文/William Luk

克羅地亞打氣歌:”Bježite ljudi, bježite iz grada,

stiže ekipa pijana,

Bježite ljudi dok postoji nada,

jer ovdije igra HRVATSKA,

Ale-ale ale-ale ale-ale…”

 

克羅地亞足球代表隊(克羅地亞文:Hrvatska nogometna reprezentacija)

世界排名:20

教練:達歷(Zlatko Dalić)

今屆外圍賽成績:歐洲區I組次名(附加賽兩回合4:1擊敗希臘)

歷屆出席世界盃決賽週次數:5次(1998年、2002年、2006年、2014年以及2018年)

歷屆最佳成績:季軍(1998年)

外圍賽最佳射手:文素基治(5球)

今屆訓練基地:列寧格勒州盧仙拿(俄文:Ро́щино)

克羅地亞喺上世紀90年代南斯拉夫解體之後獨立成國,喺獨立唔夠10年就打入1998年法國世界盃決賽週,並且一嗚驚人。喺名宿比拉斯域(Miroslav Blažević)帶領下,「格仔軍團」第一次打入世界盃決賽週就拎到季軍,但之後都無辦法拎到啲咩更好成績。

當年呢班克羅地亞「黃金一代」至今都令人懷念,包括蘇加 (Davor Šuker)、史米 (Dario Šimić)、華奧域 (Goran Vlaović) 、杜陀 (Igor Tudor)、羅拔·贊尼 (Robert Jarni) 、比歷 (Slaven Bilić)、波班 (Zvonimir Boban)、蘇度 (Zvonimir Soldo)、史坦歷 (Mario Stanić)、史迪馬 (Igor Štimac)、阿辛奴域 (Aljoša Asanović) 、普辛尼基 (Robert Prosinečki)。呢班名宿今日喺歐洲球壇都有一定嘅影響力。

筆者遺憾1998年世界盃決賽週仲係幼稚園學生,已經對呢啲嘢感到好矇矓。我只係記得碧咸畀人紅牌趕出場嗰一幕。去到2002年世盃,克羅地亞都打入32強,但喺小組賽表現飄忽,將次名出綫席位拱手相讓畀意大利(不過諗返都好彩,如果唔係好多球迷會話當年克羅地亞淘汰賽畀人黑哨黑走)。之後接近5年,克羅地亞一直處於青黃不接嘅階段。直到2008年歐國盃,呢隊「格仔軍團」又再度重現喺觀眾眼前,嗰屆8強同土耳其上演咗一次「過山車式」嘅加時賽,筆者至今歷歷在目,隨住近年呢班克羅地亞80後喺歐洲主流聯賽踢得風生水起,筆者自己都去過克羅地亞睇波,發覺呢個國家啲人對足球真係好執着。

「格仔軍團」克羅地亞喺5月14號公佈今屆俄羅斯世界盃決賽週32人初選名單,並喺同月21號減到24人。而最終23人名單喺6月4號公佈。

呢23人名單入面無咩太大驚喜,因為當中大部分球員對香港球迷呢嚟並唔陌生。包括摩迪 (Luka Modric),拉傑迪 (Ivan Rakitic),佩利錫 (Ivan Perisic)以及文素基治 (Mario Mandzukic),甚至英超球會利物浦嘅中堅路夫雲(Dejan Lovren)都入選23人大名單。而一啲效力過英超嘅球員,包括哥路卡 (Vedran Corluka)以及卡拉馬歷 (Andrej Kramaric )都悉數入選。

順帶一提,23人大軍入面有13位球員參加過上屆巴西世界盃,具有豐富大賽經驗。

克羅地亞2018年俄羅斯世界盃決賽週23人大名單(克羅地亞足總Twitter)

克羅地亞23人大名單:

門將
1.利華高域(薩格勒布戴拿模)、 12. L.卡連歷(真特)、23.蘇巴錫 (摩納哥)

後防
2.維沙積高(馬德里體育會)、3.史捷歷(森多利亞)、5.哥路卡(莫斯科火車頭)、6.路夫雲(利物浦)、13.謝華積(利華古遜)、15.卡列達卡(薩爾斯堡紅牛)、21.維達(比錫達斯)、22.比華歷(基輔戴拿模)

中場
7.拉傑迪(巴塞隆拿)、8.高華錫(皇家馬德里)、10.莫迪(皇家馬德里)(C)、11.保素域(國際米蘭)、14.巴拉達歷(列積卡)、19.巴迪積(費倫天拿)

前鋒
4.佩利鍚(國際米蘭)、 9.卡拉馬歷(賀芬咸)、*16.卡連歷(AC米蘭)、 17.文素基治(祖雲達斯) 、18.列比治(法蘭克福)、20.比查卡(史浩克04)

*卡連歷因為喺6月17號對陣尼日尼亞嘅比賽拒絕後備身份入場,被領隊達歷直接踢出23人名單。

‧回顧

自1998年世盃決賽週之後,克羅地亞喺國際大賽再無咩大突破。而上屆巴西世界盃,克羅地亞被編到A組,同東道主巴西、非洲豹喀麥隆同埋中美列強墨西哥。當時好多人睇好呢支坐擁一班效力歐洲頂級聯賽球員嘅克羅地亞會同巴西攜手出綫,點知「格仔軍團」喺最後一輪1:3意外輸畀墨西哥,小組賽就打道回府,令好多對克羅地亞抱有希望嘅球迷黯然神傷。

經歷上屆嘅失落,今屆克羅地亞誓要捲土重來,不過自2008年歐國盃嘅「格仔軍團」始終有個老毛病,就係防守問題,而且心理質素欠奉,往往喺大賽外圍賽尾段都差啲出事,獲獲都要踢附加賽。

今次都唔例外,喺外圍賽第8輪比賽之前,克羅地亞以16分為處榜首,好大機會直接晉身世盃決賽週,但竟然喺最後3輪比賽,首先不敵土耳其,然後主場畀無所事事嘅芬蘭90分鐘追和,令贏波嘅冰島壓過克羅地亞升上榜首,縱使最後一輪擊敗烏克蘭力保次名,得以參加附加賽,但國內怨聲不斷。結果,喺外圍賽完結後,克羅地亞足總因為球隊防守問題將安迪‧卡斯士(Ante Čačić) 炒魷,隨即任命達歷(Zlatko Dalić)成為克羅地亞教頭。

歸根究底,筆者喺外圍賽留意到呢支克羅地亞未做到整體攻守平衡,攻強守弱,正正係「有前無後,打死罷就」。雖然中前場坐擁摩迪、佩利錫、拉傑迪同埋文素基治呢班球星,進攻火力絕對係世界一流。
但係「格仔軍團」嘅後防線,係一大隱患。其實只要喺2016年歐國盃16強對葡萄牙嘅比賽就可以略知一二,當時後防喺加時下半場尾段壓曬上去攻門,結果畀全場甚無表現嘅葡萄牙一個反擊,後防完全睇漏曬哥利斯馬,結果贏勢輸波。而且一對中堅維達(Domagoj Vida)同路夫雲一直都唔係表現穩定嘅球員,兩位老哥喺各自效力嘅聯賽派「膠」不斷係眾所周知嘅事,呢個都係佢哋喺今屆外圍賽最後階段畀冰島超越,要靠附加賽先至晉級到決賽週嘅主要原因之一。而筆者一路都覺得,克羅地亞呢個問題係導致佢哋成為唔到歐洲列強嘅主要因素。

達歷嘅執教功力令人為之一振,為克羅地亞以至全球球迷帶嚟驚喜(FIFA)

然而,筆者認為現任教頭達歷絕對係克羅地亞同前最為適合嘅人選,佢最大限度解決咗由比歷執教開始嘅防守唔集中問題。雖然達歷球員生涯平平無奇,而且上任時間短。但查實佢早喺2006年開始已經喺克羅地亞U21青年軍擔任名宿拉迪(Dražen Ladić)嘅助教5年。時至今日,拉迪調返轉做咗佢嘅龍門助教,真係風水輪流轉。
當時呢班唔同時期嘅U21青年軍好多都有參加今屆世界盃賽事。最起碼達歷會了解每一個球員特性,雖然唔可以話了解甚深,但筆者相信至低限度班球員會畀面達歷去帶領克羅地亞喺世盃衝峰陷陣。以下係克羅地亞今屆世盃外圍賽嘅戰績:

-歐洲區I組:

克羅地亞1:1土耳其

科索夫0:6克羅地亞

芬蘭0:1克羅地亞

克羅地亞2:0冰島

克羅地亞1:0烏克蘭

冰島1:0克羅地亞

克羅地亞1:0科索夫

土耳其1:0克羅地亞

克羅地亞1:1芬蘭

烏克蘭0:2克羅地亞

-歐洲區附加賽:

4:1希臘

希臘0:0克羅地亞

兩回合合計4:1

-主力球員

後防一對中堅會係維達同路夫雲,呢一環係筆者最為擔心,原因喺上一個部分講曬。至於中場,莫迪同拉傑迪將會擔當由守轉攻嘅工作,呢一環都係克羅地亞最重要一環。去到前場,左右兩翼接應中場傳波快速發動攻勢,再交到文素基治腳下進行射門。

華沙積高防守嘅進步,有賴過去一年佢喺施蒙尼麾下嘅馬體會出色發揮(Sky Sports)

路夫雲,筆者只係希望你唔好再派「膠」 (Sports Illustrated)

隊長摩迪雖然已經32歲,但克服傷患嘅佢近兩季表現令人眼前一亮(Goal.com)

莫迪,呢位克羅地亞中場絕對主力,早喺熱刺已經被認為係有朝一日會成為中場大師,及後去到西甲豪門皇家馬德里,表現一直令人稱心滿意。結果,一如所料,今日嘅佢絕對可以獨當一面,甚至可以喺關鍵時刻企出嚟改變戰局。

其實摩迪早幾季經歷過傷病低潮,但最終佢都一一克服。摩迪嘅特點好多,廣闊嘅傳波視野,良好嘅防守意識,仲有一樣,嚇你一跳嘅遠射能力,令人防不勝防。

拉傑迪已經由史浩克04嘅細路變成一個中場悍將(90Min)

文素基治勝在夠火爆,可以帶起前場士氣(Devdiscourse)

佩利錫嘅速度驚人,筆者早喺佢效力德甲禾夫斯堡已經覺得係前途無可限量(Pinterest)

列比錫喺上屆對巴西嘅揭幕戰已經表現出佢嘅速度(法蘭克福官網)

列比錫(Ante Rebić),筆者第一次睇佢踢波都係今年5月德國盃決賽,當時佢爆到拜仁後防「一僕一碌」,最後幫助法蘭克蘭拎到德國盃冠軍。

佢絕對會係加強克羅地亞進攻火力嘅球員(特別係左路)。呢位左翼球員扭得又射得,而且體力充沛,不斷參與前場壓迫,再加上強壯嘅身型,絕對可以同佩利鍚雙翼齊飛。

‧小組賽

喺分組賽開始前,筆者已經預計到克羅地亞係D組出綫熱門球隊。就算同組有冰島(今屆外圍賽克羅地亞都同冰島一組)、阿根廷同埋尼日利亞,但「格仔軍團」坐擁摩迪、拉傑迪、文素基治呢班效力歐洲頂級聯賽嘅球星,只要正常發揮,出綫係輕易易舉嘅事。

結果佢哋首場對尼日利亞,輕輕鬆鬆2:0擊敗呢支「超霸鷹」,全場控制比賽節奏,玩波居多,但防守非常出色,中後場完場將尼日利亞所有進攻一一化解。結果,尼日利亞喺呢場比賽係完全無力還擊,克羅地亞輕輕鬆鬆袋穩3分。

克羅地亞眾志成城,小組次輪3:0擊敗阿根廷,首名出綫高唱入雲(Elsa/Getty Images)

去到第二場面對小組出綫熱門阿根廷,筆者本來預計「格仔軍團」拎到1分就心滿意足,因為喺首輪贏波嘅情況下,即使呢場波痛失3分應該保有出綫主動權。

但賽果出乎眾人意料之外,阿根廷全場表現令人失望,首先係雙方教練排陣,高下立見。今場克羅地亞改打4-2-3-1,特別喺中場緊密防守令到阿根廷經常要傳波到邊路,而左右閘位嘅壓迫導致阿根廷邊路口員不斷出高波吊入克羅地亞禁區,由於阿根廷前場身型輸蝕,往往都靠地波傳送再搵機會射門,呢種不斷吊高波入禁區,令到一對克羅地亞中堅可以輕鬆解圍,雖然上半場曾經試過一次失誤,差啲畀阿根廷有機可乘,但最終雙方半場都係互交白卷。
而喺下半場開段,前場把握到阿根廷嘅低級失誤,再加上摩迪嘅神來之筆。最終克羅地亞以3:0擊敗呢支奪冠熱門阿根廷,賽後以6分高踞D組榜首。呢場勝仗標誌住克羅地亞自1998年世盃決賽週後,再一次成功晉身淘汰賽階段,同時都係克羅地亞首次喺世盃決賽週擊敗南美洲國家隊。

不過喺呢度筆者都諗起今屆世盃南美球隊嘅表現。直到今日,5隊南美球隊表現令人失望。除咗烏拉圭可以贏波出綫之外(其實烏拉圭都踢得好差,只係同組實力真係好弱),巴西、秘魯、阿根廷同埋哥倫比亞,都係令人好失望。而喺筆者寫緊呢克羅地亞篇嗰時,秘魯已經2戰全敗一球唔入提前出局。

只要贏或和到冰島,克羅地亞一定係首名出綫(Dominic Rich FC/YOUTUBE)

小組賽最後一場克羅地亞會同冰島正面交鋒,按照雙方喺外圍賽嘅對賽經驗,「格仔軍團」照計已經非常熟悉冰島,應該唔會再次犯錯,而按牌面加換咗教練情況嚟睇應該有更多贏波方法,假設冰島今晚可以贏到尼日利亞,喺兩隊基本出綫嘅情況下,呢場波和局機會會較大。因為,按照目前克羅地亞2戰2贏6分排喺榜首,出綫已經係鐵一般嘅事實,只要最後一場唔輸畀冰島的話,克羅地亞小組首名出綫可能性係相當大。

而克羅地亞成功出綫之後,先係筆者最為擔心嘅問題。雖然小組首名可以避開C組超曬班嘅法國,按照目前C組形勢嚟睇,「格仔軍團」最有機會對到丹麥或者澳洲。呢兩隊實力當然比唔上克羅地亞。但筆者好擔心一但淘汰賽心理病發作,克羅地亞又會重蹈覆轍,自掘墳墓。不過,呢班主力球員實力加埋達歷嘅功夫。筆者深信呢個問題會迎刃而解。如果順利去到8強,好大機會會面對B組西葡或者A組嘅烏拉圭。

而筆者衷心希望克羅地亞今屆可以創造下佳績,因為今屆好大機會係呢班「黃金一代」最後一屆世界盃,相信「格仔軍團」只要克服到淘汰賽嘅問題,8強應該不是夢。

•克羅地亞世界盃小組賽賽程表:

6月17號 02 :00克羅地亞VS尼日利亞加里寧格勒球場

6月22   02:00 VS冰島下諾夫哥羅德球場

6月27號 02:00 克羅地亞VS 冰島羅斯托夫球場

•世盃小組賽次輪對阿根廷陣容(4-2-3-1) :

門將:蘇巴錫

後防:史捷歷,維達,路夫雲,華沙積高

防中:保素域,拉傑迪

前場:佩利錫,摩迪,列比治,

前鋒:文素基治