文/William Luk

阿根廷打氣歌:”Vamos, vamos Argentina,

Vamo’ a ganar, Vamos vamos Argentina Vamo’ a ganar,

Yo te sigo a todas partes a donde vas, Cada vez te quiero mas…”

阿根廷足球代表隊(西班牙文:Selección de fútbol de Argentina)

世界排名:5

教練:森柏奧利( Jorge Sampaoli

今屆外圍賽成績:南美區第三名

歷屆出席世界盃決賽週次數:17次(1930年、1938年、1958年、1962年、1966年、1974年至今)

歷屆最佳成績:冠軍(1978年以及1986年)

外圍賽最佳射手:美斯(7球)

今屆訓練基地:布隆尼斯(俄文:Бро́нницы)

阿根廷2018年俄羅斯世界盃決賽週23人大名單,圖中有2位球員隨後因傷退隊(阿根廷足總Twitter)

阿根廷喺5月14號公佈35人初選名單,並喺同月21號公佈23人大名單。但由於正選門將羅美路(Sergio Romero)因傷退隊,喺23號補入古斯文(Nahuel Guzmán)。
但係去到6月9號,蘭仙尼(Manuel Lanzini)因傷退隊,補入安素‧皮利斯(Enzo Pérez)。今屆阿根廷嘅最終23人先至塵埃落定。

當中有8個球員參加過上屆世盃,8位球員入面又有參加過2014年世盃,其中2位更加參加過2006年世界盃,包括美斯(Lionel Messi)同馬斯查蘭奴(Javier Mascherano),具有豐富大賽經驗。

至於較香港球迷熟悉嘅國際米蘭伊卡迪(Mauro Icardi)以及效力羅馬嘅柏洛迪(Diego Perotti )一同落選今屆23人名單之列。

阿根廷23人大名單如下:

門將:1.古斯文(老虎隊)、12.艾文尼(河床)、23.卡巴耶路(車路士)

後防:2. 加比爾‧梅卡度(西維爾)、3. 泰利亞費高(阿積士)、4.安沙迪(拖連奴)、6.法斯奧(羅馬)、8. 馬高斯‧艾肯拿(士砵亭)、16.盧祖(曼聯)、17.奧達文迪(曼城)

中場: 5.比基利亞(AC米蘭)、7.巴尼加(西維爾)、11.迪馬利亞(巴黎聖日門)、13.美沙(獨立隊)、 14.馬斯查蘭奴(河北華夏幸福)、15.皮利斯(河床)、18. 沙維奧(賓菲加)、20.盧些素(巴黎聖日門)、22. 柏雲(小保加)

前鋒: 9.希古恩(祖雲達斯)、10.美斯(巴塞隆拿) (c)、19.阿古路(曼城)、21.戴巴拿(祖雲達斯)

‧回顧

阿根廷喺近年一直沿用2008年北京奧運金牌嘅「黃金一代」,國民都對佢哋寄予厚望。但近年呢隊阿根廷變做名符其實嘅「亞軍廷」,先喺上屆世盃同大力神盃緣慳一面,再連續痛失兩次美洲國家盃冠軍,導致球隊內部曾經出演大混亂,美斯曾經退出國家隊,加上「黃金一代」逐漸老化,令人覺得呢隊「探戈軍團」未必再有力再度攀上世界巔峰。

其實阿根廷喺今屆南美洲區外圍賽入面係跌跌撞撞,令人擔驚受怕。同2010年外圍賽一樣,佢哋係好驚險嘅情況下先拎到出綫資格。成個外圍賽阿根廷攻守唔平衡,教練保沙(Edgardo Bauza)喺外圍賽尾段畀阿根廷足總解約,由森柏奧利接掌國家隊。最終阿根廷以7勝7和4負,入19球失16球排第三,拎到2018年俄羅斯世界盃決賽週參賽資格。以下係阿根廷今屆世盃外圍賽成績:

阿根廷0:2厄瓜多爾

巴拉圭0:0阿根廷

阿根廷1:1巴西

哥倫比亞0:1阿根廷

智利1:2阿根廷

阿根廷2:0玻利維亞

阿根廷1:0烏拉圭

委內瑞拉2:2阿根廷

秘魯2:2阿根廷

阿根廷0:1巴拉圭

巴西3:0阿根廷

阿根廷3:0哥倫比亞

阿根廷1:0智利

玻利維亞2:0阿根廷

烏拉圭0:0阿根廷

阿根廷1:1委內瑞拉

阿根廷0:0秘魯

厄瓜多爾1:3阿根廷

教練森柏奧利上任唔夠一年,對陣中球員瞭解有限(ESPN)

阿根廷目前正處於一個令人擔憂嘅動盪階段,呢幾年已經換過3位教頭。

現任教頭森柏奧利,喺2017年5月先至上任。呢位阿根廷教頭以往曾經帶領智利喺2015年美洲國家盃決賽互射12碼擊敗阿根廷。喺上季都帶領西甲西維爾拎到聯賽第四名,拎到今季歐聯小組賽參賽資格。

但係,森柏奧利喺呢一年執教阿根廷期間係諸多問題,特別係用人保守,呢點筆者唔多想講,因為呢樣嘢係街知巷聞。喺一系列熱身賽已經見到阿根廷連排陣都係令人費解,正選有近一半球員嘅表現係令人唔可以信服。

‧球員分析

阿根廷今屆面對一個嚴峻問題球員平均年齡偏大,由龍門到前場平均年齡都29.09 ,呢個情況令人十分擔憂。

卡巴耶路絕對可以令大家放心(SPORTXCLUSIVE.COM)

主力門將羅美路因傷退出之後,阿根廷門將位置嘅實力絕對會有可能大幅下降,但一號門將卡巴耶路(Willy Caballero)可以令各位球迷放心。呢位門將無論喺球會定國家隊都長居後備嘅門將,但每次臨危受命都會交出好表現。

卡巴耶路臨場心理水平好高,早幾季喺聯賽盃決賽對利物浦嘅十二碼大戰救出3個十二碼,幫助曼城拎到聯賽盃冠軍。

馬斯真係老啦,但佢絕對係一個鬥志十足嘅球員。上屆4強對荷蘭為咗救一球必入波,肛門撕裂都在所不惜(Sky Sports)

至於一眾後防同中場球員,盧祖同奧塔文迪雖然各自效力曼市兩支豪門球隊,但佢哋嘅「爆炸」演出令到一眾球迷唔肯對佢哋投下信心一票。筆者相信呢啲都係阿根廷喺今屆陣容上嘅一大問題。
至於中場老大哥馬斯查蘭奴已經過咗巔峰期,34歲嘅馬斯喺近半季仲要效力中國聯賽,令人擔心佢嘅狀態仲可唔可以保持落去。

至於今屆阿根廷前鋒,平均平齡係28.75。除咗絕對主力美斯之外,仲有效力曼城嘅神鋒阿古路(Sergio Agüero)、祖雲達斯嘅希古恩(Gonzalo Higuaín)同埋祖記新星戴巴拿(Paulo Dybala)。除咗戴巴拿,以上幾個球員大家都耳熟能詳,筆者唔喺講寫太多「呀媽係女人」嘅嘢。

美斯(左)同阿古路(右)由青年軍合作至今,私底下老友鬼鬼,所以兩個一齊出場係最為合理(City Watch)

筆者係唔會相信希古恩可以為阿根廷前線帶嚟改變(Mundo Albiceleste)

戴巴拿夠後生,而且個人能力突出,唔明點解森柏奧利死都唔肯用佢(en.as.com)

筆者想喺度重點講下戴巴拿,呢位球員係筆者近年最欣賞嘅前場球員之一。好多球迷覺得與其繼續用喺大賽飄忽不定嘅阿古路、「超級敗家仔」希古恩(希古恩3次大賽決賽都錯失黃金機會)或者扭嚟扭去都唔知做乜嘅迪馬利亞,不如用下戴巴拿嚟刺激一下前場創造性。

因為前鋒4人入面,戴巴拿只有24歲(其餘3位都年過30)。喺比賽後半場佢嘅體能、活力、突破能力同精湛射術絕對有機會改寫比賽戰局。

•小組分析

第一輪過後D組積分榜(FIFA)

筆者本來認為基本上出線唔會有太大問題,身處D組只有冰島,克羅地亞同尼日利亞,喺呢組要出綫應該輕輕鬆鬆。不過筆者喺熱身賽已經見到阿根廷完全唔對路,筆者唔明白點解會約埋海地果啲國家隊去比賽,點解唔搵返風格同小組另外3隊類似嘅國家隊友誼賽呢?以阿根廷名氣實有國家隊肯同你踢。

美斯對冰島以一人之力力抗冰島11人,最終無功而還(ESPN)

首輪對冰島嘅比賽,阿根廷第一次小組賽首輪比賽著黑衫,結果「黑」到痺。除咗比賽開段之外,阿根廷全場畀一班冰島球員「冰」封,而美斯一人力戰11人情況下,曾經喺下半場博到12碼。但美斯最終都射失12碼,只可以同冰島打成平手,導致阿根廷出線暗潮洶湧。亦都突顯一個問題,成隊波嚴重倚賴美斯,而且教練森柏奧利喺臨場調動出現好多問題。

筆者睇返23人名單,覺得今屆阿根廷中後場實力都唔算勁,甚至比上屆遜色唔少,但憑住佢哋嘅攻擊前線,筆者認為佢哋都勉強算係今屆世盃奪冠熱門之一。至少,有美斯在場,所有國家隊都會對佢提心吊膽。

其實上屆世界盃,美斯都係「單天保至尊」,帶領問題多多嘅阿根廷隊殺入決賽。但四年過去,美斯已經31歲,雖然各方面能力冇出現大幅下滑嘅問題,但佢同C朗相反,今季喺巴塞博得好盡,筆者好擔心佢仲有冇能力踢曬成個決賽週。而且其他球員近年趺Watt趺得勁,呢點係首輪對冰島嘅比賽可以睇得一清二楚。

次輪對克羅地亞比賽,一輸就真係好被動

筆者認為只要阿根廷過到次輪對克羅地亞呢一關,佢哋真正會再面對困難就係跟住落嚟嘅淘汰賽階段先至出現。因為最後一輪對尼日利亞嗰場,以尼日利亞喺今屆世盃首輪嘅「垃圾」表現,阿根廷真係「實食冇黐牙」。

最後,阿根廷要面對嘅同德國一樣,都係自己嗰一關。而家2點呢場比賽,將會決定阿根廷今屆世盃嘅走向,” Vamos, vamos Argentina, vamos, vamos a ganar”。

•阿根廷世界盃小組賽賽程表:
D

6月16號  21:00  阿根廷  VS  冰島 莫斯科斯巴達球場

6月22號  02:00阿根廷 VS 克羅地亞 下諾夫羅哥德球場

6月27號 02:00 尼日利亞 VS 阿根廷 聖彼得堡十字架球場

•世盃次首輪對冰島陣容(4-4-1-1) :

門將:卡巴耶路

後防:沙維奧,奧達文迪,盧祖,泰利亞費高

中場:美沙,馬斯查蘭奴,比基利亞,迪馬利亞

前場:美斯

前鋒:阿古路

•世盃次輪對克羅地亞陣容(3-4-3) :

門將:卡巴耶路

後防:梅卡度,奧達文迪,泰利亞費高

中場:沙維奧,馬斯查蘭奴,皮利斯,艾肯拿

前鋒:美斯,阿古路,美沙