「紅運戰士」剛剛在谷草贏出牠今季第二場頭馬,以其氣勢和評分很大機會在今年四歲系列賽佔一席位。而夏佳理雖然自「翠河」之後,一直都未能在香港再養出馬王,但他的「紅運」系近年成績絕對見得人,再加上和他關係密切的「都靈紅星」(牠是此駒的上手馬主),如果夏佳理全職做馬販,肯定年中搵唔少。

 

其實夏佳理自「翠河」之後,一直都搵唔到好馬來港服役,其中一匹好貴的名氣馬「李逵」,在阿根庭享負盛名,結果來到香港一棟都無。相信呢隻馬為夏主席帶來一個慘痛的教訓。有時失敗乃成功之母,經過一段長時間的失敗後,在2004年憑「駿河」才是再次贏一級賽,而其後的「超班」亦成績不俗。近年的「紅運」系雖然未達級際賽水準,但全部在三班交出頭馬,可以用獎金自已養自已。他未必係養最多馬王的賽駒,但養馬回報率絕對在香港數一數二。

 

有人說自「駿河」之後,夏佳理根本無心在香港贏大賽,他贏級際賽的賽駒「紅色禮物」、「紅翠」全部都係掛英國旗上陣。但有常識都知,以上兩駒在外國都是集中在2400米甚至3200米為最佳路程,這類馬來香港服役根本是浪費。夏主席深知香港的競賽環境,當然不會運類馬來香港。

 

特別是近年的「紅運」系,其實這些賽駒來香港之前,在歐洲只是參加普通賽事,剛剛香港評分夠七字頭來香港。焦土馬販成日同我講,呢類馬運來香港的價錢雖然唔貴,而且佢好多時都唔敢介紹呢D馬俾客人,因為北半球馬需要時間適應水土之外,如果無進步大多是四班馬左右。但大家唔好理,呢類馬在夏佳理手上保證三班有馬贏,而且有機會長期收獎金,隻馬可以自已養自已。呢類馬識得搵其實會受好多小本玩下的馬主的歡迎,香港馬圈唔係好多蕭百君、潘蘇通和郭少明可以用無限金錢搵馬。好明顯夏佳理十分了解香港馬圈,知道邊類歐洲馬可以在香港有一番功業,而且唔洗下下大洒金錢,小本經營都可以在香港做一個成功的馬主。更顯得夏佳理對香港賽馬的了解,可以說是在香港做馬主的樣版教科書。

 

(鹵味男   20/10/2018)