英超球會「錘仔幫」韋斯咸「官宣」,解僱智利籍領隊柏歷連尼(Manuel Pellegrini)一職,由蘇格蘭籍莫耶斯(David Moyes)第二度接任球會領隊一職。2017年11月莫耶斯走馬上任,執教韋斯咸31場比賽,取得9勝10平和12負成績,喺該季英超入面排名第13名,護級成功後辭去領隊一職。

韋斯咸近況麻麻,近十場2勝1和7負,日前更喺主場1:2不敵只係出副選應戰嘅李斯特城,賽後積分榜排第十七位,比尾三嘅阿東維拉僅多一分,陷入降班旋渦。錘仔幫於是決定將智利籍領隊柏歷連尼炒魷。

56歲嘅莫耶斯喺球員時代,司職中堅,出道於蘇超班霸些路迪。退役後莫耶斯執起教鞭,成為普雷斯頓的領隊,其後喺2002年到2013年間,長期執教英超球會愛華頓,更三次獲選為英格蘭足球聯賽領隊協會最佳領隊。

莫耶斯離開愛華頓後,領隊生涯一直命途坎坷,喺2013年7月接替退休嘅費格遜成為曼聯領隊,但執教唔夠一年就因成績唔理想被曼聯解僱,領軍期間為曼聯創下多項英超恥辱性「紀錄」,更令曼聯失去參加歐戰資格。莫耶斯其後抵達西班牙巴斯克地區,執教西甲球隊皇家蘇斯達,1年後再因戰績不佳再食無情雞。

2016年莫耶斯執教「黑貓」新特蘭,但球隊成季表現欠佳,最終提前3輪宣告降入英冠聯賽,結束「黑貓」連續10年喺英超嘅征戰之旅,最終莫耶斯喺球季結束後引咎辭職。新特蘭至今只能喺英甲中遊,重返英超遙遙無期。

莫耶斯一直到2017年11月走馬上任擔任韋斯咸領隊,最終幫助「錘仔幫」護級成功,先一吐多年烏氣。

更新時間 : 2019年12月30日(一)08:52
建立時間 : 2019年12月30日(一)08:13