文/William Luk

摩洛哥足球代表隊 (阿拉伯文: منتخب المغرب لكرة القدم‎‎)

教練:連納(Hervé Renard)

世界排名:41

今屆外圍賽成績:非洲區第三圈C組首名

歷年出席世盃決賽週次數:5次 (1970年、1986年、1994年、1998年同2018年)

歷屆最佳成績:16強 (1986年)

外圍賽最佳射手:保達立(4球)

訓練基地:佛洛尼茲 (俄文:Воро́неж)

摩洛哥,香港人一定會諗起卡薩布蘭卡呢首歌” Oh a kiss is still a kiss in Casablanca But a kiss is not a kiss without your sigh Please come back to me in Casablanca I love you more and more each day as time goes by” 。而呢個北非國家,喺一個旅遊業極為發達嘅國家,而家國內局勢喺非洲係最為穩定嘅一個。而過去法國屬地嘅關係,令到法文同阿拉伯文成為佢哋與生俱來嘅語言。

上次摩洛哥喺世界盃亮相已經係1998年法國世界盃,嗰屆佢哋身處A組,最後落後挪威1分,無緣淘汰賽。闊別廿年後重返世盃決賽。呢隊「亞特拉斯雄獅」近一年喺各項賽事連續十八場不敗。咁嘅表現絕對令人大跌眼鏡。

摩洛哥足總喺2018年5月17號公佈26人名單,並係6月4號公佈23人大名單。最令人感到詫異嘅係,今屆摩洛哥23人名單入面有17國球員係非摩洛哥出世,係名符其實嘅「聯合國」。

摩洛哥2018年世界盃決賽週23人名單 (摩洛哥足總Twitter)

摩洛哥23人大軍名單:
門將: 1.保奴 (基羅納)、12.蒙尼亞 (紐文西亞)、22.泰拿諾迪 (IR丹吉爾)

後衛:
2.夏基美 (皇家馬德里)、3.咸沙‧文迪爾 (里爾)、 4.文奴‧達哥斯達 (巴沙克舒希)、 5.賓拿迪亞 (祖雲達斯)(C)、6.沙斯 (狼隊)、17.迪拉 (費倫巴治)

中場:
7.薛耶治 (阿積士)、8.艾亞馬迪 (飛燕諾)、10.貝漢達 (加拉塔沙雷)、11.法積亞 (基達菲)、14.保斯素化 (艾查捷拉)(VC)、15.尤素夫‧賓拿沙 (卡昂)、16.岩拉巴治 (雷加利斯)、18.夏列特 (史浩克04)、21.蘇夫恩‧岩拉巴治 (飛燕諾)、23.卡斯拉-干沙利斯 (標準列治)

前鋒:
9.艾卡比 (貝簡尼)、13.保達立 (耶利馬拉蒂亞)、19.安尼斯利 (馬拉加)、20.布夏迪斯 (聖保利)

回顧
摩洛哥闊別廿年後重返世盃決賽,教練連納居功至偉。呢位曾經帶領贊比亞同象牙海岸分別贏得2012年同2015年非洲國家盃冠軍嘅法國教練,自2016年起執教「亞特拉斯雄獅」摩洛哥。摩洛哥喺連納帶領下喺世盃外圍賽非洲區第3圈最終以6戰3贏3和,入11球0失波嘅成績, 20年嚟首度躋身世界盃決賽週,連納瞬間成為摩洛哥全國上下嘅英雄。並且同摩洛哥足總續約到2022年。

今屆最型同最Man教練,非連納莫屬 (Denis Balibouse / Reuters)

而連納喺執教生涯上嘅成功係在於變陣,呢位人稱「魔術師」嘅教頭喺接手摩洛哥之後,就將唔同球員嘅位置同職責重新整理。例如喺世盃外圍賽將老將保蘇化(Mbark Boussoufa)嘅進攻重責分散畀其他球員,畀佢由攻中位置返後去防中同保留更多體力擔任更多防守工作。另外,對一部份嘅後防球員都有相應位置調整,令到摩洛哥有更多新鮮感同戰術執行靈活性,以下係摩洛哥今屆外圍賽成績(第二圈連納仍未執教摩洛哥) :

-外圈賽第二圈:

摩洛哥2:0赤道畿內亞

赤道畿內亞1:0摩洛哥

-外圈賽第三圈:

加蓬0:0摩洛哥

摩洛哥0:0象牙海岸

摩洛哥6:0馬里

馬里0:0摩洛哥

摩洛哥3:0加蓬

象牙海岸0:2摩洛哥

陣中主力

摩洛哥今屆主力主要起用一班海外「摩二代」,佢哋大多都有效力歐洲頂級聯賽經驗,絕對有一定嘅實力。

呢位鐵血隊長喺上年非洲盃期間勇戰受傷

隊長貝拿迪亞(Medhi Benatia)目前31歲,司職中堅。法國出世嘅佢係摩洛哥移民第二代,出身自法甲馬賽青訓並喺意甲成名。目前效力意甲班霸祖雲達斯。喺「老婦人」2季仍然未擔任到後防正選。但喺摩洛哥就係後防必然正選,2008年開始成為摩洛哥大國腳。貝拿迪亞喺2017年帶領「亞特拉斯雄獅」殺入非洲盃決賽,但最後不敵喀麥隆,同冠軍失之交臂。
佢嘅身體質素出眾,頭鎚能力唔錯,具有相當好嘅後上助攻能力,今季喺意甲上陣21場都入咗2球就可見一班。今個夏天轉會窗,貝拿迪亞成為英超阿仙奴嘅引援目標之一,睇下呢位隊長嘅表現可唔可以打動到「兵工廠」。

 

夏基美絕對係摩洛哥超新星(Goal.com)

夏基美(Achraf Hakimi)目前只有19歲,係摩洛哥超新星。喺西班牙首都馬德里出世嘅佢出身於皇馬青訓,司職右閘嘅同時又可以客串中堅位置。

夏基美今季自B隊升上一隊之後就開始受到施丹重用,佢後上能力驚人,能攻能守,具有一定嘅入波能力,今屆喺西甲上陣9次,入2球,並且都跟隨皇馬拎到世冠盃同歐聯冠軍。

艾亞馬迪已經過咗巔峰期 (Yahoo Sports)

另外,摩洛哥嘅中場線係有年紀偏大問題,兩位正選防中艾亞馬迪(Karim El Ahmadi)同保路素斯都已經過咗年過而立之年,導致摩洛哥防守質素會喺下半場中段開始因體力問題而大幅下降。對伊朗還好,但一但對住「雙牙」絕對係喺無還擊之力。

先講下艾亞馬迪,33歲嘅佢曾經效力過英超阿士東維拉,大賽經驗老到。喺荷蘭出世嘅佢出身於川迪並成名於飛燕諾。佢係一個反應快、控球能力唔錯而且經常有靚長傳嘅防守中場。不過隨住年紀漸大嘅佢速度慢,一但快打快會非常蝕底。

保斯素斯,生不逢時

隊長保斯素化係目前效力呢支「亞特拉斯雄獅」年資最長嘅球員。喺荷蘭出世嘅佢喺球員生涯早期係司職進攻中場,係一台價廉物美嘅「發電機」。目前33歲嘅佢因為敵唔過歲月嘅洗禮,已經改任一位偏向防守型嘅指揮中場。只有1米67嘅佢絕對唔係167,佢球下技術非常細膩,巔峰時間喺比甲嘅班霸安德列治嘅表現絕對係所向披靡。

筆者覺得岩拉巴治成日會有驚喜嘢畀各位球迷睇

岩拉巴治(Nordin Amrabat),筆者會對佢有多啲印象,事關佢曾踢過英超屈福特,嗰屆嘅佢有一球靚射差啲成為李斯特城喺2015-16球季拎冠軍嘅攔路人物。佢喺荷蘭出世,司職左翼,但通常擔任左閘,進攻能力好強,而且控球同射門能力非常好,防守能力都唔錯。不過佢有個老毛病,好唔穩定,成日派「膠」,西甲試過一次,筆者唔多講,上Youtube打佢個名同La Liga你就知咩事。
值得一提,佢細佬蘇夫恩‧岩拉巴治(Sofyan Amrabat)都入選咗今屆世盃摩洛哥23人大名單。

薛耶治絕對係摩洛哥前場進攻核心 (Offballer)

最後筆者要講下薛耶治(Hakim Ziyech),呢位年僅25歲嘅阿積士中場係今季荷甲助攻王,一共做出15次助攻並且射入9球,目前已經引起歐洲頂級聯賽球會注意。而呢位中場能傳能射,創造力驚人。另外,佢具有一定嘅罰球能力,對「雙牙」可能就要靠佢嘅罰球能力去創造驚喜。

小組分析

筆者執筆嗰時,啱啱踢完B組第一場賽事,由伊朗、摩洛哥先喺聖彼得堡體育場打頭陣。摩洛哥無奈籤運不佳,分組碰上前世界盃冠軍西班牙、應屆歐國盃冠胭葡萄牙同埋伊朗,想喺小組有突破嘅目標依舊艱難,想將西葡其中一隊拉落嚟更加係難上加難。但摩洛哥好彩首輪會先對同組實力最弱嘅伊朗,只要贏波一切都仲有可能,因為,贏伊朗之後,然後再寄望葡萄牙可能首場對「狂牛兵團」失利,喺次輪對摩洛哥再又失分,再喺尾場對西班牙,狂牛已穩奪出線權而留力,以5分次名出綫。

今屆世盃踢咗4場已經有兩場臨尾香系列 (Dylan Martinez/Reuters)

但摩洛哥竟然喺全場佔優嘅情況下喺補時入咗球烏龍球,最終以0:1不敵全場防守堅揪嘅伊朗,再加埋執筆嗰時葡萄牙同西班牙最終打成3:3平手,摩洛哥喺呢組嘅情況已經每況愈下,特別係連納唔知係咪大賽唔敢輕舉妄動,去到76分鐘先作1第一個換人名額,同佢擅於變化嘅風作大相逕庭。

布夏迪斯對伊朗後備上陣13分鐘,喺補時階段擺老烏,賽後哭成淚人 (FIFA)

所以經過首輪失利之後,「亞特拉斯雄獅」喺打後兩場嘅小組出綫形勢已經岌岌可危。教練連納調動遲疑當然有問題,而且摩洛哥班國腳嘅心理對伊朗完場嗰刻已經完全崩潰,因為對住小組最弱嘅伊朗,都要臨完場自擺老烏送3分畀對方,白白斷送自己前程。目前,筆者認為今屆摩洛哥要尋求32年嚟喺世界盃決賽週嘅首勝,甚至拎1分都可以話難過登天,有機會做三零部隊。

摩洛哥陣容

第一場對伊朗正選陣容(4-2-3-1) :

門將:蒙尼亞

後防:岩拉伯特,賓拿迪亞,沙斯,夏基美

防中:艾亞馬迪,保蘇化

前場:貝漢達,薛耶治,夏列特

前鋒:艾卡比

(文章純屬筆者意見,唔代表癲狗日報立場。

全民俾LIKE 人人「些牙」!

.