文/William Luk & Cham

比利時足球代表隊 (法文:Équipe de Belgique de football/德文:Belgische Fußballnationalmannschaft/荷蘭文:Belgisch voetbalelftal)

世界排名:3

教練:馬天尼斯(Roberto Martínez)

今屆外圍賽成績:歐洲區H組首名

出席世界盃決賽週次數:13次 (1930年、1934年、1938年、1954年、1970年、1982年、1986年、1990年、1994年、1998年、2002年、2014年以及2018年)

歷屆最佳成績:殿軍 (1986年)

外圍賽最佳射手:盧卡古(11球)

今屆訓練基地:莫斯科

歐洲「紅魔鬼」比利時喺5月21號公佈28人初選名單,最終喺6月4號公佈最終23人大名單。

比利時2018年俄羅斯世界盃決賽週23人大名單 (比利時足總Twitter)

23人大名單中入面有15位球員參加過2014年巴西世界盃,具有相當豐富嘅大賽經驗。

另外,名單入面有好多香港球迷耳熟能詳嘅球員,包括門將古圖奧斯(Thibaut Courtois)、中堅華美倫(Thomas Vermaelen)、維頓漢(Jan Vertonghen)同艾達韋列特(Toby Alderweireld),中場維素(Axel Witsel)、迪布尼(Kevin De Bruyne)、費蘭尼(Marouane Fellaini)、夏薩特(Eden Hazard)同埋前鋒盧卡古(Romelu Lukaku)。但效力水晶宮嘅賓迪基(Christian Beneteke)就落選大名單,佢喺今季其實表現唔錯,幫助水晶宮護級成功。另外,今季長期受傷嘅甘賓尼(Vincent Kompany)仍然在陣。

比利時23人大名單:

門將:
1. 古圖奧斯 (車路士)、12.米奴列 (利物浦)、13. 卡斯迪爾斯(禾夫斯堡)

後衛:
2.艾達韋列特 (熱刺) 3.華美倫 (巴塞隆拿)、4.甘賓尼 (曼城)、5.維頓漢 (熱刺)、 15.蒙尼亞 (巴黎聖日門)、20.保耶達 (些路迪)

中場:
6.維素 (天津權建)、7.迪布尼 (曼城)、8.費蘭尼 (曼聯), 10.夏薩特(車路士)(C)、11.卡拉斯高 (大連一方)、16.杜根‧夏薩特  (慕遜加柏)、14.梅頓斯(拿玻里)、17.泰文文斯 (摩納哥)、18.贊奴沙 (皇家蘇斯達)、19.丹比利 (熱刺)、23.丹當斯卡 (安德烈治)

前鋒:
9. 盧卡古 (曼聯)、21.巴舒亞伊 (多蒙特)、22.沙迪利 (西布朗)

回顧

馬天尼斯能否帶領比利時拎到好成績? (馬卡報)

馬天尼斯喺2016年8月被任命為比利時教練,之前執教比利時4年嘅馬克·韋莫斯(Marc Wilmots)因為「紅魔鬼」喺2016年歐國盃表現不濟而被炒魷。

馬天尼斯所帶領嘅比利時喺成個世界盃外圍賽係輕鬆過關,10戰9贏1和入43球失6球。

但考慮到目前「紅魔鬼」目前嘅實力,出綫係意料中事。但其實比利時足總任命對西班牙籍嘅馬天尼斯被當時比利時上下批評,特別係佢他之前執教愛華頓極度失敗,但成個外圍賽令到大家睇到佢點樣善用每一位黃金時代嘅球員。以下係比利時今屆世盃外圍賽成績:

塞浦路斯0:3比利時

比利時4:0波斯尼亞

直布羅陀0:6比利時

比利時8:1愛沙尼亞

比利時1:1希臘

愛沙尼亞0:2比利時

比利時9:0直布羅陀

希臘1:2比利時

波斯尼亞3:4比利時

比利時4:0塞浦路斯

今屆世盃之路

今屆比利時抽籤運氣唔錯,令人羨慕。佢哋被分到G組,同組對手有英格蘭、巴拿馬同突尼西亞。以實力計,除咗英格蘭之外,基本上另外兩隊都無可能威脅到比利時。而頭兩場比賽比利時都輕鬆過關,場場開大。

去到第三輪對英格蘭嘅比賽,筆者原以為出盡副選嘅比利時會以和波次名出綫為目標,因為比利時賽前同英格蘭同分兼同樣得失球差,加上公平競技分低過英格蘭。所以,只要呢場和波拎次名,就可以避開上綫法國、巴西、葡萄牙、烏拉圭等具實力嘅國家隊。

但人算不如天算,比利時一眾後備球員表現出色,最終憑住贊奴沙(Adnan Januzaj)喺下半場嘅入波,以1:0擊敗同樣出副選嘅英格蘭。最終,英格蘭走綫成功,比利時落入上線,將要面對一系列挑戰。

此外,喺分組賽3場比賽入面,因為國家隊之間實力過於懸殊,教練馬天尼斯試過起用唔同球員去試陣,為淘汰賽做準備,正正係呢類試陣,令到比利時可以喺8強同16強闖關成功。

值得一提係,第二前鋒巴舒亞伊(Michy Batshuayi)嘅級數已經係分組賽表露無遺,前線無咗盧卡古,比利時如失一臂。所以,盧卡古必定會係今屆比利時餘下賽事成為比利時不可或缺嘅前鋒球員。

比利時喺G組「輕輕鬆鬆鄧梓峰」首名出綫 (REUTERS)

比利時係今屆世盃淘汰賽頭2場可以用有驚無險嚟形容。首先,佢哋喺16強對日本嘅比賽有驚無險以3:2反勝呢支亞洲勁旅。其實呢場比賽日本嘅前場壓迫戰術導致比利時中場無法組織之外,教練馬天尼斯排陣都有問題,特別係卡拉斯高嘅位置,上半場已經表露無遺,「應交唔交,應射唔射」,完全拖慢晒比利時嘅快速進攻套路。
最終,喺下半場中段落後兩球嘅情況下,馬天尼斯當機立斷,即時收起今場表現平平嘅美頓斯同卡拉斯高,換入制空能力極強嘅費蘭尼同埋速度型嘅沙迪利(Nacer Chadli),令到比利時嘅高空轟炸戰術即時立竿見影。
最後,憑住後備入替嘅沙迪利喺下半場加時最後一分鐘射入奠定勝局嘅一球,而呢個入球大家可以留意一下盧卡古嘅走位,佢嘅跑位拉空咗日本防線,導致後上嘅沙迪利有機可乘。

去到八強,比利時面對今屆奪冠大熱巴西,教練馬天尼斯再一次變陣成功,將由外圍賽到16強常用嘅3-4-3陣容改到4-3-3陣容,因為馬天尼斯明白到如果出三個中堅陣隨時會被巴西兩隻快翼完爆,於是將今屆一直放喺右中場嘅蒙尼亞(Thomas Meunier)拉後,畀他踢返喺巴黎聖日門踢開嘅右閘位置,一定程度上壓制咗尼馬喺左路嘅進攻。
而喺呢個4-3-3陣式入面,馬天尼斯喺中場放入沙迪利同費蘭尼呢兩位上場贏波功臣,喺上半場乘住對方中場主將卡斯米路(Casemiro)停賽,利用身體優勢喺一定嘅時間將中場控制權控制得完美無遺。

另外,馬天尼斯將迪布尼推前,而喺防守時將左翼沙迪利移入中路,完全解決迪布尼,再以4-3-3陣容配合區域防守阻擋巴西大部分攻勢,改善咗比利時對日本嘅兩大缺點,首先係邊路防守力不足;其次係三閘線攔截強度不足呢兩大問題。

其實,呢場比賽巴西基本上全場佔優,但比利時上半場先把握巴西一次角球擺老烏,加上臨完上半場前迪布尼利用一個反擊射入世界波,令比利時半場就以2球遙遙領先。

最終,下半場比利時眾志成城,頂住巴西嘅狂攻猛炸,以2:1擊敗呢支今屆奪冠熱門,繼1986年之後再次殺入4強。

由比賽結果嚟睇馬天尼斯呢個變陣非常湊效,唔單止令到巴西隊係比利時中路搵不到任何空位,打唔到任何地面傳波戰術,更激活咗迪布尼嘅進攻欲望令佢拎到入球。

今晚將會上演今屆世界盃四強賽事法國對比利時,有好多球迷認為今場戲碼一流,因為單以實力計算,呢場絕對係提前冠軍爭奪戰,分分鐘好睇過決賽。

首先,比利時今屆入波球員平均,目前已經有九位比利時球員先後入波,無一個主要核心球員,相信呢點已經係法國最為頭痛嘅一環,「高盧雄雞」無得好似上兩場咁MARK死美斯或者蘇亞雷斯,令成隊波進攻癱瘓。

我哋知道上場嘅新陣式令到比利時成功贏咗巴西,但法國中場擁有嘅係普巴(Paul Pogba)同簡迪(N’Golo Kanté),對比巴西中場,論體型,活力同技術都係另一層次,並唔見到同一個比利時組合可以拎到任何甜頭。當然筆者估計比利時並唔會沿用呢個陣式去完全對付法國,但比起陣式更加重要嘅係,對面法國都有隻快馬安巴比(Kylian Mbappé),威力絕對同巴西嘅快翼有過之而無不及。而且由上2場比賽下半場尾段都見到比利時有啲力不從心嘅感覺。所以,筆者相信今場比利時都會存在呢個隱患,特別係面對法國強大進攻火力,相信比利時都唔可以捱得去邊。

而法國喺上場8強面對缺少皇牌前鋒卡雲尼(Edinson Cavani)嘅烏拉圭,後防喺無太大壓力加上運氣而輕鬆取勝。今場法國隊嘅4-3-3進攻模式,仍然會用基奧特(Olivier Giroud)作為第一點,再以基沙文(Antoine Griezmann)同安巴比支援配合兩閘後上進攻。以今場法國面對比利時,筆者相信難以好似之前咁可以憑住基奧特同普巴嘅制空能力得到甜頭,因為比利時有身材高大而且攔阻截力同頂上功夫一流嘅費蘭尼在陣,筆者相信呢場嘅關鍵在於費蘭尼同佢嘅曼聯隊友普巴喺中場嘅高空爭奪戰!

而比利時另一個重心人物必定係隊長夏薩特,佢嘅對手就係右閘嘅柏華,筆者對於柏華嘅睇法係經驗不足踢法粗糙,早喺分組賽時面對實力次等嘅左路對手經常失位(對秘魯)。今場對住能射善盤嘅夏薩特,相信會十分吃力,令左路防守成為今場法國防守上嘅弱點。如果比利時嘅防守陣式同8強一樣嘅話,客串左閘嘅維頓漢必定成為比利時後防隱憂,維頓漢雖然具豐富大賽經驗,攔截力同制空力強,但喺速度同轉身極慢,面對住具速度同突破力高嘅狠巴比,相信維頓漢真係要諗諗計點樣唔洗食塵。此外,右閘正選蒙尼亞喺之前嘅比賽拎夠兩張黃牌而今場停賽,呢個位其實真係冇咩合適人選去替代,除咗分組賽第三輪輪換嘅杜根‧夏薩特(Thorgan Hazard),筆者真係諗唔到有咩人選可以勝任呢個位置去阻擋如日中天嘅基沙文。

至於中場方面,擁有簡迪同埋普巴嘅法國,喺中場攔截力方面係無容置擬,但今屆我哋會發覺法國中場經常出現無人分波嘅情況。上幾場更出現幾次普巴單騎出面等波到嘅問題,令到筆者諗起喺今屆歐霸盃有出色表現,但因傷未能隨隊嘅皮耶(Dimitri Payet)。反觀擁有英超助攻王迪布尼嘅比利時,喺進攻路線選擇就更加得心應手。大家上場見到,迪布尼一但有大量空位,比利時嘅反擊往往一針見血。所以,簡迪同普巴可唔可以壓制迪布尼會係今場另一焦點。

點都好,今屆嘅比利時已經話畀大家知,佢哋再唔係上屆一成不變嘅「紅魔鬼」,今屆嘅比利時已經可以因應球場上情況,而喺戰術上進行唔同轉換,球員會自動自覺換位踢,呢點正正係今屆比利時最得人驚嘅地方。
所以,今晚嘅臨場調動,可能係雙方致勝關鍵。到底法國可以繼2006年再度殺入決賽,定係比利時首次殺入決賽再捧盃而回,我哋拭目以待!

今晚4強對法國陣容預測(4-3-3):

門將:古圖奧斯

後衛:維頓漢、甘賓尼、艾達韋列特、杜根‧夏薩特

中場:沙迪利、費蘭尼、維素

前鋒: 夏薩特、盧卡古、迪布尼

全民俾LIKE 人人「些牙」!

.