狼隊3:2反勝曼城,成為今季暫時唯一一支可以雙殺曼城嘅球隊。(BBC Sports)

【癲狗波經】英超今上演獨腳戲,由巨人殺手狼隊主場迎戰曼城。開賽少打一人嘅「藍月亮」曾經喺下半場開段領先狼隊2:0,但狼隊喺之後連入三球,最終以3:2反勝曼城。賽後曼城排第三,落後少打一場嘅榜首利物浦14分,爭標希望渺茫。主帥哥迪奧拿喺賽後接受訪問坦言期望後來居上趕過利物浦係不切實際嘅事。

曼城守將奧達文迪喺在上半場12分鐘長傳失位「派膠」,門將艾達臣禁區外出迎撞跌迪亞高‧祖達,畀球證艾堅遜出示紅牌趕離場。曼城即時收起阿古路,換入後備門將哥迪奧‧巴禾把關。十人應戰嘅曼城竟然成為先開紀錄嘅一隊,史達寧主射12碼被門將柏迪斯奧救出,但球證指有狼隊球員喺起腳前已經踩入禁區,勒令重射。史達寧主射再被救出,但即時補射入網。下半場初段史達寧再下一城,幫助曼城少打一人下領先到2 : 0。

但首循環對曼城梅開二度嘅西班牙大隻佬艾達曼‧查奧爾,下半場大爆發,繼首輪作客曼城梅開二度後,再次成為「曼城剋星」。佢先喺失第二球後為狼隊追近一球,再喺臨完場前助攻畀魯爾‧占美尼斯近門射入,幫助狼隊喺下半場尾段追和曼城。狼隊更喺89分鐘反超前曼城。最終十人應戰嘅曼城喺領先兩球下,未能保住勝果,被狼隊以3:2逆轉。

更新時間 : 2019年12月28日(六)07:02
建立時間 : 2019年12月28日(六)06:16