文/William Luk

澳洲著名打氣歌:”Come on Aussie come on,

Come on, Come on Aussie come on,

Come on..”

澳洲足球代表隊(英文: Australia national soccer team)

世界排名:36

教練:雲馬維克(Bert van Marwijk)

今屆外圍賽成績:亞洲區第三圈B組第三名(附加賽先後擊敗敍利亞同洪都拉斯晉級)

歷屆出席世界盃決賽週次數:5次(1974年、2006年、2010年、2014年以及2018年)

歷屆最佳成績:16強(2006年)

外圍賽最佳射手:卡希爾(11球)

今屆訓練基地:韃靼斯坦共和國喀山

「袋鼠軍團」澳洲地理位置雖然處於大洋洲,但目前係亞洲足協嘅成員國之一。其實過去澳洲曾經隸屬大洋洲足總,但為咗提升國家足球競爭力以及提升直接出綫世界盃嘅機會,於是喺2006年時申請離開轉投亞洲足協,再喺2015年拎到亞洲盃冠軍,令到澳洲成為史無前例成為第一個喺兩個唔同洲際競賽入面拎到冠軍嘅國家。
澳洲喺上兩屆世界盃三戰皆負,但係佢哋喺球場上表現出嘅戰術水平同鬥志堪稱亞洲四隊之首。

今屆俄羅斯世界盃,佢哋嘅小組形勢唔錯,雖然有實力高強嘅法國隊,但秘魯同丹麥喺實力上都稍遜一籌,而且澳洲高Q大棍加壓迫型踢法絕對可以剋死佢哋,所以澳洲如果可以拎出8年前果股氣勢,有機會幫亞洲球隊喺今屆世盃拎到佳績。

澳洲喺奧地利4:0擊敗捷克之後,喺6月3號正式公佈咗2018年俄羅斯世界盃決賽週23人名單。陣中只得5位球員目前效力歐洲頂級聯賽,其中「無業漢」38歲老將卡希爾(Tim Cahill)榜上有名,呢位「四朝元老」連續4屆入選23人名單之餘更有機會連續喺四屆世界盃決賽週取得入球。另外,未滿20歲嘅伊朗裔球員阿沙尼(Daniel Arzani)都入選咗大名單。
但係卡拉錫(Fran Karacic)、杜羅奧斯(James Troisi)、比蘭特(Josh Brillante)以及魯卡維斯亞(Nikita Rudavytsya),呢班澳洲較為著名球員並無入選到今屆23人名單。

澳洲2018年俄羅斯世界盃決賽週23人名單(澳洲足總Facebook)

澳大利亞世界盃最終23人名單:

守門員: 1. 馬菲·賴恩(白禮頓)、12. 巴特·鍾斯(飛燕諾)、18. 丹尼·胡高域(亨克)

後衛:2.迪根尼克(橫濱水手)、3.美迪列夫(米禾爾)、6.​​祖文(水原三星藍翼)、16.比希治(貝沙)、19.列斯當(西雪梨流浪者)、20.沙恩斯貝利(蘇黎世草蜢)

中場: 5.米利根(阿艾阿里)、10.羅比·告斯(波琴)、8.盧安高(昆士柏流浪)、13.摩爾(哈特斯菲)、15. 積甸拿克(阿士東維拉)(C)、22.艾雲尼(侯城)、23.洛積(些路迪)

前鋒:4.卡希爾(自由身)、7. 馬菲·歷奇(哈化柏林)、9.祖歷(琉森)、11.拿保治(浦和紅鑽)、17. 阿沙尼(墨爾本城)、21.柏達圖斯(紐卡素噴射機)、22. 占美·麥卡倫(達斯泰特)

‧回顧

澳洲喺1974年德國世界杯第一次拎到出席決賽週資格,但喺小組賽以一和兩負成績被淘汰出局,之後經歷一段連續七屆世界杯未能進入會內賽的黑暗期。而澳洲歷屆世盃參賽成績最好係2006年德國世界盃由荷蘭「神奇教頭」希丁克帶領嗰一次,澳洲憑住身材同體能優勢,加埋防守戰術,喺16強鬥到最後一刻先輸畀嗰屆冠軍意大利。

普斯迪哥路帶領澳洲5年,有前無後嘅打法一直畀人大肆評擊(ESPN)

此後,澳洲喺2010年同2014年兩屆世界盃,都係喺小組賽就鎩羽而歸。特別喺上屆世界盃決賽週前夕,澳洲教練普斯迪哥路(Angelos Postecoglou)一直強調「袋鼠軍團」將會以控球同高壓為基礎嘅進攻風格去面對任何對手。
結果,佢將呢套戰術帶到對智利、荷蘭同西班牙嘅比賽入面,結果……澳洲輸到甩轆,慘不容睹,3戰全敗,入3失9,喺B組墊底出局。

澳洲係今屆世界盃最後隊晉級32強嘅國家,過程可以話係一波三折。先喺第2圈輕鬆晉級,然後喺亞洲區第三圈12強B組嘅十場比賽入面雖然只輸一場,取得5勝4和1負成績。但係由2016年底到2017年初嘅四場比賽竟然四連和,最終導致沙地阿拉伯以得失球差壓過澳洲直接出綫,澳洲只可以排喺B組第三,要同A組第三名嘅敘利亞踢兩回合嘅亞洲區附加賽。

而喺亞洲區附加賽入面,首回合雙方喺中立場馬來西亞踢成1:1,次回合返到澳洲,「袋鼠軍團」開賽初段失波之後靠「四朝元老」卡希爾連入兩球,以總比數3:2擊敗敘利亞晉級下一輪跨洲份附加賽。

澳洲喺跨洲份附加賽嘅對手係中北美洲傳統勁旅洪都拉斯,澳洲先喺首回合作客同洪都拉斯踢成0:0,次回合憑住隊長積甸拿克(Mile Jedinak)戴帽以3: 1擊敗對手,終於以總比數3:1拎到今屆世盃決賽週最後一席。但係已經帶領澳洲參加過2014年世界盃決賽週嘅澳洲教練普斯迪哥路卻喺賽後一段時間之後宣佈遲職。

其實普斯迪哥路過去5年對澳洲嘅改造係起到一定效果。首先重新起用曾經效力外國球會嘅球員,且喺澳洲聯賽提拔唔少可造之才,呢一招其實喺2015年亞洲盃已經起到作用,「袋鼠軍團」最終奪取該屆亞洲盃冠軍。而另一方面,普斯迪哥路希望青黃不接近7年嘅澳洲可以逐步年輕化。但同時仍然確立由卡希爾以及積甸拿克呢班具有豐富大賽經驗老將,「以老帶新」去壓陣,令到班新人唔會太怯場。以下係澳洲喺今屆外圍賽成績:

-亞洲區第二圈B組:

吉爾吉斯1:2澳洲

澳洲5:0孟加拉

塔吉克0:3澳洲

約旦2:0澳洲

澳洲3:0吉爾吉斯

孟加拉0:4澳洲

澳洲7:0塔吉克

澳洲5:1約旦

-亞洲區第三圈B組:

澳洲2:0伊拉克

阿聯酋0:1澳洲

沙地阿拉伯2:2澳洲

澳洲1:1日本

泰國2:2澳洲

伊拉克1:1澳洲

澳洲2:0阿聯酋

澳洲3:2沙地阿拉伯

日本2:0澳洲

澳洲2:1泰國

-亞洲區附加賽

敍利亞1:1澳洲

澳洲2:1敍利亞

-跨洲份附加賽

洪都拉斯0:0澳洲

澳洲3:1洪都拉斯

(兩回合計3:1)

雲馬維克走馬上任,可唔可以為澳洲帶嚟改變? (The Roar)

筆者有啲澳洲老友認為今次換教練係澳洲足球一個分水嶺時刻,因為澳洲終於可以喺世界舞台上再次擺脫咗作為二流足球國家嘅自卑感覺。

而接任嘅荷蘭籍教頭雲馬維克執教風格求穩,者係先求唔失波再講。所以,佢係極鐘意用4-2-3-1陣型,希望做好防守戰術。因為雲馬維克明白,以澳洲目前嘅實力,係連2006年「黃金一代」都不如。如果唔做好全體防守呢個團體戰術,冇可能同目前一眾世界強隊一決生死。

‧主力分析

舒華沙退役之後,澳洲門將呢個位置一直令人憂心仲仲

米利根年紀漸大,由中變後(ESPN)

32歲老將米利根(Mark Milligan)今屆將會第四度出戰世界盃決賽週,佢嘅角色已經由後生時嘅防守中場轉變成中堅,筆者喺佢效力中超上海申花已經留意過佢,不過表現一直浮浮沉沉。米利根目前效力沙地阿拉伯聯賽班霸艾阿里,並開始慢慢轉型到中堅位置。雖然年紀漸大,已經無咗當年嘅速度同體能。但豐富嘅大賽經驗相信足以彌補到呢一點。

積甸拿克可以帶領澳洲行幾遠呢?

33歲嘅隊長積甸拿克,早年夕夕無名。直到喺2011年轉會到當時英冠嘅水晶宮,開始迎來職業生涯轉捩點,佢以隊長身份帶領球隊成功升上英超聯賽,開始喺球圈漸露頭角。
積甸拿克身高1米88,屬於身型高大嘅中場球員,同時有一定嘅罰球能力。雖然速度慢但係體能充沛,導致佢喺高空爭波同搶截呢類防守工作令人歎為觀止,而且處於十二碼夠啖定,絕對係目前陣中主力,默默為澳洲奉獻一切。

今屆世界盃外圍賽,積甸拿克總共上陣13場、射入10球,其中3球係喺跨洲份附加賽對洪都拉斯嘅生死戰入面射入。

摩爾喺今季英超演出驚人,協助哈特斯菲護級成功(City Watch)

大器晚成嘅摩爾(Aaron Mooy),早年球員生涯平平無奇,一定到上季喺哈特斯菲先至有所改變。佢係呢支英超新貴嘅中場核心,負責組織進攻,亦係球隊上賽季最後升上英超嘅功臣,今季開局幫球隊一度進佔榜首位置,最後護級成功。
摩爾嘅長傳係極為精準,亦都可以帶波搵空位喺禁區重抱施射。

阿辛尼(中)會唔會帶到驚喜畀大家? (The Cairns Post)

年僅19歲嘅阿辛尼係今屆世盃決賽週最後生球員,呢位進攻前場6月1日對捷克的熱身賽才上演他在國家隊的「地標戰」,其後更在對匈牙利的賽事中遠射得手,射入自己喺「袋鼠軍團」嘅第一個入波。佢速度驚人,而且控球技術一流,係澳洲打快速反擊嘅一大利器,筆者相信假以時日,呢位球員會係澳洲一粒超新星。

馬菲·歷奇(Mathew Leckie)係而家「袋鼠軍團」其中一個重要成員。雖然司職翼鋒嘅佢欠缺速度同埋突破能力,但佢跑動能力強,回防意識非常高。係少數有咁嘅能力嘅翼鋒球員。

卡希爾喺今屆有冇得為「袋鼠軍團」披甲上陣?

「四朝元老」前鋒卡希爾,喺2004年首次為澳洲上陣以來,參加過2006年、2010年以及2014年三屆世界盃決賽週,至今共為國家隊上陣多達105場,入50球,如果今屆再喺世盃入沒,呢位老將會成為另一位連績四屆世盃有入波嘅球員。距離出賽數最多的老門將舒華沙僅差4場。被稱為「袋鼠拳王」的卡希爾,
佢早年喺英冠球隊米禾爾出道,之後喺英超「拖肥糖」艾弗頓成名,身高僅1米78,但係身材唔起眼嘅佢係當時英超「空霸」,憑住良好嘅高空波判斷同優良嘅滯空能力,卡希爾經濟喺禁區入面頭鎚入波。即使年歲已高,卡希爾在隊上的影響力仍然巨大,今屆世界盃外圍賽亞洲區附加賽喺主場面對敘利亞的生死戰時,喺「袋鼠軍團」落後一球嘅時侯卡希爾梅開二度,幫助澳洲火扭轉戰局,得以挺進洲際附加賽與洪都拉斯爭奪會內賽最後一張門票的資格。總計卡希爾在本屆資格賽中出賽16場攻入11球,係澳洲頭號射手。
筆者相信「袋鼠拳王」如果今屆有出場機會,以佢嘅大賽狀態,絕對有機會成為繼德國名宿高路斯之後,第四位連續四屆喺世界盃決賽週入波嘅球員。

‧小組分析

澳洲喺今屆俄羅斯世盃處於C組,同組對手有法國、丹麥和秘魯,筆者認為澳洲嘅籤運係相當無運,首戰喺尋日6月16號面對奪冠大熱門法國,喺對方第一場一定要贏波嘅情況下,想喺法國身上拎到分係難過登天嘅事,最終以1:2不敵「高盧雄雞」。

其實雲馬維克今次臨時執起澳洲教鞭,只係因為要臨時頂替柏斯迪高古辭職留落嚟嘅空缺,澳洲足總簽佢嘅目的,都只係希望佢可以帶領澳洲去踢世界盃,所以簽嘅都係短期合同。澳洲足總3月已經宣佈前教練格拉咸‧阿諾(Graham Arnold)會喺世盃結束後重掌「袋鼠軍團」。
因此,筆者唔指望雲馬維克可以徹底改變「袋鼠軍團」,佢只有唔夠半年時去調整呢隻袋鼠,而且只有幾場熱身賽可以試陣。不過,佢一定會利用戰術去加強防守,而面對法國呢類世界強隊,澳洲希望可以能夠打一啲快速同直線傳波,從而可以更加釋放好似馬菲·歷奇或者羅比·告斯呢類速度型球員,令到澳洲嘅快速反擊可以更得心應手。結果大家見到,法國喺全場受壓之下以2:1險勝澳洲,澳洲雖然技不如人,但雖敗猶榮。如果唔係靠VAR同鷹眼,分分鐘呢場就係咁先。

澳洲首場輸波,咁樣一嚟次輪面對丹麥同尾場對秘魯就唔贏唔得,特別係第三輪對秘魯嘅比賽,同時法國都對丹麥,筆者估計如果法國喺第二輪都贏埋秘魯,喺篤定出綫16強嘅情況下,法國好可能會採取輪換制度嚟應付,養精蓄銳準備淘汰賽,隨時畀丹麥偷雞。而且,澳洲前鋒大弱雞,成個外圍賽要靠卡希爾同積甸拿克兩位老將去撐起成個進攻線(2位合計入咗21球),去到世盃決賽真係無眼睇。所以,澳洲靠自己啦,同埋聽天由命。

• 澳洲世界盃小組賽賽程表:
C

616號  18:00 法國VS 澳洲 喀山體育場

6月21號  20:00 丹麥VS澳洲 沙馬拉球場

6月26號  22:00 澳洲VS秘魯 索契菲斯特球場

陣容預測:

澳洲今屆世盃首場陣容(4-2-3-1) :

門將:馬菲·賴恩

後防:比希治、米利根、沙恩斯貝利、列斯當

防中:摩爾,積甸拿克

前場:羅比·告斯,洛積,馬菲·歷奇

前鋒:祖歷

澳洲陣容PLAN B(4-3-3) :

門將:馬菲·賴恩

後防:比希治、米利根、沙恩斯貝利、列斯當

中場:摩爾,洛積,積甸拿克

前鋒:羅比·告斯,祖歷,馬菲·歷奇

全民俾LIKE 人人「些牙」!

.