文/William Luk

哥倫比亞足球代表隊 (西班牙文:Selección de fútbol de Colombia)

世界排名:16

教練:荷西‧柏卡文 (José Pékerman)

今屆外圍賽成績:南美區第四名

歷屆出席世界盃決賽週次數:6次 (1962年、1990年、1994年、1998年、2014年以及2018年)

歷屆最佳成績:8強 (2014年)

外圍賽最佳射手:菲臘比‧卡些度(7球)

今屆訓練基地:韃靼斯坦共和國上烏斯隆斯基(俄文:Верхнеусло́нский райо́н).

南美洲代表哥倫比亞係近年世界球壇其中一隊「黑馬」,愈嚟愈多球員喺歐洲大球會效力,實力自然比上屆更強。筆者相信今屆哥倫比亞目標至少都要同上屆一樣,殺入八強。上屆一個J.洛迪古斯就風魔萬千少女,今屆又會有咩賣點呢???

哥倫比亞2018年俄羅斯世界盃決賽週23人大名單,有1位球員隨後因傷退隊 (Goal.com)

哥倫比亞喺5月14號公佈35人初選名單,並喺同月21號公佈23人大名單。但喺6月9號因為後防主力左閘法巴拉(Frank Fabra) 膝頭韌帶撕裂,而補上迪亞斯(Farid Díaz)。

今屆23人名單有9位球員參加過上屆世界盃決賽週。另外有13位球員目前效力歐洲頂級聯賽,包括巴卡(Carlos Bacca)、奧斯賓拿(David Ospina)、戴雲遜·山齊士(Davinson Sanchez)、伊斯基亞度(Jose Izquierdo )、 J.洛迪古斯(James Rodriguez) 、古亞達度(Juan Cuadrado) 以及法卡奧(Radamel Falcao)。

23人大名單:

門將:

1.奧斯賓拿 (阿仙奴)、12.卡美路‧華加斯 (卡利體育)、22.費南度‧古亞達度 (卡爾達斯)

後衛:

2.薩柏達 (AC米蘭)、3.梅里路 (帕丘卡)、4.艾利亞斯 (PSV燕豪芬)、13. 耶利‧米拿 (巴塞隆拿)、17.摩希卡 (基朗拿)、18.迪亞斯 (巴拉圭奧林比亞) 、23. 戴雲遜·山齊士 (熱刺)

中場:5.巴利奧斯 (小保加)、6.卡洛士‧山齊士 (費倫天拿)、8.阿古拿 (卡利體育)、10.J.洛迪古斯 (拜仁慕尼黑)、11.古亞達度 (祖雲達斯)、16.拿馬 (利雲特) 、20.昆迪路 (河床)、

前鋒: 7.巴卡 (維拉利爾)、9.法卡奧 (摩納哥)(C)、14.梅利爾 (西維爾)、19.保查 (彭美拉斯)、21.伊斯基亞度 (白禮頓)

•回顧

哥倫比亞喺上屆世界盃發揮出色,雖然缺少咗因傷缺陣嘅頭號球星法卡奧,不過仍然憑住新星J.洛迪古斯嘅神勇發揮,幫助「咖啡農」喺世界盃決賽週有所突破,成功打入8強。上屆J.洛迪古斯射入5球,成為上屆世盃神射手,大放異彩後,畀西甲豪門皇馬簽入其下。

如今4年過去,J.洛迪古斯已經離開皇馬,雖然目前效力拜仁嘅J.洛迪古斯依然稱得上係頂級球星之一,不過遠遠未達到眾人期望。

柏克曼帶領哥倫比亞參加過2屆世盃決賽週 (antena2)

哥倫比亞喺今屆南美洲外圍賽戰績遜於預期,雖然可以連續兩屆晉身世盃決賽週。但到最後一輪以一分力壓秘魯同智利拎到第四名最後一個直接出線席位,以18戰7勝6和5負,入21球失19球嘅成績,直接晉身今屆世盃決賽週。

哥倫比亞現任教頭係柏克曼,呢位原阿根廷籍教頭之前已經入籍哥倫比亞。佢過往帶領過阿根廷參加2005年洲際盃同2006年德國世界盃決賽週,當中喺世盃6:0大炒塞黑係佢嘅代表作。不過柏克曼喺8強對東道主德國嘅比賽調動失誤,導致阿根廷最終落敗告終。隨後柏克曼都因此辭職。

柏克曼喺之後幾年執教過2隊墨西哥球隊,就休息咗接近3年,直到2012年開始執起哥倫比亞教鞭。呢位中場出身嘅教頭,非常注重中場控制力,加上過去十年哥倫比亞出現一班實力雄厚嘅中場人員,非常適合以4-2-3-1作為常規陣容,同柏克曼戰術理念不謀而合,令佢帶領哥倫比亞可以更加得心應手。不過老實講,「咖啡農」喺今屆外圍賽嘅表現同埋成績真係冇咩說服力。以下係哥倫比亞今屆世盃外圍賽成績:

哥倫比亞2:0秘魯

烏拉圭3:0哥倫比亞

智利1:1哥倫比亞

哥倫比亞0:1阿根廷

玻利維亞2:3哥倫比亞

哥倫比亞3:1厄瓜多爾

哥倫比亞2:0委內瑞拉

巴西2:1哥倫比亞

巴拉圭0:1哥倫比亞

哥倫比亞2:2烏拉圭

哥倫比亞0:0智利

阿根廷3:0哥倫比亞

哥倫比亞1:0玻利維亞

厄瓜多爾0:2哥倫比亞

委內瑞拉0:0哥倫比亞

哥倫比亞1:1巴西

哥倫比亞1:2巴拉圭

秘魯1:1哥倫比亞

•主力分析

今屆哥倫比亞後防人員變動極大。首先,老將耶比斯(Mario Yepes)早已掛靴,而上屆正選柏保路·艾美路 (Pablo Armero)同埋C.辛尼加(Juan Camilo Zúñiga)高峰已過,都無入選今屆大名單。反而喺上屆鮮有出場機會嘅艾利亞斯已經逐漸成長成為國家隊正選右閘,而4年前仲係寂寂無名嘅戴雲遜·山齊士都已經成為熱刺後防中堅。

-門將你我都識 佢勝在夠穩陣

奧斯賓拿係哥倫比亞今屆絕對正選門將 (arsenal.com)

奧斯賓拿,呢位29歲嘅當打門將目前效力英超阿仙奴,上屆世盃已經係哥倫比亞嘅正選門將。雖然今季仍然係正選門將施治(Petr Čech)嘅後備。不過今季佢喺歐霸盃發揮出色,幫助「兵工廠」殺入4強。隨著施治年紀漸大,相信奧斯賓拿只要今屆有出色發揮,下季喺阿仙奴將會獲得更多機會。

奧斯賓拿雖然只有1米83,但撲救能力超強。佢嘅防守範圍廣闊,撲救速度極快,特別係一啲神來之筆嘅遠射,成日都可以力保不失。另外,佢嘅反應非常好,經常有一啲近距離撲救。不過,呢位哥倫比亞門將係接波方面有時會出現甩手嘅情況,呢點都係雲加(Arsène Wenger)喺過去一直唔願意比佢喺英超呢類快節奏聯賽取代施治嘅主要原因。

-「咖啡農」後防 勝在年輕力壯 主力正值巔峰

艾利亞斯能攻能守,係今屆哥倫比亞一大殺著 (Sky Sports)

艾利亞斯,呢位26歲嘅右閘,目前效力荷甲班霸PSV燕豪芬,喺今季幫助PSV拎到荷甲冠軍,並成為今季荷甲最佳球員,相信喺今個夏天PSV未必可以留住呢位球員。佢係上屆雖然有入選23人大名單,但只係後備居多,但相信呢4年已經累績一定嘅大賽經驗。

佢速度極快,而且喺防守方面係非常穩健,加埋跑唔盡嘅體力,經常後上協助進攻。值得一提,今次PSV都有幾位球員參加今屆世盃決賽週(荷蘭當然無份),例如冰島前鋒艾拔‧古蒙臣(Albert Guðmundsson)以及墨西哥快翼洛仙奴(Hirving Lozano)

戴雲遜·山齊士過去一屆表現一般

戴雲遜·山齊士,年僅21歲就效力英超熱刺,係一個身體極為強壯嘅中堅。不過防守經驗不足,經常有「派膠」舉動,特別喺今季歐聯16強對祖雲達斯嘅次回合,熱刺輸波佢要負上最大責任,所以還需磨練。

薩柏達年紀漸大,體能會係佢最大挑戰 (Pianeta Milan)

薩柏達,呢位31歲中堅嚟自意甲AC米蘭,係哥倫比亞老牌中堅。但近季隨著年齡漸大,喺AC上陣時間唔多。不過筆者相信,相比後生而又欠缺火喉嘅米拿(Yerry Mina),教頭柏克曼寧願相信有大賽經驗嘅薩柏達多啲。

法巴拉喺俄羅斯訓練基地整親膝頭 (哥倫比亞足總TWITTER)

筆者覺得今屆哥倫比亞後防左閘有一定隱患,因為正選法夫拉已經因傷退隊,呢位效力阿根廷班霸小保加左閘,係傳統「矮腳虎」,速度極快,擁有一定嘅後上助攻能力。

至於中前場方面,今屆哥倫比亞同上屆相比變化唔大。首先,講下中場,古亞達度、J.洛迪古斯以及卡洛士‧山齊士(Carlos Sánchez)喺今屆依然都係國家隊絕對主力。而相信喺古亞連(Fredy Guarín)落選之後,新星昆迪路(Juan Quintero)會成為「咖啡農」嘅新晉中場。

去到前鋒,我哋終於可以見到法卡奧踢世界盃。呢位鋒霸喺經歷曼聯同車路士嘅失意後,終於重新喺法甲摩納哥搵返一定嘅狀態,是哥倫比亞鋒線上的頭號殺手。至於拉莫斯同查維馬天尼斯已經淪為平庸,甚至無法進入大名單。另外,有住傳奇故事嘅巴卡雖然入選,但係近年喺AC嘅狀態都係一般。反而筆者相估喺今年西甲西維爾嶄露頭角嘅前鋒梅利爾(Luis Muriel)有機會成為法卡奧嘅後備人選。

-中場攻守兼備

J.洛迪古斯嘅表現絕對左右今屆哥倫比亞最終成績 (FIFA)

J.洛迪古斯,呢位目前效力德甲班霸拜仁慕尼黑嘅26歲進攻中場,加盟皇馬幾年都過得極不如意。直到今季嚟到拜仁之後重獲新生。

洛迪古斯絕對係哥倫比亞嘅進攻核心,傳波視野好,射門能力強,特別係佢嘅遠射能力係十分恐怖。另外,佢嘅罰球能力都係其中一個殺著,所以佢一上場,必定成為對方重點看防對象。

不過近期J.洛迪古斯小腿肌肉有傷,恐怕會影響哥倫比亞世盃表現。

相信香港球迷都好熟悉古亞達度 (ABC)

古亞達度,嚟自意甲祖雲達斯。相信英超球迷對佢唔會陌生,。呢隻邊路快馬,個人突破同盤扭能力一流。唯一一樣唔好係「獨食」,成日鐘意自己單槍匹馬。

-前鋒一件法卡奧 到底夠唔夠做

呢隻「老虎」可唔可以惡下去?

用涅磐重生去形法卡奧唔會過分,呢位目前效力法甲摩納哥嘅鋒霸,因為4年前重傷而緣盡世界盃,令人惋惜。其實佢最巔峰時期真係效力馬體會嗰2個球季,不過近幾年都係借嚟借去嘅「老虎」喺今季重返摩納哥之後已經搵返作為一個世界級前鋒嘅感覺,上陣26場入18球。

雖然法卡奧已經32歲,已經唔再喺巔峰期。不過筆者相信佢依然會係哥倫比亞最信賴嘅得分點。

•小組形勢

由上面球員部分可見,目前哥倫比亞陣容同上屆比毫不遜色,國家隊肯定唔會單單滿足小組出綫,甚至希望更進一步突破8強,不過談何容易?

今屆世盃H組畀人認為繼A組後另一組實力平均嘅小組。除咗哥倫比亞之外,同組仲有日本、波蘭、塞內加爾。

喺H組賽程上,哥倫比亞絕對佔有先機同出綫主動權,因為第一場就會面對小組實力較弱嘅「藍武士」日本。

但天算不如人算,先有J.洛迪古斯賽場小腿肌肉受傷要暫居後備,開賽後6分鐘防中禁區內犯下天條畀球證「全餐」,即紅牌兼十二碼,雖然「咖啡農」半場曾經憑住昆迪路嘅入波追和1:1。但係下半場中段人少打人多情況下,開始體力不繼,最終1:2不敵日本,爆出個冷門。因為上屆哥倫比亞喺分組賽係大炒日本4:1。而我哋都見到無咗J.洛迪古斯嘅哥倫比亞真無咩創造力。

呢班哥倫比亞球迷,為咗現場支持國家隊,竟然辭工,賣樓或者賣車。值得尊敬 (哥倫比亞足總Twitter)

第二場對波蘭,哥倫比亞可勝不可敗,好彩有J.洛迪古斯復出,加強咗中組織同前場進攻,成場比賽哥倫比亞完場控制晒中場,佢自己仲貢獻咗2個助攻。J.洛迪古斯嘅復出令到法卡奧得到更多供應,最終,呢位「老虎」更射入自己喺世界盃嘅第一球。最終,哥倫比亞以3:0擊敗波蘭,將波蘭踢出局之餘,都令波蘭成為今屆世界盃出現第一支出局嘅種子球隊。勝出的哥倫比亞,

雖然哥倫比亞擊敗波蘭,但目前出線形勢仍然處於被動,暫時以2戰1勝1輸得3分。最後一輪對塞內加爾嘅賽事,「咖啡農」一定要擊敗對手先可肯定出線,但塞內加爾係分組賽從未輸波,加上塞內加爾球員都唔係差,團隊合作加埋黑人先天優勢(速度加身型),所以今次要出綫,談何容易?

至於贏波之外係首名定次名,都要睇下日本同波蘭比賽戰果。因為目前次名出綫要面對嘅對手,甚至成個上線嘅對手都係非常難哽。

•哥倫比亞世界盃小組賽賽程表:
H

6 1 9 20 :00哥倫比亞 VS日本 摩度維亞球場  

6月25  02:00波蘭VS哥倫比亞 喀山球場

6月28號 22:00 塞內加爾VS 哥倫比亞 沙馬拉球場

•世盃小組賽首輪對日本陣容(4-2-3-1) :

門將:奧斯賓拿

後防:摩希卡,梅里路,戴雲遜·山齊士, 艾利亞斯

防中:拿馬,卡洛士‧山齊士

前場:伊斯基亞度,昆迪路,古亞達度

前鋒:法卡奧

•世盃小組賽次輪對波蘭陣容(4-2-3-1) :

門將:奧斯賓拿

後防:摩希卡,戴雲遜·山齊士,耶利‧米拿,艾利亞斯

防中:巴利奧斯,拿馬

前場:昆迪路,J.洛迪古斯,古亞達度

前鋒:法卡奧