文/William Luk

目前,世界上有一啲政治實體係事實上嘅主權國家,但由於唔同因素,佢哋普遍冇畀國際社會承認,呢堆政體畀人叫做有限應承認國家(states with limited recognition)。

當中最近香港嘅就係唔夠一千公里嘅中華民國(臺灣)。而呢堆有限承認國家其實都大致上都符合1933年喺烏拉圭簽訂嘅《蒙特維多國家權利義務公約》入面有關主權國家嘅定義,係具有作為一個主權國家嘅基本條件,例如常規人口、固有領土、有效政府以及同其他國家進行外交。而佢哋之所以有個咁尷尬嘅處境,都係基於佢哋唔係聯合國成員國,者係只得少數或者冇被任何國家承認。

呢啲具有國家政權性質嘅政治實體通常都係因為內戰等原因令到佢哋由原國家衍生出嚟,中華民國(臺灣)就係一個好例子。而其中有啲政權係另一國家嘅保護國,受到呢個國家嘅軍事保護及非正式外交承認,從而防止該政治實體被其母國消滅。另外一啲就已經完全在地化、發展出自己嘅軍隊、喺國際上同部份國家建交。

今日筆者唔講臺灣,反而想用一半分析,一半旅遊嘅角度去講下一個無咩香港人熟悉嘅東歐有限應承認國家,佢叫做德涅斯特河沿岸摩爾達維亞共和國(俄文:Приднестровская Молдавская Республика)。

大家明白點解筆者一開始會話呢個世界仲有蘇聯未?

•簡介

德涅斯特河沿岸摩爾達維亞共和國(Pridnestrovian Moldavian Republic ,簡稱「德河沿岸」/Transnistria)。1990年9月2日,「德河沿岸」喺蘇聯解體前,喺當時摩爾達維亞蘇維埃社會主義共和國東部嘅德涅斯特河沿岸自行宣布獨立。原因不外乎人種(主要係俄羅斯族、烏克蘭族同埋保加利亞族)、語言(斯拉夫VS拉亢)、文化、經濟(當時「德河沿岸」係發達到不得了)等因素,令到當地人唔希望加入摩爾多瓦,導致雙方喺1992年爆發咗一場名為「德涅斯特河沿岸戰爭」。最後,「德河沿岸」喺俄羅斯嘅支持下贏得呢場戰爭,並且由俄羅斯派駐維和部隊穩定當地局勢。

時至今日,雖然國際上公認「德河沿岸」係摩爾多瓦嘅一部分,但佢實際上已經成為一個獨立嘅共和國政體,已經有自己嘅首都、國旗、邊境、貨幣、護照。而由於長時間受到國際封鎖,令到當地好多嘢都發展緩慢,導致好多嘢都保留喺蘇聯時期。另外,正正因為「德河沿岸」嘅「特殊地位」同埋國際封鎖,呢度已經成為咗歐洲嘅洗錢天堂、人口販賣同埋走私軍火嘅地方。

•戰略地位

大家留意下德岸身處嘅位置,同時增加烏克蘭同摩爾多瓦邊境安全壓力

筆者一路覺得,前蘇聯主體俄羅斯喺冷戰後期遺低嘅一系列「蘇州屎」,喺目前「後冷戰時期」嘅國際秩序中期逐步爆發開嚟。所謂嘅「蘇州屎」就係俄裔人口,早喺2008年就已經喺高加索搞到佐治亞雞犬不寧。呢班俄裔人口遍佈所有前蘇聯加盟國,包括立陶宛、烏克蘭、摩爾多瓦、愛沙尼亞、拉脫維亞等。而佢哋喺近年嘅烏克蘭東部衝突同埋烏克蘭克里米亞公投嘅「積極參與」就係最好嘅「蘇州屎」例子之二。

筆者認為,自從2014年烏克蘭革命之後,「德河沿岸」對於北約、俄羅斯、烏克蘭同埋摩爾多瓦嚟講絕對係「東歐版荊州」。因為邊個掌握佢,就可以造成另外3方嘅強大壓力。首先,對於北約而言,「德河沿岸」當地俄羅斯維和部隊無礙對於以羅馬尼亞為代表嘅北約嚟講係如鯁在喉,一但無咗「德河沿岸」可以大大舒緩北約嘅壓力,順便可以吸納摩爾多瓦「歸邊」。其次,對摩爾多瓦而言,呢個關係到上世紀90年代自前蘇聯獨立之後嘅領土完整問題,希望用呢個方法去抗衡一班主張「大羅馬尼亞主義」人士,強調摩爾多瓦係同羅馬尼亞有區別。此外,烏克蘭好希望解決到呢度嘅俄羅斯維和部隊,以便集中兵力放喺烏克蘭東部。最後,俄羅斯希望利用呢嚿「蘇州屎」繼續喺度搞屎棍,作為牽製作用,因為俄羅斯借住維和部隊名義必定喺度佈置大量武器同軍人,而俄佬清楚知道永久失去烏克蘭呢個盟友之後,更加要善用呢個地方作為對抗北約嘅屏障,同時又可以令到摩爾多瓦唔可以過份親歐,又可以迫使烏克蘭調動軍隊去守住西南邊境,從而減輕克里米亞北部嘅國防壓力。

而喺2014年烏克蘭革命期間,當時「德河沿岸」曾經希望仿傚烏克蘭東部加入成為俄羅斯聯邦一部分,但呢個舉動無礙會令鄰近烏克蘭城市奧迪莎(Odessa)嘅親俄分子變本加厲。所以迫到烏克蘭增派大量軍隊到當地邊境,並且講明「德河沿岸」只要一入俄就揮軍直入。最終事件不了了之,因為俄羅斯喺度就係用緊「唔獨、唔統、唔武」嘅方針,佢純粹利用呢度造成筆者喺上面提到嘅願景。

筆者認為當前呢個地方絕對係箭在弦上。因為摩爾多瓦聯同烏克蘭、佐治亞、羅馬尼亞同埋波羅的海三國喺2018年俄羅斯世界盃決賽週期間,喺聯合國大會發起一份要求俄羅斯喺「德河沿岸」撤軍嘅草案,已經見到一班前蘇聯國家就呢個問題上面,槍頭一致對準俄羅斯。
另外,筆者喺早幾年親身體驗過烏克蘭對呢度有幾咁緊張,當時筆者同另外兩個友人喺摩爾多瓦首都基施紐(Chinisau)坐火車經「德河沿岸」到烏克蘭奧迪莎。而烏克蘭邊防軍喺接壤「德河沿岸」嘅邊境佈置大量持搶軍人同裝甲車,有幾位邊防軍上火車係帶埋軍犬仔細搜查。原因好簡單,就係怕俄羅斯利用「德河沿岸」對烏克蘭南部進行滲透。當時筆者同另外2個友人(全部亞裔樣,其中1人手持BC、另外2人BNO)、甚至同車嘅日本人,都畀軍人喺歐盟觀察員幫手翻譯嘅情況下問咗幾分鐘嘢先至扔入境印。
相反,摩爾多瓦就冇咁在意,連出境手續都冇。所以大家如果經呢度出入境,係一定唔會有摩爾多瓦出入境印。如果你係坐火車經呢度入境,去到首都基施紐一定要去當地移民局註冊,如果唔係隨時當你非法入境。反之,你離境就冇咩所謂,筆者最後係坐返火車返基施紐坐飛機去莫斯科,喺摩爾多瓦離境嗰時,個IO見到我烏克蘭出境印就問都無問就直接扔離境印畀我,結果造就我本護照啲出入日期好唔對路。

•筆者所見所聞

你只要喺中央車站不斷同人講TIRASPOL,自然有人話你知架巴士喺邊(William Luk攝)

筆者曾經喺2015年到訪摩爾多瓦嗰時,順便抽咗一日時間去拜訪呢個現存嘅蘇聯國度-「德河沿岸」。當時想去嘅原因係發覺摩爾多瓦根本無咩好行,筆者都係夜晚喺Hostel用手機上網先知有呢個地方存在。當時喺首都基施紐中央市場隔離個巴士站搵咗半個鐘先上到呢架開去「德河沿岸」首府提拉斯堡嘅蘇聯式大巴。

喺度要提提大家,巴士上面係冇冷氣同風扇。當時筆者係8月去,烈日當空,喺巴士入面係焗到大脾出曬汗,巴士全程都只係靠行駛嘅速度去引啲風入嚟車廂,可謂十分「環保」。當筆者上咗呢架蘇聯式大巴個零鐘頭之後,架巴士就會嚟到「德河沿岸」邊境。呢個時侯你會見到幾道鐵絲網同埋裝甲車,但其實仲未到首府提拉斯堡(英文:Tiraspol;俄文:Тирасполь),巴士會喺前面一個類似收費站嘅物體面前停低。

巴士開到「德河沿岸」入口就會停低,畀外入行入隔離個屋仔度做入境檢查,呢度要帶備Passport (William Luk攝)

呢個時侯司機會講一大堆俄文,意思係叫外國人落車(筆者心諗有幾多外人識聽俄文?),行去收費站隔離個屋仔,入面係一個入境檢查站。個IO根本唔識英文,我就係用好簡單嘅俄文話один(1)再搭一大堆да,да,да,да!(係呀!係呀!係呀!),跟住個IO反埋白眼唔知我講咩就SCAN我本PASSPORT再連埋張入境紙畀返我。

緊記!請一定要Keep住呢張入境紙,因為離境嗰時會有專人上車收返。另外,一但你逗留超過24個鐘,要到當地差館註冊

大巴喺進入「德河沿岸」之後,會先停一個叫做BENDER嘅城市,之後先再會開到終點站-首府提拉斯堡嘅火車站前面。

-當地貨幣只限收藏一但離境一文不值

呢堆盧布今日筆者擺咗喺屋企床下底(William Luk攝)

筆者喺到埗之後第一件事,係走到火車站前面嘅找換店去換當地德涅斯特盧布。佢同蘇聯時期嘅貨幣制度同埋圖案設計非常相似,你都會見到有鐮刀呢類「共產嘢」作為主要設計。而呢款盧布一離開「德河沿岸」就即刻變成廢紙,全世界無一間找換店會同你換呢個外幣。所以,呢款盧布喺我哋呢啲遊客眼中只係一種收藏品。

或者有人會問筆者「點解臺幣又唔見咁嘅?」筆者只想講「德河沿岸」問題嘅背景同複雜性,遠比臺灣複雜得多。臺灣至少無喺國際上面完全畀人孤立,原因之一係背後有《美臺關係法》撐腰,加埋良好嘅國際形象,令佢可以一路生存落去。相反,「德河沿岸」嘅背後係俄羅斯,受到嘅待遇自然唔同。而且,前者至少仲有17個聯合國成員國承認,後者係一個都無。

蘇聯風格隨處可見陀地友善中情烈烈

蘇聯解體之後,大家知道部份前蘇聯國家都使用咗西歐國家體制,而「德河沿岸」係唯一仍然保留蘇聯嘅鐮刀同錘仔國旗,就連軍隊體制同製服都沿用住蘇聯軍隊。呢點係任何前蘇聯國家都力不能及,甚至連俄羅斯自己都已經放棄咗呢點。雖然我哋由地理位置上面睇,呢嚿狹長嘅「德河沿岸」喺地球入面只係「丁屎咁大」,但呢度絕對係蘇聯解體之後保留到蘇聯痕跡最多嘅國家。

位處提拉斯堡國會同政府大樓外嘅一庭列寧像,列寧自己又點估到今日得返一個國家仲會當佢係神(William Luk攝)

蘇聯解體嘅時侯,筆者仲未出世。所以對於蘇聯都只可以喺歷史書、紀錄片度感受。正如上掣所講,「德河沿岸」喺被外界形容為一個世上碩果僅存嘅蘇聯,自然吸引到筆者呢類「小朋友」慕名而來感受一下咩叫蘇聯。

但老實講,首都提拉斯堡真係冇咩好行,甚至對好多人嚟講係悶到抽筋。但筆者認為提拉斯堡一堆蘇聯式建築已經令我睇到流曬口水。而且,你唔會遇到喺遊客區嗰啲搵你笨嘅情況,喺呢度你鐘意行去邊就行去邊,基本上冇人煩你。另外,筆者係一個專崇地緣政治嘅人,嚟到呢度實地走一轉亦都令到筆者可以更加明白目前東歐嘅局勢背後嘅歷史同埋「德河沿岸」喺呢一個區域嘅重要性。

左邊係獨聯體旗、中間係「德河沿岸」國旗、右邊係俄羅斯國旗,可以見到「德河沿岸」有幾咁大俄羅斯主義(William Luk攝)

有人會問筆者,點解「德河沿岸」長年唔被外界承認,但一路都唔被人搞?

好簡單,因為筆者發現呢度掌握住摩爾多瓦嘅命脈-電力。由於上世紀「德河沿岸」係蘇聯航天業嘅重要基地,當時幫蘇聯喺西南部嘅航天業提供電力能源供應,導致超過8成嘅摩爾多瓦電力設備都放咗喺「德河沿岸」。而今日,只要摩爾多瓦唔聽話,我就停你電。呢個同俄佬面對歐盟制裁嘅應對做法同出一轍-天然氣。

唔好睇少「德河沿岸」,圖中呢個女仔識得講國語、英文、俄文、羅馬尼亞文(Diana & William Luk攝)

另外,呢度嘅人基本上都係「外國勢力」,由於「德河沿岸」護照唔受國際承認,所以每個國民都會有雙重、三重、甚至四重國籍。例如,歐盟、烏克蘭、俄羅斯、白羅斯、以色列、摩爾多瓦等…….所以筆者覺得香港真係「小兒科」。

最後,可能有人會擔心呢啲國家無王管。其實喺近年,「德河沿岸」為咗建立自身形象,已經比以往清廉好多,唔會再有官員喺你出入境問你拎錢。而當地人其實都好非常友善,雖然講俄文,但啲格絕對唔係俄羅斯人。所以,絕對可以放心去嗰度行下。仲有,記得買支白蘭地,又平又好飲。

 

當地旅遊資訊

簽證:任何摩爾多瓦免簽國家都可免簽證進入;若持有摩爾多瓦有效簽證亦可以用呢個簽證入境

交通:由摩爾多瓦首都基施紐坐巴士或者火車

語言:俄羅斯文同羅馬尼亞文都會通用

 

參考資料:

  1. “State”, pp. 512–3 in  Penguin Dictionary of International Relations.  Evans, Graham & Newnham, Jeffrey. 1998. ( ISBN 0-14-051397-3 ). London: Penguin Books Ltd.

(文章純屬筆者意見,唔代表癲狗日報立場。)

全民俾LIKE 人人「些牙」!

.