以上問題相信大部份人答案都會說是潘頓,如根據客觀事實,這個答案肯定錯不了。但雷神走咗,開心的又點只潘頓一人? 但鹵味男的答案就係大部分騎師練馬師都會為此感到高興。

 
眾所周之,莫雷拉神功蓋世,他大約壟斷了六至七分一的頭馬,加上潘頓包辦了約七分之一的頭馬,基本餘下的頭馬數字要由約廿多位騎師瓜分,可以分得幾多大家心中有數。當莫雷拉要大舉搏殺的時候,騎又騎唔贏佢,連可以抗衡的坐騎都沒有,失望之餘就只有遊馬河算了,要參加一場不能贏的比賽,有誰會覺得高興?
 
雷神走了之後,最少有七分一的頭馬會分番出來俾其他騎師,當然潘頓可分到多一些雷神的坐騎。但潘頓呢位老哥出晒名「跑心情」,而且經常性「心情唔好」。但是只要呢位老哥「心情唔好」,其他騎師就有機會多贏幾場頭馬。就算潘頓搏馬亦未如雷神一樣經常得心應手。我作為一個騎師落場跑馬,如果贏的機會可以由「渺小」增至「有機會」,跑場馬都會有心機一些。總結就係,雷神離開後,大部分騎師都可以多贏幾場甚至幾十場頭馬。在香港搵食的騎師,聽到呢個消息,真係瞓瞓下都會笑醒。
 
另一班受益的群體,就是除蔡約翰外的一眾練馬師。大家都知蔡約翰手上的馬,有部分都是由四班贏到二班甚至贏級際賽的份子,呢類馬如「以奇用兵」之流,平均一季可以交出四至五場頭馬。這類馬除超班之外,如用上莫雷拉更加是穩上加穩,除非突然失準,否則頭馬根本是手到拿來。再加上莫雷拉有時會幫蔡約翰嬴一部分下風馬如「龍船」、「東方快車」之流。直到今日為止,蔡約翰贏了83場頭馬,更甚的是上季贏了94場頭馬。試想想,如果蔡約翰沒有莫雷拉,雖然他仍然是冠軍練馬師,但肯定沒有如此恐怖的頭馬數字,因為他搏失馬的風險和贏下風馬的機會率,都會少咗。
 
沒有雷神用的練馬師,要交頭馬就會相對上比較困難。因為這些練馬師就算做好一隻馬準備搏殺,但用了其他騎師,就有機會在騎功上輸俾雷神,因而博失跑二二三三,當跑二二三三跑得多,評分一直加上去,形成有些賽駒平平白白少了一場頭馬。今時今日雷神離開香港,這類馬房就算用李寶利,史卓豐,梁家俊之流,亦有較大機會搏殺得手。
 
所以雷神走咗,可以說馬圈大部分騎師和練馬師,都應該會好開心。而最傷心的,當然是我們一眾低端馬迷,因為大家賭馬的時候將會少了一支扶手棍。再想起下個馬季,很多時候將會由潘頓負責孭飛,當潘頓「心情唔好」的時候,大家就會好懷念雷神了。

(鹵味男  15/6/2018)

.

全民俾LIKE 人人「些牙」!

.