山齊士與小將格連活特(Mason Greenwood)喺操練時因為攔截問題爆發衝突
喺美洲盃有出色表現但大脾受傷嘅曼聯智利球星山齊士(Alexis Sánchez),早前終於傷癒復出重投訓練。不過,根據英國《太陽報》嘅報道,傳出山神同隊中新仔格連活特(Mason Greenwood)喺操練時因為攔截問題爆發衝突。而曼聯希望喺8月轉會窗關閉前將佢外借出去,如果唔係就扔佢落B隊。
「山神」會唔會留隊好大程度上要睇領隊蘇斯克查 (BBC)
而根據《天空體育》(Sky Sports)最新消息,意甲首都球會羅馬有意由曼聯手上租借山齊士,但大前提係曼聯需要係呢一季承擔佢大部分嘅人工(山神目前週薪係50萬英鎊)。
山神上季飽受傷患困擾 (Getty Images)
現年30歲嘅山齊士喺2018年1月冬季轉會窗期間由阿仙奴加盟曼聯。不過,對比「山神」喺阿仙奴嘅表現,佢一直被外界認為喺曼聯冇踢出應有嘅水準。上季飽受傷患以及紀律問題嘅「山神」只係代表紅魔喺各項賽事上陣27場,得2個入波同4次助攻。