香港時間8月24號22:00(英國當地時間15:00),2019/20賽季英超第3輪賽事之一喺奧脫福球場展開,由曼聯主場迎戰水晶宮。最終,「紅魔」爆冷1比2不敵水晶宮,令水晶宮接近30年嚟聯賽首贏「紅魔」。

阿休幫助水晶宮創造歴史(GETTY IMAGES)

領隊蘇斯克查(Ole Gunnar Solskjær)仍然排出上輪打和狼隊嘅正選陣容。坐擁主場之利嘅曼聯開賽初段已經完全控制比賽。但水晶宮喺上半場第32分鐘先開紀錄,門將古亞爾達(Vicente Guaita)大腳開波,舒立普(Jeffrey Schlupp)同連迪路夫(Victor Lindelöf)爭頂時搶到落點前頂,阿休(Jordon Ayew)喺禁區邊單刀低射破網,水晶宮以1:0返番更衣室。

「福仔」十二碼宴客(Getty)

曼聯下半場不斷加強攻勢,但去到第70分鐘錯失良機。當時馬舒亞(Martial)背對禁區停波,後出接應嘅中場麥湯文尼(Scott McTominay)突入禁區右側畀米列禾積域(Luka Milivojević)踢跌,「福仔」拉舒福特(Rashford)主射12碼竟然擊中左側柱後再滑門而過,曼聯繼上場對狼隊之後再度射失十二碼。
曼聯要去到完場前一刻先扳平比數,第89分鐘馬舒亞同拉舒福特撞牆配合後傳波,由占士(Daniel James)喺15碼處一記弧線球射入右上角,追成1:1。

雲安賀治成為水晶宮英雄 (Image)

但水晶宮喺第93分鐘上演絕殺,普巴(Paul Pogba)中場失波,水昌宮快速反擊,倒戈相向嘅象牙海岸前鋒沙夏(Wilfried Zaha)切入禁區左側受阻,隔離嘅荷蘭籍左閘雲安賀治(Patrick van Aanholt)禁區左側10碼射近角波畀門將迪基亞(David de Gea)撲到後再偏轉入網,最終以2-1完場。

普巴近兩場表現絕對激死人 (AFP OR LICENSORS)

呢場對於一眾曼聯迷嚟講係不能接受,是關今場係「紅魔」喺近30年英格蘭頂級聯賽以嚟,首次喺主場輸畀水晶宮,中場創造力欠佳,上場射入關鍵十二碼嘅普巴又冇料到之餘輸第二球就係佢喺中場帶失波。賽後梳爾(Luke Shaw)同馬舒亞齊齊受傷,個個以為開咧大炒車仔今季會有好開始,領隊蘇斯克查有排頭痕。