英超第23輪將上演重場戲,由榜首利物浦主場迎戰曼聯。利物浦今季22場比賽幾乎全勝姿態,唯一一場失分就係首循環作客紅魔,最終要靠比賽末段憑住拉蘭拿(Adam Lallana)嘅入波迫和曼聯1:1。到底曼聯喺「雙紅會」會唔會再一次成為利物浦衝擊英超冠軍嘅攔路虎呢?香港時間星期一凌晨00:30就有分曉!

利物浦領隊高普(Jürgen Kloop)喺賽前記者會表示,知道曼聯今季反擊十分「架勢」,認為球隊上下必須小心曼聯嘅「防反」,又話完全尊重對手,不過今次「利記」喺主場出擊,與上次作客奧脫福係兩回事。

另外,高普又叫傳媒唔好拎佢同曼聯名宿費格遜(Alex Ferguson)比較,「我心中好尊敬「費sir」,不過老實講,我認為利物浦根本無可能好似佢哋咁壟斷英超。因為好多球會都有一定財力,佢哋會喺唔同錦標(足總盃、聯賽盃)上同你競逐。…..我哋只係因為一啲好決定,令到球隊成績以及球員表現越嚟越好,呢個就係「利記」跑出嘅主要原因。」

而曼聯領隊蘇斯克查(Ole Gunnar Solskjær)喺記者會上宣佈,已經委任目前球壇身價最高嘅中堅哈利‧麥佳亞(Harry Maguire)為球隊新隊長,接替離隊他投嘅艾舒利‧楊格(Ashley Young)。對於早前喺足總盃第3圈重賽中因背部受傷離場嘅拉舒福特(Marcus Rashford)可唔可以趕得切喺「雙紅會」復出,蘇斯克查對此表示唔樂觀,指「福仔」需要接受更多治理以及評估,但距離比賽仍有一定嘅時間,即管睇睇會發生咩事。

曼聯老將楊格轉會意甲國米「養老」

至於新任隊長哈利‧麥佳亞接受英國傳媒《天空體育》(Sky Sports)專訪時表示,對成為「紅魔」隊長感到自豪(”It’s a really proud moment for myself and I’m really honoured to be captain of this great club. “)、又表示客戰「紅軍」最終目的係要拎3分,「我哋想喺星期日嘅比賽中拎到3分,我哋作客晏菲路唔係僅僅為和波拎1分而戰」(”We go into the game on Sunday looking for three points. We’re not going there to play for a draw and wherever we go, we’re expected to win games because we’re Manchester United. )

#癲狗日報 #癲狗波經 #英超 #雙紅會 #利物浦 #曼聯

更新時間 : 2020年1月18日(六)16:18
建立時間 : 2020年1月18日(六)15:52