艾殊利‧楊格即將離開效力多年嘅曼聯。(衛報)

據了解,英超球隊曼聯已同意隊長艾殊利·楊格(Ashley Young)以130萬鎊轉會意甲國際米蘭,目前只要等埋個人條款以及體測就可以落實轉會。

現年34歲嘅楊格係曼聯隊中嘅中場兼右閘,2011年由阿士東維拉轉會曼聯,一共上陣261場比賽,協助球隊贏過一季聯賽、一屆社區盾、一屆足總盃、聯賽盃以及一次歐霸冠軍。佢喺2018年世界盃決賽周,作為隊中唯一老將,協助英格蘭奪得殿軍。近年楊格改打右閘後表現不跌反升,上陣次數穩定兼有入球進帳。佢喺上年2月,更加同曼聯簽多一年合約到今年夏天,更喺上年8月被任命為球隊隊長。但好景不常,今屆面對陣中青年軍冒起,楊格上陣次數減少,最終決定離隊他投。

楊格平時係曼聯更衣室嘅開心果,而佢最為香港球迷熟悉係佢喺2014-15賽季開咧戰主場對陣史雲斯時,被鏡頭影隨開口講嘢期間不慎被鴿屎擊中,更加吞晒所有鴿屎。雖然事後佢接受訪問時堅持自己冇食到鴿屎,但自此就一直被隊友調侃,更被香港球迷戲稱「雀屎楊」。


#癲狗日報 #癲狗波經 #英超 #曼聯 #意甲 #國際米蘭

更新時間 : 2020年1月17日(五)15:23
建立時間 : 2020年1月17日(五)13:57