/文William Luk , Mariana Santos Lucas & 天叔

葡萄牙著名打氣歌”Ohhh, Portugal allez, Portugal allez, Portugal”

葡萄牙足球代表隊(西班牙文:Seleção Portuguesa de Futebol)

教練:費蘭度‧山度士(Fernando Santos)

世界排名:4

今屆外圍賽成績:歐洲區B組首名

歷年出席世盃決賽週次數:7次(1966 年、1986年、2002年、2006年、2010年、2014年以及2018年)

歷屆最佳成績:季軍(1966年)

外圍賽最佳射手:基斯坦奴‧朗拿度(15球)

訓練基地:莫斯科拉緬斯高耶

首先要喺度多謝William邀請我呢位葡人一齊幫手分析今年世界盃葡萄牙走勢,我喺澳門出世,識廣東話但唔識寫。所以呢,我係打完葡文再畀William翻譯做廣東話。由於屋企人影響下,我一直都係支持我嘅國家葡萄牙,2016年我真係唔相信葡萄牙可以拎到歐國盃冠軍。

我第一次睇葡萄牙係2002年日韓世界盃美國對葡萄牙嘅比賽,慢慢開始關注葡萄牙國家隊嘅比賽,因為當時年紀細,知道嘅球星不多。但已經知道葡萄牙隊長費高(Figo)係家傳戶曉嘅名。喺2004年我喊過一次,嗰年我哋主辦歐國盃,但決賽輸咗畀希臘,全國上下都好唔咁心一個咁好嘅奪冠機會白白斷送係自己手上。直到2016年,我哋終於吐氣揚眉,成為歐洲冠軍,呢個都係葡萄牙第一個大賽錦標。

今年,我哋浩浩蕩蕩進軍俄羅斯,劍指大力神盃!

葡萄牙喺5月14號公佈35人名單並喺5月17號公佈23人大名單,係32強入面最早公佈大名單嘅其中一個國家。

葡萄牙23人大名單(葡萄牙足總Tiwtter)

葡萄牙23人大軍名單
門將: 1.柏迪斯奧(自由身),  12.安東尼‧盧比斯  (里昂) ,22.比圖  (哥茲塔比)

後衛:
2.般奴‧艾維斯(格拉斯哥流浪),3.比比(比錫達斯) ,5.拉菲爾‧古里路  (多蒙特),6.荷西‧方迪(大連一方) , 13.魯賓‧迪亞斯  (賓菲加) ,15.列卡度‧彭利拿  (李斯特城),19.馬裡奧‧雷(拿玻里),21.薛迪索拉斯(修咸頓)

中場:
4.文奴‧費南迪斯(莫斯科火車頭),8.莫天奴(摩納哥),10.祖奧‧馬裡奧(韋斯咸),11.貝蘭度‧施華(曼城) ,14.威廉‧卡華奴(士砵亭),16.般奴‧費南迪斯(士砵亭),23.艾迪恩‧施華(李斯特城)

前鋒:
7.基斯坦奴‧朗拿度(皇家馬德里),9.安達‧施華(AC米蘭),17.古亞迪斯(華倫西亞)
,18.謝遜‧馬田斯  (士砵亭) ,20.哥利斯馬(比錫達斯)

葡國大軍抵達俄羅斯

回顧

山度士過往執教生涯一般,靠執教母國葡萄牙起死回生

葡萄牙帶住2016年歐洲冠軍之名出戰2018 世界盃外圍賽,不過佢地除左係外圍賽首戰輸俾同組最強嘅瑞士外,之後面對實力較弱嘅安道爾、法羅群島等都能夠大勝而回,遇到嘅考驗唔多,只係喺最後一場擊敗瑞士。最終,葡萄牙喺呢組9勝1負,入32球失4球,以得失球差拎返首名直接出綫資格。

瑞士2:0 葡萄牙

葡萄牙6:0 安道爾

法羅群島0:6 葡萄牙

葡萄牙4:1 拉脫維亞

葡萄牙3:0 匈牙利

拉脫維亞0:3 葡萄牙

葡萄牙5:1 法羅群島

匈牙利0:1 葡萄牙

安道爾0:2 葡萄牙

葡萄牙2:0 瑞士

陣中主力分析

-門將
門將: 1.柏迪斯奧(自由身),  12.安東尼‧盧比斯  (里昂) ,22.比圖  (哥茲塔比)

「黃金探險隊」一直唔缺少有質素嘅門將,雖然同一班世界頂級門將存在一啲差距,但都絕對算得上世界一流門將。而Maria認為葡萄牙門將一去到大賽就門神上身,總係關鍵時刻有出色嘅表現,所以佢認為門將係葡萄牙最為穩陣嘅位置。

柏迪斯奧喺葡萄牙表現夠穩陣

如無意外葡萄牙正選門將會係柏迪斯奧(Rui Patrício)。呢位30歲嘅門將自2010年起已經為葡萄牙把守最後一關,去到2014年正式取代伊度亞度·卡華路(Eduardo Carvalho)成為葡萄牙首席門將,更憑住2016歐國盃入面嘅優異演出,為國家隊贏得歷史上第一個大賽錦標。筆者認為佢防守範圍廣闊,撲救能力一流。

而兩名後備門將,安東尼盧比斯(Anthony Lopes)同比圖(Beto)喺國家隊嘅上陣時間唔多,我哋3位就唔作個別評論啦。

-後衛老態呈現
2.般奴‧艾維斯(格拉斯哥流浪),3.比比(比錫達斯) ,5.拉菲爾‧古里路  (多蒙特),6.荷西‧方迪(大連一方) ,13.魯賓‧迪亞斯  (賓菲加) ,15.列卡度‧彭利拿  (李斯特城),19.馬裡奧‧雷伊(拿玻里),21.薛迪(修咸頓)

比比(中)一但又發癲,後果不堪設想。荷西‧方迪(左)近半年效力中超,狀態令人擔憂(Goal.com)

如果閣下係葡萄牙嘅支持者,相信令您最擔心嘅都莫過於一條後防線。諗返2014巴西世界盃,比比(Pepe)喺對德國第一場比賽嘅一面紅牌,某程度上簡接斷送葡萄牙嘅出線資格。
不過今時今日嘅比比(Pepe)係脾氣控制方面已經成熟左唔少,希望佢今屆可以生生性性,踢好啲波。雖然脾氣好左,但年紀大咗。

中堅係筆者認為葡萄牙最有問題嘅位置,老化呈現,青黃不接。目前除了大師選不出第二個人選。,35歲嘅比比(Pepe),無論配上34歲嘅荷西‧方迪(José Fonte),定係36歲嘅般奴‧艾維斯(Bruno Alves),相信喺速度同體能上應該會係一大劣勢。

筆者真係諗極都唔明,點解干查奧唔想踢世界盃(FOX Sports)

另外,筆者想講一講左閘嘅位置,一路伴隨C朗多年嘅干查奧(Fábio Coentrão),以太攰為理由,拒絕接受國家隊徵召,取而代之嘅係2016歐國盃打出名堂嘅拉菲爾古里路(Raphaël Guerreiro)。

葡萄牙2個閘位勝在夠後生

呢位24歲嘅球員係16年歐國盃最佳十一人之一,而佢當年嘅優異演出亦都得到多間大球會嘅賞識。最後佢選擇左加盟德甲「蜜蜂兵團」多蒙特。喺加盟第一季,因為佢踢法全面,被當時嘅領隊杜曹(Tuchel)安排擔任中場中位置,而且攻入咗7個入球。可惜佢今季因傷關係,全季加埋都係踢得13場波。
Maria忘為佢喺多蒙特好多時候唔係打左閘位置,導致佢防守能力弱化。上年洲際盃第一場對墨西哥嘅比賽,評分係上半場全場最差嘅一位。
至於天叔認為佢去到季尾先傷癒復出,狀態成疑。所以叫各位球迷即管睇下佢可唔可以再次交出好嘅表現。

右後衛,呢個位係MARIA最為擔心嘅一個位。呢個一直係近年葡萄牙最唔穩陣嘅位置,不過今屆主力應該會係效力英超修咸頓嘅薛迪(Cédric Soares)。

畢竟薛迪喺近年葡萄牙比賽時,踢右閘時間係最多,大賽經驗豐富,比往嘅右閘會穩陣好多。

-中場
4.文奴‧費南迪斯(莫斯科火車頭),8.莫天奴(摩納哥),10.祖奧‧馬裡奧(韋斯咸),11.貝蘭度‧施華(曼城) ,14.威廉‧卡華奴(士砵亭),16.般奴‧費南迪斯(士砵亭),23.艾迪恩‧施華(李斯特城)

對比2016年歐國盃嘅陣容,葡萄牙嘅中場線變動亦都唔大,呢班人腳喺2年繼續成長,絕對唔可以睇少。

Maria覺得威廉‧卡華奴(William Carvalho)一出道時就已經受到萬眾矚目,雖然一直都無效力歐洲豪門。但係防中嘅正選席位一直穩如泰山。因為佢他除咗防守之後,傳波視野都係一大殺著。由於喺葡超踢波,所以會被外界嚴重低估。MARIA認為佢有朝一日絕對會成為世界級防中。

而中場中嘅位置,相信會係兩位老將莫天奴(João Moutinho)同艾迪恩‧施華(Adrien Silva)嘅爭奪。

莫天奴過去令人好失望

筆者想講下莫天奴呢位中場球員。「食之無味,棄之可惜」係我對佢嘅感覺。佢又唔係真係廢,但又搵唔到一個比佢仲廢嘅人。有段時期好多人吹到佢喺巔峰時期屬於中場大師,但我始終認為佢從來無呢個能力。
皆因喺2014年世界盃我對佢期望幾大,但結果3場比賽毫無貢獻。筆者唔係主觀咁評論佢,而係佢而家真係老啦,身體機能下降得好快,睇佢踢歐聯啲體能比以前差好多。但佢大賽經驗豐富,雖然而家唔可以喺關鍵時刻有咩搶眼發揮,但確實係成個中場最穩定嘅一個位置。葡萄牙自「黃金一代」之後就一直冇一個出色嘅組織中場,「廖化作先鋒」,佢或者係今屆「黃金探險球」嘅指揮中場。

至於兩翼嘅位置,預計分別由貝拿度‧施華(Bernardo Silva)以及祖奧‧馬裡奧(João Mario)出任。

貝拿度只有23歲,係今屆葡萄牙中場其中一個焦點(Sky Sports)

今季加盟曼城嘅貝拿度‧施華(Bernardo Silva),雖然介乎於正選與後備之間,但佢一上場就會交到功課,亦都幫助曼城以破紀錄嘅100分奪得英超冠軍。佢嘅速度、護波同個人突破能力早喺效力法甲摩洛哥時期已經展現畀大家睇。而有時筆者會喺佢身上見到荷蘭名將洛賓(Arjen Robben)嘅影子,因為貝拿度有時會學洛賓咁嚟一招邊路推大位起腳。唯一缺點係身體單薄,對抗能力差。

而祖奧‧馬裡奧(João Mario)上半季喺意甲國際米蘭可以話係一籌莫展,不過下半季外借到韋斯咸後,深得領隊莫耶斯(David Moyes)重用,13場2入球,以初到英超嘅外籍兵嚟講可以算係唔錯。

至於曾經被視為葡萄牙新星嘅連拿度‧山齊士(Renato Sanches),喺2016年歐國盃大爆發之後就頹無可頹,喺歐國盃嘅帶波推進能力冇曬,防守唔積極。筆者覺得而家佢比賽態度好有問題,可能真係唔應該咁快去拜仁。
佢喺今季外借到史雲斯後繼續沉淪,唔適應英超不特止,連球隊最後都降班收場,無份入選都相當合理。

-前鋒除咗C朗仲有邊個?
前鋒: 7.基斯坦奴‧朗拿度(皇家馬德里),9.安達‧施華(AC米蘭),17.古亞迪斯(華倫西亞) , 18.謝遜‧馬田斯  (士砵亭),20.哥利斯馬(比錫達斯)

C朗貴為當今足壇雙神之一(Sky Sports)

2016歐國盃決賽,C朗提早傷出,但全隊上下一心,喺極度下風嘅形勢下最終迎刃而上,1擊敗東道主法國,贏得「黃金探險隊」歷史上第一個大賽錦標,或者令到C朗上咗寶貴嘅一​​ 堂,葡萄牙無咗佢,一讓得。而C朗嘅踢法,威水史,隨時大家比我更熟悉,天哥喺度都唔再多講,就講下佢一班隊友。

喺兩年過後,呢次伴隨佢身邊嘅已經由蘭尼(Nani)換上安祖‧施華(André Silva)。

安祖‧施華係葡萄牙前場新星(Scoopnest)

年僅22歲嘅安祖‧施華,為葡萄牙上陣23場,攻入12球,平均差唔多一場有兩個入球,效率算高。佢身材唔算高大,但門前把握力好,喺歐洲區外圍賽B組以9個入球緊隨住C朗,排第二。相信佢喺決賽週亦都會夥拍C朗繼續擔任正選。
不過MARIA認為安祖‧施華雖然效力緊意甲AC米蘭,但今季AC成績慘不忍睹,施華自己成季只係入2球。而且施華射門同控球突破都好一般,更多係做到一個前場進攻支援作用。相信佢今屆喺比賽更多嘅只係為C朗製造出空位,吸引防守。

至於筆者認為,前鋒後備人選必然係哥利斯馬(Ricardo Quaresma),雖然佢一早已經過咗巔峰期,但啲一腳同外腳背傳都係極度瀟灑,目前體能係佢而家嘅一大問題,所以適合做後備。

另外,古亞迪斯(Gonçalo Guedes)呢位年青人係今屆世界盃,隨時為葡萄牙帶嚟唔少新嘅衝擊。出身自賓菲加嘅青訓體系,直到2017年1月被巴黎聖日門以三千萬歐元收購,同年7月外借到西甲球隊「蝙蝠」華倫西亞。
喺剛過去嘅球季,華倫西亞喺季初曾經打出一段高潮,當中古亞迪斯喺過程中亦都為球隊貢獻不少,而吸引到葡萄牙主帥費蘭度山席士將佢帶去葡萄牙。而喺決賽週開始前嘅最後一場熱身賽,憑古亞迪斯梅開二度,以3:0擊敗阿爾及利亞。

•小組分析

今屆葡萄牙分喺B組,同組仲有伊比利亞死敵西班牙、伊朗同摩洛哥。筆者認為今屆「黃金探險隊」喺呢組其中一個優勢係佢哋有喺俄羅斯嘅實戰經驗,參加過2017年洲際國家盃,已經嚟過俄羅斯熟悉場地。
而MARIA認為,就算葡萄牙而家貴為一支歐洲冠軍,但其實同10年前班「黃金一代」有唔少距離。嗰時嘅葡萄牙各個位置均衡,除咗費高之外,仲有迪高(Digo)同C朗呢啲新興巨星。以當時嘅實力確實有能力爭到好多大賽錦標。
所以佢客觀認為,葡萄牙喺今次分組雖然排喺一檔,但目前葡萄牙真正實力應該喺二線頭,同歐洲傳統勁旅有唔小距離。首戰對西班牙,本來勉強可以55開,但而家西班牙,因為臨陣易帥,嚴重影響軍心,令到葡萄牙有機可乘。而對伊朗同摩洛哥,實力相差太遠,絕對係一面倒嘅比賽。但B組已經因為西班牙內部問題,由「雙牙爭峰」變成群雄亂鬥,所以葡萄牙絕對唔可以輕敵。

總括而言,葡萄牙係遇強遇強,喺近年大賽,除咗畀德國大炒一次,當年宇宙最強嘅西班牙都擊敗唔到佢。所以,呢次世界盃小組賽葡萄牙出綫問題唔大。但問題係會首名定次名出綫,而家睇A組嘅形勢,最有可能出綫會係尋日大炒沙地5球嘅東道主俄羅斯同烏拉圭。葡萄牙有個一個特點-慢熱,所以8強再遇到列強先好。所以一但葡萄牙淘汰賽面對烏拉圭,就相對危險。但如果對俄羅斯,咁就好好多。

另外,Maria認為如果葡萄牙出綫,8強好有可能面對阿根廷。而呢場比賽一但現必定會成為世界盃最大賣點之一,因為係C朗同美斯最後一次世盃之爭。佢認為阿根廷雖然係列強之一,但佢而家嘅葡萄牙同阿根廷相比唔再完全處於下風。雖然阿根廷畀人感覺眾星雲集,冇咩團體戰術可以,所以一定唔夠葡萄牙團結。
而且葡萄牙核心同打法明確。今屆葡萄牙一但晉級四強,今次世界盃旅程已經非常圓滿。至於拎冠軍?要靠運氣幫手。所以,Maria預計葡萄牙至少可以殺入4強,甚至贏到今屆世盃冠軍,作為海外葡萄牙人,我緊係希望葡萄牙可以走得很遠。C朗已經喺2016年圓咗歐國盃夢,我希望2018年可以圓埋C朗嘅世盃夢。

•葡萄牙世界盃小組賽賽程表:
B組

6月16號02:00 葡萄牙VS 西班牙 索契菲斯特體育場

6月21號20:00 葡萄牙VS 摩納哥 莫斯科盧日尼基球場

6月26號02:00 伊朗VS 葡萄牙 薩蘭斯卡摩度維亞體育場

•陣容預測:

葡萄牙正選陣容(4-4-2):

門將:柏迪斯奧

後衛:薛迪,比比,荷西方迪,拉菲爾古里路

中場:貝拿度施華,威廉卡華奴,艾迪恩施華,祖奧馬裡奧

前鋒:安祖施華,基斯坦奴朗拿度

(文章純屬筆者意見,唔代表癲狗日報立場。

全民俾LIKE 人人「些牙」!

.