曼聯今季戰績一般,但作客曼城踢出佳作。(Sky Sports)

今晨(12月8日)上演曼市打吡,曼城喺主場1 : 2不敵曼聯,痛失3分之後已經被榜首利物浦拋離14分,亦落後打少一場嘅李斯特城3分。曼城上季以98分衛冕英超冠軍,若今季要拎到相同分數,就要贏晒剩低22場聯賽賽事,所以領隊哥迪奧拿喺賽後記者會表示,曼城今屆後上衛冕係唔現實,事關英超史上未有一隊球隊能由落後14分後上成功封王。相反紅魔兩連勝後,目前已經追到第4嘅車路士5分,再次重燃爭奪前四希望。曼聯今季確實遇強愈強,遇弱愈弱,穩守突擊踢法對住強隊發揮到淋漓盡致,先後連贏熱刺同曼城,早前仲差啲贏埋利物浦,今季英超曼聯面對排前6位球隊,已經錄得5場4勝1和佳績,搶分成功率接近9成,相當犀利。

曼市雙雄今場一開波已經攻勢不斷,拳來拳往,上半場23分鐘,貝拿度‧施華禁區攔跌拉舒福特獲判12碼,「福仔」親自操刀入網,曼聯領先1 : 0。僅僅6分鐘後,安東尼‧馬舒亞禁區射地波撞近柱入網,幫助紅魔半場爆冷領先2 : 0。雖然奧達文迪喺下半場85分鐘接應角球頂入,幫助「藍月亮」追近比數成1 : 2,但最終紅魔守住比數2 : 1擊敗曼城,亦都係領隊蘇斯克查喺曼聯球員以至領軍生涯,首次擊敗同市宿敵曼城。

其餘英超賽果 :

愛華頓 3 : 1 車路士

般尼茅夫 0 : 3 利物浦

熱刺 5 : 0 般尼

屈福特 0 : 0 水晶宮

更新時間 : 2019年12月8日(日)18:13
建立時間 : 2019年12月8日(日)05:02