新一季嘅歐聯分組賽將會喺天日凌晨(9月18號)展開首輪小組賽,首輪焦點係F組嘅多蒙特喺主場西法倫球場大戰巴塞隆拿。「蜜蜂兵團」喺在最近六場比賽5勝1負,而巴塞喺最近四場比賽中拎到2勝1和1負嘅成績,雙方季初狀態唔錯,今晚必然上演連番好戲。雖然巴塞歐聯首戰就要作客德國惡鬥「蜜蜂兵團」多蒙特,但教練華維迪(Ernesto Valverde)已經確認受傷嘅兩大王牌美斯(Lionel Messi)以及蘇亞雷斯(Luis Suárez)經已復操,但會喺開賽前先決定係咪比佢哋一同正選上陣。

多仔近況:前場火力猛 後防有傷兵

辛祖將會係多蒙特前場保證 (Getty Images)

 

季初嘅多蒙特3勝1負入13球失5球,暫時排喺聯賽第二位,防守專注力欠佳。而「蜜鋒兵團」喺上星期六嘅德甲聯賽主場4比0大勝利華古遜,喺各項賽事入面拎到兩連勝之餘,亦都係「蜜鋒兵團」今季首次零封對手,可見球隊嘅防守專注度開始有改善。多蒙特前場火力不嬲係保證,只係今場先有主力左閘尼高·舒侯斯(Nico Schulz)因傷缺陣,右閘比薛斯基(Łukasz Piszczek)同樣因傷出場成疑,面對巴塞嘅4-3-3進攻陣可能真係要諗下點排好個陣先去防守,因為有前無後,入幾多都無用。

巴塞近況:連績三場不敗 兩主力可復出

美斯同蘇亞雷斯季初一同受傷,今晚有望齊齊復出 (巴塞隆拿官方 Facebook)

巴塞喺上星期日凌晨嘅西甲聯賽中主場5比2大炒華倫西亞,各項賽事入面連續三場比賽不敗。「老大哥」美斯因為美斯盃小腿受傷,今季所有賽事都未上過陣,不過佢就同另一位因傷缺陣多時嘅前鋒蘇亞雷斯一同納入巴塞今場作客多蒙特嘅大軍名單,隨隊出發到德國。教練華維迪喺賽前記者會透露美斯已經參與訓練已經感覺良好,兩位球員都喺過去兩日都有出席球隊操練,睇嚟傷勢都無咩大礙。

傷兵方面,主力中堅烏迪迪(Samuel Umtiti)因傷缺陣,而「問題青年」丹比利(Ousmane Dembélé)目前仍然調整緊比賽狀態,未知可唔可以趕得切面對舊球隊多蒙特。

This image has an empty alt attribute; its file name is givelike.jpg
更新時間 : 2019年9月17號(二)23:26
建立時間 : 2019年9月17號(二)23:19