德甲球隊科隆決定退出合辦中國足球學院計劃 。(Getty Images)

效力英超阿仙奴的德國籍土耳其裔球員奧斯爾(Mesut Ozil),早前喺社交網站聲援維吾爾族人後,中國中央電視台即時取消一場阿仙奴同曼城嘅聯賽直播,另外,中國互聯網公司網易,喺中國版《PES》等3款足球遊戲中刪除奧斯爾球員資料,更發表聲明話奧斯爾喺社交媒體發布涉中極端言論,傷害中國球迷感情,違背愛與和平嘅體育精神,對此表示唔理解、唔接受、唔原諒。

更有過氣球星耶耶‧托尼(Yaya Toure)批評奧斯爾,話足球唔應該牽涉到政治,但德甲球會科隆(FC Cologne)宣佈暫停喺中國東北瀋陽建立足球學院嘅計劃。球會會員理事會負責人梅拿-洛馬爾(Stefan Muller-Romer)接受《科隆城市報》(Kölner Stadt-Anzeiger)表示,唔應與同一啲建立「全面監控」嘅國家合作。

但球會主席雲拿‧禾夫(Werner Wolf)對《科隆城市報》表示,「梅拿-洛馬爾唔係代表球會發言,我哋暫停合作係出於體育原因非涉政治,但科隆會堅守球隊嘅民主價值,以及保持國際對話」。

英國《衛報》報道,被叫停嘅項目可以為科隆帶嚟額外180萬歐元收入。「公山羊」(Die Geißböcke)科隆上季重返德甲,但目前都係處於降班區為護級奮鬥。科隆曾喺2016年派出學院教練為中國隊舉辦講習。

更新時間 : 2019年12月19日(四)19:37
建立時間 : 2019年12月19日(四)18:22