“Ladies & Gentlemen, We’re approaching Kathmandu where the local time is 13:30. At this stage you should be in your seat with your seatbelt firmly………”

喜馬拉雅山脈 (William Luk攝)

隨住呢段機長廣播,瞓到隻豬咁嘅我終於伸個懶腰再掹大對眼,一打開隔離個窗,映入眼簾嘅係喜馬拉雅山山脈,令筆者知道自己已經置身喺加德滿都盆地之中。

加德滿都機場位處市區,周圍又多山,降落同啟德有得flight (William Luk攝)

呼!!!!筆者終於嚟到嚮往已久嘅南亞。南亞初嚟報到:「高山王國」-尼泊爾

其實早喺入U早期,筆者就一直計劃嚟個南亞遊。但奈何各種因素令筆者一直都無時間去。
最終,筆者下定決心喺呢2年Gap year畀3個月自己慢慢探索南亞。而且揀12月出發絕對係要避開雨季。

但而家有好多嘢想睇都無得睇,因為尼泊爾喺2015年發生過一次大地震,當時有「山中天堂」之稱嘅首都加德滿都(Kathmandu)係重災區之一。

查實,今次飛尼泊爾可謂一波三折。事關筆者係經泰國曼谷轉機再到尼泊爾加德滿都。如果計飛行時間就已經用咗大約6個半鐘。再加埋喺泰國啲時間,筆者前前後後用咗幾日時間先嚟到尼泊爾。
有人可能會喺度問筆者,點解你要咁傻勁要先喺泰國轉機再飛過嚟尼泊爾。
因為,香港飛尼泊爾得國泰直航,貴都算(單程成$3500-5700),到埗時間成夜晚十點,一delay分分鐘真係喺個機場成個傻仔咁。
而且,筆者對國泰不嬲無好感。
另外,筆者習慣坐飛機都有咁早得咁早。因為唔想再發生一次喺土耳其嘅意外(2016年筆者喺伊斯坦堡坐飛機走嗰日就發生咗恐襲)。
所以,筆者就選擇咗一個比香港直航平7成,而又可以日光日白到埗嘅方案*。順便喺去南亞打大佬之前,留喺泰國叉返幾日電,主要目的係喺泰國買晒所有藥用品(平過香港好多)。

*以下係筆者飛尼泊爾嘅機票 (已計稅並以港紙計算)
澳門-曼谷 $171.3
曼谷-加德滿都 $1256

有人會問筆者點解飛南亞嘅機票咁貴。筆者認為地理係原因之一。因為北面西藏落嚟又多山、南接波濤洶湧嘅印度洋、東接緬甸邊境無咩人敢過、西面係全世界最危險之一嘅阿富汗。
所以,一張跨區嘅直航單程機票往往可以去到超過$2000一張。
但如果你好彩,可以搵到喺廉航度搵到$800-1200左右嘅價位。
因此,筆者推薦各位可以揀喺泰國或者馬來西亞轉機以減低交通成本。

•尼泊爾簡介

國歌  《尼泊爾王國國歌》

國花  杜鵑花

國獸  黃牛

面積  147181平方千米。

人口  1985萬(1992年)。

民族  超過30個

宗教 : 有大約88%信奉印度教,其他信奉佛教同埋伊斯蘭教。

語言 : 尼泊爾話 大部分旅客區通用英文

首都 : 加德滿都

貨幣 : 尼泊爾盧比

尼泊爾,之前叫做尼泊爾王國(Kingdom of Nepal )。佢以前都係英國殖民地。而家嘅正式國名係尼泊爾聯邦民主共和國(Federal Democratic Republic of Nepal)。以往嘅沙阿王朝(Kingdom of Gorkha)統治咗尼泊爾超過二百年。但因為十幾年前經歷一系列政變事件,最終喺2008年畀人推翻。同時令到南亞而家得返不丹仲有國王嘅存在。

時至今日,外界一致認為2001年由親美國印度以及親中國嘅王室成員之間嘅一次鬥爭所引發嘅王室槍擊事件係導致王室喺2008年畀人推翻嘅導火線。

筆者深信香港人一定聽過尼泊爾呢個國家,甚至身邊都可能有啲尼泊爾朋友。但好多人都唔知尼泊爾喺邊。
其實,尼泊爾係一個喺東亞同南亞地緣政治嘅緩衝區,因為佢位於中國同印度之間。而尼泊爾嘅國名喺尼泊爾話入面正正係等於位處中間嘅國家。

-地緣政治

呢度有人會問筆者點解尼泊爾會揀加德滿都作為首都。
呢點除咗歸究於上面提到夾喺中印兩國之間以外,歷史因素以及地理環境都係關鍵因素。
首先,10世紀已經有第一個以尼泊爾人為主嘅政體喺度定都。
其次,加德滿都嘅海拔高(約莫1350米),加上三面環山,有一個良好天然屏障。
另外,呢度同中印邊境距離均等,唔會過份傾斜任何一方。

此外,尼泊爾嘅時區,喺世界時區嚟講都係非常盞鬼。
大家都知時區一般都係整數上或者搭半,例如香港係GMT+8、日本係GMT+9、印度係GMT+5:30等等。
但尼泊爾係全世界上唯一採用GMT+5:45嘅國家,比起印度嘅GMT+5:30,仲要快3個字。而最好笑係一但你經尼泊爾走上西藏,個時間一下子快差唔多3個鐘。
筆者一路諗緊嗰15分鐘到底想點呢?其實呢點有一定程度上嘅政治考慮。
由於,尼泊爾喺國際上畀人認為佢係印度嘅細佬,所以希望盡可能喺唔同層面上同印度作個區分。

•入境經過

飛機係用硬着陸方式降落,而且筆者今之坐喺機轆上面十所以着陸嗰一下筆者個心係離一離。點都好,筆者最終都係安全嚟到尼泊爾。而呢個南亞小國係筆者到埗過嘅第62個國家。

但係筆者一落機,基本上係目瞪口呆。

加德滿都機場係尼泊爾唯一國際機場

點解? 首先,加德滿都機場係一個舊式機場,亦都係尼國唯一一個國際機場。佢係冇任何登機橋設施。所以,一離開個機艙係一定要行條樓梯。而同香港機場唔同嘅係,落機之後唔洗坐巴士,而係直接用行路方式穿過一條大路,行入機場客運大樓。(2014年筆者曾經去過緬甸曼德勒,同樣要徒步方式行去入境大堂)

筆者嚟到入境大樓之後都仲未可以即時入境住。事關筆者無事先申請簽證(香港其實可以去領事館申請,但其實無咩分別,仲要等兩日),所以要去搞落地簽證(Visa on arrival)
除咗印度之外,基本上所有國家去尼泊爾都要簽證。
但有啲國家係可以免簽證費,包括中華人民共和國公民(港澳特區護照者都有份)。

呢部機其實好難掀

首先筆者就急急填好入境表格(Arrival Card),然後就見到隔離有遊客用一部機去填落地簽證機器,於是筆者就螢幕上輸入資料,以香港人嘅速度喺3分鐘以內入晒所有資料。
資料主要分4部分:
1.護照資料
2.尼泊爾住址
3.簽證逗留時間(分1日轉機、15日、30日以及90日)
4.影相

填好資料就會出呢張收據 (William Luk攝)

當填好所有資料之後,部機會出張白色收據畀你。

拎白色收據Passport交去隔離櫃檯 (William Luk攝)

再拎住呢張紙仔連埋護照行去隔離畀錢,收錢嗰位人兄會畀返兩張收據你,一張綠同一張黃(記住唔好扔綠色!入境要用!)。

當一切準備就緒,筆者就行去幾步之隔嘅入境大廳。
緊記!要將護照連同入境卡、去程機票、白色收據、簽證費綠色收據交畀入境官員。

機場入境櫃位只有5-6個係畀外國人用,另外就有一半畀印度同尼泊爾公民用,因為印度公民去尼泊爾等同歐盟成員國自由流動。
而外國人條龍其實唔長,但處理速度極慢。另外,尼泊爾已經將中國公民(包括港澳特區護照)免費落地簽證條隊分開咗,而嗰度得2條,條龍仲長過外國人。
等呀等,等呀等…..筆者都唔知聽咗幾多首音樂,望望個錶都起碼等咗差唔多廿分鐘,終於到筆者入境。筆者算好彩,因為目測隔離條隊前面有個埃塞阿比亞人(少數尼泊爾要求提前申請簽證入境國家),搞成20分鐘都未畀佢過,搞到啲龍塞上加塞。

坦白講,筆者喺一啲發展中國家出入境都會好小心翼翼。因為真係唔知啲I.O想喺你身上攞啲咩着數。
以柬埔寨為例,筆者親眼見過啲入境官員(I.O)見有中國國名嘅護照(中華民國都照食)就問你拎tips(2蚊美金)。甚至有啲西方國家護照都會照問不誤。
但筆者有理無理,將Passport、入境卡同埋白色以及綠色收據交畀個I.O,之後筆者最擔心嘅事終於發生。

I.O:Where are you from?
我:Hong Kong
I.O:How…..you……….get …..this passport? (佢啲英文無 grammer)
我:Well, I was born in British Hong Kong before the handover in 1997.
佢諗咗一諗再點點頭:oh!okay! You first time Nepal?
我點一點頭: Aye!

尼泊爾入境印

最後搞咗成幾分鐘,終於聽到兩下響到爆嘅chop印聲,標誌住筆者嘅南亞之旅正式開始。至於有人問筆者,加德滿都機場點出市區到市區,出市區嘅唯一交通就係的士,同埋大家要緊記,千奇唔好畀司機以後
外嘅人幫你拎行李,因為要畀tips。下篇文章將會介紹一下加德滿都嘅歷史人文。

2018年12月15號 尼泊爾 加德滿都