德甲班霸拜仁慕尼黑喺今季嘅開「咧」戰只能2:2逼和首都球會哈化柏林。由於成場比賽前場欠缺攻力,拜仁喺和波之後隨即向同樣開「咧」戰失分嘅西甲巴塞隆拿借用巴西進攻球員菲臘比‧古天奴(Philippe Coutinho)。

古仔外借德甲拜仁,係少數踢晒歐洲四大聯賽嘅當打球員(bein sports)

根據德國《踢球者》(kicker Sportmagazin)消息,西甲巴塞隆拿同德甲拜仁慕尼黑已經達成一份協議,巴塞將陣中巴西球員古天奴外借到呢支德國巴伐利亞班霸1年,更提供優先購買。呢位27歲嘅巴西中場喺2018年1月由利物浦加盟巴塞隆拿以嚟,表現同喺利記差天共地,更有傳同球隊核心美斯(Lionel Messi)不和。上季古天奴喺各項賽事為巴塞上陣54場、攻入11球同埋5次助攻。值得一提,噚晚巴塞作客畢爾包,古天奴現身喺球場VIP區域。

拜仁門將紐亞(右)係拜仁全球最低評分(DW)

講返拜仁同哈化柏林嘅開「咧」戰,拜仁喺開賽初段非常積極,上半場24分鐘波蘭前鋒利雲度夫斯基門前剷射幫拜仁先開紀錄。而呢個入波都係佢連續第5個德甲球季喺開「咧」戰入波,成為德甲史上第一人。不過,哈化之後憑住比利時前鋒盧克巴基奧(Lukebakio)同埋利物浦借將馬高‧古積(Marko Grujić)嘅入球,喺完半場前爆冷反超前拜仁2:1。直到下半場58分鐘,拜仁再由利雲度夫斯基博得12碼,VAR確定古積將佢喺禁區拉跌,利雲親自操刀,幫拜仁追和2:2。雖然拜仁積極進攻,但始終單靠利雲欠缺攻力,最終維持比數2:2完場,呢場都係拜仁8年嚟首次開「咧」戰未能贏波。

【西甲】美斯缺席哨牙蘇受傷 巴塞隆拿客負畢爾包

This image has an empty alt attribute; its file name is givelike.jpg
This image has an empty alt attribute; its file name is md-ball.jpg