953年簽署咗停戰協議,但直到今日戰爭狀態仲未結束)。推動韓半島和平係美國今次其中一個目的,都係對盟友韓國嘅承諾,亦都係一個政治籌碼,鞏固美韓關係。
假如一切順利並發表聯合聲明,會提升侵侵形象,而且更加加強美國呢個「世界霸主」地位。

 

•朝鮮

肥仔心諗,我終於可以同中韓以外領導人揸揸手(CNN)

-經濟援助

金正恩喺飛去星加坡前,頻頻巡視朝鮮境內、包括平壤新餐廳、江原道鐵路同元山旅遊區。被人認為雖然朝鮮國內經濟欠缺實際數據,但筆者3年前由丹東坐火車去朝鮮嗰時經過新義州,嗰度係荒無一片。目測除咗平壤市之外,其他係面臨能源等問題。
另外,高麗航空長年被國際制裁。-所以筆者相信金正恩此行其中一個目的係要拎到經濟援助,改善朝鮮國內經濟,

-無核化立場

今次金正恩外訪星加坡係佢自2012年上任以嚟到訪最遠國家,亦都係第一次訪問中韓以外國家。今次朝鮮嘅目的非常明確,係核問題行「印度模式」,令國際社會承認佢係核子國家,同時取銷一系列制裁。
「印度模式」指嘅係印度喺1974年開始多次核試後畀西方國家製裁,但印度仍然堅持發展核武。最後,美國因應對外政策調整,改變對印政策,同印度達成協議。印度承諾唔再發展核武同接受國際社會監督。最終,制裁取消,核子國家地位都被默認,令南亞地區局勢發生根本性改變,最後都影響到果阿地區主權問題走向。

 

•星加坡

金仔恩第一張公開自拍(王乙康Facebook)

-提升區域地位

東南亞係一個政治同社會極為複雜地區,咩嘢政治類型嘅政權都有。但星加坡係東南亞嘅最先進國家,自然有佢特別之處。對比周邊國家,佢咃係守法國家,人民習慣(因為罰款)唔違法,法律嚴厲,而且國土細小容易管理。所以一但要舉行峰會,呢個國家對比周邊國家喺策劃籌備上會顯得更加安全、高效同可靠。
星加坡已經唔係第一次主持類似會議。早喺幾年前,中國同臺灣嘅「馬習會」就已經以星加坡作為見面場所。他日有一啲類似和平會議要進行,好大機會揀星加坡,從而提升星加坡國際形象,繼續成為東南亞最重要嘅國家之一。

-經濟

星加坡自己都會想喺將來一但朝鮮經濟開放去分一杯羹。所次今次趁金正恩訪問星加坡,盡地主之誼,又同佢喺海邊玩自拍,企圖拉近同金仔關係。希望將來朝鮮經濟開放,星加坡可以成為第一批打入朝鮮嘅外資。

 

•中華人民共和國

-穩定東亞政治局勢

被公認為朝鮮背後嘅支持者中華人民共和國,目的只係希望領土週邊地區局勢穩定。今次金正恩外訪,其專機「蒼鷹1號」因為安全問題其未能直航星加坡。中國就即時以一副協助姿態向其借出中國國航飛機。

實際上,喺過去半年,南北韓關係迅速改善嘅同時,中國一直無扮演到一個區域大國角色。所以,呢個係一個政治籌碼,向外界表示中國仍然重視朝鮮呢位「同志」。因為,一但朝鮮親美,百害而無一利,中國喺亞太區影響力勢必減少。中國亦都唔想有第二個越南(兩韓統一)出現,到時必定同中國喺東海同東北地區有領土糾紛。

-改善喺美國嘅形象

近期所謂中易貿易戰進行得如火如荼。中國無本錢同美國周旋嘅情況下,借今次鋒會為近日緊張嘅中美關係降溫。

 

•日本

-加強自身喺東亞嘅影響力

日本喺先前南北韓議題一直無咩影響力,甚至國內政治班子麵對一系列醜聞而分身不暇。日本借住美朝首腦峰會前夕,喺6月3號出席星加坡安全會議期間,同美韓兩國國防部長舉行三方會談,會談後共同發布了聯合聲明,希望美朝首腦會談能為朝鮮半島安全穩定等貢獻力量。藉以表達日本對韓半島和平同無核化嘅立場。

•韓國

韓國呢獲其實係食花生居多,喺會議確定舉行之後非常低調。佢哋嘅願望好簡單,維持韓半島和平局勢。如果「特金會」成功舉行,文在寅一定希望藉住「特金會」個勢再同金正恩嚟個會面。到時又可以手拖手跨越38線。

 

•俄羅斯

可能普京叔叔呢排忙緊世界盃決賽週,俄羅斯喺今次美朝首腦峰會反而無咩表態同實際行動。

但日前普京,雙方可能就朝鮮問題達成一定共識。俄羅斯係同意由中國出面。

金正恩34歲就可以搞到滿城風雨,筆者真係佩服佢(曲)

「國際局勢,瞬息萬變」由侵侵上臺以後嘅行動,筆者相信以侵侵性格,有機會一返美國就鬧金正恩呢樣嗰樣。但過幾日又當無事發生,但呢樣嘢係好惹人討厭,美朝要關係要正常化,絕對唔係一朝一夕嘅事,甚至牽涉到嘅南北韓統一都一樣。

不過,今次「特金會」算係話畀世人知凡事有可能,一年前各位會諗過侵侵同肥仔會同台出現?但始終,各國都係要小心翼翼處理朝鮮,畢竟「紙老虎」都有牙,佢得唔到想要嘅嘢可能就會及難,一但發難齊齊受難。

(文章純屬筆者意見,不代表癲狗日報立場。)

 

全民俾LIKE 人人「些牙」!

.