文/William Luk

俄羅斯著名打氣歌 “Только русский, только победа, (Хлопки) Только русский, только победа, (Хлопки) Только русский, только победа (Хлопки)… (Повторяется…)” (俄羅斯文)

俄羅斯足球代表隊 ( 俄羅斯文:национа́льная сбо́рная Росси́и по футбо́лу)

教練:卓捷索夫(Cherchesov)

世界排名:70

外圍賽成績:東道主

歷年出席世盃決賽週次數:*11次(1958年、1962年、1966年、1970年、1982年、1986年、1990年、1994年、2002年、2014年以及2018年)

歷屆最佳成績:*殿軍(1966年)
*1990年之前喺蘇聯時期

俄羅斯,好多香港人會諗起魚子醬,菠蘿型教堂、俄羅斯娃娃同埋俄羅斯靚女。

俄羅斯作為今屆世界盃主辦國,喺籌備同治安等方面一直令人提心吊膽,而國家隊嘅能力同樣備受質疑。目前俄羅斯喺FIFA排名70,係國家隊史上最差。呢個要歸咎於俄羅斯近況好差,喺近7場友誼賽不勝,「雙頭鷹」上一次贏波已經係要追朔到上年10月對南韓嘅比賽。但其實排名低嘅原因之一,係因為近2年佢哋友誼賽嘅對手都係一啲喺FIFA排好前列嘅國家(例如巴西、法國、比利時、西班牙同葡萄牙),所以輸多贏少。

仲有幾多球迷仲記得俄羅斯嘅前身蘇聯係曾經咜咤一時嘅歐洲強隊?蘇聯喺1958年到1970年4屆世盃連續晉身8強,曾經喺1966年英格蘭世界盃拎到殿軍。龍門耶辛(Lev Yashin)同戴沙耶夫(Rinat Dasayev),前鋒烏克蘭裔布洛堅(Oleh Blokhin)以及奧利·普羅塔索夫(Oleh Protasov),呢班全部都係球壇傳奇人物。

筆者作為一個波牛,一路覺得呢支國家隊喺歐洲國家隊入面係怪中之怪。早喺十幾年前已經有一大堆耳熟能詳嘅球星喺歐洲頂級聯賽立足,但都只係喺2008年歐國盃由荷蘭籍教頭希汀克(Guus Hiddink)帶領之下發光發亮過一次咁大把。

俄羅斯喺再之後嘅2012年歐國盃同2014年巴西世界盃入面嘅表現都已經係強差人意。筆者最記得2014年世界盃,俄羅斯喺小組賽對陣韓國果場,門將艾堅菲夫牛油手果一幕,簡直慘不忍睹。俄羅斯喺跟住落嚟呢幾年係已經令人不堪入目,我好記得16年歐國盃除咗逼和英格蘭之外。另外兩場比賽,都係睇到啲球迷嘔血,但好彩場外俄羅斯球迷為國爭光,喺法蘭西展現「戰鬥民族」嘅風範,令到俄羅斯喺呢屆歐國盃入面成為鎂光燈下嘅主角。

俄羅斯征戰2018年俄羅斯世界盃嘅23人大名單(轉自俄羅斯足總Twitter圖片)

俄羅斯足總喺6月4號正式公佈今夏出戰俄羅斯世界盃23人大名單,惟當中大部分球員對香港球迷而言絕對係兩眼漆黑。今屆俄羅斯嘅陣容畀認為係史上最弱,喺23人大名單入面,除咗加布洛夫同卓利舒夫之外,其他國腳都喺俄羅斯聯賽搵食。

筆者想請問有冇讀者可以即時講到3-5個球員名出嚟?嗱!唔好講有艾沙雲啦,佢退出咗國家隊好耐,而家喺哈薩克踢緊波。另外,較德甲球迷所認識嘅紐斯‧泰達(Roman Neustädter)落選23人名單。

俄羅斯23人大名單:
門將:
1.艾堅菲夫(中央陸軍)(C)、12.隆約夫(辛尼特)、16.加布洛夫(布魯日)

後衛:
2.馬里奧‧費南迪斯(中央陸軍)、3.古迪普夫(莫斯科斯巴達)、4.伊拿舒域治(中央陸軍)、5.施美安洛夫(艾卡馬特)、13.古迪亞舒夫(魯賓喀山)、14.格納特(魯賓喀山)、23.施莫尼哥夫(辛尼特)

中場:
6.卓利舒夫(維拉利爾)、7.古斯耶耶夫(辛尼特)、8.加辛斯基(卡斯洛達)、9.迪沙哥夫(中央陸軍)、11.祖比連(莫斯科斯巴達)、16.安東‧米蘭卓克(莫斯科火車頭)、17.高路雲(中央陸軍)、18.舒哥夫(辛尼特)、19.森美杜夫(莫斯科斯巴達)、21.耶洛堅(辛尼特)

前鋒:
10.史莫洛夫(卡斯洛達) 、15.阿歷斯‧米蘭卓克(莫斯科火車頭)、22.迪素巴(圖拉兵工廠)

回顧

卓捷索夫上任教一直無辦法解決俄羅斯防守同進攻問題

俄羅斯教練卓捷索夫(Cherchesov)早喺5月11號率先揀出28人名單,幾日之後因為正選中堅甘巴洛夫(Kombarov)因傷退隊。導致補選咗已經效力國家隊16年,年屆38歲嘅老將伊拿舒域治(Ignashevich),伊拿舒域治有嘅係豐富嘅大寶經驗不禁令人質疑俄羅斯係咪青黃不接到咁嘅地步。至於被譽為俄羅斯超新星嘅辛尼特前鋒高哥連(Kokorin),因為喺今年3月一場歐霸比賽入面傷及前十字韌帶,最終無緣今次世盃決賽週。

卓捷索夫(Cherchesov)自2016年8月上任,球員時代司職門將位置,曾代表*獨聯體同俄羅斯參加4次洲際大賽(1992年歐洲國家盃、1994年美國世界盃、1996年歐洲國家盃以及2002年日韓世界盃)。縱觀佢之前嘅執教履歷,佢都只係喺波蘭,奧地利同俄羅斯聯賽球隊執教過。不禁令外界質疑佢到底有冇能力帶領俄羅斯征戰世盃決賽週。
*獨聯體國家足球隊(CIS),全名係獨立國家聯合體足球代表隊。因應1991年11月,蘇聯隊拎到1992年歐洲國家盃決賽週參賽資格後,因同年年底蘇聯解體,因而喺1992年由15個前蘇聯加盟共和國入面嘅12個共和國(除咗波羅的海3國)組成獨聯體隊,代替前蘇聯國家足球隊參加歐國盃。

喺上年12月抽籤之後,車捷索夫表示:「我唔可以講呢個分組係好定壞,我而家唯一知道嘅就係每場比賽都唔好踢。」 (Link: https://youtu.be/jxwzC9ZN3Tc)。其實車捷索夫世盃完結後合約就到期,到底會唔會繼績執教俄羅斯,相信嚟緊喺世盃嘅表現係至關重要。

•陣中主力球員
而俄羅斯以往出名行軍速度快,踢法機動。但過去兩年一系列友誼賽見到「雙頭鷹」已經無咗呢種打法,防定問題同攻力不足係現今俄羅斯嘅最大問題,由2016年歐國盃同2017年洲際國家盃俄羅斯入波同失波數字可見,防守同攻力都係嘅係俄羅斯國家隊兩大問題。

老實講,筆者認為而家隊俄羅斯係無咩章法可言,基上上係各打各。以下呢班球員係俄羅斯近年最有名氣同實力,但同時亦係佢哋令到俄羅斯存在住老化問題(平均年齡28.26),主力球員大多都已經年過30,到底大賽經驗重要定係活力重要呢?

-門將唔好再玩「膠」
1.艾堅菲夫(中央陸軍)(C)、12.隆約夫(辛尼特)、16.加布洛夫(布魯日)

呢一次失誤係艾堅菲夫球員生涯最大污點

俄羅斯正選門將艾堅菲夫(Igor Akinfeev)被譽為俄羅斯近20年最出色門將,成個球員生涯都效力莫斯科中央陸軍,係目前球圈中絕無僅有嘅one club player。

當年年僅17歲就成為中央陸軍正選陣容之一,之後以第三門將身份參加咗2004年歐洲國家盃,及後喺2008年成為球隊同國家隊絕對主力,並喺2008年歐國盃憑住嘅出色表現幫助俄羅斯殺入4強。令佢畀當時歐洲一眾豪門所關注,英超豪門曼聯曾經因為搵龍門接班人而同佢扯上關係,但最後都係無疾而終。

艾堅菲夫喺跟住落嚟嘅表現都係不過不失,直至喺2014年巴西世界盃小組賽對陣韓國嘅比賽,艾堅菲夫喺下半場一下「牛油手」,令佢足球生涯留下一大污點。

喺今個球季,艾堅菲夫仍然係中央陸軍必然正選,就算俄羅斯面對後防老化問題,相信呢位隊長仍然會喺關鍵時刻挺身而出。但大前提係,唔好再學上屆咁派「膠」就得。

-後防年紀嚇死人
2.馬里奧‧費南迪斯(中央陸軍)、3.古迪普夫(莫斯科斯巴達)、4.伊拿舒域治(中央陸軍)、5.施美安洛夫(艾卡馬特)、13.古迪亞舒夫(魯賓喀山)、14.格納特(魯賓喀山)、23.施莫尼哥夫(辛尼特)

今屆俄羅斯後防平均年紀係29.86歲,喺32強入面算係年紀比較大嘅一隊。一但喺小組賽最後兩輪面對埃及同烏拉圭嘅速度型球員,防線絕對係岌岌可危。

伊拿舒域治同舒哥夫,呢兩位都年過30嘅球員,會喺今屆俄羅斯中後場重要成員

伊拿舒域治 (Ignashevich),呢位俄羅斯國家隊出場(129場)最多嘅中央陸軍老牌中堅,具豐富大賽經驗,能力全面,能攻能守,有一定嘅頭鎚能力,攔截準繩度唔錯。今屆本來只係喺俄羅斯後備名單嘅佢,因為正選中堅迪米捷·甘巴洛夫(Dmitri Kombarov)因傷退隊,先以後補身份入選到23人名單。

目前已經38歲嘅佢,成個球員生涯一直無出現咩傷患問題,絕對可以用老而彌堅嚟形容。到底佢嘅大賽經驗可唔可以搭救到體能問題?相信好多球迷都會有所質疑。,無疑稱得上是,

但由於年紀問題,當佢面對住一啲速度型前鋒,反應慢嘅弱點就會表露無遺,甚至有機會成為防線漏洞。而筆者相信,如果中防可以喺以上問題對伊拿舒域治帶領嘅防線帶來足夠保護的話,可以加強俄羅斯後防安全。

-中場
6.卓利舒夫(維拉利爾)、7.古斯耶耶夫(辛尼特)、8.加辛斯基(卡斯洛達)、9.迪沙哥耶夫(中央陸軍)、11.祖比連(莫斯科斯巴達)、16.安東‧米蘭卓克(莫斯科火車頭)、17.高路雲(中央陸軍)、18.舒哥夫(辛尼特)、19.森美杜夫(莫斯科斯巴達)、21.耶洛堅(辛尼特)

俄羅斯後中前較為正常嘅就係中場,特別係左路同中間都係相對穩陣。以下將講下一啲主力球員。

迪沙哥耶夫可唔可以靠今屆世盃打返起? (Television Jamaica)

即將渡過28歲生日嘅迪沙哥耶夫 (Dzagoev) 係俄羅斯陣中中場主力。佢係一個好早成名嘅中場球員,18歲已經效力俄羅斯班霸中央陸軍,當選過俄超最佳年青球員,2008年入選大國腳名單,成為俄羅斯歷史上第二位年輕國腳。2012年歐國盃之後曾經同英超熱刺扯上關係,最終不了了之。目前已經喺俄羅斯班霸中央陸軍效力超過十年。

喺2016年歐國盃,迪沙哥耶夫因傷退隊。俄羅斯喺無咗迪沙哥耶夫嘅情況下,成個俄羅斯中場失衡,毫無組織,最終小組賽墊底出局。有迪沙哥耶夫喺度,俄羅斯中場將會全面昇華。佢係俄羅斯少見嘅技術型球員,球下功夫唔錯,加上願意幫手回防,絕對係球迷心目中嘅最佳球員。不過筆者留意到近年佢喺中央陸軍嘅位置越墮越後,好擔心佢自己適應唔返自己喺國家隊前場嘅踢法。

舒哥夫(Yuri Zhirkov),呢位34歲俄羅斯左中場自2005年開始為國家隊效力至今,2008年開始無缺席過一次俄羅斯有份參加嘅國際大賽。司職左中場嘅佢絕對係左路嘅通天老倌,可以踢左路後中前3個位置。佢係一個鬥志極高球員,剷截能力唔錯,控球技術強而且有唔錯嘅傳波能力。相信今屆世盃佢會係俄羅斯左路最重要嘅球員。

值得一迷嘅佢,佢曾經效力英超球會車路士兩季,最後因為上陣時間少而決定回流俄羅斯。

高路雲係俄羅斯少數後生正選球員 (Daily Star)

高路雲(Aleksandr Golovin),目前22歲,筆者認為佢係目前用波同遠射能力最好嘅俄羅斯中場,亦係俄羅斯陣中最強同埋少數後生正選球員。而且高路雲的傳送視野及用球能力,相信阿記球迷可能會對佢有印象,事關今年四月歐霸盃八強首回合,高路雲射入一球靚罰球幫中央陸軍一度追和。如果今屆世盃俄羅斯有前場罰球,相信佢會係「雙頭鷹」嘅首席人選。

卓利舒夫係今屆俄羅斯唯一一位效力歐洲頂級聯賽嘅中前場球員 (Futbolgrad)

至於卓利舒夫(Denis Cheryshev),目前效力西甲維拉利爾,係皇馬青年軍出身嘅佢喺西甲打滾多年。呢位左中場傳波、控波同射門三範樣樣精,今季喺維拉利爾唔錯,上陣24場射入2球。但一直唔受教練卓捷索夫嘅重用。但大家絕對唔會懷疑他嘅能力,筆者相信佢強大嘅左路爆破能力會令佢成為球隊進攻嘅主要來源。

-前鋒攻力備受質疑
10.史莫洛夫(卡斯洛達) 、15.阿歷斯‧米蘭卓克(莫斯科火車頭)、22.迪素巴(圖拉兵工廠)

近年好多國家都利用歸化球員改善隊內問題。以德國為例,近十年改變吸納移民第二代嘅歸化球員策略,係德國喺2014年世界盃成功捧盃嘅重要一步。雖然之前一直傳出,俄羅斯足總會揀一啲歸化巴西前鋒入23人大名單,但最後都係不了了之。無辦法,俄羅斯真係一個好民粹主義嘅國家,但正正因為咁今屆世界攻力真係備受質疑,甚至可能係出唔到綫嘅關鍵。

本來,俄羅斯喺前鋒人選係今屆一大亮點,但可惜高高連 (Aleksandr Kokorin)今年3月因傷緣盡今屆世盃。而其中一位入選球員迪素巴 (Artem Dzyuba) 本來會係最佳人選,但因為喺辛尼特重傷後仍然未恢復最佳狀態。因此,今季表現穩定嘅史莫洛夫係目前俄羅斯入波最大希望。

史莫洛夫已經係目前俄羅斯前鋒最佳人選 (soccersouls)

效力卡斯洛達嘅史莫洛夫(Fyodor Smolov),今季喺俄超射入14球,係入波最多嘅俄羅斯球員。今年為「雙頭鷹」出場4次都射入2球,最近一次係上星期對土耳其嘅友誼賽。筆者認為史莫洛夫速度快,位置感好,把握力高,係近年俄羅斯少見嘅多功能前鋒。但佢自己帶波進攻能力一般,屬於餵波型球員。所以中場隊友要做好助攻任務,佢先有發揮嘅機會,幫助俄羅斯喺A組突圍而出。

效力莫斯科火車頭嘅米蘭卓克預料成為第二前鋒 (Goal.com)

迪素巴身型高大,頭鎚了得 (Sky Sports)

小組形勢分析
俄羅斯沿襲咗作為東道主嘅「好運」。A組另外三隊分別係沙地阿拉伯,烏拉圭同埃及,四大洲國家隊身處同一組,係好少見嘅事。今次A組都被外界認為係過去幾屆世界盃東道主身處小組入面實力最平均嘅一次,但筆者認為係A組係8個分組入面,實力最差嘅一組,也因此形成個個沒把握的局面。而「雙頭鷹」有唯一有嘅嘅係地主之利,踢返自己嘅主場,利用對球場熟悉感補救自身不足,所以唔可以睇小。筆者認為同組對手冇一支有4強實力甚至冠軍相。所以今次俄羅斯可以抽到同沙地、埃及以及烏拉圭同組可以講係是十分好彩。

另外,筆者認為作為主辦國嘅俄羅斯,雖然有效力喺辛尼特嘅主力前鋒高哥連,因為膝頭重創而避戰今屆世界盃,令人擔心俄羅斯攻力問題。而且俄羅斯過去2年無參加過世盃外圍賽,只係靠友誼賽同洲際盃保持狀態,令人質疑俄羅斯成隊波嘅能力。包括迪沙哥夫、史莫洛夫、阿歷斯‧米蘭卓克等多名中前場球員,喺過去一季表現唔錯。球練卓捷索夫如果可以適當用人,解決到近年俄羅斯一直存在嘅攻力問題,相信係可唔可以順利躋身16強嘅一大關鍵。當然,都要睇埋門將艾堅費夫同班後防嘅表現。

筆者認為即使A組畀外界認為實力係較弱嘅一組,但係目前4支國家隊實力都接近嘅情況下,場場比賽都會係關鍵。而「戰鬥民族」將喺6月14號同沙地阿拉伯踢首輪賽事,呢場比賽被世人譽為史上最弱世界盃揭幕戰,而兩隊係32強FIFA排名最低嗰2隊。但如果揭慕戰,俄羅斯連沙地都贏唔到,我真係怕成個盧日尼基球場會暴動。筆者唔係講笑,畢竟以露西亞強悍民族作風,絕唔容許國家隊喺自己主場踢到不知所謂。相反,只要擊敗到沙地,小組出綫權仍然掌握係自己手上。

第二場對陣埃及嗰時,都要寄望對方王牌球員穆罕默德‧沙拿繼續因傷缺陣。如果唔係,以俄羅斯嘅防守能力係絕無可能mark到沙拿。

而目前嚟睇同組中實力最強對手會係南美洲嘅烏拉圭。不過,蘇亞雷斯同卡雲尼都已經年過30,唔再係8年前嘅初生之犢,活力四射。筆者相信而家嘅烏拉圭同俄羅斯嘅實力差距都係六四之數。但如果最後兩場都和局收場,出綫仍有一絲希望。

最後要講講,俄羅斯過去3屆世界盃決賽周表現,全部都係分組賽出局。「雙頭鷹」對上一次喺決賽週贏波,已經係16年前日韓世界盃(當時教練卓捷索夫仲係23人名單入面),除咗喺首輪 2:0贏北非嘅突尼西亞,之後就2場全輸,分組賽出局。而上屆嘅世盃表現正如文章開頭所講,踢法雜亂無章,不知所謂。

而俄羅斯自2008年歐國盃之後,從未喺國際大賽入面分組賽出綫。所以,筆者唔多睇好呢隊「雙頭鷹」可以喺今次世界盃決賽週有咩大作為。而家嘅俄羅斯係處於一個青黃不接嘅時期,後防嘅老化絕對係今屆世盃一大問題。所以,小組賽可以出到綫已經係一個Bonus。而且出綫之後要面對B組出綫大熱葡萄牙或者西班牙,想要更進一步真係難過登天。

世界盃揭幕戰同決賽球場-盧日尼基球場 (William Luk攝)

俄羅斯小組賽賽程表:

A組

6月14日 23:00 俄羅斯 VS 沙地阿拉伯 莫斯科盧日尼基球場

6月20日 02:00 俄羅斯 VS 埃及 聖彼得堡體育場

6月25日 22:00 烏拉圭 VS 俄羅斯 沙馬拉體育場

陣容預測:
俄羅斯正選陣容 (4-5-1):

守門員: 艾堅菲夫

後防:古迪亞舒夫,格納特,伊拿舒域治,費南迪斯

中場: 舒哥夫,祖比連,高路雲,迪沙哥耶夫,森美杜夫

前鋒: 史莫洛夫

 

全民俾LIKE 人人「些牙」!

.