文/William Luk

伊朗足球代表隊(波斯文: تیم ملی فوتبال ایران‎)

世界排名:37

教練:基羅斯(Carlos Queiroz)

今屆外圍賽成績:亞洲區A 組首名

歷年出席世盃決賽週次數: 5 (1978年、1998年、2006年、2014年以及2018年)

歷屆最佳成績:小組賽

外圍賽最佳射手:薩達爾·阿斯蒙( 11 )

今屆訓練基地:莫斯科

亞洲勁旅伊朗連續兩屆殺入決賽週,亦係伊朗歷嚟第五次打入世界盃決賽週。「伊朗雄獅」喺世界盃最令人印象深刻佢哋1998年對美國嗰場大戰,呢場比賽,伊朗贏2 1美國,呢場都係伊朗參加世界盃以嚟唯一一場勝仗。伊朗作為而家嘅亞洲大佬,喺亞洲區預選賽中以不敗戰績晉級世界盃。

但係,目前國際局勢形勢突變,伊朗再次受到美國嘅制裁,導致伊朗喺世界盃開打前好難搵班似樣嘅熱身賽對手,希臘同匈牙利臨時放飛機,無奈佢哋只好第一隊飛到俄羅斯訓練基地,並同立陶宛踢咗場象徵性嘅比賽,然後等第一輪正式開賽。同時,由於受今次製裁影響,伊朗喺運動裝備都出現問題,NIKE將所有波BOOT供應取消。

世界盃B組即將打響,今晚B組賽事有摩洛哥對伊朗,一眾波斯人一定興奮到爆,而對於廣大球迷嚟講,伊朗最正嘅會係佢哋海外女Fans。

而伊朗今屆5月13號公佈35人大名單,再喺24號減少到24人。最後喺6月4號公佈23人大名單。

伊朗今屆23人大名單

伊朗23人大軍名單:
門將:
1.比蘭雲特(柏斯波利斯)、12.馬沙夏利(索柏阿漢) 、22.阿拔沙度(馬里迪莫)

後衛:
4.捷舒美(艾斯迪格拿) 、5.米列莫‧哈馬迪(艾卡馬特)、8.普拿列簡積(艾薩德)、13.卡漢薩德(柏迪德)、15.蒙達斯利(艾斯迪格拿) 、19.賀斯尼(艾斯迪格拿) 、23.列沙尼安(奧斯坦德)

中場:
2.托拿比(塞柏),3.夏沙菲(奧林比亞高斯),6.艾沙杜拉希(阿馬卡),7.蘇查爾(AEK雅典),9 .伊巴謙美(艾斯迪格拿),11.阿美利(柏斯波利斯),14.高度斯(奧斯達辛斯) 、18.查漢巴克殊(阿爾克馬爾) 、21.迪查加(諾定咸森林)

前鋒:
10.安沙列法特(奧林比亞高斯) 、16.高查尼赫特(海倫芬) 、17.美迪達利美(艾加拉法) 、20.艾斯蒙(魯賓卡山)

•回顧

2014年嘅巴西世界盃,四支亞洲參賽球隊全部小組賽出局,但伊朗可以話係四支亞洲參賽球隊入面,表現最好一隊。先守和非洲尼日利亞,再喺次輪對阿根廷嘅比賽中,眾志成城頑強抵擋咗阿根廷近90分鐘嘅狂轟猛炸,但最終阿根廷都係憑住美斯補時絕殺,伊朗都係以0 1告負。

雖然伊朗喺2014年分組賽只係1和2負得1分,最終出局。但3場小組賽伊朗都只係失4球,可以見到基羅斯戰術重視防守。呢4年,伊朗一直冇轉變過呢個踢法,今屆喺亞洲區外圍賽第二輪尾2嗰場到第三輪尾2嗰場,曾經連續造出12場唔失波嘅世盃外圍賽紀錄,可以睇到伊朗防守實力喺亞洲係一流水平。

基羅斯執教伊朗7年,對伊朗肯定瞭如指掌

今屆外圍賽基本上伊朗都係輕輕鬆鬆,先喺第二圈8戰6勝2和輕鬆出戰12強,再喺第三圈12強最終以6勝4和嘅成績,成為亞洲唯一一支不敗國家隊殺入2018年世界盃決賽週,以下係伊朗喺今屆世盃戰績

-第二圈D組

土庫曼1 1伊朗

伊朗6 0土庫曼

印度0 3伊朗

阿曼1:1伊朗

伊朗3 1土庫曼

關島0 6伊

伊朗4 0印度

伊朗2 0阿曼

-第三圈A組

伊朗2 0卡塔

中國0 0伊朗

烏茲別克0 1伊朗

伊朗1 0韓國

敘利亞0 0伊朗

卡塔0 1伊朗

伊朗1:0中國

伊朗2 0烏茲別克

韓國0 0伊朗

伊朗2 2敍利亞

-主力分析

近年越嚟越多伊朗中前場球員外流歐洲主流聯賽,所以今屆伊朗喺前場好多選擇。首先係「伊朗美斯」阿斯蒙(Sardar Azmoun)絕對係昆洛斯的首選。仲有效力荷甲海倫芬嘅高查尼赫特(Reza GHOOCHANNEJHAD)、效力希臘班霸奧林比亞高斯前鋒安沙裡法特(Karim ANSARIFARD)仲有今季荷甲神射手嘅查漢巴克殊(Alireza JAHANBAKHSH)。所以伊朗被認為會係今屆亞洲最有機會嘅國家。

比蘭雲特以前曾經係窮到瞓街(德黑蘭時報)

門將比蘭雲特(Alireza Beiranvand)係筆者覺得係近年伊朗最出色門將,而且佢啲手力癡線到驚人,一下可以快速而又輕鬆咁拋個過波半場,佢喺伊朗聯賽同亞洲冠軍聯賽都試過用手扔波直接助攻畀前場隊友入波,絕對係伊朗今屆打快速進攻嘅利器。

迪查加踢波充滿拚勁

31歲嘅迪查加(Ashkan Dejagah)雖然喺伊朗出世,但1歲就搬去德國柏林,青年軍時期代表過德國踢波。佢係筆者中學生嗰時最鐘意嘅球員之一。佢早年喺德甲效力,並喺2012年轉戰英超富咸,雖然球隊喺翌季不幸降班,但佢出色嘅表現仍然說服到班富咸球迷,獲選做該季富咸最佳球員。

而迪查加對於伊朗仍然有份濃厚感情,其中左手手腕紋上出生地「德黑蘭」,可以見到佢對家鄉波斯嘅重視。而佢最終都決定效力伊朗國家隊。早年嘅迪查加擅於邊線突破,但而家嘅佢已經轉型做攻中擔任傳送工作,係國家隊一直係必然正選,為前線嘅阿斯蒙送上源源不絕嘅助攻。

阿斯蒙絕對有機會入波

伊朗主力前鋒阿斯蒙(Sardar Azmoun)佢係伊朗以不敗之身晉級決賽週嘅主力,喺今季外圍賽合共攻入11球。目前效力魯賓喀山,今季佢喺喀山攻入4個俄超入球。而且俄羅斯舉行世界盃令他享有半個主場之利,發揮更得心應手。

身高達1.86米嘅佢係轉戰足球之前喺細個嗰時曾經打過一段時間排球隊,彈跳力係一大特點,令佢有一定嘅頭鎚能力,而且控傳了得,係伊朗前場核心。目前英超愛華頓同西甲華倫西亞都對佢有興趣,相信世盃表現會好影響佢來季嘅去向。

•小組分析

今屆伊朗將會身處B組,第五次參加世界盃的伊朗,渴望著在戰績上再向前邁一步。無奈籤運差,同與西班牙、葡萄牙以及摩洛哥分到一組,想要喺呢組突圍,確實有一定嘅難度。

伊朗先喺首輪對陣北非摩洛哥,兩隊都面對住伊斯蘭齋戒月問題,相信會好影響兩隊球員狀態。

兩國其實近期關係因為斷交事件而極為惡劣。摩洛哥同伊朗一樣都喺外圍賽最後一圈比賽入面以不敗戰績進軍今屆世界盃決賽週,伊朗10戰僅失2球,而摩洛哥喺6場世預賽中一球不失,防守都十分穩健,但兩隊都冇可以決定比賽嘅的皇牌。

而呢場失利嘅一隊面對西葡兩隊強隊,基本上一定提前宣告淘汰出局。贏波嘅球隊如果運氣好,或者可以喺西葡之間扮演攪局者嘅角色。

筆者相信伊朗係小組中實力最弱一隊,不過主教練基羅斯曾經執教過皇馬同葡萄牙國家隊,亦都跟過摩連奴學嘢。相信喺葡萄牙人治下嘅「波斯鐵騎」有機會為伊比利亞雙雄帶嚟困擾。不過都要睇下西葡大戰嘅賽果,邊隊首戰贏波喺後面2場都會輕鬆好多,若果係和波收場,後面嗰2場都將係決賽,恐怕畀伊朗嘅機會都唔會多。

筆者曾經喺某國機場偶遇基羅斯,當時都祝佢喺世盃有好成績

伊朗女FANS (Worldcupgirls)

•伊朗世界盃小組賽賽程表:
B組

6月15號23:00 摩洛哥VS 伊朗  聖彼得堡球場

6月21號02:00 伊朗VS 西班牙  喀山體育場

6月26號02:00 伊朗VS 葡萄牙  薩蘭斯卡摩度維亞球場

•陣容預測

伊朗正選陣容PLAN A(4-5-1):

門將:比蘭雲特

後衛:夏沙菲,捷舒美,普拿列簡積,列沙尼安

中場:安沙列法特,伊巴謙美,蘇查爾,迪查加,查漢巴克殊

前鋒:艾斯蒙

伊朗正選陣容PLAN B(3-4-3):

門將:比蘭雲特

後衛:捷舒美,普拿列簡積,列沙尼安

中場:蘇查爾,夏沙菲,伊巴謙美,艾沙杜拉希

前鋒:高查尼赫特,艾斯蒙,查漢巴克殊

(文章純屬筆者意見,唔代表癲狗日報立場。

全民俾LIKE 人人「些牙」!

.