文/William Luk & 環球9up快線

俄羅斯同哈薩克、土耳其一樣都係地跨歐亞嘅大國,但後兩者只有一小塊領土喺歐陸邊緣,國力上亦只夠做區域大國。然而,俄羅斯就擁有一個同其歐陸本土緊密相連而綿延到白令海峽嘅亞洲大帝國,加上強大國力,令俄羅斯成為真正嘅歐亞帝國同世界強國。

今次,我哋帶大家由中亞嘅裏海東行到阿爾泰山脈,開始我哋呢個「影子競賽」系列嘅第三章:俄羅斯嘅遠東大博弈(上)。

由絕望中開拓出嚟嘅帝國傳奇:西伯利亞(Сиби́рь)

當葡萄牙、西班牙同荷蘭喺15世紀開展緊佢哋嘅大航海時代。另一邊廂,四面陸封嘅沙俄就喺令人絕望嘅冰天雪地中一步一腳印咁開拓出一個亞洲大帝國:西伯利亞。

位處莫斯科嘅聖巴斯里大教堂,正正係紀念伊凡四世滅喀山汗國,開始向遠東地區進發(William Luk攝)

1547年~1598年間,沙俄喺斯多羅加諾夫家族(Стро́гановы)同哥薩克(Казаки́)領袖易涅馬克·捷莫菲域治(Ерма́к Тимофе́евич)效力下攻滅咗喀山、阿斯特拉罕、西伯利亞等汗國;喺西伯利亞汗國後面嘅係組織更薄弱嘅西伯利亞各支土著民族,根本無力可檔。隨後半世紀,沙俄對佢哋使用貿易或徵戰方式,同時興建一系列東進據點、最終進抵北美洲。

1648年哥薩克探險家舍芒·伊雲奴域治·謝舒洛夫(Семён Ива́нович Дежнёв/Semyon Ivanovich Dezhnev)由也沽次克(Яку́тск/Yakutsk)出發到達北冰洋同白令海峽(Бе́рингов проли́в/Bering Strait)並建立亞拉迪涅(Ана́дырь/Anadyr)要塞,成為第一個航行經過白令海峽嘅歐洲人,比白令(Vitus Jonassen Bering/Ви́тус Ионассен Бе́ринг/Иван Иванович Бе́ринг)早近八十年。

1728年,白令到達迪奧米達群島(Острова́ Диоми́да/Острова Гво́здева),其中嘅大代奧米德島/勒切馬諾夫島(Остров Ратма́нова)係現時俄羅斯領土最東端;相鄰嘅小代奧米德島(Остров Крузенштерна)自1867年10月18日阿拉斯加主權移交後就成為美國領土,兩島之間既係俄美分界線亦係國際換日線,身處小代奧米德島就可以見到「聽日」嘅俄羅斯;1740年白令建立堪察加彼得羅巴甫洛夫斯克(Петропа́вловск-Камча́тский)作為東進北美嘅要塞,1741年到達「隊長群島(Командо́рские острова́)」。

最初嘅博弈對手:滿清以及日本

西伯利亞~阿拉斯加半島嘅冰天雪地確實令沙俄絕望,當地除咗規模有限嘅毛皮貿易之外幾乎無嘢發展倒;要尋求生機,俄人惟有行返以前啲遊牧民族嘅舊路:南下,而沙俄亦遇上最初嘅博弈對手:滿清、日本。

而喺謝舒洛夫進入白令海峽嘅同時,俄人亦開始進入阿穆涅河(Река Аму́р/黑龍江)同松花江(1643年~1689年)但被當地土著同兵力佔優嘅滿清擊敗;俄清兩國先後於1689年及1727年簽署《尼涅秦斯克條約(Не́рчинский договор/尼布楚條約)》同《加廷斯克條約(Кя́хтинский догово́р/恰克圖條約)》確立邊界及貿易關係。

1701年,哥薩克探險家華拉捷美涅·華斯里耶域治·亞切拉索夫(Влади́мир Васи́льевич Атла́сов)喺堪察加半島(Камча́тка)發現日本漂流民傳兵衛(日文:伝兵衛/でんべえ、俄文:Дэмбэй),彼得大帝安排佢留俄開辦日語學校教授日語;沙俄通過呢位俄國史上第一位日文老師得到大量日本資訊,並想發展對日貿易。

同時,沙俄為發展北太平洋貿易,喺1799年成立俄美公司(Россiйско-Американская компанiя),公司創辦人之一嘅尼古拉·彼得羅域治·歷莎諾夫(Никола́й Петро́вич Реза́нов)喺1802年~1805年間幾次向當時處於鎖國狀態嘅德川幕府爭取通商都唔成功,於是俄日自1805年十月起展開長達八年嘅武裝衝突;由於當時沙俄正忙於應付法國大革命以及拿破崙戰爭,最後俄日雙方停止衝突。

至此,沙俄嘅遠東擴張暫告一段落;雖然沙俄擴張受阻於日清兩國,但其實亦同時受歐陸或近東情勢牽制(對奧圖曼帝國、瑞典、法國嘅戰爭或瓜分波蘭);咁嘅格局一直影響俄羅斯嘅擴張取向。

帝國主義時代沙俄同日本嘅遠東大博弈

1840年英國打敗滿清奪取香港島,其後又發生太平天國同兩次英法聯軍之戰,暴露咗滿清「東亞病夫」疲態;加上克里米亞戰爭令沙俄喺近東同歐陸擴張受阻,面對眼前嘅「東亞病夫」更加要把握時機失之近東、收之遠東。

當時沙俄以調停為名「抽水」:逼滿清簽署《璦琿條約》、《中俄北京條約》,其中後者確立咗現代俄中邊界基本形態,並為沙俄取得其重要遠東基地:薩哈林島(Сахали́н/庫頁島)及符拉捷窩斯托克(Владивосто́к)。

「抽水」係俄羅斯對華外交傳統:1895年日清《馬關條約》後沙俄聯合德法幹預、1896年為邀功而簽訂《俄清密約》、1897年德國強租膠州灣後沙俄又以抗德為名強租關東州(Квантунская область,即今日旅順、大連)、八國聯軍時乘機佔領滿洲、二戰結束前出兵滿洲攻擊日本關東軍並將關東軍武器轉贈中共及拆遷當地工廠返蘇聯、其後就根據《中蘇友好同盟條約》重租旅順同大連。

203高地爭奪戰係日俄戰爭最為血腥嘅一場戰事

呢個階段沙俄對日政策同對清政策唔同;1875年俄日簽署《庫頁島千島群島交換條約》,規定薩哈林島歸沙俄、千島群島歸日本;日本喺「明治維新」後國力大增,日本唔再係弱勢嘅仿傚者或被侵略者而係強勢嘅侵略者同競爭者。

八國聯軍後,沙俄唔單只想獨霸滿洲,仲想柒指朝鮮半島;1902年,英日同盟成立以抗衡沙俄野心,呢係帝國主義時代首個歐美強權同有色人種國家之間嘅平等同盟;1904年俄日戰爭爆發,沙俄不單慘敗要割薩哈林島南半部、退出滿洲南部,而且全國(包括俄屬波蘭)大革命,革命之火一直燒到伊朗。

俄日戰爭結束咗帝國主義時代沙俄喺遠東嘅擴張,十年後嘅第一次世界大戰同紅白內戰(Гражданская война́ в Росси́и)更為日本清算沙俄喺滿洲北部嘅利益及進犯西伯利亞提供機會;喺蘇俄紅軍進入西伯利亞及美國持續施壓後,日本惟有退出西伯利亞。

第二次世界大戰同蘇俄遠東政策

雅爾達會議被認為係對遠東格局最為深遠嘅一次首腦會議

同帝國主義時代嘅沙俄一樣,二戰前後蘇俄遠東政策雖然都離唔開利益,但利益已經由反英為主變成應付日本為主(或對抗或妥協,講穿咗就係「買兩邊」) ,而利益之外又混合咗意識形態成份喺外交政策之內。

-「買兩邊」以維護自身利益:第一次世界大戰削弱咗歐洲列強喺遠東嘅支配力,日本成為亞太區新興霸權、威脅著美國主導嘅「華盛頓體系」;1933年日軍控制滿洲、希特拉統治德國並揚言消滅蘇俄,蘇俄不得不對日本既牽制又妥協以免遭德日夾擊。

  • 1. 承認滿洲國並出售中東鐵路(Китайско-Восточная железная дорога):1929年蘇俄因為「中東路衝突(Конфликт на Китайско-Восточной железной дороге/Дальневосточный конфликт)」而同中華民國斷交;1932年雙方又為牽制日本擴張復交,但為咗維持鐵路特權蘇俄又同日本嘅附庸滿洲國建交;1933年至1935年間日軍控制滿洲後,蘇俄為免同日本衝突就將鐵路賣比滿洲國。

  • 2. 援華抗日:1937年中國正式對日抗戰,當時蘇俄外長李維諾夫(Макси́м Макси́мович Литви́нов)係國際聯盟信徒、反對侵略;當年八月蘇中兩國簽署互不侵犯條約,蘇俄對華輸出石油、飛機並派出志願軍同飛行員助戰;同時作為國聯理事國喺國聯布魯塞爾大會上痛斥日本侵略。

  • 3. 蘇日邊境衝突(1937年—1939年):早喺1937年蘇日兩軍已經開始喺俄屬遠東邊界上發生軍事衝突,到1938年及1939年先後喺哈桑湖(Хасан,位於張鼓峰東側)同夏牽河(Халхи́н-Гол,河以西為諾門罕)爆發大規模戰鬥;最後蘇軍擊敗日軍,得以集中精力為歐陸戰場早作準備。

  • 4. 《蘇日中立條約》(Пакт о нейтралитете между СССР и Японией 1941年):由於日本決定改為南進奪取南洋天然資源而蘇俄亦想集中力量迎戰德國,兩國就簽署中立條約而蘇俄亦唔再援華抗日;1939年5月,蘇俄外長已經由和平至上嘅李維諾夫換成實利優先嘅莫洛托夫(Вячесла́в Миха́йлович Мо́лотов),蘇俄外交亦重返唯利是圖、抽水嘅舊路。

-俄式共產外交:蘇俄係共產主義國家,外交政策深受馬克思學說影響;一方面宣稱反對帝國主義、殖民主義,另方面成立共產國際(Коммунистический интернационал/Коминтерн/第三國際/Третий интернационал)扶植各國共產黨、滲透顛覆各國封建主義或資本主義政權。

  • 1. 所謂嘅反帝、反殖:蘇俄一再聲明放棄帝國主義時代沙俄喺鄰國嘅殖民特權,當然事實就無咁理想;例如東清鐵路問題原本喺1924年嘅《中蘇解決懸案大綱協定》以兩國共同持有資產形式解決;但1929年又為咗鐵路特權而同中華民國發生「中東路衝突」,事後蘇俄全取鐵路所有權同營運權。

  • 2.共產國際對日本嘅顛覆滲透:共產國際對中華民國同東南亞嘅顛覆滲透相信唔少香港朋友都略知一二,但共產國際對日本嘅顛覆滲透喺香港就少人問津;當年臺灣仲係日本殖民地、臺灣共產黨(『日本共產黨台灣民族支部』)由日本共產黨指導;1928年3月15日,日共嘅重要領導人被捕,臺共改由中共指導,臺共黨綱包括臺灣民族獨立建國,所以今日中共意淫臺灣都真係自打咀巴。

  • 3. 支持蒙古獨立:1921年俄羅斯紅白內戰(Гражданская война́ в Росси́и)時,蘇俄紅軍喺蒙古境內擊潰其中一支白軍;是年11月25日建立咗君主立憲嘅大蒙古國;1924年又改為蒙古人民共和國,實行共產主義;1945年10月20日蒙古進行獨立公投;1946年同1949年,中華民國同中華人民共和國先後承認蒙古獨立。

冷戰~廿一世紀嘅今日:中華人民共和國成立

第二次世界大戰改變咗十九世紀中葉以嚟嘅遠東格局:西歐帝國主義力量退出導致遠東造就咗一批新嘅博弈者(例如印度、越南、印尼)出現。而日本亦由日俄戰爭開始喺遠東近乎獨當一面變成美國保護國、美國勢力進入朝鮮半島。

而最重要當然就係中華人民共和國成立新中國以大國身份喺世界範圍四處擴張,已經成為俄羅斯喺遠東最大威脅。

下一篇「俄羅斯嘅遠東大博弈(下)」,我哋探討俄羅斯點樣面對呢啲新挑戰。

(文章純屬筆者意見,唔代表癲狗日報立場。)

全民俾LIKE 人人「些牙」!

.