文/William Luk

尼日利亞足球代表隊(英文:Nigeria national football team)

世界排名:48

教練: 格諾特·路亞(Gernot Rohr)

今屆外圍賽成績:非洲區第三圈B組首名

出席世界盃決賽週次數:6次(1994年、1998年、2002年、2010年、2014年以及2018年)

歷屆最佳成績:16強(1994年、1998年以及2014年)

外圍賽最佳射手:米基爾、伊禾比& 伊恩拿祖(2球)

今屆訓練基地:葉先圖基(俄文:Ессентуки́)

講起尼日利亞,好多香港球迷會即時聯想起1998年法國世界盃。呢支以1996年亞特蘭大奧運會金牌成員為主力嘅「超霸鷹」喺當時有一班「黃金一代」球員,包括隊長奧高查(Austin Okocha)、芬尼迪(Finidi George)、簡奴(Nwankwo Kanu )、奧利殊(Sunday Oliseh)、威斯(Taribo West)同埋伊比巴(Victor Ikpeba)。

尼日利亞喺5月14號公佈30人初選名單。並喺5月27號因為摩西斯‧西蒙(Moses Simon)大髀受傷退隊而減至29人。隨後喺25號將名單減到25人,而最終名單喺6月3號公佈。

今屆世盃尼日利亞23人名單入面有好多香港球迷認識嘅球員,當中以中前場為甚,包括梅沙(Ahmed Musa)、尼迪迪(Wilfred Ndidi)、米基爾(John Obi Mikel)、恩哈路(Odion Ighalo)、摩西斯(Victor Moses)同伊恩拿祖(Kelechi Iheanacho)。

尼日利亞2018年俄羅斯世界盃決賽週23人大名單(尼日利亞足總TWITTER)

尼日利亞23人名單如下:
門將:
1.伊辛華(安耶巴)、16.艾比爾(茨普帕聯)、23.烏素荷(拉科魯尼亞)

後防:
2.伊度胡(阿馬卡)、3.艾治積利(色格拉布魯日)、5.威廉‧杜路斯-伊干(貝沙)、6.巴路根(白禮頓)、12.阿卜杜拉‧施胡(貝沙)、20.艾華施安(南特)、21.伊布希(ADO海牙)、22.奧美羅(卡森柏沙)

中場:
4.尼迪迪(李斯特城)、8.伊迪保(拉斯彭馬斯)、10.米基爾(天津泰達)(C)、17.安拿斯(特拉布宗)、15.祖爾‧奧比(拖連奴)、19.約翰‧奧古(別是巴工人),

前鋒:
7.梅沙(中央陸軍)、9.恩哈路(長春亞泰)、11.摩西斯(車路士)、13.施美(克羅托尼)、14.伊恩拿祖(李斯特城)、18.伊禾比(阿仙奴)

•回顧

尼日利亞係近屆世界盃決賽週嘅常客。呢支非洲「超霸鷹」喺世盃決賽週表現出色,其中喺1994年美國世盃決賽週16強,如果唔係臨完場前派膠,一早踢咗該屆亞軍意大利出局。

路亞係德國人,著重球隊紀律同機動性(90mins)

今屆外圍賽開始前,尼日利亞喺2014年之後已經換咗5位教頭,其實近10年尼日利亞嘅中前場人強馬壯,但後防一直弱雞到無眼睇,上屆世盃唔係後防差可能可以更進一步入到16強。而且,非洲球隊一直存在嘅各打各問題,都係佢哋一直喺國際大賽拎唔到好成績嘅原因之一。

最終,尼日利亞足總委任德國籍教練路亞成為「超霸鷹」教頭,而對上一位外籍教頭已經係10年嘅德國名宿福士(Hans Hubert Vogts)。由於路亞球員生涯司職後防,加上德國民族嘅紀律性。終於解到咗尼日尼亞纏繞多年嘅防守問題。

最終「超霸鷹」係做到攻守平衡,加上近年出產一班效力歐洲頂級聯賽嘅中前場球員嘅情況下,喺非洲區外圍賽第3區B組以6戰4勝1和1負,入11球失6球成績位處榜首,力壓喀麥隆同阿爾及利亞呢兩支傳統勁旅,殺入今屆世界盃32強。以下係尼日利亞今屆世盃外圍賽戰績:

-非洲區第2圈:

斯威士蘭0:0尼日利亞

尼日利亞2:0斯威士蘭

兩回合計2:0晉級

-非洲區第3圈B組:

贊比亞1:2尼日利亞

尼日利亞3:1阿爾及利亞

尼日利亞4:0喀麥隆

喀麥隆:1尼日利亞

尼日利亞1: 0贊比亞

阿爾及利亞3:0尼日利亞*

*賽果本來係1:1,但尼日利亞派咗唔合資格球員上場,畀FIFA判罰0:3輸波

•主力分析

烏素荷年紀輕輕就成為「超霸鷹」正選門將(AFP PHOTO / NICOLAS ASFOURI)

今屆世盃我哋再見唔到門神安耶馬(Vincent Enyeama),取而代之嘅係年僅19歲嘅小將烏素荷(Francis Uzoho)。呢位小將效力西班牙拉科魯尼亞,喺上年10月以18歲又352日成為西甲最年輕正選門將。佢反應極大,而且封位一流,絕對係一個可造之材。

拉科魯尼亞來季會降落西乙,相信烏素荷如果喺今次世盃有好表現,唔愁無一個「新東家」。

巴路根係今屆尼日利亞絕對正選中堅(FIFA)

巴路根(Leon Balogun),爸爸係尼日利亞人,媽咪係德國人。呢位將喺來季效力英超白禮頓嘅中路守將係今屆尼日利亞嘅後防重心。

巴路根身高達1米9,重88公斤。身體強壯,攔截率高,加上廣闊嘅制空能力,面對一啲擅長高空轟炸嘅國家隊,巴路根必定為「超霸鷹」挺身而出。不過呢位29歲中堅控球能力方面較弱,喺效力德甲緬恩斯期間都試過出現一啲「蝦祿」鏡頭。

米基爾必定係「超霸鷹」嘅中場悍將(Goal.com)

現時效力中超天津泰達嘅尼日利亞隊長米基爾喺初出茅廬嗰時曾經引起英超曼聯同車路士兩支豪門你爭我奪。雖然呢位中場球員生涯履歷表閃閃發亮,拎過兩屆英超同聯賽盃冠軍、4奪足總盃、仲有社區盾、歐聯同歐霸盃各1次。但米基爾其實一一個問題多多嘅中場球員。

筆者平心而論,米基爾防守一直唔錯,而傳球成功率一直亦能保持85%或者以上,但佢經常喺關鍵時刻犯錯,加上進攻能力欠佳,一直未能喺車路士中場企穩陣腳。但佢已經算係近年尼日利亞最出色嘅中場,相信佢嘅防守能力可以減輕尼日利亞嘅後防壓力。

摩西斯(左)以及伊恩拿祖(右),相信會擔起尼日利亞進攻重責(FIFA)

現年27歲嘅前鋒摩西斯效力英超豪門車路士,其實佢細個父母遇交通意外身亡,之後就去咗英國申請政治庇護,並被寄養喺劍橋郡其中一個小鎮嘅普通家庭入面。喺求學其間開始足球生涯。

摩西斯除咗前鋒之外都名以勝任邊路位置,呢位尼日利亞球員以速度聞名,佢嘅巨大優勢在於肯同對方閘位近距離嘅埋身肉搏以及願意做非洲球員少見嘅個人突破,經常有一啲令人大跌眼鏡嘅靚傳波。不過摩西斯間中又會派下「膠」,相信好多車迷會明筆者講緊乜。

梅沙係隊內少數穆斯林球員(FIFA)

梅沙,呢位曾經效力英超「黑馬」李斯特城嘅球員,曾經被人寄予厚望,但上季喺球會表現一般,更被外借返去前球會俄超中央陸軍。

梅沙擁有飛快嘅速度,加埋摩西斯絕對係尼日利亞打反攻嘅最佳利器。

伊禾比有今日,真係要多謝雲加(Sporting News)

目前效力阿仙奴嘅伊禾比係今屆尼日利亞前場主力球員之一,擁有雙重國籍嘅佢曾經幫過英格蘭U18上陣,但之後佢決定為「超霸鷹」效力。而值得一提係伊禾比叔叔就係尼日利亞上世紀90年代名宿奧高查(Augustine Okocha)。

呢位年僅22歲嘅翼鋒出身自英超阿仙奴青訓系統,近年成為啱啱離任嘅前教頭雲加嘅愛將,上陣機會多不勝數,令佢閱讀大賽能力不斷增加。

伊禾比喺今屆世盃外圍賽佢上場四次就射2球,幫助國家隊晉身今屆俄羅斯決賽週。佢有一定嘅控球技術同埋傳波能力,可以幫助「超霸鷹」前場帶來更多威脅同創造力。

•小組分析

尼日利亞喺俄羅斯嘅大巴,巴士上寫住「非洲人自豪嘅快翼」 (尼日利亞足總TWITTER)

今屆尼日利亞籤運一般,編入D組,其中同阿根廷再度喺小組賽狹路相逢,同組仲有新丁冰島同埋克羅地亞。

筆者預計尼日利亞喺D組可以力爭次名。首先,「超霸鷹」係非洲一支老牌強隊,加上近年有唔少高質素嘅年輕球員湧現,今屆23人大名單比起前幾屆相對好好多。而且尼日利亞大賽經驗豐富,喺過去5屆參加世盃賽事入面,雖然只都係16強行人止步,但佢係某幾場嘅爆發力仍然令到全球球迷目瞪口呆。

但始終非洲國家隊存在獎金,欠缺紀律性等問題,亦都係非洲國家隊喺世盃表現欠缺穩定嘅主原。不過世盃開賽前,尼日利亞已經同呢班球員達成獎金協議,相信有助提升隊內士氣。

但首場對克羅地亞,上半場佢哋最弱嘅後防線已經頂唔到對手進攻,先由防中伊迪保(Oghenekaro Etebo)自擺烏龍。再喺下半場再輸一球12碼,最以02落敗。

呢場敗仗主要歸究於排陣問題,前場恩哈路獨力難支表現低迷,而且要唔擅攻嘅米基爾擔任進攻中場,筆者已經覺得匪夷所思,。另外,教練路亞臨場反應慢,要去到下半場中段先換入梅沙同伊恩拿祖加強攻力,已經係為時已晚。

筆者睇完尼日利亞首場比賽之後,原本估計佢哋今次好難再喺小組賽中殺出重圍。點知第二輪同冰島嘅交鋒,尼日利亞竟然打出漂亮一仗,喺上半場捱打嘅情況下,憑住下半場兩次反擊,由梅沙個人梅開二度,以2:0擊敗冰島,重燃出綫希望。

呢場比賽尼日利亞贏在肯變陣,起用3-5-2陣式,將米基爾退後一格打返防中,再由尼迪迪同伊迪保兩人幫手掃波,從而加強中場控制。同埋冰島有主力受傷,令整體戰術大受影響。另外,冰島可能喺對阿根廷嗰場比賽博到盡,成隊波體能喺下半場尾段係完場跟唔上尼日利亞嘅快速節奏,令到梅沙同摩西斯喺前場如入無人之境。

D組目前形勢 (FIFA TWITTER)

由於尼日利亞喺上場成功碎「冰」,已經拎咗小組出綫主動權,不過同時救咗阿根廷一命。筆者喺度作個假設,今晚尼日利亞對阿根廷只要贏波或者和波而冰島失分,咁佢哋會以小組次名出綫16強。而「超霸鷹」喺16強好大機會會對C組兼上屆16強對手法國,相信要再進一步,恐怕難如登天。

講返今晚場波,尼日利亞喺歷史上同阿根廷交戰過7次,其中喺世界盃決賽週交戰過4次,阿根廷4戰全勝佔據絕對優勢。不過以阿根廷而家嘅團隊士氣,尼日利亞絕對有力創造歷史新一頁,喺世界決賽週上第一次擊敗南美洲球隊。

值得一提係,上屆世盃兩隊都係同處一組,當時阿根廷以3:2擊敗尼日利亞(Link: https://www.youtube.com/watch?v=9-8_rM9WcS8),兩隊一齊攜手出戰16強。但今屆兩隊只能活一隊,甚至有機會和波齊齊出局,鹿死誰手,今晚就一清二楚。

•尼日利亞世界盃小組賽賽程表:

6 1 7 02 :00克羅地亞VS尼日利亞加里寧格勒球場  

6月22    23:00尼日利亞VS冰島伏爾哥格勒體育場

6月27號 02:00 尼日利亞VS 阿根廷聖彼得堡十字架球場

•世盃小組賽首輪對克羅地亞陣容(4-2-3-1) :

門將:烏素荷

後防:伊度胡,巴路根,威廉‧杜路斯-伊干,施胡

防中:伊迪保,尼迪迪

前場:摩西斯,米基爾,伊禾比

前鋒:恩哈路

•世盃小組賽次輪對冰島陣容(3-5-2) :

門將:烏素荷

後防:奧美羅,威廉‧杜路斯-伊干, 巴路根

中場:伊度胡,伊迪保,米基爾,尼迪迪,摩西斯

前鋒:伊恩拿祖,梅沙