萬眾期待,英超開季至今唯一一隊不敗之師利物浦,喺今晚將同曼城上演矚目嘅榜首大戰,利物浦上季以1分之微不敵曼城,以97分成為英超史上「最強亞軍」,但之後贏得歐聯錦標,挾歐洲王者霸氣,今季誓破英超二奶命宿命,希望奪得隊史上首座英超獎盃。而到底兩隊又會唔會如大家所期待咁,鬥個你死我活?

直播 : Now 611 & 621 00:30 2019年11月10日

利記開季11戰10勝1和表現一流,係英超目前唯一一隊不敗之師。而週中歐聯因輕傷先後缺操嘅軒達臣以及雲迪積克,教練高普喺賽前記者會已經肯定兩人都可以落場。不過,前場穆罕默德沙拿及及羅拔圖法明奴近期狀態非常一般,特別係前者受到傷患困擾,有機會成為紅軍今場全取三分嘅阻礙。

曼城本季鋒線上除咗季初遭遇傷病嘅沙內之外就再無人受傷,過去兩個賽季火力冠絕歐洲五大聯賽,今個賽季11場英超都已經射入34球,比利物浦仲要多9球,攻擊力無容置疑。目前隊中最大問題係中堅唔夠人,甘賓尼夏天離隊、拿樸迪受傷長抖、奧達文迪頻頻後防自爆,領隊哥迪奧拿連史東斯都信唔過,近期寧願用中場洛迪頂中堅位,都唔畀史東斯踢。但洛迪因傷缺陣,再加上艾達臣喺週中歐聯比賽受傷,曼城後防確有隱憂。再加上曼城近38年嚟,只喺晏菲路贏過一次咁大把,球隊可唔可以完成使命,將雙方積分差距拉返3分,哥迪奧拿臨場變陣至關重要。


更新時間 : 2019年11月10日(日)20:16
建立時間 : 2019年11月10日(日)18:29