文/William Luk & 天叔


法國足球代表隊(法文: Équipe de France de football)

世界排名:7

教練:迪甘斯(Didier Deschamps)

今屆外圍賽成績:歐洲區A組首名

歷屆出席世界盃決賽週次數:15次 (1930年、1934年、1938年、1954年、1958年、1966年、1978年、1982年、1986年、1998年、2002年、2006年、2010年、2014年以及2018年)

歷屆最佳成績:冠軍(1998年)

外圍賽最佳射手:基奧特 & 基斯文(4球)

今屆訓練基地:莫斯科伊斯特拉(Istra)

今晚6點C組將會上演首輪賽事,由法國對陣澳洲。法國喺1998年成功以東道主身份奪取大力神盃,但往後多年法國足球一直浮浮沉沉,至今未嘗一冠。

法國係今屆其中一隊最早宣佈23人名單嘅32強之一,早喺5月17號就公佈今屆俄羅斯世界盃決賽週23人名單。而皮耶(Dimitri Payet)、賓施馬(Karim Benzema)、賓耶達(Wissam Ben Yedder)馬斯亞(Anthony Martial)、拿卡錫迪(Alexandre Lacazette)拉比奧特(Adrien Rabiot)以及京士利·高文(Kingsley Coman)都無入選到今次23人大名單。

法國23人大名單 (法國足總TWITTER)

法國23人大軍名單:

門將:
1.羅列斯(熱刺)、16.文丹達(馬賽)、23.艾利奧拿(巴黎聖日門)

後衛:
2.柏華特(史特加)、3.甘賓比(巴黎聖日門)、4.華拉尼(皇家馬德里)、5.安迪堤(巴塞隆拿)、17.艾迪‧拉美(馬賽)、19.斯迪比(摩納哥)、21.盧卡斯‧靴南迪斯(馬德里體育會)、2.班捷文·文迪(曼城)

中場:
6.保羅‧普巴(曼聯)、8.湯馬士‧林馬(摩納哥)、12.杜利素(拜仁慕尼黑)、13.簡迪(車路士)、14.馬度迪(祖雲達斯)、15.尼桑斯(西維爾)

前鋒:
7.基斯文(馬德里體育會)、9.基奧特(車路士)、10.基利安‧麥巴比(巴黎聖日門)、11.奧斯文‧丹比利(巴塞隆拿)、18.費基亞(里昂)、20.泰奧雲(馬賽)

回顧
2016年喺全國人民面前痛失歐國盃,或者令到法國上下更有決心去打好今屆世界盃。外圍賽佢哋處於A組,同組較強嘅對手有荷蘭同瑞典。法國喺呢組最終以7勝2和1負,入18球失6球嘅成績首名出綫。兩勝荷蘭絕對係佢哋今屆外圍賽可以首名出綫嘅關鍵,同時亦都將「橙衫軍團」踢出局。
以下係佢地外圍賽嘅成績:

白俄羅斯 0: 0法國

法國 4:1 保加利亞

荷蘭 0:1 法國

法國 2:1 瑞典

盧森堡 1:3 法國

瑞典 2:1 法國

法國 4:0 荷蘭

法國 0:0 盧森堡

保加利亞 0:1 法國

法國 2:1 白俄羅斯

-教練

迪甘斯好多決定都惹人不滿 (Sky Sports)

迪甘斯,由2012年7月已經開始帶領法國隊,到而家已經接近六個年頭,上屆世界盃在八強敗予當屆冠軍德國,而歐國盃更打入決賽,表現可說是不過不失。其實近幾年,法國隊可以講係有點「幸福嘅煩惱」。繼「89黃金一代」後,近幾年不斷湧現有潛力嘅新人,配以原有班底,可以話係法國近年穩步上揚嘅主因。而今屆嘅點兵,基本上佢都以球員嘅狀態先行,放棄喺曼聯表演時好時壞嘅馬斯亞(Anthony Martial)以及有「契仔」之稱嘅梅沙‧施素高(Moussa Sissoko)等。

踢法上,迪甘斯都偏好使用4-4-2陣式,基奧特同基斯文可以話佢嘅陣中必然正選。不過筆者個人覺得迪甘斯嘅戰術咁多年嚟頗為單一,有時候過份依賴基奧特呢類柱躉中鋒為其他球員開路,當基奧特唔喺陣時,其他前鋒球員就變成各有各踢,只靠個人能力搵食。而面對一啲防守性強,「泊大巴」嘅球隊更加苦無對策,好似喺外圍賽入面,法國主場都曾經俾所謂嘅「魚腩」盧森堡逼和0:0,即管睇下迪甘斯喺今屆比賽會唔會有啲咩新嘅招數啦。

主力分析
-門將

唔經唔覺羅列斯都31歲 (Reuters UK)

守門員黎講,羅列斯(Hugo Lloris)反應算快,但見佢今屆喺熱刺,偶然也會有啲大意失誤,而且一直畀人嘅感覺無咩霸氣,壓唔到場。所以,始終唔能夠將佢同紐亞以及迪基亞呢啲一級門將相提並論。不過作為法國隊隊長,羅列斯就一定係必然正選。
筆者相信同上屆一樣,兩位後備門將文丹達(Steve Mandanda)同艾利奧拿(Alphonse Areola) 都應該無咩機會落場予。

-後衛

華拉尼今屆終於有得踢世界盃

唔知係咪法國隊班中堅有啲黑仔,上個大賽有華拉尼(Raphaël Varane)因傷缺陣,今次就到阿仙奴隊長高斯尼(Laurent Koscielny)緣盡世盃。

呢一次受傷,令到高斯尼緣盡今屆世盃,再下屆佢已經36歲,參加世盃機會……….渺茫 (Sky Sports)

不過唔緊要,法國有嘅係人材,效力巴塞嘅安迪堤(Samuel Umtiti)呢兩年表現一直穩步上揚,已經成為巴塞絕對正選,預計佢將會拍住皇馬嘅華拉尼為法國扼守中路。呢兩位中堅有身形,有速度,法國隊嘅球迷基本上都唔需要太擔心。

至於左閘人選方面,可能係法國隊其中一個值得討論嘅位置。喺近兩年嘅外圍賽,左閘正選大多數時間由巴黎聖日耳門嘅古沙華出任正選,可惜季尾大部分時間受傷,最後都無份去俄羅斯。

今年馬體會陣中都好多人入選到世盃名單,包括盧卡斯‧靴南迪斯 (Into the Calderon)

而今次兩位有份入選嘅左閘球員分別係文迪(Benjamin Mendy)同盧卡斯‧靴南迪斯(Lucas Hernández)。文迪季前以破紀錄轉會費加盟曼城,可惜開季無耐就因為十字韌帶重創而長抖,直到4月尾先復出。而盧卡斯‧靴南迪斯,雖然佢最佳位置應該係中堅,但因為左腳仔嘅關係,好多時都被安排出任左閘,今季幫助馬體會贏得歐霸盃冠軍。雖然盧卡斯‧靴南迪斯今年3月先第一次入選法國大國腳,但始乎佢穩健嘅作風都深得迪甘斯愛戴,相信佢打正選嘅機會比長抖完嘅文迪高。

-中場

普巴同簡迪喺英超鬥咗成季,返到國家隊合作可唔可以順風順水呢? (Soccer Laduma)

一對中場中,天叔預計會由普巴(Paul Pogba)同簡迪(N’Golo Kanté)出任正選。普巴今季喺曼聯嘅表演時好時壞,亦都曾經被曼聯領隊摩連奴眨為後備,今季歐聯16強對西維爾次回合仲試過傳出一腳超垃圾傳波,令佢近期被日本傳入香港嘅「佛系文化」惡搞一輪。
但佢番到國家隊嘅時候,往往亦能交出助攻同入球,究竟普巴係咪留力踢世界盃,我哋好快就會知道答案。

而佢嘅拍擋簡迪,無論任何時間,都畀人充滿能量嘅感覺,有呢位防中在陣,法國後防絕對會少好多壓力。

而後備方面,馬杜迪(Blaise Matuidi)同埋杜利素(Corentin Tolisso)呢兩位box to box嘅中場亦都可以為中場注入活力。

而防中位置嘅尼桑斯(Steven Nzonzi),身形和路數兼備,搵佢落場加強防守,亦都會係信心之選。筆者諗起當初效力史篤城嘅佢話要離隊踢西甲,心諗你英超都未踢掂就想去西甲?點知佢喺西維爾發揮出色,拎過歐霸之餘仲入選15-16歐霸最佳11人,到今日佢入選23人名單,算係筆者睇漏眼。

林馬(左)以及麥巴比(右)係法國未來棟樑 (Sky Sports)

左路方面,如無意外會由湯馬士‧林馬(Thomas Lemar)擔正。喺筆者執筆之時,馬德里體育會就宣布已同摩納哥達成共識,林馬將會喺今屆世界盃結束後加盟。呢位左翼喺2016-17球季曾經幫助摩納哥贏得聯賽冠軍,亦都曾經成為過阿仙奴、利物浦等英超球會嘅獵物。
雖然佢身材唔高大,但佢夠靈活、速度高,除咗能夠個人突破之外亦可以為隊友製造機會,唔知佢係比賽入面會唔會助攻多幾球畀黎緊喺球會都會一齊合作嘅基斯文呢?

-前鋒

都係短頭髮嘅基斯文好睇好多 (Goal.com)

基斯文(Antoine Griezmann)嘅能力筆者唔多講,效力馬體會嘅佢係筆者最愛嘅球員之一。呢位27歲前鋒,早喺皇蘇時期就已經超晒班,去到馬體會開始大爆發。佢無論控傳扭射皆見功架。但筆者認為雖然基沙文個人能力出眾,但係同馬體會一樣係仍然非常依賴隊友嘅發揮同配合。
基斯文喺筆者眼早唯一一個缺點係大賽隱形,不過早喺上個月歐霸決賽就已經話畀大家知,佢已經克服呢個問題。

麥巴比(Kylian Mbappé),呢位早兩季喺法甲摩納哥冒出頭來嘅妖人,相信會喺今屆法國隊最關鍵嘅人物之一。佢速度快,爆發力強,的確係唔少後衛嘅惡夢。雖然喺法國隊陣中佢經常俾安排擔任右翼嘅位置,而唔係佢最擅長嘅正前鋒。不過喺比賽入面,佢同基斯文,甚至左翼嘅林馬都會不時換位,再配合一啲小組入滲,令到對手難以防守。

基奧特喺前幾日對美國嘅友誼賽撼爆頭,首輪上陣成疑(Football.London)

「銀河唯一」基奧特(Olivier Giroud)今屆仍然會係前場主力之一。如果計能力,佢嘅能力唔算好突出,但往往係默默奉獻最多嗰位。
基奧特係今屆法國唯一一名正中鋒,佢嘅頭鎚能力自然不在話下。筆者認為今晚首場對澳洲嘅比賽,澳洲嘅打法上大體上係反防為主,基奧特嘅頭槌能力,本來係法國隊首戰打破僵局嘅關鍵。但係,佢喺9號對美國嘅友誼賽入面,同對方球員美亞斯加(Matt Miazga)頭部相撞,血流披面,最終要退下火線。賽後報告話佢可能無辦法趕得切復出踢首場,呢獲法國有啲「大檸樂」
基奧特係法國打4-3-3陣容嘅必要條件,基奧特打正中鋒可以畀法國幾名球員普巴、麥巴比同埋基沙文可以同時上陣,又唔會位置重疊,將法國的技能和創造性提升至最高點,基奧特缺陣,必定逼到迪甘斯改陣,而且而家已經無試新陣嘅空間,會嚴重影響法國嘅戰術發揮。

小組分析

今屆法國會同丹麥、秘魯以及澳洲喺C組相遇,星光熠熠嘅法國絕對係呢組最大出綫熱門,更被一致認為係今屆世盃冠軍熱門之一。筆者對以上呢點絕對認同,相信陣中嘅基斯文、普巴、華拉尼以及羅列斯構建嘅主力將會係法國隊喺今屆世盃最大利器。

天叔認為單以實力嚟睇,雖然頭場對澳洲同次輪對秘魯應該都唔會對法國構成咩威脅,相信法國隊應該可以順利拎到小組賽兩連勝。但最後一輪對丹麥,法國唔可以有輕敵嘅心態,事關擁有多位喺歐洲五大聯賽擔任主力嘅「童話王國」團體戰術都比法國會好啲,因為丹麥陣中並唔似得法國咁有咁多位核心球員,佢哋頂攏得艾歷臣(Christian Eriksen)一位,咁樣一嚟,呢場絕對唔係實力懸殊嘅比賽,好可能會決定C組首位,法國如果次名出綫,16強極大機會對住D組嘅阿根廷,呢個係法國最唔想見到嘅結果。

值得一提嘅係,如果法國一但不幸只能以次名出綫,咁佢哋好有可能要面對坐擁美斯等球員嘅上屆亞軍阿根廷。呢場自自然又會係今屆其中一場萬眾矚目嘅大戰。「福不是禍,是禍躲不過」,其實法國隊以首名或者次名出綫都有可能遇到阿根廷。

總括而言,法國出綫無咩難度,以法國嘅實力只要唔好輕敵就可以好好準備淘汰賽要面對嘅嘢。「高盧雄雞」擁有現今球壇最為豪華嘅陣容之一,唔單只人才輩出,並且喺各個位置上都有世界級球星,迪甘斯同一眾球員最終目標然係拎起大力神盃。
不過,法國想要笑到最後,就算過咗16強之後,仲會有種種挑戰。假設法國擊敗到阿根廷入到8強之後,法國嘅下一位對手將會喺A組首名同B組次名嘅勝出方之間產生。

由目前分組情況同賽程安排嚟睇,「高盧雄雞」極有可能遇到烏拉圭、葡萄牙或者西班牙。而筆者認為法國隊想要笑到最後,好有可能會喺決賽遇到巴西或者德國,無論點都好,一但入到淘汰賽,場場惡戰也係無可避免。我哋就放長雙眼睇下呢隻「高盧雄雞」可以叫到幾時!

法國世界盃小組賽賽程表:
C組

6月16號 18:00 法國VS 澳洲 喀山體育場

6月21號 23:00 法國VS秘魯 葉卡捷琳堡中央體育場

6月26號 22:00 丹麥VS法國 莫斯科盧日尼基體育場

陣容預測

法國正選陣容PLAN A(4-3-3):

門將:羅列斯

後防:斯迪比、華拉尼、安迪堤、盧卡斯‧靴南迪斯

中場:普巴,簡迪, 馬度迪

前鋒:基斯文、基奧特、麥巴比

法國正選陣容PLAN B (4-4-2) :

門將:羅列斯

後防:斯迪比、華拉尼、安迪堤、盧卡斯‧靴南迪斯

中場:麥巴比,普巴,簡迪,林馬

前鋒:基斯文、基奧特、

法國正選陣容PLAN C (4-1-2-1-2) :

門將:羅列斯

後防:斯迪比、華拉尼、安迪堤、盧卡斯‧靴南迪斯

防中:簡迪

中場:普巴、馬度迪

攻中:基斯文

前鋒:基奧特、麥巴比

 

(文章純屬筆者意見,唔代表癲狗日報立場。

全民俾LIKE 人人「些牙」!

.