文/William Luk

講起阿富汗,香港人一定會諗起拉登、塔利班同阿蓋達。但有幾多人知道佢以前曾經係一個西域佛教強國(巴米揚大佛係一個最好證明),早喺二千幾年前,亞歷山大大帝都踏足過呢度,並且將希臘文明帶到嚟呢度,並持續一段時間。另外,由於阿富汗喺地理上位於東西交界,導致佢成為亞歐一個重點貿易點同埋遊牧民族遷徙嘅路過點之一,歷史上好多民族遷徙都同必定路過呢度。

呢堆特點自亞歷山大大帝國時期開始出現,歷經7世紀伊斯蘭化之後一直持續到十九世紀尾,之後嘅阿富汗就成為咗大英帝國同沙俄喺對外博弈嘅一個緩衝區(特別係克羅米亞戰爭之後)。然後,呢個國家基本上都係子彈橫飛,永無寧日。特別喺塔利班執政時期,將好多佛教文化嘅文物全數摧毀,包括著名嘅巴米揚大佛。

阿富汗戰火從不停歇,自上世紀70年代晚期開始,阿富汗經歷各種內戰。時至今日,阿富汗戰爭爆發至今斷斷續續接近17年,而陷入絕泥漿嘅美國自奧巴馬上任後就開始逐漸減少駐阿美軍,甚至曾經考慮將駐阿美軍全數撤出阿富汗,並且訂立一個撤軍時間表。但後嚟因應當地恐怖組織聲勢壯大,加上ISIS崛起。美國又決定暫緩撤軍行動,重新協助阿富汗政府訓練阿富汗軍隊,持續打擊向個恐怖組織。

而阿富汗戰爭近年已經演變為內戰,塔利班近年一直主動攻擊政府軍各個據點,雖然雙方有舉行過幾次會談,但最近雙方又再度出現大規模衝突。雖然雙方近日再因為伊斯蘭節日而宣佈暫時停火,但筆者一直諗呢場持續17年嘅殺戮係咪真係會有落幕之日?阿富汗嘅國情無辦法喺呢度作過多介紹,今次專欄文章筆者會講下喺呢場持續不斷嘅衝突背後各國嘅盤算。

近年阿富汗政府同塔利班多次舉行會談 (Rahmat Gul/Associated Press)

•美國
-逢「馬」必反 繼續增兵 堅持反恐

莫迪同特朗普喺今年6月會面(Mumbai live)

筆者認為特朗普上任之後決定對阿增兵,取消奧巴馬定落嚟撤軍時間表。正正體現佢從一而終嘅「反奧巴馬」作風。

眾所周知,反恐係美國其中一個維持自身國力嘅方法。正如上文所講,喺奧巴馬時期,美國竟然定咗一個撤軍時間表,將駐阿美軍人數逐漸減到大約8400人。而且仲將大權交畀阿富汗政府,喺權力真空嘅情況下,出現咗好多簡問題。筆者一路認為奧巴馬撤軍方案係操之過急。結果,阿富汗呢幾年搞成點大家有目共睹。

另外,阿富汗政府一直存在住貪污問題,好多軍費被人唔知拎咗去邊,欠缺有效裝備訓練嘅政府軍係一盤散沙,根本無能力去對付孔武有力嘅塔利班。呢幾年阿富汗又亂成咁,奧馬巴絕對難辭其咎。

筆者認為目前美國增兵一定程度上會自奧巴馬時期之後,再次改變阿富汗戰場局勢,而且可以維持返美國以往嘅對阿政策,同當地政府合作,繼續反恐。同埋,可以對避免俄羅斯透過中亞搵阿富汗作為突破口。(參考當年大英帝國同沙俄喺呢度嘅對峙)

-期望以印制中 抗衡一帶一路

奧巴馬一直反對奧巴馬任內各項政策 (Robyn Beck/AFP/Getty Images)

我地由近半年美國嘅動態可以睇到美國為咗解決阿富汗問題,喺區域策略上面改變咗印度喺阿富汗問題上面嘅角色-由配角走向主角。
雖然喺地理上嚟睇,印阿隔住個巴基斯坦,喺地緣政治上面印度絕對輸蝕,亦絕無可能取代到巴基斯坦對阿富汗嘅軍事作用。但近年美巴關係因為拉登事件轉差,成為美國拉攏印度埋堆嘅關鍵因素之一。

而筆者認為克什米爾係推因之一,印度一直對克什米爾咁緊張,都係覺得呢度係印度唯一一個實際突破口(北有喜馬拉雅、東有緬甸阻住、南有印度洋),而且都係其中一個阻止中華人民共和國推進嘅地方。

因此,筆者認為美國拉攏印度其中一個主要目的,唔係單單要印度嘅軍事支持,而係一條長遠路線,希望利用印度去牽制住中華人民共和國喺中亞嘅影響力。其實,中華人民共和國正正靠美國多年專注阿富汗反恐戰爭而喺東亞不斷膨脹,直到美國宣佈調整對外政策,決定重返南海,但都已經為時已晚。近年,中華人民共和國一直透過「一帶一路」希望喺中亞同南亞兩個區域擴大自身影響力,斯里蘭卡一事對印度嚟講已經係一個警示,加上近年錫金地區境衝突不斷,心水清嘅印度絕對唔會坐以待斃,就算明知道畀美國利用,都迫不得已要主動迎擊,維持自己區域霸主地位。

其實,印度近年已經不斷用對外經濟援助嚟加強同維持自己嘅區域影響力,呢點同中華人民共和國不遑多讓。印度目前係阿富汗第六大援助國家。由一系列數據得知近年印度對阿富汗援助多不勝數,特別喺基建同農業都做出不可或缺嘅貢獻。筆者一路覺得印度一路都有個「印度夢」,喺文章開頭提到過,阿富汗自古以嚟已經係一個重要嘅戰略要地,如果印度可以成為阿富汗問題上面嘅其中一個重要棋子,就可以慢慢透過阿富汗去加強自身對中亞諸國嘅影響力。而家特朗普向莫迪伸出橄欖枝(請自行參考特朗普6月同莫迪會面詳情),兩國自然不謀而合。

•俄羅斯
-重返阿富汗?

俄國外拉夫洛夫(Alexander Nemenov/AFP/Getty Images)

筆者認為呢部分段落雖短,但值得關注。
近年,俄羅斯嘅對外政策都係非常高調,呢點喺敍利亞問題已經一清二楚。而俄羅斯對阿富汗近期衝突都係非常主動。事關外長拉夫洛夫已經宣佈阿富汗政府將喺9月4日同塔利班代表喺莫斯科舉行停火會談。

俄佬自蘇聯時期嗰次十年對阿戰爭失利後,基本上唔敢再干涉阿富汗事務,因為對重視榮譽嘅俄佬嚟講,阿富汗係一個活生生嘅恥辱,甚至係蘇聯喺90年代初解體嘅主因之一。

今次,俄羅斯咁主動去舉行會談,筆者驚訝之餘都覺得俄羅斯係希望一雪前恥,而且解決阿富汗問題,就可以透過中亞去打通同伊朗嘅連結,同時舉行會談又可以提升俄國嘅良好形象,何樂而不為?

總括而言,筆者相信阿富汗往後多年,都注定只會繼續作為一個代理人戰場,永無寧日係最貼切不過嘅形容詞。美國當下其實係想盡快抽身,所以必定會搵一啲區域大佬去幫手解決阿富汗問題。至於俄羅斯,都係嗰句,佢嘅擴張主義係好得人驚,幫得你阿富汗政府搞和談,肯定唔係「正義使者」咁簡單。

2018年9月1日 馬來西亞檳城

(文章純屬筆者意見,不代表癲狗日報立場。)

全民俾LIKE 人人「些牙」!

.