眾所周知,香港馬圈獎金只比日本低,有好多好手如不選擇日本,就會選擇在香港搵食,因此近年好多有錢的馬主,都會一擲千金,希望買隻好馬,但往往事與願違,或者可以在此探討箇中原因。

上幾個賽日,大摩有一匹新馬叫做「電路五號」,血統十分優良屬種馬級的血統,因此其週歲價亦十分高昂,出自2018年殷利殊復活節拍賣會,以一百八十萬澳元成交,在該年的拍賣會屬第二高價的拍賣馬。但看其第一次出賽,已經證明此駒肯定屬蝕本貨,毫無競賽能力,屬「大灣駒」的貨色,更跑完之後幾個禮拜後宣佈退役。「電話五號」的例子在世界馬圈比比皆是,因為買週歲馬,無論血統幾好型格幾靚,始終未跑過俾你睇,隻馬一唔成長果舊錢即時凍過水。好彩的就好似「好計」(此駒曾是2016加拉卡拍賣會最高價的拍賣馬,價值一百三十萬紐紙)在三四班可以跑下,唔好彩就好似「大灣駒」的下場,毫無競賽能力。

無論買PP或者PPG,如果你用八位數字價錢而要搏佢進步的賽駒,呢個風險實在太高,講完PPG又不如講下PP,近年好多馬主為咗附合REPLACEMENT簽的條件(出賽少於五場但評分達八十分以上),會走去買一些兩歲級際賽上名的賽駒,之後搏佢進步。不過所有國家的兩歲賽,即使去到澳洲呢類純跑早熟的兩歲賽事,都會和年長馬有一段距離,如果來到香港沒有進步,就好大機會要四班見,舉一個例子就是「旅遊拿督」,他在愛爾蘭跑兩歲二級賽跑第二,但來到香港仲係千年老處。呢類兩歲賽績往往都是以天價轉手,但好多都中伏,只有少數如「威爾頓」「佳龍駒」可以做到馬王(兩匹馬都在兩歲一級賽入Q)。

我知各位馬主都好有錢買好馬,但買馬前是否應該要三思,如果買一隻貴價馬仲要有好大的賭搏元素才可成才是否值得?其實買好馬唔係一定要買好血統貴馬,仲有好多方法可以買到好嘢,或者可以下次再談。

(鹵味男  18/1/2020)

.

全民俾LIKE 人人「些牙」!

.