今個週末西甲迎嚟重頭戲,由馬德里體育會主場迎戰同城死敵皇家馬德里,「馬德里打吡」近年隨住雙方實力拉近令比賽可觀性提升唔少。馬體會近年仇人絕對係皇馬,事關馬體會近5年2次打入歐聯決賽都係不敵皇馬飲恨而回,而且兩次決賽過程都充滿爭議性,再加上施丹回巢教皇馬,施蒙尼自然想擊敗呢位「馬體會剋星」。所以,今次「馬德里打吡」一定會充滿火藥味。

直播 : Now 611以及632台 9月29號週日 03:00

兩隊今夏陣容大變動

哥斯達上場對馬略卡終於喺今季開齋,狀態漸漸提升 (La Liga)

馬體會今夏雖然有高甸、基沙文、洛迪高、祖安法蘭、菲臘比‧路易斯等一眾主力離隊,但驚人地大灑金錢增兵,前中後都有一定嘅人腳調動,主帥施蒙尼買入的一批新球員已融入,陣容實力甚至更強,聯賽開季6場4勝1和1負,歐聯分組賽首戰主場落後祖記2球都可以追和,有「新C朗」稱號嘅葡萄牙19歲前鋒祖奧‧菲歷斯更加已經向世人證明自己1.2億歐羅身價。雖然馬體會自從3 : 2反勝艾巴之後,曾經聯賽兩輪不勝,但喺週中2 : 0作客擊敗馬略卡,一洗頹風。而「床單軍團」今場喺有主場優勢下,相信外界會對馬體會睇高一綫。唯獨係馬體會另一射手莫拉達,喺週中對陣馬略卡嘅比賽兩黃一紅,今場無緣倒戈皇馬。

夏薩特表現強差人意 (皇馬官網)

相反,皇馬今夏同樣增兵,但開季幾場成績欠突出,早前喺歐聯分組賽首戰更加0 : 3慘敗巴黎聖日門腳下,雖然之後兩場聯賽將士用命,全取6分,登上西甲榜首,暫時領先同市宿敵馬體會1分,但仍然有傳教練施丹飽受壓力隨時要走人,軍心不穩下,兼作客換血後已經融入球隊體系嘅馬體會,自然被人睇低。而且「銀河艦隊」飽受傷兵問題困擾,今季由法甲里昂加盟嘅左閘費蘭特‧文迪又再受傷,至少要休息3星期,加上仲未好返嘅馬些路,而家嘅皇馬係欠缺一個左閘。而一眾今夏加盟嘅新兵更加完全交唔到功課,夏薩特喺各項正式比賽仲未交出助攻或者波,狀態完全唔係車路士嗰皮,前場基本上只靠老將賓施馬獨力撐住。至於高價加盟嘅塞爾維亞前鋒盧卡‧祖域表現更加係強差人意,完全發揮唔到自己喺法蘭克福應有嘅表現。

This image has an empty alt attribute; its file name is givelike.jpg

更新時間 : 2019年9月27號(五)21:59
建立時間 : 2019年9月27號(五)21:55