熟知本人都知道,本人對巫顯東出道初期的表現,基本上未講過一句好說話。雖然本人對一個見習騎師要求甚低,我只要求佢揸好繮繩,出閘暢順俾隻馬順走就可以了。不要要求見習生又要出閘四五位,快步速要點慢步速要點等等。不過巫顯東出道初期,很明顯係做唔到一個十磅仔所要求做到的事。當年巫顯東其實是比潘明輝早了半個馬季出道,當時如果同潘明輝比較,兩位騎師的騎功可以說是相距甚遠。

 

當年巫顯東初出道經常慢閘,俾佢出到閘又跑到D步速亂晒大籠,一係就前面放得太快搞到隻馬上晒口,一係就放得太慢俾人中段發力突襲。我成日同尤達師兄講,佢除咗淨係識得跑「育成寶貝」之外,其他馬佢根本就跑唔到,而且陣上又成日犯規,其中有一次谷草夜賽,巫顯東騎隻「超強快駒」,入直路「不小心」地危險策騎,強行切入郭能「辣得很」的跑線,當時的環境係郭能差唔多墮馬咁制,而且周圍都係馬,如果發生意外就算大難不死都半身殘廢。該場馬跑完之後,隔住個MON都聽到郭能對住沈集成FUCKFUCK聲。可想而知果個意外的嚴重性。

 

眾所周之,沈集成除了對佢身邊的人要求高之外,更重要佢係出名屌人屌得好勁的練馬師之一,我相信巫顯東入佢馬房,就算到今時今日,都可能係三日一小屌,五日一大屌的狀態。但屌還屌,沈集成係真係巫顯東大恩師,我不知道沈集成施了甚麼魔法,但明顯今時今日,巫顯東跑馬比以前完全不同,雖然不是殿堂級騎師,但最少在香港一定有競爭能力,今季「最驫」的兩場頭馬,就知巫顯東真的是大有進步,很明顯是在其師父百屌之下,才見到巫顯東有所進步。

 

更重要的是,上季尾巫顯東曾經試閘時墮馬,在養傷期間,沈集成對巫顯東指出,你的腳有事但你的腦袋應該沒有問題,當時潘頓和莫雷拉正為爭冠軍而打得火熱,因此要求巫顯東多看賽事影片,學習其他高手的騎功,並不要和賽馬運動脫節。結果今季養傷復出後,巫顯東果然耳目一新,騎功有所進步。當大家今年都在討論潘明輝幾時畢業的時候,請不要忘記巫顯東,他同樣有機會在今季畢業。

 

(鹵味男    29/9/2018)