2018年俄羅斯世界盃C組：「童話王國」丹麥 做隻「黑馬」可以嗎?

文/William Luk & Clara Daugaard (居港丹麥人)

丹麥打氣歌:”Lo, Lo, lo, lo, Lo, lo, lo, lo, lo, lo, lo, lo, lo,

Lo, lo, lo, lo, lo, lo, lo, lo, lo,

Danmark!”

丹麥足球代表隊(丹麥文：Danmarks fodboldlandshold)

世界排名：12

教練：夏列迪（Åge Hareide）

今屆外圍賽成績：歐洲區外圍賽E組次名(附加賽兩回合5：1擊敗愛爾蘭晉級)

歷屆出席世界盃決賽週次數：5次(1986年、1998年、2002年、2010年以及2018年)

歷屆最佳成績：8強（1998年）

外圍賽最佳射手：基斯甸‧艾歷臣（8球）

今屆訓練基地：卡斯洛達安拿柏(俄文：Ана́па)

筆者無緣份見證「童話王國」丹麥最輝煌時期，好多都係聽啲老波牛口述當年丹麥有幾勁。上世紀90年代係佢哋足球黃金時期，最令香港球迷有印象係1992年歐國盃決賽週，當時因為南斯拉夫爆發內戰，導致南斯拉夫畀FIFA禁止參與所有國際賽事，導致當時外圍賽同南斯拉夫同組嘅丹麥，取代咗呢支歐洲班霸去到瑞典參加歐國盃決賽週。丹麥喺嗰屆表現令人刮目相看，先喺小組賽力壓英格蘭同法國兩支歐洲勁旅晉級4強，再喺互射十二碼淘汰衛冕冠軍荷蘭，殺入決賽。丹麥喺決賽以2：0擊敗德國，拎到丹麥目前唯一一個歐洲國家盃冠軍。

丹麥喺缺席一屆世盃之後，今屆重返世盃決賽週，到底呢支「童話王國」可唔可以再寫下一頁安徒生童話?我哋拭目以待啦!

Clara印像中第一次睇丹麥應該係1998年法國世界盃。嗰年Clara仲係小學五年班，佢同老豆一齊去法國現場睇波。第一場就喺8強淘汰賽，一場現實對童話嘅淘汰賽，雖然最後丹麥2：3不敵巴西。但都係呢場比賽，令Clara對自己國家足球開始有所瞭解，起碼都知道勞特立兄弟同大舒米高係邊個先。

Clara因為出嚟做嘢前時間比較充裕，所以最熟悉丹麥嘅係正正係千禧年代，先經歷低谷，再到而家新嘅黃金一代。Clara記得大學有一年去咗香港某間大學做交流生，撞正2010年世界盃日本對丹麥，因為居港丹麥人唔多，所以自己膽粗粗第一次去香港酒吧睇波，不過香港人睇波氣氛真係一般。Clara身邊幫丹麥打氣啲香港人，都係落咗注喺丹麥度，最終丹麥1：3不敵日本，小組賽出局，不過Clara諗返都幾有意思。

丹麥足球喺之前十年出現青黃不接問題，老將一個接一個掛靴，特別係湯馬臣(Jon Dahl Tomasson)嘅退役令Clara感到好傷心。丹麥足球開始蟄伏，隨也有大本的驚世駭俗，但近年北歐國家表現令人歎為觀止，連冰島都威到痺，但係終究未有丹麥份。

最終，艾歷臣健康嘅成長，畀我哋睇到一絲希望，由荷甲到熱刺就能知道佢係一個用腦踢波嘅球員，呢種中場大師嘅氣質，從唔盲目，從唔自大，亦令佢經常為熱刺喺英超賽場作出關鍵性嘅貢獻。當然，近年丹麥青訓出產好多「妖人」，Clara都對丹麥足球未來依然保有希望。今次大炒愛爾蘭5：1殺入世盃決賽週，我呢個丹麥人絕對要歡呼，雀躍同大肆慶祝，莫斯科我哋嚟啦!我都買咗機票同波飛飛去俄羅斯撐丹麥!

丹麥喺5月14號公佈35人大名單，並喺同月27號減到27人。而最終23人大名單喺6月3號正式出爐，有2位球員曾經出席過2010年世界盃決賽週，分別係隊長卡查(Simon Kjær)同老將基域斯(William Kvist)。

由龍門到前鋒都有好多香港球迷熟悉嘅面孔，包括「狐狸」李斯特城門將卡斯柏‧舒米高(Kasper Schmeichel)、車路士中堅安達斯‧基斯坦臣(Andreas Christensen)、雲達不來梅中場湯馬士‧迪蘭尼(Thomas Delaney)、熱刺中場核心艾歷臣(Christian Eriksen)同埋RB萊比錫前鋒尤素夫‧保臣(Yussuf Poulsen)。

但係「Lord賓」賓特拿(Nicklas Bendtner)最後因傷落選，而同「Lord賓」一齊落選嘅仲有效力英冠嘅中堅比蘭特(Andreas Bjelland)。仲有一位球員筆者都想講下，效力西甲切爾達嘅翼鋒丹尼爾·華斯(Daniel Wass)竟然一同落選，呢位右翼喺切爾達交足功課，能傳能射，筆者諗極都唔明點解佢無份入選。

丹麥23人大名單：

門將：1.卡斯柏‧舒米高(李斯特城)、16.約拿斯·羅素(哈特斯菲)、22.費達歷·朗奴(邦比)

後防：3.維斯達加特(慕遜加柏)、4. 卡查 (西維爾)(C)、5.盧特臣(葉士域治)、6.安達斯‧基斯坦臣(車路士)、13.馬菲斯‧佐真臣(哈特斯菲)、14.達斯加特(賓福特), 17.贊斯‧拿臣(烏甸尼斯) 

中場:  2.米高‧高朗-達利(拉科魯尼亞)、7.基域斯(哥本哈根)、8.湯馬士‧迪蘭尼(雲達不萊梅)、10.基斯甸‧艾歷臣(熱刺)、18.拿拉加(波爾多)、19.舒安尼(阿積士)

前鋒:  9.佐真遜(飛燕諾)、11.巴拉夫韋迪(波爾多) 、12.杜貝治(阿積士)、15.費舒查(哥本哈根)、20.尤素夫‧保臣(萊比錫)、21.哥尼利奧斯(亞特蘭大)、23.史斯度(切爾達)

‧回顧

丹麥自2010年世盃出局之後，往後喺各項大賽同外圍賽表現都令人失望。執教丹麥15年嘅摩頓·奧臣(Morten Olsen)喺2015年毅然決定離開丹麥，但足見北歐人嗰種耐性係超乎大家想像，唔會亂咁炒教頭。

現任教頭夏列迪喺今屆世界盃外圍賽開始前正式上任，呢位縱橫北歐多年嘅名牌教頭喺世盃外圍賽頭幾場試用唔同陣式，導致丹麥戰績一度未如理想。由於丹麥中堅球員多不勝數，令到夏列迪執教初期經常排出3中堅陣式，導致丹麥經常失波，攻守都顧此失彼。最終夏列迪決定用返結4人防線，喺做返攻守平衡下終於穩返隊波。往後就決定用4-3-3呢個陣容嚟做主打。最終喺外圍賽E組僅次波蘭，壓過黑山以小組次名參加附加賽，以下係丹麥喺今屆世盃外圍賽成績：

-歐洲區外圍賽E組：

丹麥1：0亞美尼亞

波蘭3：2丹麥

丹麥0：1黑山

丹麥4：1哈薩克

羅馬利亞0：0丹麥

哈薩克1：3丹麥

丹麥4：0波蘭

亞美尼亞1：4丹麥

黑山0：1丹麥

丹麥1：1羅馬尼亞

-附加賽

丹麥0：0愛爾蘭

愛爾蘭1：5丹麥

(兩回合計5：1愛爾蘭)

•主力分析

丹麥首席門將卡斯柏‧舒米高(Kasper Schmeichel)，佢正正係代表丹麥出席1998年法國世界盃嘅鋼龍彼得‧舒米高(Peter Schmeichel)嘅大仔。今屆「細米」將會創造世界盃歷史另一個子承父業嘅紀錄，「大米」喺98世盃帶領丹麥殺入8強，最終不敵巴西。今屆世盃「細米」誓要超越老豆，相信好多人都好期待「細米」可唔可以打破老豆當年嘅成績。

細米效力英超李斯特城，擔任「狐狸」正選門將已經有7個球季，先後幫助「李城」拎咗英冠同英超冠軍。佢撲救反應快，封位同佢老豆樣咁勁。

但佢都有一個問題，處理快速長傳落點往往強差人意，而且有時會有啲無厘頭犯錯，呢樣嘢喺佢效力李斯特城期間經常出現。筆者怕佢因為背負住老豆嘅聲望，今屆壓力會好大。

講到丹麥最核心球員，非基斯甸·艾歷臣(Christian Eriksen)莫屬。呢位攻擊中場出身自有「青訓搖籃」之稱既阿積士，喺荷甲效力時一直都有唔少人將佢同兩位阿積士嘅前輩史尼達(Wesley Sneijder)以及雲達華治(Rafael van der Vaart)相提並論。

而艾歷臣亦都緊隨雲達華治既步伐，轉投英超既熱刺。今季可以話係艾歷臣職業生涯中其中一個最好嘅球季，佢為熱刺上陣46場，射入14球。14個入球亦係佢職業生涯單季入球數字既新高。

國家隊方面，佢喺今屆外圍賽分組賽攻入8球，冠絕丹麥國家隊，更加喺附加賽次回合作客愛爾蘭時上演帽子戲法，幫助球隊成功晉身今屆決賽週。佢有廣闊嘅傳波視野，精準嘅傳送，再配以巧妙嘅遠射。CAARA絕對相信艾歷臣絕對有能力帶領丹麥衝出分組賽階段。

艾歷臣係今屆世盃開幕前初為人父，CLARA唔知香港啲女球迷鐘唔鐘意呢位丹麥中場，佢都想喺度問下一眾女球迷，唔知道喺2月14號情人節出世既艾歷臣喺球場上嘅一舉一動，有無為妳帶嚟一絲絲嘅浪漫感覺呢？

尤素夫‧保臣(Yussuf Poulsen)係丹麥少數非白人球員，爸爸係坦桑尼亞人，媽咪係丹麥人，係丹麥少數嘅穆斯林球員。目前效力德甲新貴萊比錫。

佢嘅特點係夠拼勁、高段速同積極跑動，同入選今屆德國23人名單嘅前鋒華拿(Timo Werner)一齊為萊比錫衝鋒陷陣。呢對萊比錫前場已經吸引好多歐洲頂級球會注意，相信佢哋世盃表現會好影響佢哋喺下季嘅去向。

不過佢好多時都魯莽犯錯，呢點係萊比錫已經表露無遺，而今屆世盃首輪賽事丹麥都因為佢差啲輸畀秘魯。

•小組分析

筆者認為但要數今屆賽事其中一支最有合作性的球隊，丹麥係一個不錯嘅選擇。因為今屆世盃第一輪嘅賽事已經話畀大家知，團體合作較出色嘅球隊，往往會有較好嘅表現。包括B組嘅伊朗、D組嘅冰島、H組嘅塞內加爾。所以筆者執筆前已經估到丹麥係有機會喺C組突出重圍。

而正如教練夏列迪所講:「要想喺小組出綫，首輪對秘魯嘅比賽至關重要。」因為夏列迪明白法國隊喺C組實力強大，佔據小組首名出綫係輕易易舉嘅事，次名出綫係丹麥唯一而又可行嘅目標。
再加上筆者認為丹麥實力唔差，較為整體。第一場結果正如夏列迪所料，上半場秘魯幾乎圍攻丹麥，只能靠由艾歷臣嘅發板產生一啲威脅，而呢支「童話王國」喺上半場完場差啲畀人12碼入波。但係為秘魯博得12碼嘅古華親自主射竟然一飛衝天直上看台，令到丹麥半場幸保不失。
下半場開段秘魯繼續圍攻，但丹麥把一握一次反擊攻勢，射入全場唯一入球。由艾歷臣交出助攻，保臣即時帶波推前，一對一門將起腳近柱破網，幫助丹麥以1:0擊敗對手。(Link: https://www.youtube.com/watch?v=O4odLCih0Os )

全取三分後嘅丹麥同同日以2:1贏波嘅法國同得三分，但法國以得球較佳暫列榜首，丹麥位居次席，保持出綫主動權。

丹麥下場會對澳洲，只要呢場贏或者和基本上好大機會可以次名出綫，但面對澳洲身型加體力化嘅踢法，丹麥要贏波，絕對會比首輪對秘魯難上加難。

再加上陣中主力之一基域斯喺對秘魯嘅比賽嚴重受傷，賽後證實因為肋骨骨裂，已經返咗丹麥接受治理，緣盡今屆世界盃。基域斯係丹麥近年主力防中，具豐富大賽經驗，而且夏列迪帶領嘅丹麥中場線分工清晰，由基域斯負責掃蕩、湯馬士‧迪蘭尼(Thomas Delaney)負責同後場做串連，而艾歷臣負責幫前場策劃進攻。基域斯嘅缺陣必定導致丹麥喺今屆往後賽事嘅人員調動出現困難，特別係對澳洲要硬碰硬嗰時，真係會好頭痕。因為筆者都真係諗唔到一個適合人選可以頂到佢個位，上場換上舒安尼(Lasse Schöne)，都同另外兩位球員夾唔到。

而一但過到澳洲嗰關，最後一輪對法國都要打醒12分精神。而且要小心法國前鋒基斯文(Antoine Griezmann)同麥巴比(Kylian Mbappé)嘅速度。因為筆者留意到法國最近改變咗以往主攻嘅比賽風格，再唔主打中場壓迫同主攻，而係採用反擊。由澳洲嗰時比賽下半場兩個入波可見，法國嘅反擊打得好有效率，一兩下已經將個波由中後場吊到入澳洲禁區，繼而令到澳洲防線大亂。以丹麥後防嘅「慢」節奏，當然要好好提防。只要執行到團體戰，相信小組第2，自然得心應手。

•丹麥世界盃小組賽賽程表：
C 組

6月17號 00 :00秘魯VS丹麥 摩度維亞球場

6月21 號  20:00丹麥VS澳洲  沙馬拉球場

6月26號 22:00 丹麥VS法國  莫斯科盧日尼基球場

•世盃首場陣容(4-3-3) ：

門將：卡斯柏‧舒米高

後防：贊斯‧拿臣，卡查，基斯坦臣，達斯加特

中場：迪蘭尼，艾歷臣，基域斯

前鋒：史斯圖，佐真臣，保臣