文/William Luk

烏拉圭打氣歌:”Soy Celeste, Soy Celeste, Celeste soy yo…”(Link: https://www.youtube.com/watch?v=9fXVWh8sb_w)

烏拉圭足球代表隊 (西班牙文:Selección de fútbol de Uruguay)

教練:奧斯卡塔巴利斯(Oscar Tabarez)

世界排名:14

今屆外圍賽成績:南美洲賽區次名

外圍賽最佳射手:卡雲尼(10球)

歷年出席世盃決賽週次數:13次(1930年、1950年、1954年、1962年、1966年、1970年、1974年、1986年、1990年、2002年、2010年、2014年以及2018年)

歷屆最佳成績:冠軍(1930年 & 1950年)

訓練基地:下諾夫哥羅德州波耳(俄文:Бор)

烏拉圭其實係南美一個天堂,治安比周邊國家好,人口又少,,生活壓力又低,又曾經出過一個好節儉嘅總統José Mujica。
烏拉圭嘅足球不嬲出名,「天藍軍團」曾經拎過兩屆世盃冠軍,目前只得少數幾個國家比烏拉圭有更好嘅戰績。兩屆冠軍烏拉圭會出戰幾日後喺俄羅斯舉行嘅世界盃決賽週,希望能夠挑戰自1950年以嚟首個嘅第一個冠軍,儘管有人話呢樣係痴人說夢。

目前烏拉圭已經抵達俄羅斯,今屆仲特登帶咗大量嘅瑪黛茶去俄羅斯。瑪黛茶係南美傳統茶,每個南美人都係佢嘅忠實擁躉。因為,馬黛茶嘅功效類似咖啡,可以刺激神經中樞,而且又促進維他命同營養吸收,對於運動員係非常有益。南美國家球隊都會認為,瑪黛茶等同護身符,可以令國家隊喺俄羅斯平平安安。

烏拉圭足總喺2018年5月15號就公佈26人初選名單,並喺6月2號公佈今夏「天藍軍團」出戰俄羅斯世界盃最終23人大名單,教練塔巴利斯今次揀人,決定續用上2屆世盃嘅班底,再帶領一班年青球員。而高甸、卡雲尼、蘇亞雷斯同基文尼斯等一眾效力歐洲豪門嘅球員均榜上有名,而較香港球迷認識嘅加斯頓‧拉美利斯(Gastón Ramírez)落選最後23人大名單。

烏拉圭23人名單 (烏拉圭足總Twitter)

烏拉圭23人大名單:
龍門: 1.梅斯利拿(加拉塔沙雷)(C) 、12.馬田‧甘賓拿(獨立隊)、23.馬田‧施華 (華斯高),

後衞:2.荷西‧基文尼斯(馬德里體育會)、3.高甸(馬德里體育會)、4.華利拿(彭拿路)、13.加斯頓‧施華(獨立隊)、16.麥斯‧彭利拿(波圖)、19.高亞迪斯(士砵亭)、22.馬田‧卡沙利斯(拉素)

中場:5.卡路斯‧山齊士(蒙特雷)、6.賓坦古亞(祖雲達斯)、7.基斯甸‧洛迪古斯(彭拿路)、8.蘭迪斯(小保加)、10.迪阿拉斯卡達(高士路)、14.盧卡斯‧托拉拿(森多利亞)、 15.馬泰斯‧雲仙奴(國際米蘭)、 17.迪亞高‧拿索特(熱拿亞)、20.烏列達(蒙特雷)

前鋒: 9.路爾斯·蘇亞雷斯(巴塞隆拿), 11.史杜安尼(基羅納) 18.麥斯高美斯(切爾達)、21.卡雲尼(巴黎聖日門)

今屆烏拉圭呢個23人名單可以話係32強裡面其中一隊星光熠熠,由卡雲尼同蘇亞雷斯領衍嘅進攻鋒線,絕對係今屆世盃決賽週最強前鋒組合之一,再加埋一條西甲鐵盾「馬體會」兩個主力中堅高甸同基文尼斯組成嘅鋼鐵防線,今屆嘅烏拉圭可以話係攻守兼備,而且呢班球員嘅大賽經驗非常豐富,加埋中場班後生球員,絕對有望成為今屆世界盃一支奇兵。

回顧

綽號「天藍軍團」嘅南美傳統勁旅烏拉圭曾經喺1930年同1950年拎過世界盃冠軍,不過當時參賽國家唔多,所以被認為含金量唔高。而喺近2屆世界盃什面,烏拉圭表現不唔錯,2010年南非世盃憑住科蘭等球員嘅出色表現成功晉級4強,技驚四射,最終拎到殿軍。而喺上屆巴西世界盃入面烏拉圭深陷「死亡之組」,首戰竟然爆冷輸畀同組實力最弱嘅哥斯達黎加,但最後竟連贏英格蘭同意大利,同哥斯達黎加一齊出綫淘汰賽。但隨後不敵哥倫比亞,最終喺16強止步。

塔巴利斯近年身體狀況每況愈下 (Remezcla)

烏拉圭至今都未用過外籍主教練執教國家隊(1927-28年曾經有一位阿根廷籍副教頭)。現任烏拉圭主帥係塔巴利斯(Oscar Tabarez)呢位71歲教頭自2006年執教「天藍軍團」至今已經長達12年,呢位老教頭帶領烏拉圭出戰4次世界盃(1998,2010,2014 & 2018),更帶領烏拉圭領到2011年美洲國家盃冠軍。佢係目前世界球壇中執教單一國家隊出戰最多比賽嘅教練,亦係今屆世界盃年紀最大嘅教頭。但近年身體狀況唔好,公開場合經常要撐拐杖,今屆好可能係佢最後一次帶領「天藍軍團」出戰世盃決賽週。目前佢總共帶領烏拉圭踢咗186場比賽,拎到91勝47和48敗嘅成績,經驗相當豐富。

其實烏拉圭喺今次外圍賽次名出綫,但都遭遇暗湧,佢哋喺2016年11月到2017年3月連續三場比賽全輸,令到烏拉圭出現危機,但佢哋喺最後四場比賽迅速調整,保持不敗,迎嚟最終嘅勝利。

今屆南美洲外圍賽非常刺激,去到最後一輪有六支國家隊仍然有出綫機會,烏拉圭最終4:2擊敗玻利維亞,維持佢哋出線資格,避免喺最後關鍵時刻出現類似智利嘅失誤。

最終,「天藍軍團」喺南美洲區外圍賽總共贏咗9場和4場輸5場,落後榜西巴西10分,喺10個南美洲國家中排名第2,以31分次名完成今屆南美洲區外圍賽,成功晉身2018年俄羅斯世界盃32強。 以下係塔巴利斯帶領嘅烏拉圭今屆外圍賽戰績:

玻利維亞0:2烏拉圭

烏拉圭3:0哥倫比亞

厄瓜多爾2:1烏拉圭

烏拉圭3:0智利

巴西2:2烏拉圭

烏拉圭1:0秘魯

阿根廷1:0烏拉圭

烏拉圭4:0巴拉圭

烏拉圭3:0委內瑞拉

哥倫比亞2:2烏拉圭

烏拉圭2:1厄瓜多爾

智利3:1烏拉圭

烏拉圭1:4巴西

秘魯2:1烏拉圭

烏拉圭0:0阿根廷

巴拉圭1:2烏拉圭

委內瑞拉0:0烏拉圭

烏拉圭4:2玻利維亞

主力分析

筆者認為今屆世界盃烏拉圭三線入面,前後場仍然係80後嘅天下,但中場或者會重用年輕球員,預計效力祖雲達斯嘅90後中場賓坦古亞將會成為今屆「天藍軍團」嘅新核心。以下會分析一啲今屆世盃絕對主力:

– 門將勝在夠經驗

梅斯利拿(Fernando Muslera),呢位烏拉圭首席門將喺阿根廷出世,但佢一早公開自己只會100%忠誠於烏拉圭。自2010年世界盃開始就成為國家隊國門,擁有豐富嘅大賽經驗。
身高有1米90嘅佢 ,具有南美球員特有嘅靈活性,反應迅速,彈跳出色。 門前撲救唔錯,反應快,救十二碼係佢最耍家嘅一環,佢喺2010年南非世界盃半準決賽對加納嘅互射十二碼階段連撲兩球十二碼,最終幫助「天藍軍團」以5:3擊敗呢支非洲黑馬晉身4強。但人總有缺點,佢係出擊方面係弱咗啲,呢點早喺意甲效力拉素嗰時已經多次畀人評擊。

-後防馬體孖寶領衍防線 絕對夠堅揪夠熱血

上屆烏拉圭後防因為隊長盧根奴老化,導致後防表現比2010年南非世界盃大為遜色。但今屆就唔同講法啦!

基文尼斯(左)同高甸(右)相信會延續喺馬體會嘅好表現 (http://livefutbol.com)

烏拉圭今屆後防一定要講呢對馬體會中堅高甸(Diego Godín)同基文尼斯(José María Giménez),筆者自己係馬體會死忠,用「熱血鐵衞」形容呢對中堅係最好不過,佢哋亦都係今屆世盃32強唯一一對同時效力同一間球會嘅正選中堅。

首先講下高甸,呢位32歲中堅去到邊都係一位關鍵嘅防守人物,筆者認為佢守強攻強,反應、攔截同彈跳力都係世界一流。而接應角球同罰球嗰時喺禁區有強大嘅頭鎚能力,經常喺球隊打大賽逆境波嗰時會成為球隊板平關鍵。
如果真係要筆者講佢一個缺點,就係經常有啲小動作,特別遇到眼利兼嚴厲嘅球證,基本上就食硬牌。

而基文尼斯近幾年喺馬體會速度上位,呢位中堅身材健碩,又經常參與角球進攻。但初時喺馬體會因為一啲魯莽攔截而備受批評,2年前仲差啲累到馬體會入唔到歐聯決賽。但喺高甸悉心教導下,佢將過往急躁嘅毛病戒咗,喺今季西甲犯規次數大幅下跌,馬體會喺今季西甲38賽只係失咗22球,基文尼斯絕對係「床單軍團」一大功臣。
筆者記得FIFA有一次對基文尼斯同高甸嘅採訪入面,基文尼斯話「高甸係佢球場上嘅老師」,高甸答返佢:「我唔係老師,我唔會教他踢波,但係我會盡力勸他改善一啲問題。因為,我係佢身上見到昔日嘅自己,佢仲後生,總會犯錯。所以我會試下去將我啲經驗傳授畀佢。」相信呢對中堅會係烏拉圭今屆力爭上游嘅關鍵。

-中場好「嫩」 毫無大賽經驗 但勝在有拚勁
中場:5.卡路斯‧山齊士(蒙特雷)、6.賓坦古亞(祖雲達斯)、7.基斯甸‧洛迪古斯(彭拿路)、8.蘭迪斯(小保加)、10.迪阿拉斯卡達(高士路)、14.盧卡斯‧托拉拿(森多利亞)、 15.馬泰斯‧雲仙奴(國際米蘭)、 17.迪亞高‧拿索特(熱拿亞)、20.烏列達(蒙特雷)

賓坦古亞有力成為烏拉圭超新星

烏拉圭今年中場基本上係面目全非,香港球迷會對好多球員感到陌生。但唔好睇小佢哋嘅戰鬥力,事關今屆烏拉圭平均平齡只有25.5歲,係A組最後生嘅一隊中場,將會係烏拉圭充滿體能同拚勁嘅一環。
筆者認為今屆如無意外會由效力意甲班霸祖雲達斯嘅賓坦古亞(Rodrigo Bentancur)擔任中場大旗,佢嘅短傳同控球都係一流,再配埋國際米蘭悍將雲仙奴(Matías Vecino)喺中場無限奔跑迫搶,將上屆烏拉圭中場老化問題一掃而空。

域仙奴(左),今季幫助國米重返來季歐聯小組賽 (Zimbio)

-前鋒夠癲
前鋒: 9.路爾斯·蘇亞雷斯(巴塞隆拿), 11.史杜安尼(基朗拿) 18.麥斯高美斯(切爾達)、21.卡雲尼(巴黎聖日門)

蘇亞雷斯(左)同卡雲尼(右),呢對進攻組合絕對係今屆世盃信心保證 (The National)

前鋒係烏拉圭最大皇牌,卡雲尼(Edinson Cavani)同蘇亞雷斯(Luis Suarez)兩個效力歐洲豪門嘅前鋒將會擔當入波重責,今屆烏拉圭如果要更上一層樓,呢兩位星級前鋒嘅發揮將係當中關鍵。當然,如果呢兩位球員畀對方球員MARK到實一實,烏拉圭會即時啞火,呢點筆者喺世盃外圍賽3連敗時期就已經睇到出嚟。

首先講下卡雲尼,目前效力巴黎聖日門,今季為巴黎喺法甲攻入28球,拎咗法甲金靴獎。佢能頂能控,位置感一流,仲有一定嘅窩利遠射能力,而且射十二碼極為冷靜。
但筆者一直對佢感覺一般,原因係佢每次到重要賽事都係啞火球員。如果卡雲尼要成功擺脫筆者甚至普羅大眾對佢嘅形象,必須要喺世界盃舞台上證明自己,而入到波協助烏拉圭出綫16強係其中一個方法。

再講下蘇亞雷斯,呢位「哨牙蘇」喺烏拉圭近半世紀最出色前鋒之一,早喺利物浦時期,已經係前途無可限量,如果唔係謝拉特關鍵一跣,跣走埋個英超冠軍,我諗蘇亞雷斯未必咁快離隊去巴塞。而喺效力巴塞隆拿,同阿根廷球王美斯同巴西尼馬組成西甲歷史上最強進攻火力嘅「MSN組合」。「哨牙蘇」已經效力巴塞4個球季,每季至少射入25球,今季幫助巴塞拎到西甲同國王盃,成為雙料冠軍。

蘇亞雷斯其中一個問題係佢好具侵略性,上屆佢小組賽咬傷意大利中堅基亞連尼嘅畫面至今仍然歷歷在目。結果,佢被判停賽半年之餘,仲要喺16強對哥倫比亞嘅淘汰賽冇得上陣,累烏拉圭16強止步。筆者相信已經31歲嘅「哨牙蘇」,心態比以往更為成熟,唔使再用棚牙去解決對方後衛,只要個波喺佢腳下,每個防守球員都要忌佢三分。

值得一提嘅係,今屆FIFA決定喺世盃第12條規則下要增加一條球例,明文規定球員唔准喺場上咬人,咬人球員直紅趕出場之餘,對手印會得到罰球。擺到明係為「哨牙蘇」度身訂造,係名符其實嘅「蘇亞雷斯球例」。

另外兩位後備前鋒嘅入波率都十分出色,可以睇到今屆烏拉圭嘅鋒線水平,係目前世界足壇首屈一指。
先講下史杜安尼(Cristhian Stuani),呢位31歲基朗拿前鋒迎嚟遲嚟嘅春天,今季幫助呢隊升班馬排喺聯賽第10,更加協助球隊主場逼和馬體會同擊敗皇馬,今季總共射入21球。
史杜安尼係一個跑得、跳得、搶得嘅前峰,位置感非常好,成日會捕靚位爭取入波。筆者相信佢絕對係國家隊第三前鋒,一定會有出場機會。

另一位新秀係21歲嘅麥斯‧高美斯(Maxi Gómez),效力西甲切爾達。喺上季西甲聯賽中入咗17球,同史杜安尼一樣位置感極佳,而且把握力高。其實佢嘅崛起都係將瑞典球員古達迪離隊嘅主因。

小組分析

2018年俄羅斯世界盃A組有東道主俄羅斯、北非埃及、中東沙特阿拉伯同南美勁旅烏拉圭。呢組被認為係今屆8個分組入面實力較弱嘅一組,係隊隊有希望嘅局面。

但筆者認為世界排名第14嘅烏拉圭係A組公認實力最強球隊,晉級呼聲自然最高,只要有穩定發揮,理應輕鬆出線。不過塔巴利斯一定要解決前場過份倚賴卡雲尼同蘇亞雷斯嘅問題。一但遇到一啲鐘意喺中後場打體力迫搶或者死守嘅國家隊,烏拉圭就會無所適從。

另外,喺烏拉圭踢小組賽之前,烏拉圭只係喺首都蒙特維多同中亞烏茲別克進行咗一場世盃熱身賽,儘管「天藍軍團」以3:0輕鬆擊敗對手,但筆者認為呢場比賽同佢哋喺俄羅斯將會遇到嘅水平係截然不同。再對上一次烏拉圭踢友誼賽已經係3月底喺中國同捷克以及威爾斯嘅格力盃比賽。

今屆烏拉圭賽前準備工作令筆者覺得佢哋對A組另外幾隊毫唔在意。首場對埃及嘅比賽應該本來會係一場入波大戰,但埃及最強前鋒沙拿(Mohamed Salah)早前喺歐聯冠軍戰被西班牙後防拉莫斯整傷膊頭,好可能會缺席第一場小組賽。而烏拉圭只要中前場表現正常,單純以攻力嚟講要解決埃及唔係一件難事。至於最後一場對俄羅斯,烏拉圭當然希望最後一輪小組賽對俄羅斯之前,已經可以2戰全勝拎到出綫資格,咁樣心理壓力會減輕好多,仲可以畀班主力抖下,應付淘汰賽嘅強敵。

筆者認為只要烏拉圭發揮正常,今屆要入到8強絕對係輕而易舉嘅事。話晒呢隊烏拉圭2010年拎殿軍嗰班職球員大部分都仲喺度,教頭塔巴利斯至今仍然領軍,而嗰班「黃金一代」高甸、卡雲尼、蘇亞雷斯同梅斯利拿都由後生仔變成依家嘅陣中「老大哥」。喺2011年美洲國家盃仲淘汰阿根廷,最後贏得冠軍。由於職球員合作多年,默契已經係根深蒂固。呢樣正正係目前烏拉圭最大本錢。

最後,筆者認為烏拉圭近年都將要面對青黃不接問題,特別係前鋒後繼無人,蘇亞雷斯同卡雲尼下屆都35歲,有冇狀態再踢都已經係一個問題。參考返鄰國巴拉圭嘅情況,2022年卡塔世界盃我哋有可能會見唔到烏拉圭嘅身影。所以,球迷要好好珍惜今屆世盃卡雲尼同蘇亞雷斯嘅最後衝鋒。

總括而言,烏拉圭今屆俄羅斯世界盃陣容齊整,先有經驗同硬度並存嘅後場組合,再有充滿拚勁嘅後生中場,又有衝擊力極強嘅前鋒二人組。所以筆者相信今年世盃嘅烏拉圭係較為期待嘅國家隊,8強應該走唔甩。

烏拉圭小組賽賽程表:
A組
6月15日 20:00 埃及 VS 烏拉圭 葉卡捷林堡中央體育場

6月20日 23:00 烏拉圭 VS 沙地阿拉伯 羅斯托夫體育場

6月25日 22:00 烏拉圭 VS 俄羅斯 沙馬拉體育場

陣容預測:
烏拉圭正選陣容 (4-4-2):

守門員: 梅斯利拿

後防:麥斯‧彭利拿,基文尼斯,高甸,卡沙利斯

中場: 洛迪古斯,雲仙奴,賓坦古亞,蘭迪斯

前鋒: 卡雲尼,蘇亞雷斯

.

全民俾LIKE 人人「些牙」!

.